Ruma 4

Abraham ngau cuntoh

Cuba kita medaꞌ Abraham puyang jagang kita sidaꞌ Yahudi. Apa te nyuroh Abraham tauꞌ kenaꞌ de mua Tuhan Allah? 2 Enteꞌ Abraham tauꞌ kenaꞌ de mua Tuhan Allah tegal kebala utai te depulah ya, nyaꞌ adai alasan ngau ya ngepah-ngemah direꞌ. Uleh ya nitauꞌ ngepah-ngemah direꞌ de mua Tuhan Allah 3 nema Kitab Suci madah, “Abraham pecayaꞌ ke Tuhan Allah, abaꞌ nyaꞌ nyuroh Tuhan Allah ngangap ya kenaꞌ de mua Ya.”

4 Enteꞌ urang te bekreja nerimaꞌ upah, upah ya nyaꞌ nadai deangap hadiyah, uleh nyaꞌ hak ya. 5 Enteꞌ urang nadai bekerja uleh ya pecayaꞌ ke Tuhan Allah, urang nyaꞌ deangap Tuhan Allah kenaꞌ de mua Ya tegal iman ya. Peroꞌ Tuhan Allah mah te tauꞌ ngasoh urang te dusa tauꞌ kenaꞌ de mua Ya. 6 Raja Daot sigeꞌ madah urang te lampar gaga toꞌ urang te deangap Tuhan Allah kenaꞌ de mua Ya, nadai tegal apa te sidaꞌ pulah. Raja Daot madah,

7 “Betuah amat mah urang te kebala penyalah ya deampon,

abaꞌ te kebala dusa ya deapos.

8 Betuah amat mah urang te dusa ya nadai deitong Tuhan.”

9 Apa urang te betuah toꞌ peroꞌ kebala urang te sunat sekaleꞌ ke kebala urang te nadai sunat gaꞌ? Kami udah madah teh, Abraham deangap Tuhan Allah kenaꞌ nyaꞌ tegal iman. 10 Kemaya Abraham deangap kenaꞌ, sebedau ya desunat sekaleꞌ ke udah ya desunat? Tuhan Allah nerimaꞌ ya sebedau ya desunat bukai udah ya desunat. 11 Semaru Abraham pecayaꞌ udah nyaꞌ baroꞌ ya desunat. Sunat toꞌ sama abaꞌ cap te debereꞌ Tuhan Allah ke ya. Ya debereꞌ cap nyaꞌ ngau tana ya udah kenaꞌ de mua Tuhan tegal pecayaꞌ. Nema Abraham pecayaꞌ ke Tuhan Allah nyaꞌ nyuroh ya tauꞌ ngau apai ugaꞌ urang pecayaꞌ te nadai desunat. Abaꞌ nema sidaꞌ pecayaꞌ ke Tuhan Allah upa Abraham sidaꞌ deangap kenaꞌ de mua Tuhan Allah. 12 Bukai ari nyaꞌ, Abraham apai kebala urang te sunat gaꞌ, uleh nadai peroꞌ tegal sidaꞌ desunat. Ya ngau apai sidaꞌ nema sidaꞌ pecayaꞌ ke Tuhan Allah gaꞌ, sama upa Abraham pecayaꞌ sebedau ya desunat.

13 Tuhan Allah bedanyi ke Abraham abaꞌ ke pureh ya enteꞌ sidaꞌ kaꞌ empu dunia. Nyaꞌ nadai tegal Abraham patoh ke Prator Musa, uleh tegal ya pecayaꞌ ke Tuhan Allah abaꞌ ya deangap Tuhan Allah urang te kenaꞌ. 14 Enteꞌ peroꞌ urang te patoh ke Prator Musa jaꞌ te kaꞌ nerimaꞌ apa te udah dedanyi Tuhan Allah, nyaꞌ niseꞌ guna kita pecayaꞌ ke Tuhan Allah abaꞌ apa te udah dedanyi Tuhan Allah nyaꞌ sama sekaleꞌ niseꞌ reti. 15 Ku madah piyaꞌ nema Prator Musa toꞌ nyuroh Tuhan Allah ngukom urang te ngelangar. Uleh enteꞌ Prator Musa toꞌ niseꞌ, niseꞌ gaꞌ te delangar.

16 Kebala urang tauꞌ nerimaꞌ berkat te udah dedanyi Tuhan Allah ke sidaꞌ nyaꞌ ngau cara pecayaꞌ ke Ya. Berkat nyaꞌ debereꞌ Tuhan Allah gena mah ke urang. Ugaꞌ pureh Abraham pesti nerimaꞌ berkat nyaꞌ. Danyi nyaꞌ nadai semoꞌ ngau sidaꞌ te idop de baroh Prator Musa, uleh ngau ugaꞌ urang te pecayaꞌ ke Tuhan Allah upa Abraham. Abraham nyaꞌ apai ugaꞌ kita 17 de mua Tuhan Allah, upa te depadah alam Kitab Suci, “Ku udah nyuroh meh ngau apai kebala bansa.” Pas Abraham ninga danyi nyaꞌ, ya pecayaꞌ ke Tuhan Allah. Ya mah Tuhan Allah te ngidop urang mati, abaꞌ te mulah utai te bedau adai jadi adai ngau apa te depadah Ya.

18 Amat mah niseꞌ agam ageꞌ Abraham tauꞌ beranak, uleh ya matang ngagam abaꞌ pecayaꞌ ke Tuhan Allah. Kebaꞌ nyaꞌ nyuroh ya ngau apai kebala bansa, nunaꞌ te detules alam Kitab Suci, “Pureh meh kaꞌ mayoh amat upa pemayoh piyanau de langet.” 19 Pas tengan nyaꞌ Abraham tauꞌ badaꞌ enteꞌ ya niseꞌ agam ageꞌ tauꞌ beranak. Tuboh ya nyau lemah nema umor ya nyau kaꞌ seratos taon, apa klageꞌ Sara bini ya nyaꞌ manol. Uleh iman Abraham nadai ngamoꞌ lemah. 20 Ya selareh pecayaꞌ abaꞌ nadai kalaꞌ saban ke danyi Tuhan Allah. Iman ya ke Tuhan Allah empala betamah kuat abaꞌ ya selareh muji Tuhan Allah. 21 Ya bamat-amat pecayaꞌ enteꞌ Tuhan Allah tauꞌ mulah apa te udah dedanyi Ya. 22 Tegal Abraham pecayaꞌ ke Tuhan Allah kebaꞌ Tuhan Allah ngangap ya kenaꞌ. 23 Te detules “ya deangap kenaꞌ” nyaꞌ nadai peroꞌ detules ngau Abraham gena, 24 uleh ngau kita gaꞌ. Tuhan Allah sigeꞌ kaꞌ ngangap kita kenaꞌ nema kita pecayaꞌ ke Ya te udah ngidop Isa, Tuhan kita, ari pemati. 25 Isa nyaꞌ udah deserah sampai mati de kayu saleb tegal kebala dusa kita, abaꞌ udah deidop Tuhan Allah ageꞌ isaꞌ kita tauꞌ kenaꞌ de mua Ya.