Tuhan Allah kaseh ke kita amat kita ageꞌ bemunsoh abaꞌ Ya
5
Kebaꞌ nyaꞌ, nema entoꞌ kita nyau kenaꞌ de mua Tuhan Allah tegal iman, kita tauꞌ idop damai abaꞌ Tuhan Allah tegal Tuhan kita, Isa Al Maseh. 2 Nema kita pecayaꞌ ke Isa, Ya mereꞌ kita jalai isaꞌ tauꞌ ngasa pemayek ati Tuhan Allah, abaꞌ ngau pemayek ati Ya nyaꞌ kita idop entoꞌ. Kita gaga nema kita ngagam abaꞌ pecayaꞌ enteꞌ kita abaꞌ Tuhan Allah kaꞌ dejunyong tingeꞌ. 3 Nadai peroꞌ nyaꞌ, kita empala gaga ngasa pemedeh, nema kita tauꞌ badaꞌ pemedeh nyaꞌ ngasoh kita tabah. 4 Enteꞌ kita tabah, kita tan enteꞌ deuji, enteꞌ kita tan deuji, nyaꞌ ngasoh kita adai agam. 5 Abaꞌ te deagam kita nadai nyuroh keciwa nema Tuhan Allah udah mereꞌ kaseh Ya te belebeh alam ati kita ari Roh Kudos te udah debereꞌ Ya ke kita.6 Pas tengan kita nitauꞌ mulah utai ngau nyelamat direꞌ, Isa Al Maseh mati ngau kita urang te jat, nunaꞌ senta te udah deatoh Tuhan Allah. 7 Jarang adai urang te kaꞌ mati nganti urang te kenaꞌ. Enteꞌ ngau urang te bayek ati, amang ku adai te kaꞌ. 8 Uleh Tuhan Allah nganyaꞌ kaseh Ya ke kita upa pitoꞌ: Tengan kita ageꞌ idop alam dusa, Isa Al Maseh mati ngau kita. 9 Apa klageꞌ entoꞌ kita nyau kenaꞌ de mua Tuhan Allah tegal pemati Isa Al Maseh, Ya pesti mah kaꞌ nyelamat kita ari ukom Tuhan Allah. 10 Meliyaꞌ jaꞌ jalai kita ageꞌ bemunsoh abaꞌ Tuhan Allah, kita tauꞌ bedamai abaꞌ Ya tegal pemati Anak Ya, apa klageꞌ entoꞌ kita udah bedamai abaꞌ Ya, pesti mah kita kaꞌ deselamat Ya gaꞌ nema Anak Ya nyaꞌ udah idop ageꞌ. 11 Abaꞌ lebeh ari nyaꞌ, kita sigeꞌ gaga medaꞌ pemayek Tuhan Allah ari Tuhan kita Isa Al Maseh. Tegal Isa Al Maseh kita udah dedamai abaꞌ Tuhan Allah.
Ensia mati tegal Adam abaꞌ idop tegal Isa Al Maseh
12 Kebaꞌ nyaꞌ, upa medaꞌ dusa tamaꞌ ke dunia toꞌ ari sikoꞌ urang, abaꞌ ari dusa nyaꞌ timol pemati, upa piyaꞌ gaꞌ pemati nyaꞌ nyangket ke ugaꞌ urang, nema ugaꞌ urang udah mulah dusa.a 13 Sebedau adai Prator Musa, dusa udah adai alam dunia. Uleh dusa nadai detuntot, nema niseꞌ Prator te delangar. 14 Uleh tegal dusa Adam ugaꞌ ensia belaboh ari jeman ya datai ke jeman Musa udah ngasa pemati. Amat mah ensia nadai lansong ngelangar printah Tuhan Allah upa te depulah Adam, uleh ensia matang mati mah tegal dusa Adam.
Adam nyaꞌ gamar ari Al Maseh te dedanyi Tuhan Allah kaꞌ datai. 15 Uleh dusa Adam nadai sama abaꞌ pemayek ati Tuhan Allah te debereꞌ gena. Tegal dusa Adam ugaꞌ ensia mati, uleh te lebeh besai apa te udah depulah Isa Al Maseh. Tegal apa te udah depulah Isa Al Maseh ugaꞌ urang tauꞌ kenaꞌ de mua Tuhan Allah abaꞌ jong idop abaꞌ Ya sengabot. 16 Pemayek ati Tuhan Allah toꞌ jaoh lebeh besai ari dusa Adam. Nema udah Adam mulah dusa sekaleꞌ, ya depadah salah abaꞌ deukom mati, uleh hadiyah te debereꞌ Tuhan Allah gena datai tengan ensia mayoh mulah dusa, abaꞌ asel ari nyaꞌ kita tauꞌ kenaꞌ de mua Ya. 17 Tegal dusa sikoꞌ urang te nama Adam, pemati bekuasa nyangket ngenap urang. Uleh te lebeh besai ageꞌ apa te depulah uleh sikoꞌ urang bukai te nama Isa Al Maseh. Tegal Ya urang te nerimaꞌ pemayek ati Tuhan Allah te ma besai abaꞌ deangap kenaꞌ de mua Tuhan Allah kaꞌ idop abaꞌ dusa nadai ageꞌ bekuasa de sidaꞌ.
18 Kebaꞌ nyaꞌ, upa tegal sikoꞌ urang te mulah dusa, ugaꞌ urang deukom Tuhan Allah, upa piyaꞌ gaꞌ tegal sikoꞌ urang te mulah te kenaꞌ, ugaꞌ urang delepas ari ukom Tuhan Allah abaꞌ debereꞌ idop. 19 Abaꞌ tegal sikoꞌ urang te nadai patoh, ugaꞌ urang jadi dusa, upa piyaꞌ gaꞌ tegal sikoꞌ urang te patoh ke Tuhan Allah, ugaꞌ urang tauꞌ kenaꞌ de mua Ya.
20 Tuhan Allah mereꞌ Prator Musa ke ensia isaꞌ ensia tauꞌ badaꞌ dusa ensia toꞌ lampar mayoh. Uleh empala mayoh dusa ensia, empala nyaꞌ mah Tuhan Allah nganyaꞌ pemayek ati Ya. 21 Meliyaꞌ teh ensia idop de baroh kuasa dusa, nyaꞌ mah te nyuroh kita mati. Uleh entoꞌ pemayek ati Tuhan Allah bekuasa alam idop kita. Tegal apa te udah depulah Tuhan kita Isa Al Maseh, nyaꞌ te nyuroh kita tauꞌ kenaꞌ de mua Tuhan Allah abaꞌ tauꞌ jong idop abaꞌ Ya sengabot.