Pemayek ati Tuhan Allah ke sidaꞌ Israel
11
Ku betanyaꞌ, enteꞌ piyaꞌ Tuhan Allah nulak sidaꞌ Israel, urang te deempu Ya? Sama sekaleꞌ nadai! Nema ku kedireꞌ sidaꞌ Israel pureh Abraham, abaꞌ ari suku Benyamen. 2 Tuhan Allah mileh bansa Israel ngau urang te deempu Ya sebedau sidaꞌ adai. Abaꞌ Ya nadai kalaꞌ nulak sidaꞌ. Pesti kitaꞌ tauꞌ badaꞌ te depadah Kitab Suci upa kati jalai nabi Elia nusoi pemenyat sidaꞌ Israel. Ya madah, 3 “O Tuhan Allah, sidaꞌ udah munoh kebala nabi Wan abaꞌ udah ngancor mesbah te ngau nunu kurban pesemah ke Wan. Peroꞌ ku kedireꞌ mah te ageꞌ idop, abaꞌ entoꞌ sidaꞌ berusaha kaꞌ munoh ku.”a 4 Uleh apa sawot Tuhan Allah ke nabi Elia? Tuhan Allah madah, “Ku ageꞌ adai empu tujoh ribu sidaꞌ Israel te nadai kalaꞌ nyemah Diwa Baal.”b5 Piyaꞌ mah gaꞌ entoꞌ, ageꞌ adai sidaꞌ Israel te jadi empu Tuhan Allah nema pemayek ati Ya te udah mileh sidaꞌ. 6 Abaꞌ enteꞌ Ya mileh sidaꞌ tegal pemayek ati Ya, nyaꞌ bereti nadai tegal apa te sidaꞌ pulah. Nema enteꞌ Tuhan Allah mileh sidaꞌ tegal apa te sidaꞌ pulah, nyaꞌ ukai ageꞌ tegal pemayek ati Tuhan Allah.
7 Jadi kati? Sidaꞌ Israel nadai buleh apa te sidaꞌ gigaꞌ, uleh kebala urang te depileh Tuhan Allah udah buleh berkat nyaꞌ. Abaꞌ ati kebala urang te kebukai nyau ngematu ngai ninga Ya. 8 Upa te detules alam Kitab Suci,
“Tuhan Allah nyuroh sidaꞌ tinok lenyaꞌ,
Ya nutop mata sidaꞌ nyuroh sidaꞌ nitauꞌ medaꞌ,
abaꞌ nangam peneng sidaꞌ isaꞌ sidaꞌ nitauꞌ ninga,
datai ke sari toꞌ.”c
9 Abaꞌ Raja Daot madah gaꞌ,
“Isaꞌ mah kebala gawai te depulah sidaꞌ nyaꞌ jadi perangkap sidaꞌ kedireꞌ,
abaꞌ jadi lubang teban sidaꞌ laboh abaꞌ teban sidaꞌ deukom.
10 Isaꞌ mah mata sidaꞌ butaꞌ isaꞌ sidaꞌ nadai medaꞌ,
abaꞌ isaꞌ mah pungong sidaꞌ jong bungkok sengabot.”d
Tuhan Allah nyelamat bansa bukai te pecayaꞌ
11 Ku betanyaꞌ ageꞌ, pas kebala sidaꞌ Israel nadai pecayaꞌ ke Isa, apa tegal sidaꞌ nadai pecayaꞌ nyuroh sidaꞌ nitauꞌ deselamat ageꞌ? Sama sekaleꞌ nadai! Uleh tegal penyalah sidaꞌ, jalai selamat tebukaꞌ ngau bansa bukai. Tuhan Allah mulah piyaꞌ isaꞌ sidaꞌ Yahudi iri ke bansa te kebukai. 12 Cuba kita miker, penyalah bansa Yahudi jaꞌ, tauꞌ nyuroh Tuhan Allah mereꞌ tuah te te luar biasa ke kebala bansa bukai. Apa klageꞌ enteꞌ sidaꞌ Yahudi bebalek ke Tuhan Allah abaꞌ nunaꞌ penekaꞌ Ya, pesti berkat te debereꞌ Tuhan Allah jaoh lebeh luar biasa ageꞌ.
