Nang nyalah urang bukai
2
Kebaꞌ nyaꞌ kebala menyadeꞌ, sapa piyaꞌ kitaꞌ kaꞌ nyalah urang bukai? Kitaꞌ sigeꞌ salah abaꞌ niseꞌ alasan ngau kitaꞌ mila direꞌ. Enteꞌ kita nyalah urang bukai, nyaꞌ sama mah abaꞌ kitaꞌ nyalah direꞌ, nema kitaꞌ nyalah urang bukai, uleh kitaꞌ mulah upa te sidaꞌ pulah gaꞌ. 2 Kita tauꞌ badaꞌ enteꞌ Tuhan Allah adel pas Ya ngukom kebala urang te mulah piyaꞌ. 3 Uleh kitaꞌ kebala menyadeꞌ, kitaꞌ mulah kebala utai te kitaꞌ tudoh ke urang bukai gaꞌ! Kati kitaꞌ tauꞌ miker kitaꞌ tauꞌ rari ari ukom Tuhan Allah? 4 Tuhan Allah lampar bayek ke kitaꞌ. Ya ma sabar nungoꞌ kitaꞌ bebaleꞌ. Uleh kitaꞌ menadai pemayek ati Ya ke kitaꞌ. Kitaꞌ nadai nyarok enteꞌ pemayek ati Tuhan Allah, nyaꞌ tunaꞌ des senta te debereꞌ Tuhan Allah ngau kitaꞌ nudi kebala dusa kitaꞌ abaꞌ bebalek ke Ya.5 Uleh nema ati kitaꞌ degel abaꞌ kitaꞌ ngai nudi kebala dusa, kitaꞌ nugong ukom te lebeh berat ngau direꞌ senta ari Tuhan Allah nganyaꞌ peranseng Ya. Pas ari nyaꞌ lah ngenap urang kaꞌ medaꞌ Tuhan Allah ngukom urang ngau adel. 6 Tuhan Allah kaꞌ malas ngenap urang nunaꞌ te depulah sidaꞌ.a 7 Adai urang te selareh mulah utai te bayek, nema sidaꞌ kaꞌ depuji, dehormat, abaꞌ kaꞌ idop abaꞌ Tuhan Allah sengabot. Sidaꞌ nyaꞌ kaꞌ debereꞌ Tuhan Allah idop bayek te niseꞌ pemadoꞌ. 8 Uleh adai mayoh kebala urang te miker direꞌ kedireꞌ. Sidaꞌ ngai nunaꞌ te kenaꞌ abaꞌ gaga nunaꞌ te jat. Sidaꞌ nyaꞌ kaꞌ ngasa peranseng abaꞌ ukom Tuhan Allah. 9 Pemedeh abaꞌ penusah kaꞌ nacah ngenap urang te mulah te jat, te semaru ke sidaꞌ Yahudi, baroꞌ udah nyaꞌ ke sidaꞌ te bukai Yahudi. 10 Uleh ngenap urang te mulah utai te bayek kaꞌ depuji, dehormat abaꞌ debereꞌ damai, te semaru ke sidaꞌ Yahudi, baroꞌ udah nyaꞌ ke sidaꞌ te bukai Yahudi. 11 Nema Tuhan Allah nadai nyemeh-mipeh urang.b
12 Kebala urang dusa te bedau tauꞌ badaꞌ Prator Tuhan Allah te detules Musa kaꞌ deukom, uleh nadai deukom ngau Prator Musa. Piyaꞌ gaꞌ kebala urang dusa te nyau tauꞌ badaꞌ Prator Musa kaꞌ deukom gaꞌ, abaꞌ sidaꞌ kaꞌ deukom nunaꞌ Prator Musa. 13 Nema ukai urang te ninga Prator Musa te kenaꞌ de mua Tuhan Allah, uleh urang te nunaꞌ Prator nyaꞌ te kenaꞌ de mua Ya.
14 Kebala urang te bukai bansa Yahudi toꞌ niseꞌ Prator Musa, uleh enteꞌ sidaꞌ nunaꞌ penekaꞌ ati nurani, sidaꞌ mulah utai nunaꞌ te depadah Prator Musa. Nyaꞌ bukti enteꞌ ati nurani sidaꞌ kedireꞌ jadi prator sidaꞌ amat sidaꞌ niseꞌ Prator Musa. 15 Ari apa te sidaꞌ pulah, nyaꞌ bukti alam ati nurani sidaꞌ tauꞌ badaꞌ apa te kenaꞌ abaꞌ apa te salah, upa te deprintah alam Prator Musa, abaꞌ ati nurani sidaꞌ setuju ke nyaꞌ. Kebaꞌ ati nurani sidaꞌ segegena madah sidaꞌ mulah te salah abaꞌ segegena madah sidaꞌ mulah te kenaꞌ.
