SURAT PAULUS KE JEMAT
RUMA
Penulau becakap
Meliyaꞌ teh kuta Ruma toꞌ jadi pusat pemerintah ngau kebala bansa te kebukai. Paulos nules surat toꞌ ke kebala urang Kristen te adai de kuta Ruma, nema ya bedau naꞌ kalaꞌ kiyaꞌ abaꞌ ngajar sidaꞌ diyaꞌ.
Alam surat toꞌ Paulos madah urang tauꞌ kenaꞌ de mua Tuhan Allah nyaꞌ nadai tegal apa te sidaꞌ pulah uleh peroꞌ tegal iman (pasal 1:16-17). Paulos nyelas enteꞌ ugaꞌ ensia toꞌ dusa, nyaꞌ nyuroh Tuhan Allah kaꞌ ngukom sidaꞌ (pasal 3:9-20). Uleh tegal pemayek ati Tuhan Allah, Ya mereꞌ Anak Ya Isa Al Maseh mati ngau nebos dusa ensia (pasal 3:24-25; 5:8). Ngenap urang te pecayaꞌ ke Tuhan Isa nadai deukom Tuhan Allah abaꞌ tauꞌ kenaꞌ de mua Ya (pasal 3:22, 26; 4:24-25; 5:1).
Alam surat toꞌ Paulos madah Tuhan Allah ma mah kaseh ke sidaꞌ Yahudi abaꞌ kaꞌ nyelamat sidaꞌ (pasal 9-11). Uleh nema mayoh sidaꞌ ngai pecayaꞌ ke Tuhan Isa kebaꞌ mayoh sidaꞌ te nadai deselamat Ya (pasal 10:1-4). Abaꞌ tegal sidaꞌ Yahudi mayoh ngai pecayaꞌ ke Tuhan Isa, jalai ngau bansa te bukai Yahudi ninga Brita Bayek tebukaꞌ (pasal 11:11-15, 30-31). Abaꞌ urang te pecayaꞌ ke Tuhan Isa bayek sidaꞌ Yahudi bayek te bukai Yahudi deselamat Ya.
Pemadoꞌ surat toꞌ Paulos ngajar kati cara urang Kristen idop. Ya ngajar alah kaseh ke pangan bukai (pasal 12:9-21, 13:8-14), patoh ke pemerintah (pasal 13:1-7), abaꞌ alah sama hormat ke pangan bukai (pasal 14:1-15:13).