Idop nunaꞌ Roh
8
Entoꞌ urang te idop suteꞌ abaꞌ Isa Al Maseh nadai ageꞌ deukom. 2 Utai nyaꞌ tauꞌ piyaꞌ nema perator Roh te nyuroh kita idop suteꞌ abaꞌ Isa Al Maseh, udah ngelepas kita ari perator te ngasoh kita dusa abaꞌ mati. 3 Apa te nitauꞌ depulah Perator Musa nema penekaꞌ tuboh kita te jat toꞌ, nyaꞌ udah depulah Tuhan Allah. Tuhan Allah ngalah kuasa dusa ngau cara ngutos Anak Ya kedireꞌ alam tuboh te sama abaꞌ tuboh kita ensia te ngau kita mulah dusa. Tuhan Allah ngutos Anak Ya alam tuboh ensia, isaꞌ Ya tauꞌ ngapos dusa abaꞌ ngalah kuasa dusa alam tuboh ensia. 4 Tuhan Allah mulah piyaꞌ isaꞌ kita tauꞌ idop nunaꞌ penekaꞌ Ya upa te detules alam Perator Musa. Entoꞌ kita nadai ageꞌ idop nunaꞌ penekaꞌ kita te jat, uleh idop nunaꞌ penekaꞌ Roh Kudos.5 Kebala urang te idop nunaꞌ penekaꞌ sidaꞌ te jat, peroꞌ miker apa te dekedekaꞌ sidaꞌ. Uleh kebala urang te idop nunaꞌ Roh Kudos, peroꞌ miker apa te dekedekaꞌ Roh Kudos. 6 Nema penekaꞌ kita te jat nyaꞌ nyuroh mati. Uleh penekaꞌ Roh Kudos nyaꞌ nyuroh kitaꞌ idop abaꞌ ngasa damai. 7 Urang te nunaꞌ penekaꞌ ensia te jat bemunsoh abaꞌ Tuhan Allah. Sidaꞌ nadai patoh ke printah Tuhan Allah nema sidaꞌ nadai talah. 8 Kebala urang te idop nunaꞌ penekaꞌ ensia te jat, nitauꞌ nyuroh Tuhan Allah gaga.
9 Uleh kitaꞌ nadai idop nunaꞌ penekaꞌ kitaꞌ te jat. Enteꞌ Roh Tuhan Allah bamat-amat idop alam kitaꞌ, kitaꞌ depimpen Roh Tuhan Allah. Enteꞌ urang niseꞌ Roh Al Maseh, urang nyaꞌ ukai empu Al Maseh. 10 Uleh enteꞌ Al Maseh idop alam kitaꞌ, biyar mah tuboh kitaꞌ mati tegal dusa, uleh Roh Kudos mereꞌ idop ke kitaꞌ nema Al Maseh udah nyuroh kitaꞌ kenaꞌ de mua Tuhan Allah. 11 Enteꞌ Roh Ya te ngidop Isa ari entara urang te mati diyau alam kitaꞌ, Ya te ngidop Al Maseh ari entara urang te mati nyaꞌ kaꞌ ngidop tuboh kitaꞌ te tauꞌ mati toꞌ gaꞌ. Ya mulah utai nyaꞌ ngau Roh Ya te idop alam kitaꞌ.
12 Kebaꞌ nyaꞌ kebala menyadeꞌ, kita toꞌ urang te berutang uleh ukai berutang ke penekaꞌ kita te jat, isaꞌ kita nunaꞌ penekaꞌ kita te jat nyaꞌ. 13 Nema enteꞌ kitaꞌ idop nunaꞌ penekaꞌ kitaꞌ te jat nyaꞌ, kita kaꞌ mati. Uleh enteꞌ kitaꞌ ngengaꞌ Roh Kudos mantoꞌ kitaꞌ ngemadoꞌ pemenyat te depulah kitaꞌ, kitaꞌ kaꞌ idop.
