10
Kebala menyadeꞌ, penekaꞌ ati ku abaꞌ pradua ku isaꞌ Tuhan Allah nyelamat sidaꞌ Israel nyaꞌ. 2 Ku tauꞌ badaꞌ enteꞌ sidaꞌ lampar ransak ngelayan Tuhan Allah, uleh sidaꞌ nitauꞌ badaꞌ kati cara ngelayan Tuhan Allah te kenaꞌ. 3 Sidaꞌ nadai nyarok kati cara Tuhan Allah nyuroh ensia tauꞌ kenaꞌ de mua Ya, nyaꞌ nyuroh sidaꞌ berusaha ngau cara sidaꞌ kedireꞌ. Abaꞌ nyaꞌ mah te ngasoh sidaꞌ nadai kaꞌ patoh abaꞌ nunaꞌ cara te udah deatoh Tuhan Allah.Urang tauꞌ kenaꞌ de mua Tuhan Allah tegal iman
4 Pemadoꞌ ari Prator Musa nyaꞌ Al Maseh, nyaꞌ nyuroh urang te pecayaꞌ ke Al Maseh, tauꞌ kenaꞌ de mua Tuhan Allah. 5 Musa nules cara isaꞌ ensia tauꞌ kenaꞌ de mua Tuhan Allah, ensia alah patoh ke Prator Musa. Ya madah, “Enteꞌ kitaꞌ kaꞌ idop kitaꞌ alah patoh ke Prator nyaꞌ. ”a 6 Uleh Kitab Suci madah gaꞌ ensia tauꞌ kenaꞌ de mua Tuhan Allah nyaꞌ tegal iman. Diyaꞌ depadah, “Nang madah alam ati direꞌ, ‘Sapa bah te kaꞌ nikeꞌ ke sruga?’ ” (Toꞌ bereti, “Sapa te kaꞌ nikeꞌ ke sruga ngemaiꞌ Al Maseh turon ke dunia?”) 7 “Abaꞌ nang madah, ‘Sapa te kaꞌ turon ke sebayan?’ ” (Toꞌ bereti, “Sapa te kaꞌ turon ke baroh ngemaiꞌ Al Maseh nikeꞌ ke atau ngidop Ya ari pemati?”)
8 Uleh toꞌ te detules diyaꞌ,
“Pesau Tuhan Allah nyaꞌ semak abaꞌ kitaꞌ,
alam mulot abaꞌ alam ati kitaꞌ.”
Pesau Tuhan Allah nyaꞌ mah Brita Bayek te kami padah ke urang isaꞌ sidaꞌ pecayaꞌ ke Tuhan Allah.b 9 Enteꞌ kitaꞌ ngakoꞌ ngau mulot kitaꞌ, Isa nyaꞌ Tuhan, abaꞌ pecayaꞌ alam ati kitaꞌ enteꞌ Tuhan Allah udah ngidop Ya ari entara urang mati, pesti kitaꞌ kaꞌ deselamat. 10 Nema ngau ati urang pecayaꞌ abaꞌ deangap kenaꞌ de mua Tuhan Allah. Abaꞌ ngau mulot urang ngakoꞌ abaꞌ deselamat.
11 Alam Kitab Suci depadah, “Ugaꞌ urang te pecayaꞌ ke Ya, nadai ngamoꞌ nesal.”c 12 Depadah “ugaꞌ urang” nema niseꞌ bida sidaꞌ Yahudi abaꞌ te bukai Yahudi. Tuhan te sikoꞌ nyaꞌ Tuhan ugaꞌ urang. Abaꞌ Ya mereꞌ tuah sampai ngeluweꞌ ke ugaꞌ urang te mintaꞌ talau Ya. 13 Munyi te depadah alam Kitab Suci, “Ugaꞌ urang te ngangau Tuhan, kaꞌ deselamat.”d
14 Uleh kati sidaꞌ tauꞌ ngangau Tuhan enteꞌ sidaꞌ bedau pecayaꞌ ke Ya? Abaꞌ kati sidaꞌ tauꞌ pecayaꞌ ke Ya enteꞌ sidaꞌ bedau kalaꞌ ninga brita Ya? Abaꞌ kati sidaꞌ tauꞌ ninga brita Ya enteꞌ niseꞌ urang te nusoi ke sidaꞌ? 15 Abaꞌ kati sidaꞌ tauꞌ nusoi Ya enteꞌ sidaꞌ nadai deutos? Upa te detules alam Kitab Suci, “Saja lampar bayek penatai kebala urang te nusoi Brita Bayek.”e
Nadai ugaꞌ sidaꞌ Israel pecayaꞌ
16 Uleh nadai ugaꞌ kami sidaꞌ Israel nerimaꞌ Brita Bayek nyaꞌ. Kebaꞌ nyaꞌ nyuroh nabi Yesaya madah, “Tuhan, mayoh amat urang te ngai pecayaꞌ ke apa te kami padah.”f 17 Ku madah ke kitaꞌ, iman timol ari apa te detinga. Abaꞌ urang tauꞌ ninga Brita Bayek enteꞌ adai urang te nusoi Al Maseh.
18 Uleh ku nanyaꞌ, nadai piyaꞌ sidaꞌ udah ninga Brita Bayek nyaꞌ? Pesti mah sidaꞌ udah ninga. Nema adai detules,
“Goꞌ sidaꞌ nyau datai ke ugaꞌ dunia,
abaꞌ cakap sidaꞌ datai ke ujong bumi.”g
19 Uleh ku betanyaꞌ ageꞌ, nadai piyaꞌ bansa Israel nyarok Brita Bayek nyaꞌ? Alam Kitab Suci, Musa nules apa te depadah Tuhan Allah ke ya upa pitoꞌ,
“Ku kaꞌ nyuroh kitaꞌ iri ke kebala urang te ukai empu Ku,
abaꞌ nyuroh kitaꞌ ranseng ke bansa te nadai nyarok kebala utai.”h
20 Abaꞌ nabi Yesaya lampar berani madah apa te depadah Tuhan Allah ke ya,
“Kebala urang te nadai ngigaꞌ Ku udah nemu Ku,
abaꞌ Ku udah nganyaꞌ direꞌ ke kebala urang te nadai nanyaꞌ sapa Ku toꞌ.”
21 Uleh ke bansa Israel, Tuhan Allah madah pitoꞌ, “Nyuran ari Ku ngulor jari Ku ke bansa te nadai patoh abaꞌ ngelawan Ku.”i