Urang te butaꞌ breta adai dasemoh Isa
9
Pas Isa tengan bejalai, Ya medaꞌ sikoꞌ urang te butaꞌ breta adai. 2 Kebala muret betanyaꞌ ke Ya, “Guru, apa te ngasoh urang toꞌ butaꞌ breta adai? Apa nyaꞌ tegal dusa ya, skaleꞌ ke tegal dusa apai inai ya?” 3 Sawot Isa, “Nyaꞌ nadai tegal dusa ya abaꞌ dusa apai inai ya. Uleh urang toꞌ butaꞌ isaꞌ kuasa Tuhan Allah dapedaꞌ kreja alam ya. 4 Kita alah ngreja kreja Ya te ngutos Ku slamaꞌ ari ageꞌ tawas. Nema nadai lamaꞌ ageꞌ nyau kaꞌ malam, niseꞌ te tauꞌ kreja. 5 Slamaꞌ Ku de dunia toꞌ, Ku mah trang dunia toꞌ.” 6 Udah Ya madah ugaꞌ nyaꞌ, Ya ngeludah ke tanah, baroꞌ ngadok ludah Ya abaꞌ tanah. Udah nyaꞌ Ya ngunsot ke mata urang butaꞌ nyaꞌ. 7 Ya madah ke urang nyaꞌ, “Angkat ke meh, empungas ke mata meh de kulam Seluam.” (Reti Seluam nyaꞌ: te dautos.) Baroꞌ urang nyaꞌ angkat empungas mua ya ke kulam Seluam. Ya bebalek, abaꞌ ya nyau tauꞌ medaꞌ.8 Sidaꞌ te besemak rumah abaꞌ ya abaꞌ te tauꞌ badaꞌ ya urang te mintaꞌ-mintaꞌ, betanyaꞌ ke sama direꞌ, “Ukai ya toꞌ urang te gah dudok mintaꞌ-mintaꞌ weh?” 9 Adai te madah, “Amat mah, ya mah nyaꞌ.” Adai te madah, “Ukai, uleh upa medaꞌ ya mah ni.” Baroꞌ urang nyaꞌ madah, “Amat mah, ku mah te butaꞌ nyaꞌ.” 10 Sidaꞌ nanyaꞌ ya, “Kati meh tauꞌ medaꞌ?” 11 Ya nyawot sidaꞌ, “Urang te nama Isa ngadok ludah abaꞌ tanah, baroꞌ ngunsot ke mata ku. Udah nyaꞌ Ya nyuroh ku angkat, empungas mua ku de kulam Seluam. Baroꞌ ku angkat, ku empungas mua abaꞌ udah nyaꞌ ku tauꞌ medaꞌ.” 12 Baroꞌ sidaꞌ nanya ya ageꞌ, “Dini Urang nyaꞌ?” Sawot ya, “Ku nitauꞌ badaꞌ.”
13 Baroꞌ sidaꞌ ngemaiꞌ urang te udah butaꞌ nyaꞌ ke kebala urang ari klumpok Parisi, 14 nema jalai Isa ngadok ludah Ya abaꞌ tanah, abaꞌ nyuroh mata urang te butaꞌ nyaꞌ tauꞌ medaꞌ, pas ari Sabat. 15 Kebala urang Parisi nanyaꞌ ya, “Kati meh tauꞌ medaꞌ?” Sawot ya, “Ya ngunsot mata ku ngau ludah abaꞌ tanah te deadok Ya, baroꞌ ku empungas mua ku. Udah nyaꞌ ku tauꞌ medaꞌ.” 16 Dua tiga ikoꞌ sidaꞌ Parisi nyaꞌ madah, “Nadai amang Ensia nyaꞌ dautos Tuhan Allah, nema Ya nadai patoh ke prator agama tentang ari Sabat.” Uleh adai gaꞌ te kebukai madah, “Urang te dusa nadai patot tauꞌ mulah kebala tana te upa toꞌ.” Baroꞌ sidaꞌ betengek sama direꞌ. 17 Kebala urang Parisi nanyaꞌ ageꞌ ke urang te butaꞌ nyaꞌ tadeꞌ, “Enteꞌ jakoꞌ meh sapa Ya nyaꞌ te udah nyuroh mata meh encelak?” Urang te butaꞌ nyaꞌ tadeꞌ nyawot, “Ya nyaꞌ mah nabi.” 18 Uleh sidaꞌ nadai pecayaꞌ, enteꞌ ya udah butaꞌ abaꞌ entoꞌ nyau tauꞌ medaꞌ. Kebaꞌ nyaꞌ nyuroh sidaꞌ ngumai apai inai ya, 19 abaꞌ nanyaꞌ ke snikoꞌ, “Amat toꞌ anak snikoꞌ te snikoꞌ padah butaꞌ breta adai weh? Ngapa ya tauꞌ medaꞌ entoꞌ?” 20 Baroꞌ apai inai ya nyawot, “Amat mah, ya anak kmua. Bamat mah ya butaꞌ breta adai, 21 uleh kmua nitauꞌ badaꞌ ngapa ya tauꞌ medaꞌ entoꞌ. Abaꞌ kmua nadai nglala urang te ngasoh ya tauꞌ medaꞌ. Kitaꞌ mah nanyaꞌ ya, ya nyau tuwai, abaꞌ ya tauꞌ nyawot kitaꞌ.” 22 Apai inai ya madah piyaꞌ nema snikoꞌ takot daukom kebala pemimpen sidaꞌ Yahudi. Kebala pemimpen nyaꞌ udah bapekat kaꞌ ngukom urang te ngakoꞌ Isa nyaꞌ Al Maseh. Urang te nadai patoh nadai tauꞌ bekamoh abaꞌ sidaꞌ Yahudi abaꞌ nitauꞌ tamaꞌ ageꞌ ke Rumah te jalai sidaꞌ Yahudi nyemah Tuhan Allah. 23 Kebaꞌ nyaꞌ nyuroh apai inai ya madah tadeꞌ, “Ya nyau tuwai, tanyaꞌ jaꞌ ke ya.”
