Untong jadi sidaꞌ Yahudi abaꞌ Tuhan Allah setia
3
Enteꞌ piyaꞌ, apa untong jadi sidaꞌ Yahudi baneng bansa bukai, abaꞌ apa guna sunat? 2 Pesti mayoh mah untong jadi sidaꞌ Yahudi. Te paleng penteng, sidaꞌ bansa te semaru depecayaꞌ Tuhan Allah nerimaꞌ pemadah Ya. 3 Uleh kati enteꞌ adai sidaꞌ Yahudi te nadai setia? Tauꞌ nadai tegal sidaꞌ nadai setia, Tuhan Allah nadai setia gaꞌ? 4 Pesti nadai! Tuhan Allah selareh madah utai te kenaꞌ, amat mah ugaꞌ urang bulaꞌ. Toꞌ sama mah abaꞌ te depadah alam Kitab Suci,“Ugaꞌ te depadah Wan pesti kenaꞌ,
abaꞌ Wan menang enteꞌ desidang.”a
5 Uleh adai urang te miker pitoꞌ, “Adai gaꞌ guna kita mulah dusa isaꞌ urang tauꞌ medaꞌ enteꞌ Tuhan Allah nyaꞌ kenaꞌ. Uleh ngapa weh Tuhan Allah ageꞌ tubah kaꞌ ngukom kita. Nyaꞌ breti Tuhan Allah nadai adel ke kita.” 6 Uleh ku madah ke kitaꞌ, pemiker sidaꞌ nyaꞌ sama sekaleꞌ salah! Nema enteꞌ Tuhan Allah nadai adel, kati Ya tauꞌ nyidang dunia toꞌ?
7 Uleh adai gaꞌ urang te bepiker pitoꞌ, “Adai gaꞌ guna kita bulaꞌ isaꞌ urang tauꞌ medaꞌ enteꞌ Tuhan Allah nyaꞌ kenaꞌ abaꞌ isaꞌ Ya depuji urang. Uleh ngapa weh Tuhan Allah ageꞌ tubah kaꞌ nyalah kita tegal dusa kita?” 8 Ku madah ke kitaꞌ enteꞌ sidaꞌ bepiker piyaꞌ nyaꞌ sama mah abaꞌ sidaꞌ madah, “Boh kita mulah te jat jaꞌ, isaꞌ timol kebala utai te bayek.” Adai urang te madah kami ngajar piyaꞌ. Urang te upa nyaꞌ patot deukom nema madah piyaꞌ.
Ugaꞌ ensia toꞌ urang te dusa
9 Jadi kati? Apa kita sidaꞌ Yahudi toꞌ lebeh bayek ari kebala bansa bukai? Sama sekaleꞌ nadai! Munyi te udah kami padah teh, bayek sidaꞌ Yahudi bayek bansa bukai, adai debaroh kuasa dusa ugaꞌ mah. 10 Upa te detules alam Kitab Suci,
“Niseꞌ urang te kenaꞌ,
datai ke sikoꞌ mah niseꞌ.
11 Datai ke sikoꞌ mah niseꞌ urang te nyarok,
abaꞌ datai ke sikoꞌ mah niseꞌ te ngigaꞌ Tuhan Allah.
12 Ugaꞌ urang udah ngerari direꞌ ari Tuhan Allah,
abaꞌ idop sidaꞌ nadai beguna.