13 Entoꞌ ku kaꞌ madah ke kitaꞌ te bukai bansa Yahudi. Ku deutos jadi rasol ngau urang te bukai Yahudi, abaꞌ ku ngasa bangga ngreja tugas ku toꞌ. 14 Ku ngagam apa te ku pulah ke nyaꞌ nyuroh bansa ku iri. Ngau cara nyaꞌ ku tauꞌ nyelamat sidaꞌ kedaꞌ. 15 Enteꞌ tegal bansa Yahudi de tulak Tuhan Allah jaꞌ adai kesempatan ngau bansa bukai bekawan abaꞌ Tuhan Allah, apa klageꞌ pas Tuhan Allah nerimaꞌ bansa Yahudi, nyaꞌ lebeh luar biasa ageꞌ, upa urang mati idop ageꞌ.
16 Enteꞌ selapek ruti te semaru nyaꞌ kudos, ugaꞌ te de adon nyaꞌ kudos gaꞌ. Abaꞌ enteꞌ urat kayu nyaꞌ kudos, ugaꞌ kebala dan kayu nyaꞌ sigeꞌ kudos gaꞌ.e 17 Kebala sidaꞌ Yahudi nyaꞌ kebarat ke kayu saiton te deintu. Dua tiga uteꞌ dan kayu nyaꞌ udah dekempat, abaꞌ de teban te udah dekempat nyaꞌ, Tuhan Allah nyamong dan kayu saiton te nadai deintu, isaꞌ kebala dan kayu nyaꞌ tauꞌ idop galak ari urat kayu saiton te deintu nyaꞌ. Abaꞌ kebala dan kayu te desamong Tuhan Allah nyaꞌ, kitaꞌ te bukai sidaꞌ Yahudi. 18 Uleh nang kitaꞌ sumong abaꞌ miker direꞌ lebeh bayek ari kebala dan kayu te udah dekempat nyaꞌ. Ingat! Ukai kitaꞌ te mereꞌ idop ke urat, uleh urat te mereꞌ idop ke kitaꞌ.
19 Amang adai de entara kitaꞌ te madah, “Kebala dan kayu nyaꞌ dekempat isaꞌ ku tauꞌ desamong ke pon nyaꞌ.” 20 Nyaꞌ amat mah. Uleh sidaꞌ dekempat tegal sidaꞌ nadai pecayaꞌ, abaꞌ kitaꞌ detrimaꞌ tegal kitaꞌ pecayaꞌ. Kebaꞌ nang kitaꞌ sumong, uleh kitaꞌ alah takot ke Tuhan Allah. 21 Nema enteꞌ kebala dan te seli jaꞌ Tuhan Allah nadai reyu muai, Ya nadai gaꞌ reyu muai kitaꞌ.
22 Kebaꞌ nyaꞌ pedaꞌ ke bamat-amat. Tuhan Allah toꞌ bayek, uleh Ya ma mah ketat gaꞌ. Ya ngukom kebala urang te badoꞌ patoh ke Ya. Uleh Ya bayek ke kitaꞌ enteꞌ kitaꞌ selareh pecayaꞌ ke pemayek Ya. Enteꞌ nadai piyaꞌ, kitaꞌ sigeꞌ dekempat Ya. 23 Abaꞌ enteꞌ kebala sidaꞌ Yahudi nadai ageꞌ degel abaꞌ bebalek pecayaꞌ ke Tuhan Allah, Ya kaꞌ nerimaꞌ sidaꞌ ageꞌ. Nema Tuhan Allah bekuasa nyamong sidaꞌ ageꞌ abaꞌ Ya. 24 Kebala menyadeꞌ te bukai bansa Yahudi toꞌ kebarat ke dan kayu saiton te nadai deintu. Enteꞌ kitaꞌ dan kayu saiton te nadai deintu jaꞌ tauꞌ desamong ke pon kayu saiton te deintu, apa klageꞌ kebala sidaꞌ Yahudi te kebarat dan kayu saiton te deintu nyaꞌ. Pesti lebeh mudah Tuhan Allah nyamong sidaꞌ ageꞌ ke pon direꞌ.
