Tuhan Allah abaꞌ sidaꞌ Israel
9
1-3 Ku aja ma mah tusah abaꞌ ati ku merinsaꞌ tegal kebala menyadeꞌ ku te sebansa abaꞌ ku. Tegal sidaꞌ ku sangop mah dekutok Tuhan Allah abaꞌ tepisah ari Al Maseh. Apa te ku padah ke toꞌ amat mah nadai ku bulaꞌ nema ku nyau suteꞌ abaꞌ Al Maseh. Ati nurani ku depimpen Roh Kudos, nyaꞌ mah te nyuroh ku yaken te ku padah ke toꞌ amat. 4 Kami toꞌ bansa Israel te udah depileh Tuhan Allah abaꞌ deangkoꞌ Ya ngau anak Ya. Tuhan Allah udah nganyaꞌ kuasa Ya ke kami, negoh apa te udah dedanyi Ya, abaꞌ mereꞌ Perator Musa ke kami. Tuhan Allah madah ke bansa kami kati cara nyemah Tuhan Allah abaꞌ kami udah nerimaꞌ kebala danyi Ya.a 5 Kami toꞌ pureh puyang jagang kita Abraham, Isak, abaꞌ Yakob. Ari pureh bansa kami toꞌ mah adai Al Maseh.b Ya mah te paleng tingeꞌ ari ugaꞌ utai, abaꞌ Ya mah Allah te alah depuji sengabot. Amen!6 Ku nadai madah enteꞌ Tuhan Allah bulaꞌ ke danyi Direꞌ, nema nadai ugaꞌ kami sidaꞌ Israel toꞌ depileh Tuhan Allah empu Ya, 7 abaꞌ nadai ugaꞌ pureh Abraham nyaꞌ anak Tuhan Allah. Nema Tuhan Allah madah ke Abraham, “Peroꞌ pureh Isak mah te depadah pureh meh.”c 8 Nyaꞌ breti nadai ugaꞌ pureh Abraham depadah anak Tuhan Allah, uleh peroꞌ anak te dedanyi Tuhan Allah ke ya mah te depadah pureh ya te kenaꞌ. 9 Nema jalai Tuhan Allah bedanyi ke Abraham, Ya madah pitoꞌ, “Taon nyaꞌ lah Ku kaꞌ datai ageꞌ, abaꞌ Sara kaꞌ ngadai sikoꞌ miyak laki.”d
10 Abaꞌ nadai peroꞌ nyaꞌ, cuntoh te lebeh jelas nyaꞌ Rebka te ngadai miyak laki berakop ari Isak, puyang jagang kita. 11-13 Sebedau dua ikoꞌ miyak nyaꞌ adai, Tuhan Allah udah madah ke Rebka pitoꞌ, “Anak deꞌ te tuai kaꞌ jadi ulon anak deꞌ te biyak.”e Tuhan Allah udah madah toꞌ sebedau senikoꞌ tauꞌ mulah utai te bayek abaꞌ utai te jaiꞌ. Utai toꞌ munyi te detules alam Kitab Suci, “Ku kaseh ke Yakob uleh Ku areh ke Esau.”f Ngau cara nyaꞌ jelas mah enteꞌ Tuhan Allah mah te ngatoh abaꞌ mileh nunaꞌ penekaꞌ Ya abaꞌ nadai tegal apa te depulah ensia.
14 Enteꞌ piyaꞌ tauꞌ kita madah Tuhan Allah nadai adel? Sama sekaleꞌ nitauꞌ! 15 Nema Tuhan Allah mah ngatoh sapa te kaꞌ Ya pileh. Munyi te udah depadah Ya ke Musa,
“Ku kaꞌ nganyaꞌ pemayek ati Ku ke urang te Ku pileh,
abaꞌ Ku kaꞌ nganyaꞌ pengaseh Ku ke urang te Ku pileh.”g
16 Kebaꞌ nyaꞌ ku madah ke kitaꞌ, Tuhan Allah mileh urang, nyaꞌ nadai tegantong ke penekaꞌ urang abaꞌ usaha urang, uleh tegantong ke pemayek ati Tuhan Allah. 17 Alam Kitab Suci Tuhan Allah madah ke Pirawon, “Ku nyuroh meh jadi raja isaꞌ Ku tauꞌ nganyaꞌ kuasa Ku ari meh. Ku kaꞌ isaꞌ nama Ku detusoi de ugaꞌ dunia.”h 18 Enteꞌ Tuhan Allah kaꞌ nganyaꞌ pengaseh Ya ke urang, Ya anyaꞌ ke pengaseh Ya, abaꞌ enteꞌ Tuhan Allah kaꞌ nyuroh ati urang degel, Ya suroh ke degel.
