Pejalai Paulos ke Italia
27
Gubernor mutos enteꞌ kami alah angkat ke Italia.a Kebaꞌ penyaga ya nyerah Paulos abaꞌ dua tiga ikoꞌ urang te udah depajak alam penyara ke Yulius kepalaꞌ prajuret ari klumpok khusus te nyaga Kaisar. 2 Kami nikeꞌ ke prau besai te datai ari kuta Adramitium ngau prau nyaꞌ kami angkat bekayoh ke pelabuhan te adai de propinsi Asia. Aristarkusb sidaꞌ Makedonia te datai ari kuta Tesalonika abaꞌ kami bekayoh gaꞌ. 3 Sari suteꞌ kami datai ke pelabuhan Sidon. Yulius kepalaꞌ prajuret nyaꞌ ma ritak abaꞌ Paulos, ya nyadi Paulos ngusong kebala kawan ya isaꞌ kebala kawan ya mreꞌ kebala utai te daperlu ke Paulos. 4 Tegal kudeꞌ tengan nyaꞌ lampar betat, nyaꞌ nyuroh kami bekayoh ari nyaꞌ nelusor pantai Siprus. 5 Udah kami nyemrang laot te de mua Klikia abaꞌ Pampilia, baroꞌ kami datai ke pelabuhan Mira de daerah Likia abaꞌ kami turon diyaꞌ.6 Diyaꞌ kepalaꞌ prajuret medaꞌ sebuah prau besai ari Aleksandria te kaꞌ bekayoh ke Italia. Baroꞌ ya nyuroh kami bepinah ke prau nyaꞌ. 7 Dua tigaꞌ ari prau kami aja nyau kaꞌ nitauꞌ begansat, abaꞌ aja ngau kemedeh kami datai ke kuta Kenidus. Nema kudeꞌ nitauꞌ badoꞌ-badoꞌ datai ari mua kami, nyaꞌ nyuroh kami bekayoh nelusor pantai pulau Kreta mansaꞌ tanyong Salmone. 8 Udah kami nacah pemedeh mansaꞌ tanyong nyaꞌ, kami datai ke pelabuhan Indah, de semak kuta Lasia. 9 Tengan nyaꞌ waktu kami ames piyaꞌ abaꞌ ari besai sidaꞌ Yahudi te dasebot Ari Damai sigeꞌ nyau udah, nyaꞌ reti urang nitauꞌ bekayoh ageꞌ. Kebaꞌ nyaꞌ Paulos madah ke sidaꞌ, jakoꞌ ya, 10 “Kebala kawan, ku miker enteꞌ kita belayar sengabot, kita tauꞌ rugi besai nadai proꞌ prau abaꞌ kebala utai te adai ditoꞌ mes. Kita sigeꞌ tauꞌ mati tengelam.” 11 Uleh kepalaꞌ prajuret nyaꞌ lebeh pecayaꞌ apa te depadah urang te ngemudi prau abaꞌ anak buah ya, ari pada te depadah Paulos, nyaꞌ nyuroh ya mintaꞌ sidaꞌ blayar sengabot jaꞌ. 12 Nema nadai bayek diyau de pelabuhan nyaꞌ slamaꞌ rama celap. Kebaꞌ nyaꞌ mayoh urang kaꞌ bekayoh sengabot abaꞌ brusaha isaꞌ datai ke pelabuhan Peniks abaꞌ diyau diyaꞌ slamaꞌ rama celap. Pelabuhan nyaꞌ de pulau Kreta abaꞌ ngadap ke pemadam mataari. 13 Tengan nyaꞌ ribot ari selatan datai. Kebaꞌ sidaꞌ miker sidaꞌ nyau kaꞌ datai ke teban te sidaꞌ gusong, sidaꞌ ngangkat jangkar baroꞌ sidaꞌ bekayoh ageꞌ nelusor pantai Kreta.
Kudeꞌ betat de laot
14 Uleh nadai lamaꞌ udah nyaꞌ, datai kudeꞌ betat ari darat te nyuroh aiꞌ beglumang besai. 15 Baroꞌ kudeꞌ nyaꞌ ngenaꞌ prau besai kami te kami tumpang, nyaꞌ nyuroh prau besai kami nadai talah nanyak glumang nyaꞌ. Kebaꞌ nyaꞌ kami nadai ageꞌ kaꞌ brusaha kaꞌ ngelawan kudeꞌ uleh kami ngengaꞌ prau besai kami anyot nunaꞌ pemansang kudeꞌ. 16 Tengan nyaꞌ prau besai kami anyot ke pulau met, te nama Kauda. Diyaꞌ kami ngelinong direꞌ ari kudeꞌ. Abaꞌ tengan nyaꞌ kami nacah kepemedeh majak prau metc ke alam prau te kami tumpang. 17 Udah nyaꞌ baroꞌ kebala anak buah melet prau besai kami ngau tali isaꞌ tegoh. Sidaꞌ nuron layar abaꞌ ngengaꞌ prau besai sidaꞌ anyot nunaꞌ pemansang kudeꞌ nema sidaꞌ takot tejangal de engkrangan Sirtis. 18 Nema kudeꞌ te ma betat niseꞌ pemadoꞌ nacah prau kami. Kebaꞌ nyau tawas sidaꞌ muai kebala barang te adai de alam prau ke laot. 19 Baroꞌ ari suteꞌ ageꞌ sidaꞌ muai kedaꞌ kebala alat kapal ngau jari sidaꞌ kedireꞌ. 