Paulos de Melta
28
Udah kami datai ke pantai, baroꞌ kami tauꞌ badaꞌ nyaꞌ pulau Melta. 2 Kebala urang te diyau de pulau nyaꞌ ma ritak abaꞌ awas ke kami, sidaꞌ nyamot kami. Sidaꞌ ngidop api bawoh abaꞌ ngemaiꞌ kami kiyaꞌ nema ari belaboh ujan abaꞌ teban nyaꞌ celap amat. 3 Tengan Paulos ngrawob kebala rangau abaꞌ namah ke api, tengan nyaꞌ gaꞌ sikoꞌ ular te bisa pansot ari rangau te derawob Paulos. Ular nyaꞌ pansot nema ngasa angat baroꞌ mantok jari Paulos. 4 Pas kebala urang te diyau de pulau nyaꞌ medaꞌ ular lekat engkateng de jari Paulos, sidaꞌ tauꞌ badaꞌ abaꞌ madah ke pangan bukai, “Urang toꞌ pesti gah munoh. Amat mah ya tauꞌ selamat ari laot, uleh dewi pengadel pesti nadai ngengaꞌ ya idop.”5 Uleh Paulos ngisai jari ya kaya-kaya nyaꞌ nyuroh ular nyaꞌ teplanteng ke alam api, abaꞌ ya sama sekaleꞌ nadai pedeh. 6 Jakoꞌ alam ati sidaꞌ, “Jari urang toꞌ pesti bengkak, enteꞌ nadai ke lansong mati.” Nyau buti pelamaꞌ sidaꞌ nungoꞌ, sidaꞌ ampal medaꞌ Paulos nadai pedeh. Kebaꞌ sidaꞌ miker enteꞌ Paulos toꞌ diwa.
7 Da semak nyaꞌ adai tanah empu Publios Gubernor pulau nyaꞌ, ya ritak abaꞌ awas ke kami abaꞌ ngintu kami upa temuai selamaꞌ tiga ari. 8 Tengan nyaꞌ apai Publios kredan abaꞌ pedeh perot biraꞌ pancar. Paulos masau apai Publios te tengan pedeh nyaꞌ baroꞌ Paulos bradua blumaꞌ nepoꞌ jari de atau palaꞌ ya, nyaꞌ nyuroh ya semoh. 9 Ninga brita nyaꞌ, kebala urang te pedeh de pulau nyaꞌ datai ngusong Paulos abaꞌ Tuhan Allah nyemoh sidaꞌ. 10 Sidaꞌ lampar hormat ke kami abaꞌ mereꞌ kebala utai ke kami. Pas kami kaꞌ angkat blayar, sidaꞌ ngageh kebala utai te kaꞌ dengau kami selamaꞌ kami blayar.
Paulos datai ke Ruma
11 Udah tiga bulan kami diyau de pulau nyaꞌ, baroꞌ kami angkat ari nyaꞌ ngau prau te ari Aleksandria. Prau nyaꞌ singah diyaꞌ nema tengan nyaꞌ rama kudeꞌ abaꞌ glumang de laot tengan betat. Prau nyaꞌ adai lamang diwa te berakop Kastor abaꞌ Poluks.a 12 Kami singah de kuta Sirakusa abaꞌ tiga hari kami diyau diyaꞌ. 13 Ari nyaꞌ kami blayar nebeng pantai datai ke kuta Regiom. Sari suteꞌ kudeꞌ nempoh bong ke utara, nyaꞌ nyuroh kami tauꞌ datai ke kuta Putioli alam dua ari. 14 Diyaꞌ kami ngusong kebala urang te pecayaꞌ ke Isa, sidaꞌ mintaꞌ tujoh ari kami diyau abaꞌ sidaꞌ diyaꞌ. Udah nyaꞌ kami angkat ke Ruma. 15 Breta urang te pecayaꞌ ke Isa de kuta Ruma ninga rita kami adai de kuta Pasar Apius abaꞌ kuta Penginapan Tiga, sidaꞌ datai ngusong kami. Pas Paulos betemu abaꞌ sidaꞌ ya becakap abaꞌ ngucap sukor ke Tuhan Allah abaꞌ tengan nyaꞌ ya ngasa ati ya kuat.
16 Pas datai ke kuta Ruma, pemrintah Ruma nyadi Paulos diyau kedireꞌ, uleh amat piyaꞌ pemrintah Ruma nyuroh sikoꞌ prajuret nyaga ya.