16 Ugaꞌ utai kaꞌ pedaꞌ ugaꞌ lah senta Tuhan Allah ngukom dunia toꞌ. Munyi Brita Bayek te ku padah kah, Tuhan Allah kaꞌ nyuroh Isa Al Maseh ngukom ugaꞌ utai te nadai pedaꞌ alam ati ugaꞌ urang.
Prator Musa abaꞌ sunat nitauꞌ nyelamat sidaꞌ Yahudi
17 Kebala menyadeꞌ ku te ngakoꞌ direꞌ sidaꞌ Yahudi, kitaꞌ selareh bepegai ke Prator Musa abaꞌ ngepah-ngemah direꞌ semak abaꞌ Tuhan Allah. 18 Kitaꞌ tauꞌ badaꞌ apa te dekedekaꞌ Tuhan Allah. Kitaꞌ tauꞌ badaꞌ apa te bayek abaꞌ te nadai, nema kitaꞌ belajar Prator Musa. 19 Kitaꞌ yaken enteꞌ kitaꞌ tauꞌ ngireng urang te butaꞌ ke jalai te kenaꞌ, abaꞌ kitaꞌ ngangap direꞌ terang ngau sidaꞌ te adai de teban te petang. 20 Kitaꞌ miker kitaꞌ tauꞌ ngajar utai te kenaꞌ ke urang te budu. Abaꞌ kitaꞌ miker kitaꞌ tauꞌ jadi guru ngau kebala urang te baroꞌ belajar. Kitaꞌ empu Prator Musa, nyaꞌ nyuroh kitaꞌ miker kitaꞌ mayoh pemenauꞌ abaꞌ tauꞌ badaꞌ ugaꞌ pengajar te kenaꞌ.
21 Kebala menyadeꞌ, kitaꞌ tauꞌ ngajar urang bukai, ngapa kitaꞌ nitauꞌ ngajar direꞌ? Kitaꞌ ngajar urang nang encuri, uleh kitaꞌ kedireꞌ encuri! 22 Kitaꞌ ngajar urang nang baraꞌ abaꞌ laki bini urang, uleh kitaꞌ kedireꞌ baraꞌ gaꞌ! Kitaꞌ areh ke urang te nyemah berhala, uleh kitaꞌ kedireꞌ encuri kebala barang ari rumah berhala. 23 Kitaꞌ ngepah-ngemah direꞌ nema kitaꞌ empu Prator Musa, uleh kitaꞌ mejaiꞌ Tuhan Allah nema kitaꞌ ngelangar Prator Musa nyaꞌ. 24 Alam Kitab Suci detules, “Kebala bansa bukai mejaiꞌ nama Tuhan Allah tegal apa te kitaꞌ pulah.”c
25 Kebala menyadeꞌ, sunat toꞌ adai mah guna enteꞌ kitaꞌ patoh ke Prator Musa. Uleh enteꞌ kitaꞌ ngelangar Prator Musa, sama sekaleꞌ niseꞌ guna sunat kitaꞌ nyaꞌ. 26 Enteꞌ sidaꞌ te bukai Yahudi te nadai sunat nunaꞌ Prator Musa, nadai piyaꞌ Tuhan Allah ngangap sidaꞌ upa urang te udah desunat? 27 Kebala sidaꞌ te nadai desunat uleh nunaꞌ Prator Musa, kaꞌ nyalah kitaꞌ te adai Prator nyaꞌ, nema kitaꞌ ngelangar Prator nyaꞌ.
28 Sidaꞌ Yahudi te seli, nyaꞌ ukai peroꞌ sidaꞌ te deadai de Yahudi jaꞌ, abaꞌ sunat te seli nyaꞌ, ukai sunat te depulah urang de tuboh ensia. 29 Uleh sidaꞌ Yahudi te seli, nyaꞌ nadai berupa pedaꞌ ari luar, abaꞌ sunat te seli nyaꞌ sunat de ati, te dekreja uleh Roh Kudos bukai dekreja Prator te detules. Urang te upa nyaꞌ nerimaꞌ puji ari Tuhan Allah, bukai ari ensia.d