20 Beari-ari kami niseꞌ medaꞌ mataari abaꞌ piyanau, abaꞌ kudeꞌ betat niseꞌ pemadoꞌ nacah kami. Tengan nyaꞌ niseꞌ kami ngagam direꞌ ageꞌ idop. 21 Udah dua tigaꞌ ari nyawa kami niseꞌ pemiker kaꞌ makai, baroꞌ Paulos diri de tengah sidaꞌ abaꞌ madah, “Kebala kawan, cuba enteꞌ kitaꞌ kaꞌ nunaꞌ te jakoꞌ ku, nadai ngasa pemedeh abaꞌ perugi toꞌ. Uleh kitaꞌ tengek angkat ari Kreta. 22 Entoꞌ ku madah, nang kita saban. Niseꞌ daentara kita te mati, proꞌ kapal toꞌ mah ancor. 23 Ku madah pitoꞌ nema malam teh mlikat Tuhan Allah datai ngusong ku. Tuhan Allah nyaꞌ te empu ku abaꞌ Ya te ku semah. 24 Mlikat nyaꞌ madah, ‘Nang meh takot, Paulos! Meh pesti mah ngadap Kaisar lah. Nema Tuhan Allah bayek ati, kebaꞌ Tuhan Allah kaꞌ nyelamat meh abaꞌ ugaꞌ urang te abaꞌ meh blayar toꞌ.’ 25 Kebaꞌ nyaꞌ kebala kawan, nang kita saban ku pecayaꞌ enteꞌ Tuhan Allah pesti kaꞌ mulah apa te udah depadah mlikat Ya ke ku. 26 Uleh kapal kita kaꞌ tejangal de suteꞌ pulau.” 27 Udah empat blas malam kapal kami brapong de laot Adria. Sekitar tengah malam kebala anak buah kapal madah nyau mah sidaꞌ kaꞌ datai ke darat. 28 Baroꞌ sidaꞌ ngelaboh batu ngau tali ngau nyukat penalam laot. Penalam laot teban nyaꞌ empat puloh miter. Udah sidaꞌ begansat jaoh geꞌ, baroꞌ sidaꞌ nyukat ageꞌ penalam laot teban nyaꞌ nyau sekitar tiga puloh miter. 29 Sidaꞌ saban mali kapal sidaꞌ nerapaꞌ batu besai, kebaꞌ sidaꞌ nuron empat jangkar ari belakang kapal. Abaꞌ kami ngagam ari deras tawas. 30 Uleh kebala anak buah kapal kaꞌ ncuba ngerari direꞌ ari kapal nyaꞌ. Sidaꞌ nuron prau met ngau cara sidaꞌ budi-budi nuron kebala jangkar ari mua kapal. 31 Medaꞌ piyaꞌ, Paulos madah ke kepalaꞌ prajuret abaꞌ kebala prajuret, “Enteꞌ kebala anak buah kapal rari ari kapal, kitaꞌ nadai slamat.” 32 Baroꞌ kebala prajuret ngempat tali prau met nyaꞌ, kebaꞌ prau nyaꞌ anyot. 33 Pas ari meramak tawas, Paulos ngumok urang makai abaꞌ madah, “Kitaꞌ saban abaꞌ slamaꞌ empat blas ari, datai ke siket niseꞌ pemakai te tamaꞌ perot kitaꞌ. 34 Kebaꞌ nyaꞌ ku madah ke kitaꞌ pakai kebala utai, nyaꞌ perlu ngau kitaꞌ betan idop. Nema datai ke selamar mah bok de palaꞌ kitaꞌ niseꞌ te lenyau.” 35 Udah madah piyaꞌ, Paulos ngameꞌ ruti ngucap sukor ke Tuhan Allah de mua ugaꞌ urang. Udah nyaꞌ ya mungaꞌ ruti nyaꞌ abaꞌ ya blaboh makai. 36 Medaꞌ Paulos makai, kuat mah ati sidaꞌ, abaꞌ sidaꞌ sigeꞌ makai abaꞌ ya.
37 Ugaꞌ kami te adai de kapal nyaꞌ dua ratos tujoh puloh enam ikoꞌ. 38 Udah ugaꞌ urang makai sampai kenyang, kebala anak buah kapal muai ganom ke laot isaꞌ kapal lempong. 39 Breta ari nyau tawas sidaꞌ medaꞌ pantai rata te sama skaleꞌ bedau sidaꞌ klala. Amat piyaꞌ sidaꞌ mutos singah ke pantai. 40 Sidaꞌ ngempat tali te ngau namet kebala jangkar abaꞌ nibar kebala jangkar nyaꞌ ke laot. Tengan nyaꞌ sidaꞌ nenor kebala tali kemudi abaꞌ nikeꞌ layar te ngau ngator luan kapal isaꞌ kapal sidaꞌ mansang ke pantai. 41 Uleh tengan nyaꞌ luan kapal sidaꞌ tejangal de engkrangan, nyaꞌ nyuroh kapal sidaꞌ nitauꞌ begansat ageꞌ. Abaꞌ buntot kapal sidaꞌ ancor tacah glumang aiꞌ te betat.
42 Tengan nyaꞌ gaꞌ kebala prajuret ngamoꞌ kaꞌ munoh ugaꞌ urang te daukom te kaꞌ dapinah ke penyara Ruma isaꞌ sidaꞌ niseꞌ te kedenang ngelari direꞌ ke darat. 43 Uleh kepalaꞌ prajuret ngerot munoh sidaꞌ nema ya kaꞌ nyelamat Paulos. Abaꞌ ya nyuroh kebala urang te tauꞌ kedenang isaꞌ ngrejok ke laot abaꞌ dulau kedenang ke pantai. 44 Kebala penumpang te ke bukai dasuroh ya kedenang ngau kebala papan awak pecah kapal nyaꞌ. Nyaꞌ nyuroh kami slamat ugaꞌ nikeꞌ ke darat.