Pesemah ke tuboh kitaꞌ ke Tuhan Allah
12
Kebala menyadeꞌ, Tuhan Allah udah nganyaꞌ pemayek ati Ya ke kita, kebaꞌ nyaꞌ ku bamat-amat mintaꞌ ke kitaꞌ, pesemah ke tuboh kitaꞌ ngau kurban pesemah te idop, te kudos, abaꞌ te nyuroh ati Tuhan Allah gaga. Nyaꞌ mah cara te patot ngau kitaꞌ nyemah Ya. 2 Nang kitaꞌ mulah utai upa te depulah kebala urang de dunia toꞌ, uleh ngaꞌ ke Tuhan Allah maleꞌ pemiker kitaꞌ isaꞌ pemiker kitaꞌ baru. Ngau cara nyaꞌ kitaꞌ tauꞌ badaꞌ apa te dekedekaꞌ Tuhan Allah, utai te bayek, te nyuroh ati Tuhan Allah gaga, abaꞌ te niseꞌ pejah.3 Nema Tuhan Allah udah nganyaꞌ pemayek ati Ya ke ku, ku kaꞌ madah ke ngenap kitaꞌ: Nang kitaꞌ ngangap direꞌ lebeh penteng ari te pengamat. Kitaꞌ alah nilai direꞌ ngau pengamat, nunaꞌ pemesai iman te debereꞌ Tuhan Allah ke ngenap kitaꞌ. 4 Upa medaꞌ kita empu suteꞌ tuboh uleh mayoh anggota, uleh guna ngenap anggota tuboh toꞌ nadai sama. 5 Piyaꞌ mah gaꞌ kita, amat mah kita mayoh, uleh kita suteꞌ tuboh alam Al Maseh. Kita bekayet abaꞌ pangan bukai nema tuboh kita suteꞌ.
6 Ugaꞌ kita adai krunia abaꞌ krunia kita toꞌ bebida. Krunia nyaꞌ debereꞌ Tuhan Allah nunaꞌ pemayek ati Ya ke kita. Enteꞌ krunia kita benubuat, kita alah benubuat nunaꞌ pemesai iman te debereꞌ Tuhan Allah ke kita. 7 Enteꞌ krunia kita ngelayan, kita alah bamat-amat ngelayan. Enteꞌ krunia kita ngajar, kita alah bamat-amat ngajar. 8 Enteꞌ krunia kita ngansak urang, kita alah bamat-amat ngansak urang bukai. Enteꞌ krunia kita mereꞌ, kita alah mereꞌ ngau ati gaga. Enteꞌ krunia kita mimpen, kita alah bamat-amat rajen mimpen urang. Enteꞌ krunia kita mudah mantoꞌ urang, kita alah mantoꞌ urang ngau ati gaga.
Pengajar isaꞌ idop alam kaseh
9 Kaseh ke bamat-amat urang bukai. Kareh ke te jat abaꞌ pegai tegoh ke te bayek. 10 Kitaꞌ alah sama kaseh ke pangan bukai upa ngaseh direꞌ sebilek. Abaꞌ alah sama berusaha dulau hormat ke pangan bukai. 11 Rajen ke kitaꞌ bekerja ngelayan Tuhan, nang kelalah. Isaꞌ mah semangat kitaꞌ bejelau-jelau ngelayan Tuhan. 12 Kitaꞌ alah rinang sengabot, nema kitaꞌ ngagam Tuhan Allah. Kitaꞌ alah sabar enteꞌ kitaꞌ ngasa pemedeh, abaꞌ kitaꞌ alah bradua sengabot. 13 Bantoꞌ ke kebala menyadeꞌ seiman kitaꞌ te perlu debantoꞌ, abaꞌ enteꞌ sidaꞌ perlu teban te jalai bemalam, kitaꞌ alah nyamot sidaꞌ ngau ati gaga.
14 Enteꞌ adai kebala urang te medeh kitaꞌ, pradua ke sidaꞌ isaꞌ Tuhan Allah mereꞌ tuah Ya ke sidaꞌ. Pintaꞌ ke Tuhan Allah isaꞌ Ya mereꞌ tuah ke sidaꞌ, abaꞌ nang mintaꞌ Tuhan Allah ngutok sidaꞌ. 15 Gaga ke kitaꞌ abaꞌ urang te gaga, abaꞌ nyabak ke kitaꞌ abaꞌ urang te nyabak. 16 Kitaꞌ alah idop suteꞌ ati suteꞌ pemiker abaꞌ pangan bukai. Nang sumong, uleh kitaꞌ alah bekawan abaꞌ kebala urang te misken. Abaꞌ nang kitaꞌ ngangap direꞌ lebeh panai ari urang bukai.a
17 Nang malas jat ngau jat, uleh pulah ke kebala utai te deangap urang bayek. 18 Kitaꞌ alah selareh berusaha idop damai abaꞌ ugaꞌ urang. 19 Kebala menyadeꞌ, nang sekaleꞌ-kaleꞌ kitaꞌ malas denam ke urang te mulah penyalah ke kitaꞌ, uleh isaꞌ mah Tuhan Allah te ngukom urang nyaꞌ. Nema alam Kitab Suci Tuhan Allah madah pitoꞌ, “Peroꞌ Ku mah te tauꞌ malas penyalah urang. Ku kaꞌ ngukom sidaꞌ nema apa te udah depulah sidaꞌ.”b 20 Uleh kita alah nunaꞌ apa te udah depadah alam Kitab Suci,
“Enteꞌ munsoh kitaꞌ lapar, bereꞌ ke ya makai.
Enteꞌ ya awos, bereꞌ ke ya nginom.
Nema enteꞌ kitaꞌ mulah piyaꞌ,
kitaꞌ kaꞌ nyuroh ya ngasa malu.”cd
21 Nang kitaꞌ kalah uleh te jat, uleh kalah ke te jat nyaꞌ ngau te bayek.