14 Ugaꞌ urang te depimpen Roh Tuhan Allah, nyaꞌ anak Tuhan Allah. 15 Meliyaꞌ teh kitaꞌ upa ulon nema kitaꞌ takot ke ukom Tuhan Allah. Uleh entoꞌ kitaꞌ udah buleh Roh Kudos te nyuroh kitaꞌ nadai takot ageꞌ. Roh Kudos nyaꞌ mah te udah nyuroh kitaꞌ jadi Anak Tuhan Allah. Abaꞌ tegal Roh Kudos nyaꞌ kitaꞌ brani ngumai Tuhan Allah, “O Abba,a o Apai!” 16 Roh Kudos abaꞌ roh kita madah enteꞌ kita toꞌ kebala anak Tuhan Allah. 17 Abaꞌ enteꞌ kita toꞌ anak Tuhan Allah, kita kaꞌ nerimaꞌ kebala berkat te udah deageh Tuhan Allah ke kebala anak Ya. Kita kaꞌ nerimaꞌ kebala berkat nyaꞌ abaꞌ Al Maseh. Nema enteꞌ kita kaꞌ merinsaꞌ abaꞌ Al Maseh, kita kaꞌ depuji abaꞌ Ya.
Te deagam kebala anak Tuhan Allah
18 Ku yaken ugaꞌ pemedeh te kita asa ke entoꞌ niseꞌ reti sama sekaleꞌ, enteꞌ debaneng ke idop nyamai te kaꞌ debereꞌ Tuhan Allah ke kita jemah lah. 19 Abaꞌ entoꞌ ugaꞌ te depulah Tuhan Allah tengan nungoꞌ abaꞌ ngagam senta Tuhan Allah nganyaꞌ sapa kebala anak Ya te pengamat. 20 Tuhan Allah ngengaꞌ ugaꞌ utai te depulah Ya de baroh kuasa te ngancor sidaꞌ. Nyaꞌ ukai penekaꞌ ugaꞌ utai te depulah Ya, uleh penekaꞌ Tuhan Allah kedireꞌ. Tuhan Allah mulah piyaꞌ nema Ya ngagamb 21 adai lah senta Ya kaꞌ ngelepas kebala utai te depulah Ya ari kuasa te ngancor sidaꞌ. Sidaꞌ kaꞌ debibas Ya abaꞌ dejunyong tingeꞌ abaꞌ kebala anak Tuhan Allah.
22 Kita tauꞌ badaꞌ ugaꞌ utai te depulah Ya datai ke pitoꞌ ngakai ngadoh ngasa pemedeh, upa urang inoꞌ te kaꞌ beranak. 23 Abaꞌ nadai peroꞌ sidaꞌ te ngakai ngadoh ngasa pemedeh, kita te udah nerimaꞌ Roh Kudos sigeꞌ ngakai ngadoh alam ati kita. Kita udah nerimaꞌ Roh Kudos buah te semaru ari ugaꞌ utai te kaꞌ debereꞌ Tuhan Allah ke kita. Uleh kita ageꞌ tubah nganteꞌ Tuhan Allah ngangkoꞌ kita ngau anak Ya abaꞌ ngelepas tuboh kita ari kuasa te ngancor kita. 24 Tuhan Allah udah nyelamat kita abaꞌ datai ke pitoꞌ kita ageꞌ tubah ngagam danyi Ya te bedau pedaꞌ. Uleh enteꞌ utai te nyau empu kita, nyaꞌ bukai ageꞌ utai te deagam. Nema urang nadai ageꞌ ngagam utai te nyau empu direꞌ. 25 Uleh enteꞌ kita ngagam utai te bedau kita pedaꞌ, pesti kita kaꞌ sabar nungoꞌ.
