Nang nyalah pangan bukai
14
Bayek-bayek ke kitaꞌ nerimaꞌ urang te lemah iman, abaꞌ nang betengek abaꞌ sidaꞌ te bida pemiker abaꞌ kitaꞌ. 2 Adai urang te pecayaꞌ enteꞌ ya tauꞌ makai apa jaꞌ. Uleh adai urang bukai te lemah iman, ya ngasa enteꞌ ya peroꞌ tauꞌ makai kebala utai rebos. 3 Urang te makai apa jaꞌ, nitauꞌ menadai urang te peroꞌ makai kebala utai rebos. Piyaꞌ gaꞌ urang te makai kebala utai rebos, nitauꞌ nyalah urang te makai apa jaꞌ. Nema Tuhan Allah udah nerimaꞌ urang nyaꞌ. 4 Cuntoh, kitaꞌ nitauꞌ nyalah ulon urang bukai. Peroꞌ tuan ya kedireꞌ mah te tauꞌ mutos ya bekreja bayek sekaleꞌ ke nadai. Uleh ya kaꞌ brasel alam kreja ya, nema Tuhan talah nyuroh ya brasel.5 Adai urang te ngangap adai ari te ma penteng debaneng ke ari te kebukai, uleh adai gaꞌ te ngangap ugaꞌ ari toꞌ sama mah. Ngenap urang alah yaken enteꞌ apa te ya piker ke nyaꞌ kenaꞌ. 6 Urang te ngangap adai ari te ma penteng debaneng ke ari te kebukai, urang nyaꞌ mulah piyaꞌ ngau Tuhan. Urang te makai apa jaꞌ, urang nyaꞌ mulah piyaꞌ ngau Tuhan, nema ya besukor ke Tuhan Allah. Abaꞌ urang te nadai makai apa jaꞌ, urang nyaꞌ mulah piyaꞌ ngau Tuhan, abaꞌ ya besukor gaꞌ ke Tuhan Allah.
7 Nema datai ke sikoꞌ mah de entara kita niseꞌ te idop ngau direꞌ kedireꞌ, abaꞌ mati ngau direꞌ kedireꞌ. 8 Enteꞌ kita idop, kita idop ngau Tuhan, abaꞌ enteꞌ kita mati, kita mati ngau Tuhan. Bayek idop, bayek mati, kita toꞌ empu Tuhan. 9 Nyaꞌ mah te nyuroh Isa mati abaꞌ idop ageꞌ, isaꞌ Ya jadi Tuhan ugaꞌ urang, bayek Tuhan kebala urang te idop, bayek Tuhan kebala urang te mati.
10 Kebaꞌ nyaꞌ, nang kitaꞌ nyalah menyadeꞌ seiman kitaꞌ. Kitaꞌ nadai patot mulah piyaꞌ. Abaꞌ nang kitaꞌ menadai kebala menyadeꞌ seiman kitaꞌ te kebukai. Nema ugaꞌ kita kaꞌ diri ngadap Tuhan Allah abaꞌ Ya mah te kaꞌ nyidang kita. 11 Upa te detules alam Kitab Suci,
“Tuhan Allah madah, ‘Demi Ku te idop, Ku bedanyi,
ugaꞌ urang kaꞌ nyungkon nyemah de mua Ku,
abaꞌ ngenap urang kaꞌ ngakoꞌ enteꞌ Ku mah Tuhan Allah.’ ”a
12 Kebaꞌ nyaꞌ ngenap kita kaꞌ nyelas ke Tuhan Allah ugaꞌ utai te udah kita pulah.
Nang mulah utai te nyuroh urang bukai laboh alam dusa
13 Kebaꞌ nyaꞌ nang kitaꞌ nyalah pangan bukai. Uleh kitaꞌ alah berusaha bepiker pitoꞌ: Nang sampai kitaꞌ mulah utai te nyuroh menyadeꞌ seiman kitaꞌ laboh alam dusa. 14 Ku tauꞌ badaꞌ abaꞌ ku yaken alam Tuhan Isa, niseꞌ pemakai te nitauꞌ depakai. Uleh enteꞌ adai menyadeꞌ seiman kita te ngangap adai pemakai te nitauꞌ depakai, breti ya nitauꞌ mah makai pemakai nyaꞌ.
15 Uleh enteꞌ kitaꞌ sengaja makai pemakai te deangap kebala menyadeꞌ seiman kitaꞌ nitauꞌ depakai, kitaꞌ medeh ati sidaꞌ abaꞌ nyaꞌ breti kitaꞌ nadai ageꞌ idop alam kaseh. Ingat! Isa Al Maseh udah mati ngau sidaꞌ gaꞌ, kebaꞌ nang kitaꞌ ngerusak iman sidaꞌ tegal kitaꞌ makai pemakai te deangap sidaꞌ nitauꞌ depakai. 16 Kebaꞌ nyaꞌ nang ngengaꞌ apa te kitaꞌ angap bayek, deangap nadai bayek uleh menyadeꞌ seiman kita te ke bukai. 17 Nema bagi kita te idop alam Pemrintah Tuhan Allah, utai te depakai abaꞌ utai te deinom nyaꞌ nadai penteng. Uleh te penteng idop kenaꞌ de mua Tuhan Allah, idop penoh damai abaꞌ ati selareh gaga. Kita tauꞌ ngasa ugaꞌ nyaꞌ nema Roh Kudos bekreja alam idop kita. 18 Sapa jaꞌ te ngelayan Al Maseh ngau cara upa nyaꞌ, urang nyaꞌ ngasoh ati Tuhan Allah gaga, abaꞌ ya dehormat urang bukai.
19 Kebaꞌ nyaꞌ kita alah selareh berusaha mulah utai te tauꞌ nyuroh urang idop damai abaꞌ mulah utai te tauꞌ nalau urang bukai isaꞌ sidaꞌ kuat alam iman. 20 Nang ngerusak apa te udah Tuhan Allah kreja tegal pemakai. Ugaꞌ pemakai tauꞌ depakai. Uleh enteꞌ tegal pemakai kitaꞌ nyuroh urang bukai laboh alam dusa, kitaꞌ salah! 21 Lebeh bayek kitaꞌ nadai makai kebala utai te deidop, nadai nginom beram arak, abaꞌ nadai mulah kebala utai, enteꞌ utai nyaꞌ nyuroh kebala menyadeꞌ seiman kitaꞌ laboh alam dusa.
22 Apa te kitaꞌ pecayaꞌ nyaꞌ peroꞌ kitaꞌ abaꞌ Tuhan Allah mah te tauꞌ badaꞌ. Kitaꞌ baroꞌ bamat-amat ngasa gaga enteꞌ kitaꞌ nadai nyalah direꞌ pas kitaꞌ mulah apa te menurot kitaꞌ kenaꞌ. 23 Uleh enteꞌ kitaꞌ ageꞌ tubah gamaꞌ tauꞌ nadai kitaꞌ makai pemakai nyaꞌ, uleh kitaꞌ makai, kitaꞌ desalah Tuhan Allah. Nema kitaꞌ nadai yaken te kitaꞌ pulah ke nyaꞌ kenaꞌ. Abaꞌ ugaꞌ utai te kitaꞌ pulah enteꞌ kitaꞌ nadai pecayaꞌ nyaꞌ kenaꞌ, kitaꞌ dusa.