19 Ninga piyaꞌ, kitaꞌ madah ke ku, “Enteꞌ apa te depadah meh nyaꞌ kenaꞌ, ngapa Tuhan Allah ageꞌ tubah kaꞌ nyalah ensia? Piyaꞌ ni niseꞌ urang te tauꞌ ngelawan penekaꞌ Tuhan Allah?” 20 Kebala menyadeꞌ, piker ke apa te kitaꞌ padah ke nyaꞌ. Sapa piyaꞌ kitaꞌ brani mantah Tuhan Allah? Tauꞌ piyaꞌ te depulah madah ke te mulah ya, “Ngapa bah wan mulah ku upa pitoꞌ?”i 21 Piyaꞌ ni tukang sampau periyok nguna tanah liat ya nunaꞌ penekaꞌ ati ya? Ari tanah liat te sama, ya tauꞌ mulah dua igeꞌ pingan, te sigeꞌ dengau enteꞌ adai acara kusos, te sigeꞌ ageꞌ dengau ari-ari.
22 Upa piyaꞌ mah gaꞌ te depulah Tuhan Allah. Ya kaꞌ nganyaꞌ peranseng Ya abaꞌ kaꞌ nganyaꞌ kuasa Ya ke urang. Uleh Ya sabar ke sidaꞌ te nyuroh Ya ranseng, ke sidaꞌ te deageh Ya kaꞌ depunas. 23 Ya mulah piyaꞌ nema Ya kaꞌ nganyaꞌ kuasa abaꞌ pemayeꞌ Ya te lampar besai ke kita te dekaseh Ya. Kita udah deageh abaꞌ Ya dejunyong tingeꞌ. 24 Kita mah te udah dekumai Ya, nadai peroꞌ ari bansa Yahudi, uleh ari kebala bansa bukai gaꞌ. 25 Munyi te udah depadah alam Kitab Hosea,
“Kebala urang te ukai empu Ku
kaꞌ Ku padah ke ‘Empu Ku,’
abaꞌ kebala urang te nadai Ku kaseh,
kaꞌ Ku padah ‘Ku kaseh.’j
26 Abaꞌ de teban te depadah ke sidaꞌ, ‘Kitaꞌ toꞌ ukai empu Ku,’
de teban nyaꞌ mah gaꞌ sidaꞌ kaꞌ depadah, ‘Kebala anak Tuhan Allah te idop.’ ”k
27 Nabi Yesaya madah ngau goꞌ te sareng upa kati sidaꞌ Israel, “Amat mah kebala sidaꞌ Israel mayoh upa engkrangan de tisi laot, uleh peroꞌ siket mah sidaꞌ te kaꞌ deselamat. 28 Nema Tuhan Allah pesti mah kaꞌ beburoh ngukom urang te de dunia toꞌ.”l 29 Abaꞌ munyi te udah depadah nabi Yesaya teh, “Enteꞌ Te Ma Kuasa nadai ngengaꞌ dua tiga ikoꞌ pureh kita ageꞌ idop, pesti ugaꞌ kita nyau punas, upa sidaꞌ Sudom abaꞌ Gumora.”m
Kebala bansa bukai selamat tegal pecayaꞌ ke Tuhan Allah
30 Toꞌ mah te tauꞌ kami padah, amat mah kebala bansa bukai nadai berusaha kenaꞌ de mua Tuhan Allah, uleh nema sidaꞌ pecayaꞌ ke Ya, sidaꞌ kaꞌ deangap Tuhan Allah kenaꞌ de mua Ya. 31 Uleh bansa kami Israel, amat mah sidaꞌ udah berusaha isaꞌ tauꞌ kenaꞌ de mua Tuhan Allah ngau cara nunaꞌ Perator Musa, uleh sidaꞌ nadai brasel. 32 Ngapa sidaꞌ nadai brasel? Nyaꞌ tegal sidaꞌ berusaha isaꞌ sidaꞌ tauꞌ kenaꞌ de mua Tuhan Allah ngau apa te sidaꞌ pulah, nadai tegal pecayaꞌ ke Tuhan Allah. Kebaꞌ sidaꞌ tetanyal ke batu te nyuroh urang terap. 33 Upa te detules alam Kitab Suci,
“Pedaꞌ kah! Ku udah nepoꞌ sigeꞌ batu de kuta Sion,n
batu te kaꞌ ngasoh urang tetanyal,
abaꞌ kaꞌ ngasoh urang terap.
Uleh urang te pecayaꞌ ke Ya
nadai ngamoꞌ nesal.”o