KISAH KEBALA RASOL
PENULAU BECAKAP
Kitab Kisah Kebala Rasol toꞌ, kitab kedua te detules enteri Lukas. De kitab toꞌ enteri Lukas nyamong ageꞌ kisah te udah detusoi ya de kitab Inyel Lukas. Alam kitab toꞌ Lukas ngisah kebala utai te depulah kebala rasol Isa pas Ya udah deidop ageꞌ abaꞌ trangkat ke sruga. Diyaꞌ de padah kebala rasol Isa depenoh Roh Kudos abaꞌ sidaꞌ madah Brita Bayek, belaboh ari Yerosalem, udah nyaꞌ ke Yudia, Samaria, abaꞌ ugaꞌ dunia (Kis 1:8.) Mayoh urang te pecayaꞌ ke Brita Bayek te depadah sidaꞌ (pasal 2:41.) De kitab toꞌ depadah urang te semaru jadi urang Kristen nyaꞌ sidaꞌ Yahudi, udah nyaꞌ baroꞌ nyebar ke bansa te bukai Yahudi.
Bansa te semaru ninga Brita Bayek nyaꞌ, bansa Yahudi ( pasal 11:19.) Uleh nema mayoh sidaꞌ Yahudi te ngai pecayaꞌ ke Brita Bayek nyaꞌ, kebaꞌ Brita Brita Bayek nyaꞌ depadah gaꞌ ke kebala bansa te bukai Yahudi ( pasal 13:45-46; 18:6; 28:28.) Pas kebala rasol Isa begugoꞌ de Yerosalem, sidaꞌ udah mutos enteꞌ urang te bukai sidaꞌ Yahudi te udah pecayaꞌ ke Isa nadai alah nunaꞌ ugaꞌ Prator Musa (pasal 15.)
Alam kitab toꞌ Lukas nusoi Roh Kudos turon ke atau urang te pecayaꞌ ke Isa de Yerosalem pas ari besai Pentakosta sidaꞌ Yahudi. Ditoꞌ kita medaꞌ upa kati Roh Kudos mimpen kebala urang te pecayaꞌ ke Isa abaꞌ nguat iman sidaꞌ. Adai dua ikoꞌ rasol te selareh timol alam kitab toꞌ. Rasol Petros (pasal 1-12) abaꞌ rasol Paulos (13-28.)