Cuntoh Perator Musa
7
Kebala menyadeꞌ, ku becakap ke kitaꞌ te udah tauꞌ badaꞌ Perator Musa. Kitaꞌ udah tauꞌ badaꞌ enteꞌ Perator Musa toꞌ peroꞌ bekuasa de urang selamaꞌ ya ageꞌ idop. 2 Upa urang inoꞌ te udah belaki: Ya alah idop abaꞌ laki ya selamaꞌ laki ya ageꞌ idop. Uleh enteꞌ laki ya mati, ya bibas ari perator te namet senikoꞌ laki. 3 Enteꞌ inoꞌ nyaꞌ jadi ke laki bukai, jalai laki ya ageꞌ idop, inoꞌ nyaꞌ besinah. Uleh enteꞌ laki ya nyau mati, ya bibas ari perator nyaꞌ. Abaꞌ enteꞌ ya belaki ageꞌ, ya nadai besinah.4 Upa piyaꞌ gaꞌ kitaꞌ kebala menyadeꞌ ku. Kitaꞌ udah mati ari Perator Musa nema kitaꞌ udah mati abaꞌ Al Maseh, abaꞌ jadi empu Ya te udah deidop Tuhan Allah ageꞌ ari pemati. Kita jadi empu Al Maseh isaꞌ kita mulah utai te bayek abaꞌ hormat ke Tuhan Allah. 5 Meliyaꞌ teh kita lemah abaꞌ idop nunaꞌ penekaꞌ kita te jat. Amat mah Perator Musa toꞌ ngingat kita isaꞌ kita nadai mulah dusa, uleh Perator nyaꞌ mah te empala nyuroh penekaꞌ kita te jat menoh tuboh kita. Penekaꞌ kita te jat nyaꞌ nyuroh kita mulah dusa sengabot abaꞌ nyuroh kita mati. 6 Uleh entoꞌ kita udah bibas ari Perator Musa. Kita udah mati ari Perator te bekuasa alam idop kita meliyaꞌ teh. Kita nadai ageꞌ idop nunaꞌ cara te lamaꞌ, nunaꞌ Perator te detules. Entoꞌ kita nunaꞌ cara te baru te detunyok uleh Roh Tuhan Allah ke kita.
7 Enteꞌ piyaꞌ apa te tauꞌ kita padah? Tauꞌ kita madah Perator Musa abaꞌ dusa nyaꞌ sama? Sama sekaleꞌ nadai! Uleh ari Perator Musa nyaꞌ mah ku tauꞌ badaꞌ adai dusa. Cuntoh, ku nadai tauꞌ badaꞌ enteꞌ cerat ke kebala utai urang nyaꞌ dusa, enteꞌ Perator Musa nadai madah, “Nang cerat ke kebala utai urang.”a 8 Tegal adai Perator Musa, nyaꞌ nyuroh dusa adai jalai ngasoh ku cerat ke kebala utai urang. Enteꞌ Perator Musa niseꞌ, dusa nyaꞌ mati. 9 Meliyaꞌ teh jalai ku bedau tauꞌ badaꞌ Perator Musa, ku miker direꞌ idop bayek. Uleh pas ku nyau tauꞌ badaꞌ Perator nyaꞌ, dusa belaboh idop alam ku, 10 abaꞌ ku mati. Perator te tunaꞌ des alah nyuroh ku idop, empala nyuroh ku mati. 11 Nema ari Prator nyaꞌ adai jalai dusa nipu ku abaꞌ munoh ku.b 12 Perator Musa toꞌ kudos, abaꞌ perintah nyaꞌ sigeꞌ kudos, kenaꞌ abaꞌ bayek.
Idop debaroh Perator Musa
13 Enteꞌ piyaꞌ, utai te bayek toꞌ te nyuroh ku mati? Sama sekaleꞌ nadai! Dusa nyaꞌ te nyuroh ku mati. Dusa ngau Prator Musa te bayek toꞌ nyuroh ku mati. Nyaꞌ bukti dusa nyaꞌ lampar jat. 14 Kita tauꞌ badaꞌ Perator Musa toꞌ rohani, uleh ku toꞌ urang te nadai rohani. Dusa bekuasa de ku abaꞌ ku nyau jadi ulon dusa. 15 Nyaꞌ nyuroh ku nadai nyarok apa te ku pulah. Nema ukai utai te ku kedekaꞌ te ku pulah uleh empala utai te ku kareh nyaꞌ te ku pulah. 16 Enteꞌ ku mulah kebala utai te belawan abaꞌ penekaꞌ ku, nyaꞌ reti ku ngakoꞌ mah enteꞌ Prator Musa nyaꞌ bayek. 17 Kebaꞌ tunaꞌ des ukai ku te mulah pemenyat nyaꞌ, uleh dusa te diyau alam ku. 18 Ku tauꞌ badaꞌ niseꞌ kebala utai te bayek alam ku, maksot ku alam penekaꞌ ku te jat toꞌ. Ku kaꞌ mah mulah apa te bayek, uleh ku nadai talah mulah piyaꞌ. 19 Ku nadai mulah utai te bayek nunaꞌ te ku kedekaꞌ, uleh ku empala mulah kebala utai te jat te nadai nunaꞌ kedekaꞌ ku. 20 Enteꞌ ku mulah kebala utai te nadai nunaꞌ kedekaꞌ ku, nyaꞌ reti bukai ku te mulah kebala utai nyaꞌ, uleh dusa te diyau alam ku.
21 Ari apa te ku pelajar nyaꞌ pitoꞌ, amat mah penekaꞌ ku kaꞌ mulah kebala utai te bayek, uleh kebala utai te jat nyaꞌ mah te selareh ku pulah. 22 Ati ku gaga nunaꞌ ugaꞌ Perator Tuhan Allah, 23 uleh ku medaꞌ perator te kebukai bekreja alam ku. Perator nyaꞌ belawan abaꞌ Perator Tuhan Allah te adai alam ati ku. Perator te kebukai nyaꞌ perator dusa te ngalah ku abaꞌ nyuroh ku nitauꞌ bibas ari dusa. 24 Kaseh mah badaꞌ ku toꞌ! Sapa naꞌ mah te kaꞌ nyelamat ku ari tuboh te ngasoh ku toꞌ mati? 25 Uleh ku besukor ke Tuhan Allah nema tegal Isa Al Maseh, Tuhan kita, ku deselamat Ya. 26 Entoꞌ upa pitoꞌ te ku pulah: ngau pemiker ku, ku ngelayan Perator Tuhan Allah, uleh ngau penekaꞌ ensia ku te jat toꞌ, ku ngelayan perator dusa.