26 Piyaꞌ gaꞌ Roh Kudos mantoꞌ kita nema kita toꞌ nadai talah. Cuntoh kita nitauꞌ badaꞌ kati kita alah bradua, uleh Roh Kudos bradua ngau kita ke Tuhan Allah, madah kebala utai te nadai talah kita padah ke Ya. 27 Abaꞌ Tuhan Allah tauꞌ badaꞌ iseꞌ ati ensia. Ya tauꞌ badaꞌ apa te depadah Roh Kudos ke Ya nema Roh Kudos bradua ngau kebala urang te deempu Ya nunaꞌ penekaꞌ Ya.
28 Kita tauꞌ badaꞌ enteꞌ Tuhan Allah bekreja alam brena utai, mulah brena utai te bayek ke kebala urang te ngaseh Ya, ke sidaꞌ te dekumai nunaꞌ pengamoꞌ Ya. 29 Nema ugaꞌ urang te depileh Ya ari semaru, sidaꞌ nyaꞌ deatoh Ya ari semaru isaꞌ serupa abaꞌ Anak Ya, isaꞌ Anak Ya nyaꞌ jadi anak tuai de entara mayoh kebala menyadeꞌ. 30 Abaꞌ sidaꞌ te udah deatoh Ya ari semaru, sidaꞌ nyaꞌ gaꞌ dekumai Ya. Abaꞌ sidaꞌ te dekumai Ya, sidaꞌ nyaꞌ desuroh kenaꞌ de mua Ya. Abaꞌ sidaꞌ te desuroh Ya kenaꞌ de mua Ya, sidaꞌ nyaꞌ gaꞌ depuji Ya.
Kaseh Tuhan Allah alam Isa Al Maseh
31 Ngingat ugaꞌ te udah depadah nyaꞌ, apa te tauꞌ kita padah ke entoꞌ? Enteꞌ Tuhan Allah adai abaꞌ kita, sapa ageꞌ te talah ngelawan kita? 32 Tuhan Allah udah ngengaꞌ Anak Ya ngasa pemedeh abaꞌ mati ngau nyelamat ugaꞌ kita. Anak Ya jaꞌ udah Ya bereꞌ ke kita, apa klageꞌ ugaꞌ utai pesti mah Ya bereꞌ ke kita. 33 Adai piyaꞌ te tauꞌ nudoh kebala urang te depileh Tuhan Allah? Niseꞌ! Tuhan Allah mah te udah nyuroh sidaꞌ kenaꞌ de mua Ya. 34 Adai piyaꞌ te tauꞌ nyalah urang te deempu Tuhan Allah? Niseꞌ! Nema Isa Al Maseh udah mati ngau kita. Abaꞌ lebeh ageꞌ, Ya udah deidop ageꞌ abaꞌ entoꞌ dudok de sepiyak kanan Tuhan Allah bradua ke kita. 35 Adai piyaꞌ te tauꞌ misah kita ari kaseh Al Maseh? Niseꞌ! Bayek Pemedeh, bayek tusah, bayek lapar, bayek misken, bayek bahaya, abaꞌ pemati, niseꞌ te tauꞌ misah kita ari kaseh Ya. 36 Alam Kitab Suci detules pitoꞌ,
“Tegal Wan, ngenap ari kami ngadap pemati,
abaꞌ kebala urang ngangap kami toꞌ upa dumba te kaꞌ debunoh.”c
37 Uleh ari ugaꞌ pemedeh te udah kita asa ke nyaꞌ, kita lebeh ari menang ngadap ugaꞌ nyaꞌ nema Tuhan Isa kaseh ke kita. 38 Ku aja ma mah yaken, bayek mati, bayek idop, bayek kebala mlikat, bayek kebala pemerintah, bayek te adai entoꞌ, bayek te kaꞌ datai, abaꞌ kebala kuasa te bukai, 39 bayek kebala kuasa te de atau, bayek kebala kuasa te de baroh abaꞌ kebala utai te kebukai, niseꞌ te tauꞌ misah kita ari kaseh Tuhan Allah, te adai alam Isa Al Maseh, Tuhan kita.