Niseꞌ urang mulah te bayek,
datai ke sikoꞌ mah niseꞌ!b
13 Rekong sidaꞌ upa kubor te tebukaꞌ,
dilah sidaꞌ dengau sidaꞌ ngemulaꞌ urang,
abaꞌ cakap sidaꞌ bisa upa bisa ular.c
14 Mulot sidaꞌ mangah nyumpah abaꞌ cakap sidaꞌ selareh medeh ati urang.d
15 Kaki sidaꞌ regas bejalai kaꞌ munoh urang.
16 Kikai jaꞌ sidaꞌ angkat sidaꞌ selareh mulah kacau abaꞌ medeh urang.
17 Sidaꞌ nadai nyarok idop damai abaꞌ urang.e
18 Abaꞌ sama sekaleꞌ sidaꞌ nadai hormat ke Tuhan Allah.”f
19 Kitaꞌ udah tauꞌ badaꞌ, ugaꞌ Prator Musa nyaꞌ ngau sidaꞌ Yahudi. Toꞌ breti nadai peroꞌ bansa bukai te patot deukom Tuhan Allah uleh sidaꞌ Yahudi gaꞌ. Abaꞌ ugaꞌ urang niseꞌ jalai tauꞌ ngamat direꞌ de mua Tuhan Allah. 20 Nema datai ke sikoꞌ mah niseꞌ urang te tauꞌ kenaꞌ de mua Tuhan Allah tegal nunaꞌ Prator Musa. Prator Musa nyaꞌ empala nunyok ke kita enteꞌ kita toꞌ dusa.
Ensia tauꞌ kenaꞌ de mua Tuhan Allah peroꞌ tegal iman
21 Uleh entoꞌ Tuhan Allah udah nunyok kati cara isaꞌ ensia tauꞌ kenaꞌ de mua Ya. Prator Musa abaꞌ kitab kebala nabi udah madah kati cara nyaꞌ. Tuhan Allah madah ensia tauꞌ kenaꞌ de mua Ya nadai tegal nunaꞌ Prator Musa, 22 uleh ensia tauꞌ kenaꞌ de mua Ya tegal pecayaꞌ ke Isa Al Maseh. Tuhan Allah mulah toꞌ ngau ugaꞌ urang te pecayaꞌ ke Isa Al Maseh. De mua Ya niseꞌ bida urang, 23 nema ugaꞌ urang udah mulah dusa, nadai patot abaꞌ Tuhan Allah te lampar bayek. 24 Uleh entoꞌ kita tauꞌ kenaꞌ de mua Tuhan Allah nyaꞌ peroꞌ tegal pemayek ati Ya. Abaꞌ ugaꞌ nyaꞌ debereꞌ Ya gena nema Isa Al Maseh udah nebos ugaꞌ dusa kita. 25 Tuhan Allah udah ngutos Isa Al Maseh ngau mukaꞌ jalai bedamai abaꞌ Ya, isaꞌ ngenap kita te pecayaꞌ ke Isa dusa kita deampon. Tuhan Allah ngampon dusa kita nema Isa udah mati ngau kita. Ngau cara nyaꞌ Tuhan Allah kaꞌ nunyok ke kita enteꞌ Ya selareh mulah te kenaꞌ abaꞌ adel. Meliyaꞌ teh Tuhan Allah sabar abaꞌ nadai ngukom dusa ensia. 26 Nema pas tengan nyaꞌ, Tuhan Allah udah ngamoꞌ nyuroh ensia kenaꞌ de mua Ya tegal te Isa pulah. Entoꞌ Tuhan Allah nganyaꞌ enteꞌ Ya selareh mulah utai te kenaꞌ abaꞌ te adel, blumaꞌ Ya nyuroh urang te dusa kenaꞌ de mua Ya nema sidaꞌ pecayaꞌ ke Isa.
27 Enteꞌ piyaꞌ, ageꞌ kita sidaꞌ Yahudi tauꞌ ngepah-ngemah direꞌ? Nitauꞌ! Nema kita tauꞌ kenaꞌ de mua Tuhan Allah nyaꞌ ukai tegal apa te kita pulah, uleh tegal iman. 28 Kami yaken ensia tauꞌ kenaꞌ de mua Tuhan Allah nyaꞌ tegal iman, ukai tegal mulah apa te depadah alam Prator Musa.
29 Piyaꞌ Tuhan Allah nyaꞌ semoꞌ Tuhan Allah sidaꞌ Yahudi weh? Nadai piyaꞌ Ya Tuhan Allah bansa bukai gaꞌ? Auꞌ, Ya Tuhan Allah bansa bukai gaꞌ! 30 Nema Tuhan Allah peroꞌ sikoꞌ, Ya mah te nyuroh ugaꞌ ensia, bayek sidaꞌ Yahudi bayek bansa bukai kenaꞌ de mua Ya tegal iman.g
31 Enteꞌ piyaꞌ, kita kaꞌ ngemalang Prator Musa tegal iman? Sama sekaleꞌ nadai! Nema kita pecayaꞌ enteꞌ Prator Musa nyaꞌ beguna.