24 Baroꞌ sidaꞌ ngumai urang te udah butaꞌ nyaꞌ ageꞌ abaꞌ madah, “Meh alah nusoi te pengamat ke kami demua Tuhan Allah nema kami tauꞌ badaꞌ Isa nyaꞌ urang te dusa.” 25 Ya nyawot sidaꞌ, “Ku nitauꞌ badaꞌ Ya nyaꞌ dusa skaleꞌ ke nadai. Uleh suteꞌ te ku ketauꞌ kah: dulau teh ku butaꞌ entoꞌ ku tauꞌ medaꞌ.” 26 Kebala pemimpen sidaꞌ Yahudi nanyaꞌ ya ageꞌ, “Apa te dapulah Ya ke meh? Kati Ya ngasoh meh tauꞌ medaꞌ?” 27 Sawot urang te udah butaꞌ nyaꞌ, “Udah ku nusoi ke kitaꞌ, uleh kitaꞌ ngai ninga. Engkapaꞌ ku madah ageꞌ? Kitaꞌ kaꞌ jadi muret Ya gaꞌ?” 28 Ninga ya madah piyaꞌ sidaꞌ mlicak ya blumaꞌ madah, “Meh mah muret Ya, ukai kami. Kami toꞌ muret Musa. 29 Kami tauꞌ badaꞌ Tuhan Allah udah becakap abaꞌ Musa. Uleh tentang Urang nyaꞌ, kami nitauꞌ badaꞌ ari ni penatai Ya.” 30 Urang te udah butaꞌ nyaꞌ nyawot sidaꞌ, “Ku ampal medaꞌ kitaꞌ nitauꞌ badaꞌ ari ni penatai Ya. Bataꞌ naꞌ Ya udah ngasoh ku tauꞌ medaꞌ. 31 Kita tauꞌ badaꞌ, enteꞌ Tuhan Allah ngai mreꞌ apa te dapintaꞌ kebala urang te dusa, uleh Ya kaꞌ mreꞌ ke kebala urang te slareh nyemah Ya abaꞌ te nunaꞌ kedekaꞌ Ya. 32 Blaboh ari dunia dapulah datai ke entoꞌ, bedau ku kalaꞌ ninga adai urang te tauꞌ ngasoh mata urang te butaꞌ breta adai, tauꞌ medaꞌ. 33 Enteꞌ Urang toꞌ nadai datai ari Tuhan Allah, Ya nadai tauꞌ mulah kebala utai te upa toꞌ.” 34 Sawot sidaꞌ, “Meh toꞌ lamaꞌ udah dusa ari adai, abaꞌ meh kaꞌ ngajar kami?” Udah nyaꞌ sidaꞌ nesar ya keluar ari Rumah te jalai sidaꞌ Yahudi nyemah Tuhan Allah.
35 Pas Isa ninga urang butaꞌ nyaꞌ udah datesar ari Rumah te jalai sidaꞌ Yahudi nyemah Tuhan Allah, Isa ngigaꞌ ya. Pas snikoꞌ nyau betemu, Isa nanyaꞌ ke ya, “Meh pecayaꞌ ke Ensia te datai ari Tuhan Allah?” 36 Sawot urang te udah butaꞌ nyaꞌ, “Pak, sapa Ya? Padah ke ku isaꞌ ku pecayaꞌ ke Ya.” 37 Isa nyawot ya, “Meh udah medaꞌ Ya. Toꞌ mah Ya te tengan becakap abaꞌ meh.” 38 Sawot urang te udah butaꞌ nyaꞌ, “Ku pecayaꞌ, Tuhan!” Baroꞌ ya nyungkon nyemah Isa. 39 Isa madah ke ya, “Ku datai isaꞌ urang de dunia toꞌ dasidang. Ku datai isaꞌ urang te butaꞌ tauꞌ medaꞌ abaꞌ urang te madah direꞌ medaꞌ jadi butaꞌ.”