Urang te kuat iman abaꞌ urang te lemah iman
15
Kita te kuat iman alah nulong sidaꞌ te lemah iman abaꞌ nang kita peroꞌ mulah utai te nyuroh direꞌ gaga. 2 Uleh kita alah berusaha nyuroh ati pangan bukai gaga, isaꞌ sidaꞌ betamah kuat pecayaꞌ. 3 Nema jalai Al Maseh idop de dunia toꞌ, Ya nadai mulah utai te nyuroh Direꞌ gaga. Alam Kitab Masmor detules “O Tuhan Allah jalai urang mejaiꞌ Wan, ku ngasa sidaꞌ mejaiꞌ ku gaꞌ.”a 4 Ugaꞌ te detules alam Kitab nyaꞌ detules ngau ngajar kita. Ari Kitab Masmor toꞌ kita belajar tabah abaꞌ kuat ngadap kebala utai abaꞌ ngagam Tuhan Allah te selareh nulong. 5 Ku bradua engkremaꞌ Tuhan Allah te nyuroh ensia tabah abaꞌ kuat, nulong kitaꞌ isaꞌ kitaꞌ idop sati, upa te dekedekaꞌ Isa Al Maseh, 6 isaꞌ ugaꞌ kitaꞌ sati sepiker muji Tuhan Allah, Apai Tuhan kita Isa Al Maseh.7 Kebaꞌ nyaꞌ kitaꞌ alah bamat-amat nerimaꞌ pangan bukai alam ati kitaꞌ, sama upa Al Maseh udah bamat-amat nerimaꞌ kitaꞌ alam ati Ya. Pulah ke nyaꞌ isaꞌ Tuhan Allah dejunyong tingeꞌ. 8 Ku madah piyaꞌ nema Al Maseh udah jadi ulon ngelayan sidaꞌ Yahudi ngau nunyok enteꞌ Tuhan Allah toꞌ setia nepat danyi Ya ke puyang jagang kita. 9 Isa mulah piyaꞌ gaꞌ isaꞌ kebala bangsa bukai nyunyong tingeꞌ Tuhan Allah nema pengaseh Ya ke sidaꞌ. Alam Kitab Suci detules pitoꞌ,
“Kebaꞌ nyaꞌ ku kaꞌ muji Wan de entara kebala bansa,
abaꞌ ku kaꞌ menanyi lagu ngau muji nama Wan.”b
10 Adai gaꞌ detules pitoꞌ,
“O kebala bansa, gaga ke kitaꞌ abaꞌ urang te deempu Tuhan Allah.”c
11 Abaꞌ adai detules pitoꞌ,
“O kebala bansa, puji ke Tuhan Allah!
Ugaꞌ urang alah muji Tuhan Allah.”d
12 Abaꞌ nabi Yesaya madah gaꞌ,
“Sikoꞌ Urang ari pureh Isai kaꞌ datai
abaꞌ Ya kaꞌ bangket mrintah kebala bansa,
abaꞌ Ya mah te kaꞌ deagam kebala bansa.”e
13 Kebaꞌ nyaꞌ ku bradua ke kitaꞌ, engkremaꞌ Tuhan Allah te kita agam nyaꞌ, mereꞌ kitaꞌ pengaga abaꞌ idop penoh damai nema kitaꞌ pecayaꞌ ke Ya. Ngau cara nyaꞌ Roh Kudos kaꞌ nyuroh kitaꞌ empala yaken enteꞌ Tuhan Allah nepat danyi Ya.
Paulos nusoi kati cara ya ngelayan
14 Kebala menyadeꞌ ku, ku yaken enteꞌ kitaꞌ toꞌ ma bayek, kitaꞌ mayoh amat pemenauꞌ abaꞌ kitaꞌ tauꞌ ngajar urang bukai. 15 Uleh amat piyaꞌ, alam surat toꞌ ku udah teros terang nules kebala utai ngau ngingat kitaꞌ. Ku mulah nyaꞌ tegal pemayek ati Tuhan Allah te udah debereꞌ Ya ke ku, 16 isaꞌ ku jadi pelayan Isa Al Maseh ngau kebala bansa te bukai Yahudi. Ku ngelayan upa imam madah Brita Bayek Tuhan Allah ke sidaꞌ, isaꞌ sidaꞌ jadi pesemah te tauꞌ detrimaꞌ Tuhan Allah, nema udah dekusos Roh Kudos.