Umong Paulos abaꞌ sidaꞌ Yahudi de Ruma
17 Tiga ari udah nyaꞌ, Paulos ngumai kebala pemimpen Yahudi te adai de Ruma. Pas sidaꞌ tengan begugoꞌ Paulos madah, “Kebala menyadeꞌ ku sidaꞌ bansa Yahudi, ku niseꞌ mulah penyalah ke bansa kita abaꞌ ku niseꞌ ngelangar prator abaꞌ cara idop puyang jagang kita. Uleh amat piyaꞌ kebala urang kita te adai de Yerosalem udah nangkap ku abaꞌ nyerah ku ke sidaꞌ Ruma. 18 Udah kebala pemrintah Ruma te adai Kaisarea mresa ku, baroꞌ sidaꞌ tauꞌ badaꞌ ku niseꞌ mulah kebala utai te jaiꞌ te tauꞌ nyuroh ku deukom mati. Kebaꞌ nyaꞌ nyuroh sidaꞌ kaꞌ ngelepas ku. 19 Uleh nema kebala urang kita te adai de Yerosalem nadai nerimaꞌ pemrintah Ruma ngelepas ku, nyaꞌ ngasoh ku paksa mintaꞌ Kaisar te lansong nyidang ku. Ku sama sekaleꞌ niseꞌ maksot kaꞌ ngemalu bansa kita. 20 Kebaꞌ nyaꞌ ku mintaꞌ kitaꞌ kitoꞌ, isaꞌ ku tauꞌ becakap abaꞌ kitaꞌ. Ku depenyara, tegal ku pecayaꞌ ke Penyelamat te deagam ugaꞌ kita sidaꞌ Israel.”
21 Baroꞌ kebala pemimpen Yahudi te adai de Ruma madah, “Kami bedau iseꞌ nerimaꞌ surat ari kebala urang kita te de Yudia, abaꞌ datai ke sikoꞌ mah niseꞌ urang te ngelapor utai te jat te wan pulah. 22 Uleh entoꞌ kami kaꞌ ninga kedireꞌ pengajar te wan pecayaꞌ. Nema kami gah ninga diyaꞌ-ditoꞌ urang ngelawan pengajar te wan pecayaꞌ.”
23 Baroꞌ sidaꞌ mileh suteꞌ ari ngau betemu abaꞌ Paulos. Pas senta ari te udah sidaꞌ pileh ke nyaꞌ datai, mayoh urang datai ke rumah te jalai Paulos bemalam. Tengan nyaꞌ belaboh ari lam-lam datai ke ujong ari, Paulos madah ke sidaꞌ upa kati Pemrintah Tuhan Allah. Abaꞌ ya berusaha nyelas sapa Isa ari Prator Musa abaꞌ kitab kebala nabi isaꞌ sidaꞌ pecayaꞌ ke Isa. 24 Dua tiga ikoꞌ urang te adai diyaꞌ pecayaꞌ enteꞌ apa te depadah Paulos nyaꞌ kenaꞌ, uleh adai gaꞌ urang te nadai pecayaꞌ. 25 Kebaꞌ sidaꞌ bubar niseꞌ temu pekat. Uleh sebedau sidaꞌ angkat Paulos madah ke sidaꞌ upa pitoꞌ, “Amat kenaꞌ mah apa te depadah Roh Kudos ke puyang jagang kita ari nabi Yesaya dulau teh. Nabi Yesaya madah,
26 ‘Angkat ke bansa toꞌ abaꞌ padah ke sidaꞌ:
Kitaꞌ kaꞌ ninga sengabot,
uleh nadai nyarok,
abaꞌ kitaꞌ kaꞌ medaꞌ sengabot
uleh kitaꞌ nadai nyarok te kitaꞌ pedaꞌ.
27 Nema ati urang de bansa toꞌ ma degel,
peneng sidaꞌ nyau brat nadai kaꞌ ninga,
abaꞌ mata sidaꞌ nyau bekamet nyuroh sidaꞌ nitauꞌ medaꞌ.
Enteꞌ nadai piyaꞌ, mata sidaꞌ kaꞌ medaꞌ,
peneng sidaꞌ ninga,
ati sidaꞌ nyarok
abaꞌ Ku kaꞌ nyuroh sidaꞌ semoh.’
28 Kebaꞌ nyaꞌ kitaꞌ alah tauꞌ badaꞌ Brita Bayek enteꞌ Tuhan Allah nyelamat toꞌ udah depadah ke sidaꞌ te bukai Yahudi abaꞌ sidaꞌ pesti kaꞌ ninga!” [ 29 Udah Paulos madah piyaꞌ, kebala sidaꞌ angkat ari nyaꞌ blumaꞌ sidaꞌ betengek.]
De Ruma Paulos madah Pemrintah Tuhan Allah