SURAT PAULUS KE JEMAT
RUMA
Kirem tabeꞌ
1
Kirem tabeꞌ ari ku, Paulos, pelayan Isa Al Maseh. Tuhan Allah udah mileh ku jadi rasol Ya isaꞌ ku madah Brita Bayek ari Ya. 2 Brita Bayek nyaꞌ udah dedanyi Tuhan Allah jeman dulau ari kebala nabi Ya, abaꞌ nyaꞌ udah detules alam Kitab Suci. 3 Alam Brita Bayek nyaꞌ depadah Anak Tuhan Allah nyaꞌ enteꞌ secara ensia, Ya nyaꞌ pureh Raja Daot, 4 abaꞌ enteꞌ jakoꞌ Roh Kudos te udah ngidop Ya ageꞌ ari pemati, Ya Anak Tuhan Allah abaꞌ Ya bekuasa, Isa Al Maseh Tuhan kita.5 Tegal pemayek ati Isa Al Maseh, Tuhan Allah mileh kami jadi rasol Isa. Kami kebala rasol detugas Ya ngemaiꞌ urang ari ugaꞌ bansa isaꞌ pecayaꞌ abaꞌ patoh ke Ya. 6 Kitaꞌ te diyau de Ruma toꞌ sigeꞌ temasok kebala bansa te udah dekumai jadi urang te deempu Isa Al Maseh.
7 Kebaꞌ nyaꞌ nyuroh ku nules surat toꞌ ke kitaꞌ te diyau de Ruma, te dekaseh Tuhan Allah, te dekumai jadi urang te deempu Isa Al Maseh.
Ku bradua engkremaꞌ Tuhan Allah Apai kita abaꞌ Tuhan Isa Al Maseh mereꞌ tuah abaꞌ idop nyamai ke kitaꞌ.
Paulos kaꞌ ke Ruma
8 Kebala menyadeꞌ, semaru ku kaꞌ besukor ke Tuhan Allah ku, nema apa te udah depulah Isa Al Maseh ke kitaꞌ, nema de ugaꞌ dunia kebala urang udah ninga kitaꞌ pecayaꞌ ke Isa Al Maseh. 9 Ngenap kaleꞌ ku bradua, ku selareh ingat bradua ke kitaꞌ. Tuhan Allah mah saksi enteꞌ apa te ku padah nyaꞌ amat. Ya mah Tuhan Allah te ku layan sepenoh ati ngau cara madah Brita Bayek Anak Ya nyaꞌ. 10 Ku udah bamat-amat bradua mintaꞌ ke Tuhan Allah isaꞌ Ya nyadi ku ngunyong kitaꞌ entoꞌ. 11 Nema ku kaꞌ amat mah betemu abaꞌ kitaꞌ isaꞌ ku tauꞌ magi berkat rohani te tauꞌ nguat kitaꞌ. 12 Maksot ku nema kita udah sama pecayaꞌ ke Isa Al Maseh, kebaꞌ kita tauꞌ nguat pangan bukai.
13 Kebala menyadeꞌ, ku kaꞌ kitaꞌ tauꞌ badaꞌ udah cara berapa kaleꞌ ku kaꞌ ngunyong kitaꞌ, uleh selareh adai mah te ngaral. Ku kaꞌ adai asel te bayek ari pelayanan ku de tengah kitaꞌ, sama upa pelayanan ku de tengah kebala bansa bukai Yahudi te bukai.
14 Ku ngasa enteꞌ ku alah ngelayan ugaꞌ urang: bayek kebala sidaꞌ Yunani, bayek kebala sidaꞌ te bukai Yunani, bayek kebala sidaꞌ te sekulah tingeꞌ bayek kebala sidaꞌ te nadai sekulah. 15 Kebaꞌ nyaꞌ gaꞌ ku kaꞌ amat mah madah Brita Bayek nyaꞌ ke kitaꞌ te diyau de Ruma toꞌ.
Brita Bayek nyaꞌ kuasa Tuhan Allah te nyelamat
16 Ku nadai malu madah Brita Bayek nyaꞌ, nema Brita Bayek nyaꞌ mah kuasa Allah te nyelamat ugaꞌ urang te pecayaꞌ, semaru ngau sidaꞌ Yahudi, abaꞌ entoꞌ ngau bansa bukai gaꞌ. 17 Brita Bayek nyaꞌ madah ke kita kati Tuhan Allah ngangap kita kenaꞌ de mua Ya. Kita tauꞌ buleh toꞌ ari semaru datai ke pemadoꞌ peroꞌ tegal iman. Upa te detules alam Kitab Suci, “Urang te deangap kenaꞌ uleh Tuhan Allah tegal iman kaꞌ idop!”a
Tuhan Allah ranseng ke dusa ensia
18 Ari sruga Tuhan Allah nganyaꞌ peranseng Ya ke ugaꞌ dusa abaꞌ pemenyat te depulah ensia, nema ugaꞌ pemenyat nyaꞌ nekol urang ngelala pengajar te kenaꞌ ari Tuhan Allah. 19 Apa te alah deketauꞌ ensia ke Tuhan Allah tunaꞌ des udah jelas mah, nema Ya kedireꞌ udah nganyaꞌ nyaꞌ ke ensia.