17 Nema ku udah suteꞌ abaꞌ Isa Al Maseh, nyaꞌ te nyuroh ku uleh ke pengaga ngelayan Tuhan Allah. 18 Ku nadai berani ngepah-ngemah direꞌ. Ku peroꞌ berani becakap ke kebala utai te udah dekreja Al Maseh ari ku, isaꞌ ku tauꞌ mimpen kebala bansa te bukai Yahudi patoh ke Tuhan Allah ngau apa te ku padah abaꞌ te ku pulah. 19 Sidaꞌ patoh ke Tuhan Allah nema Roh Kudos nunyok kuasa Ya ari ku, nyaꞌ nyuroh kebala tana te nyaroh abaꞌ kebala utai te luar biasa mayoh tejadi. Abaꞌ Brita Bayek sapa Al Maseh nyaꞌ udah ku tusoi ugaꞌ mah ke kebala urang, belaboh ari kuta Yerosalem datai ke dairah Ilirikom. 20 Penekaꞌ ati ku, ku selareh madah Brita Bayek de teban urang te bedau kalaꞌ ninga sapa Al Maseh nyaꞌ. Ku mulah piyaꞌ nema ku ngai nyamong kreja te udah dedudok urang bukai. 21 Utai nyaꞌ munyi te detules alam Kitab Suci,
“Kebala urang te bedau kalaꞌ nerimaꞌ Brita sapa Ya nyaꞌ, kaꞌ medaꞌ Ya,
abaꞌ kebala urang te bedau kalaꞌ ninga sapa Ya nyaꞌ, kaꞌ nyarok.”f
Paulos ngamoꞌ kaꞌ ke Ruma
22 Tugas ku de kebala dairah te kebukai nyuroh ku sibok, abaꞌ nyaꞌ mah gaꞌ te gah ngaral ku ngunyong kitaꞌ. 23 Uleh entoꞌ, udah mah deh kreja ku de kebala dairah nyaꞌ. Nyau betaon-taon ku kaꞌ amat ngunyong kitaꞌ. 24 Asa ku mansaꞌ kuta kitaꞌ alam pejalai ku ke Spanyol lah, ku ngagam kita betemu abaꞌ ku tauꞌ merama dua tiga mingu abaꞌ kitaꞌ diyaꞌ ngau ati gaga. Udah nyaꞌ ku ngagam kitaꞌ tauꞌ nalau pejalai ku ke Spanyol.
25 Uleh entoꞌ ku ageꞌ tengan de jalai mansang ke Yerosalem kaꞌ nganyong duet te ngau mantoꞌ urang te deempu Tuhan Allah den. 26 Nema kebala jemat de Makedonia abaꞌ Akhaya udah mutos enteꞌ sidaꞌ kaꞌ nyumang duet ke kebala urang te misken de entara urang te deempu Tuhan Allah de Yerosalem. 27 Kebala jemat de Makedonia abaꞌ Akhaya mulah nyaꞌ ngau ati gaga, uleh bukai ari nyaꞌ sidaꞌ berutang ke sidaꞌ Yahudi, nema sidaꞌ udah buleh Berkat Rohani ari sidaꞌ Yahudi. Entoꞌ sidaꞌ kaꞌ mantoꞌ sidaꞌ Yahudi ngau cara ngirem duet sidaꞌ de ku. 28 Enteꞌ ku udah ngreja tugas ku nyaꞌ abaꞌ udah nyerah duet te desumang nyaꞌ, ku angkat ke Spanyol mansaꞌ kuta kitaꞌ. 29 Ku yaken pas ku datai ngunyong kitaꞌ lah, ku datai abaꞌ magi mayoh berkat ari Al Maseh ke kitaꞌ.
30 Kebala menyadeꞌ, ku mintaꞌ bantoꞌ kitaꞌ bradua ke tugas ku. Pulah ke nyaꞌ nema kita nyau suteꞌ abaꞌ Tuhan kita Isa Al Maseh abaꞌ Roh Kudos nyuroh kita talah ngaseh pangan bukai. 31 Pradua ke gaꞌ isaꞌ ku selamat ari kebala urang te nadai pecayaꞌ de Yudia, abaꞌ isaꞌ duet te desumang te ku baiꞌ ke Yerosalem detrimaꞌ bayek uleh kebala urang te deempu Tuhan Allah den. 32 Abaꞌ udah ku mulah ugaꞌ nyaꞌ lah, enteꞌ Tuhan Allah nyadi, ku tauꞌ datai ngusong kitaꞌ ngau ati gaga, abaꞌ ku tauꞌ belepa abaꞌ ngasa pemiker ku nyamai nema ku tauꞌ ngunyong kitaꞌ. 33 Ku bradua engkremaꞌ Tuhan Allah mereꞌ idop penoh damai ke kitaꞌ! Amen.