Mati abaꞌ idop ageꞌ abaꞌ Isa Al Maseh
6
Enteꞌ piyaꞌ apa te tauꞌ kita padah kah? Tauꞌ nadai kita mulah dusa sengabot, isaꞌ pemayek ati Tuhan Allah empala betamah ke kita? 2 Sama sekaleꞌ nadai! Kita udah mati ari dusa, kati kita rinah ageꞌ tubah kaꞌ mulah dusa sengabot? 3 Kitaꞌ pesti tauꞌ badaꞌ enteꞌ kita te udah depaneꞌ alam Isa Al Maseh, udah depaneꞌ alam pemati Ya gaꞌ. 4 Pas kita depaneꞌ, kita upa kebala urang te mati abaꞌ dekubor abaꞌ Isa Al Maseh. Isaꞌ upa Isa Al Maseh deidop ageꞌ uleh kuasa Tuhan Allah Apai kita, upa piyaꞌ gaꞌ kita idop ngau cara te baru.5 Enteꞌ kita udah suteꞌ abaꞌ Isa Al Maseh nema kita udah mati abaꞌ Ya, kita sigeꞌ kaꞌ suteꞌ abaꞌ Ya pas kita deidop ageꞌ abaꞌ Ya. 6 Kita tauꞌ badaꞌ idop kita te lamaꞌ udah desaleb abaꞌ Isa Al Maseh, isaꞌ kuasa dusa alam idop kita nyaꞌ lenyau. Ngau cara nyaꞌ kita nadai ageꞌ idop ngau ulon dusa. 7 Nema ngenap urang te udah mati udah delepas ari kuasa dusa.
8 Enteꞌ kita udah mati abaꞌ Al Maseh, kita pecayaꞌ kita sigeꞌ kaꞌ idop abaꞌ Ya. 9 Nema enteꞌ Al Maseh udah deidop ageꞌ ari pemati pesti Ya nadai tauꞌ mati ageꞌ. Pemati nadai ageꞌ bekuasa de Ya. 10 Pemati Al Maseh nyaꞌ pemati ngau ngalah kuasa dusa abaꞌ pemati Ya nyaꞌ sekaleꞌ mah, udah nyaꞌ Ya nadai mati ageꞌ. Entoꞌ Ya empu idop baru abaꞌ idop Ya nyaꞌ ngau Tuhan Allah. 11 Upa piyaꞌ mah gaꞌ kitaꞌ, kitaꞌ alah medaꞌ direꞌ nyau mati ari kuasa dusa abaꞌ idop uleh kuasa Tuhan Allah nema kitaꞌ empu Isa Al Maseh.
12 Kebaꞌ nyaꞌ nang kitaꞌ ageꞌ ngengaꞌ dusa bekuasa alam tuboh kitaꞌ te tauꞌ reraꞌ, isaꞌ kitaꞌ nadai nunaꞌ penekaꞌ kitaꞌ te jat. 13 Abaꞌ nang kitaꞌ nyerah kebala anggota tuboh kitaꞌ ke kuasa dusa ngau mulah utai te jat. Uleh serah ke idop kitaꞌ ke Tuhan Allah, nema kitaꞌ udah mati abaꞌ entoꞌ kitaꞌ nyau idop baru. Kitaꞌ alah nyerah anggota tuboh kitaꞌ ke Tuhan Allah ngau mulah utai te bayek. 14 Dusa nadai ageꞌ bekuasa alam idop kitaꞌ, nema kitaꞌ nadai ageꞌ idop de baroh Prator Musa uleh de baroh pemayek ati Tuhan Allah.
Dua macam ulon
15 Jadi kati entoꞌ? Tauꞌ nadai kita mulah dusa nema kita nadai ageꞌ idop de baroh Prator Musa, uleh de baroh pemayek ati Tuhan Allah? Sama sekaleꞌ nadai! 16 Kitaꞌ pesti udah tauꞌ badaꞌ enteꞌ kitaꞌ nyerah direꞌ ke sikoꞌ urang abaꞌ mulah apa te dekedekaꞌ ya, kitaꞌ jadi ulon urang nyaꞌ. Piyaꞌ gaꞌ enteꞌ kitaꞌ mulah dusa, kitaꞌ jadi ulon dusa te ngemaiꞌ kitaꞌ mati. Enteꞌ kitaꞌ patoh ke Tuhan Allah, kitaꞌ jadi ulon Ya te ngemaiꞌ kitaꞌ idop kenaꞌ de mua Ya. 17 Uleh besukor ke Tuhan Allah! Meliyaꞌ teh kitaꞌ jadi ulon dusa, uleh entoꞌ kitaꞌ bamat-amat nunaꞌ pengajar te kenaꞌ te udah debereꞌ ke kitaꞌ. 18 Kitaꞌ udah delepas ari dusa, abaꞌ entoꞌ kita nyau jadi ulon Tuhan Allah kebaꞌ kitaꞌ alah selareh mulah apa te kenaꞌ. 19 Ku ngau cuntoh ulon nyaꞌ isaꞌ kitaꞌ mudah nyarok apa te demaksot ku. Meliyaꞌ teh kitaꞌ nyerah ugaꞌ anggota tuboh kitaꞌ jadi ulon dusa abaꞌ pemiker te jat, nyaꞌ nyuroh kitaꞌ peroꞌ idop mulah te jat. Uleh entoꞌ kitaꞌ alah nyerah ugaꞌ anggota tuboh kitaꞌ jadi ulon Tuhan Allah abaꞌ alah selareh mulah apa te kenaꞌ. Nyaꞌ nyuroh kitaꞌ peroꞌ idop kusos ngau Ya.
20 Jalai kitaꞌ ageꞌ jadi ulon dusa, kitaꞌ bibas nadai alah mulah utai te kenaꞌ. 21 Abaꞌ apa untong ari te udah kitaꞌ pulah ke nyaꞌ? Niseꞌ! Ugaꞌ nyaꞌ nyuroh kitaꞌ ngasa malu, nema pemadoꞌ ari te udah kitaꞌ pulah nyaꞌ nyuroh kitaꞌ mati! 22 Uleh entoꞌ kitaꞌ udah delepas ari dusa abaꞌ nyau jadi ulon Tuhan Allah. Nyaꞌ nyuroh idop kitaꞌ dekudos Tuhan Allah abaꞌ pemadoꞌ kitaꞌ tauꞌ jong idop abaꞌ Ya sengabot. 23 Nema upah dusa toꞌ mati. Uleh jong idop sengabot aba Tuhan Allah alam Isa Al Maseh, Tuhan kita, nyaꞌ pemayek ati Tuhan Allah te debereꞌ Ya gena ke kita.