20 Nema belaboh ari dunia depulah kebala sipat Allah abaꞌ kuasa Ya te niseꞌ pemadoꞌ te nadai pedaꞌ nyaꞌ, udah jelas pedaꞌ ari kebala utai te udah depulah Ya. Kebaꞌ niseꞌ jalai ensia tauꞌ madah direꞌ nadai ngelala Allah.
21 Amat mah ensia ngelala Tuhan Allah, uleh nadai nyunyong tingeꞌ Ya abaꞌ nadai betrimaꞌ kaseh ke Ya. Uleh ensia empala miker kebala utai te niseꞌ reti abaꞌ budu, nyaꞌ nyuroh sidaꞌ nadai nyarok kedekaꞌ Tuhan Allah. 22 Sidaꞌ ngasa direꞌ pintar, bataꞌ naꞌ sidaꞌ nyau budu. 23 Sidaꞌ ngai nyemah Tuhan Allah te patot dejunyong tingeꞌ abaꞌ te idop sengabot. Sidaꞌ empala nyemah kebala pentek ensia te tauꞌ mati, kebala pentek burong, kebala pentek jelu te bekaki empat, abaꞌ kebala pentek jelu te ngerayap te depulah sidaꞌ kedireꞌ.b
24 Tegal pemudu sidaꞌ nyaꞌ, Tuhan Allah ngengaꞌ sidaꞌ idop bejat nunaꞌ penekaꞌ ati sidaꞌ, nyaꞌ nyuroh sidaꞌ mulah utai te bejat ngau tuboh sidaꞌ ke sama direꞌ. 25 Sidaꞌ nadai pecayaꞌ ageꞌ ke Tuhan Allah te kenaꞌ, uleh sidaꞌ empala pecayaꞌ ke utai te bulaꞌ. Sidaꞌ nyemah abaꞌ ngelayan kebala utai te depulah Tuhan Allah ari pada Tuhan Allah te mulah ugaꞌ nyaꞌ. Tunaꞌ des Tuhan Allah te alah depuji sengabot! Amen.
26 Tegal pemudu sidaꞌ nyaꞌ, Tuhan Allah ngengaꞌ sidaꞌ idop nunaꞌ penekaꞌ sidaꞌ te mulah malu nyaꞌ. Kebala urang inoꞌ nadai ageꞌ kaꞌ ke kebala urang laki upa te jama depulah urang enteꞌ belaki bini, uleh sidaꞌ nyau kaꞌ ke sama direꞌ inoꞌ. 27 Piyaꞌ gaꞌ urang laki. Sidaꞌ nadai ageꞌ kaꞌ ke urang inoꞌ upa te jama depulah urang enteꞌ belaki bini. Sidaꞌ nadai talah ngetat direꞌ kaꞌ amat ke sama direꞌ laki, nyaꞌ nyuroh sidaꞌ mulah utai te mulah malu abaꞌ sama direꞌ laki. Kebaꞌ nyaꞌ sidaꞌ nerimaꞌ ukom dusa te sidaꞌ pulah nyaꞌ alam tuboh sidaꞌ kedireꞌ.
28 Abaꞌ nema sidaꞌ ngasa direꞌ nadai perlu ngelala Tuhan Allah, kebaꞌ Tuhan Allah ngengaꞌ pemiker sidaꞌ nyaꞌ kutor, nyaꞌ ngasoh sidaꞌ mulah kebala utai te nadai patot. 29 Ati sidaꞌ penoh utai te jat, te nadai kenaꞌ, tamaꞌ abaꞌ peroꞌ miker direꞌ. Sidaꞌ iri ke pangan, kaꞌ munoh, belayaꞌ, nipu, abaꞌ denam ke urang. Sidaꞌ keran becakap ke urang bukai, 30 keran bejaiꞌ urang bukai abaꞌ areh ke Tuhan Allah. Sidaꞌ kurang ajar, sumong, abaꞌ gaga depuji. Sidaꞌ lampar panai mulah utai te jat. Sidaꞌ ngelawan apai inai, 31 budu, nadai setia, niseꞌ kaseh, abaꞌ nadai nyarok mantoꞌ urang bukai. 32 Amat mah sidaꞌ tauꞌ badaꞌ enteꞌ Tuhan Allah udah madah urang te mulah piyaꞌ patot deukom mati, uleh matang mah sidaꞌ mulah kebala utai nyaꞌ. Abaꞌ nadai peroꞌ nyaꞌ, sidaꞌ empala ngansak urang bukai mulah piyaꞌ gaꞌ.