Patoh ke pemrintah
13
Ngenap urang alah patoh ke pemrintah, nema niseꞌ pejabat pemrintah te tauꞌ dudok mrintah enteꞌ nadai desadi Tuhan Allah. Abaꞌ ngenap pejabat pemrintah te merintah entoꞌ nyaꞌ udah deatoh Tuhan Allah. 2 Kebaꞌ nyaꞌ urang te ngelawan pemrintah, breti ya ngelawan te udah deatoh Tuhan Allah. Abaꞌ urang te mulah piyaꞌ kaꞌ nyuroh direꞌ deukom. 3 Urang te mulah utai te kenaꞌ nadai perlu takot ke pejabat pemrintah. Peroꞌ urang te mulah te jat mah te alah takot ke sidaꞌ. Enteꞌ kitaꞌ ngai ngasa takot ke sidaꞌ, pulah ke te kenaꞌ. Nema enteꞌ kitaꞌ mulah piyaꞌ sidaꞌ kaꞌ muji kitaꞌ.4 Kebala pejabat pemrintah nyaꞌ pelayan Tuhan Allah te kreja nguros kebala utai te kitaꞌ perlu. Uleh enteꞌ kitaꞌ mulah te jat, patot kitaꞌ takot ke sidaꞌ, nema sidaꞌ adai kuasa ngukom urang. Pejabat pemrintah nyaꞌ pelayan Tuhan Allah te debereꞌ kuasa ngukom urang te mulah te jat. 5 Kebaꞌ nyaꞌ kitaꞌ alah patoh ke pejabat pemrintah, nadai peroꞌ tegal kitaꞌ takot deukom, uleh nema ati nurani kitaꞌ kedireꞌ tauꞌ badaꞌ enteꞌ te kitaꞌ pulah ke nyaꞌ utai te kenaꞌ.
6 Nyaꞌ mah gaꞌ te nyuroh kitaꞌ alah mayar pajak. Nema kebala pejabat pemrintah toꞌ pelayan Tuhan Allah aba sidaꞌ perlu degajeh, nema sidaꞌ udah ngreja tugas sidaꞌ. 7 Kebaꞌ nyaꞌ bayar ke pejabat pemrintah utai te alah kitaꞌ bayar ke sidaꞌ. Bayar ke pajak te alah kitaꞌ bayar ke sidaꞌ, abaꞌ hormat ke urang te patot dehormat.
Kaseh ke sama direꞌ nyaꞌ dasar ugaꞌ Prator Tuhan Allah te detules Musa
8 Nang kitaꞌ berutang ke pangan bukai. Enteꞌ kitaꞌ berutang kitaꞌ alah mayar utang kitaꞌ nyaꞌ. Uleh te paleng penteng kitaꞌ alah kaseh ke pangan bukai. Angap jaꞌ kitaꞌ adai utang kaseh ke pangan bukai te alah selareh kitaꞌ bayar. Nema urang te kaseh ke pangan bukai udah nunaꞌ Prator Musa. 9 Alam Prator Musa depadah, “Nang besinah, nang munoh, nang encuri, abaꞌ nang cerat ke utai urang.”a Ugaꞌ printah nyaꞌ abaꞌ printah te ke bukai udah desuteꞌ alam printah toꞌ, “Kaseh ke sama direꞌ upa ngaseh direꞌ kedireꞌ.”b Printah toꞌ jadi dasar ugaꞌ Prator Musa. 10 Enteꞌ urang kaseh ke sama direꞌ, ya nadai kaꞌ mulah te jat ke urang bukai. Urang te kaseh ke sama direꞌ, breti urang nyaꞌ udah nunaꞌ ugaꞌ Prator Musa.
11 Ku madah piyaꞌ nema kita toꞌ idop de waktu te ma genteng. Entoꞌ nyau mah senta kitaꞌ angkat ari peninok. Nema senta Tuhan Allah nyelamat kita nyau semak enteꞌ baneng ke semaru kita belaboh pecayaꞌ ke Isa Al Maseh. 12 Malam nyau kaꞌ mes, abaꞌ stegal ageꞌ ari tawas. Kebaꞌ nyaꞌ jadi kitaꞌ mulah kebala utai te jat te datai ari teban te petang. Abaꞌ kita alah nyiap direꞌ ngau kebala alat perang te datai ari teban te tampak, ngau kitaꞌ ngelawan kebala utai te jat. 13 Kita alah idop bayek upa te depulah kebala urang te diyau de teban te tampak. Nang beibor-yor mulah utai te nadai senunoh, nang nginom mabok, nang kanyi, nang baraꞌ, nang belayaꞌ abaꞌ nang iri ke pangan bukai. 14 Uleh isaꞌ mah Tuhan Isa Al Maseh te ngatoh apa te alah kitaꞌ pulah. Abaꞌ nang miker kati cara muas penekaꞌ ati kitaꞌ te jat.