Pengaseh Tuhan Allah ngau ugaꞌ ensia
25 Kebala menyadeꞌ, adai kebala utai te dekedekaꞌ Tuhan Allah, uleh bedau deketauꞌ urang. Ku kaꞌ kitaꞌ tauꞌ badaꞌ utai nyaꞌ, isaꞌ kitaꞌ nadai ngangap direꞌ lebeh panai ari urang bukai. Sebagi ari sidaꞌ Yahudi degel ngai pecayaꞌ, abaꞌ sidaꞌ upa piyaꞌ datai ke jatah bansa bukai te datai ke Tuhan Allah lengkap. Enteꞌ jatah nyaꞌ nyau lengkap baroꞌ ugaꞌ sidaꞌ Yahudi pecayaꞌ ke Tuhan Allah. 26 Ngau cara nyaꞌ Tuhan Allah kaꞌ nyelamat ugaꞌ sidaꞌ Yahudi, upa te detules alam Kitab Suci,
“Raja Penyelamat kaꞌ datai ari kuta Sion,
Ya kaꞌ ngapos kebala pemenyaiꞌ pureh Yakob.f
27 Abaꞌ toꞌ mah danyi Ku abaꞌ sidaꞌ,
pas Ku ngampon kebala dusa sidaꞌ.”g
28 Nema sidaꞌ Yahudi ngai nerimaꞌ Brita Bayek ari Tuhan Allah, kebaꞌ sidaꞌ jadi munsoh Ya. Utai nyaꞌ tejadi ngau mukaꞌ jalai ke kitaꞌ te bukai Yahudi isaꞌ deselamat. Uleh sidaꞌ Yahudi tetap mah urang te depileh Tuhan Allah, te ma Ya kaseh nema kebala danyi Ya ke puyang jagang sidaꞌ. 29 Nema enteꞌ Tuhan Allah udah mileh abaꞌ mereꞌ tuah ke urang, Ya nadai ngamoꞌ kaꞌ narek ageꞌ apa te udah debereꞌ Ya. 30 Meliyaꞌ, kitaꞌ te bukai sidaꞌ Yahudi nadai kaꞌ patoh ke Tuhan Allah, uleh entoꞌ Tuhan Allah nganyaꞌ pengaseh Ya ke kitaꞌ nema kebala sidaꞌ Yahudi ngai patoh ke Ya. 31 Piyaꞌ gaꞌ sidaꞌ Yahudi entoꞌ ngai patoh ke Tuhan Allah isaꞌ sidaꞌ nerimaꞌ pengaseh Tuhan Allah sama upa Ya udah nganyaꞌ pengaseh Ya ke kitaꞌ. 32 Tuhan Allah udah ngator isaꞌ ugaꞌ bansa ngasa dejajah dusa abaꞌ ngai patoh ke Tuhan Allah. Ngau cara nyaꞌ, Ya tauꞌ nganyaꞌ pengaseh Ya ke ugaꞌ urang.
33 Lampar mayoh pengaya Tuhan Allah! Pemanai abaꞌ pemenauꞌ Ya aja luar des! Datai ke sikoꞌ mah niseꞌ urang te tauꞌ nyelas apa te Tuhan Allah putos, abaꞌ datai ke sikoꞌ mah niseꞌ urang te nyarok cara kreja Ya.h 34 Upa te detules alam Kitab Suci,
“Sapa piyaꞌ te tauꞌ badaꞌ pemiker Tuhan Allah?
Sapa piyaꞌ te tauꞌ ngajar Ya?i
35 Sapa piyaꞌ urang te gah mereꞌ kebala utai ke Tuhan Allah?
Tuhan Allah niseꞌ berutang ke urang.”
36 Nema peroꞌ Tuhan Allah mah te mulah ugaꞌ utai. Ugaꞌ utai nyaꞌ datai ari Ya abaꞌ ngau Ya. Puji Tuhan Allah te patot dejunyong tingeꞌ belama raya! Amen.