Kirem tabeꞌ abaꞌ pesau ari Paulos
16
Kebala menyadeꞌ, ku kaꞌ ngelala ke kitaꞌ menyadeꞌ kita te inoꞌ nama ya Pibi, ya urang te bayek abaꞌ ya mantoꞌ ngelayan jemat te adai de Kingkria. 2 Trimaꞌ bayek ke ya nema ya udah pecayaꞌ ke Tuhan sama upa kitaꞌ. Trimaꞌ bayek ke ya nema upa piyaꞌ mah sikap urang pecayaꞌ abaꞌ urang bukai. Bantoꞌ ke ya enteꞌ ya perlu bantoꞌ kitaꞌ, nema ya kedireꞌ udah mayoh mantoꞌ urang, temasok ku kedireꞌ.3 Padah ke kirem tabeꞌ ku ke Priskila abaꞌ laki ya Akwila. Senikoꞌ udah bekreja sama abaꞌ ku ngelayan Isa Al Maseh. 4 Senikoꞌ nyaꞌ nyares mati tegal nyelamat idop ku. Ku aja ma mah betrimaꞌ kaseh ke senikoꞌ, abaꞌ nadai peroꞌ ku jaꞌ te betrimaꞌ kaseh, uleh ugaꞌ jemat te bukai bansa Yahudi betrimaꞌ kaseh gaꞌ ke senikoꞌ. 5 Padah ke gaꞌ kirem tabeꞌ ku ke jemat te kumpol de rumah sidaꞌ.
Kirem tabeꞌ ke Epenetos te ku kaseh. Ya mah urang te semaru pecayaꞌ ke Al Maseh de propinsi Asia. 6 Kirem tabeꞌ gaꞌ ke Maria. Ya udah brunteꞌ kreja ngau kitaꞌ. 7 Padah ke gaꞌ kirem tabeꞌ ku ke Andrunikos abaꞌ Yunia. Senikoꞌ nyaꞌ sebansa abaꞌ ku, abaꞌ gah depenyara abaꞌ ku. Sebedau ku pecayaꞌ ke Al Maseh, senikoꞌ dulau ari ku pecayaꞌ. Abaꞌ senikoꞌ ma mah dehormat de entara kebala rasol.
8 Kirem tabeꞌ ke Ampliatos, kawan ku te ku kaseh alam Tuhan. 9 Kirem tabeꞌ ke Urbanos, kawan kreja kami te sama ngelayan Al Maseh, abaꞌ kirem tabeꞌ gaꞌ ke Stakis, kawan ku te ku kaseh. 10 Kirem tabeꞌ ke Apeles. Ya udah nunyok enteꞌ ya setia ke Al Maseh. Padah ke gaꞌ kirem tabeꞌ ku ke ugaꞌ urang te adai de rumah Aristubulos. 11 Kirem tabeꞌ ke Herodion, menyadeꞌ sebansa ku. Abaꞌ kirem tabeꞌ gaꞌ ke kebala menyadeꞌ seiman ku te adai de rumah Narkisos.
12 Kirem tabeꞌ ke Tripena abaꞌ Tripusa. Senikoꞌ nyaꞌ bruntek kreja ngelayan Tuhan. Kirem tabeꞌ gaꞌ ke Persis, kawan te inoꞌ te ku kaseh. Ya sigeꞌ brunteꞌ gaꞌ kreja ngelayan Tuhan. 13 Kirem tabeꞌ ke Rupos, ya nyaꞌ urang te depileh Tuhan. Abaꞌ padah ke gaꞌ kirem tabeꞌ ku ke inai ya, te udah ku angap upa inai ku kedireꞌ. 14 Kirem tabeꞌ ke Asinkritos, Pligon, Hermes, Patrobas, Hermas, abaꞌ kebala menyadeꞌ seiman te kebukai te adai abaꞌ sidaꞌ. 15 Padah ke gaꞌ kirem tabeꞌ ku ke Pilologos, Yulia, Olimpas, Nereus abaꞌ menyadeꞌ inoꞌ ya, abaꞌ ugaꞌ kebala menyadeꞌ seiman te kebukai te adai abaꞌ sidaꞌ.
16 Kebala menyadeꞌ, betabeꞌ ngau penoh kaseh ke ugaꞌ kitaꞌ abaꞌ sama direꞌ urang pecayaꞌ. Ugaꞌ jemat Al Maseh kirem tabeꞌ ke kitaꞌ.
Pesau te pemadoꞌ
17 Kebala menyadeꞌ, ku aja bamat-amat mintaꞌ ke kitaꞌ isaꞌ kitaꞌ ati-ati abaꞌ sidaꞌ te tauꞌ ngasoh kitaꞌ pecah belah. Sidaꞌ ngerusak pecayaꞌ kitaꞌ ke Tuhan abaꞌ ngelawan pengajar te kenaꞌ te udah kitaꞌ trimaꞌ. Jaoh ke ari kebala sidaꞌ nyaꞌ. 18 Nema kebala sidaꞌ nyaꞌ nadai ngelayan Al Maseh, Tuhan kita, uleh sidaꞌ peroꞌ mulah utai te nyuroh ati direꞌ gaga. Ngau mulot sidaꞌ te blemak, sidaꞌ ngemulaꞌ kebala urang te nitauꞌ badaꞌ utai. 19 Ugaꞌ urang udah ninga enteꞌ kitaꞌ jemat te adai de Ruma, ma mah patoh ke Tuhan Isa, kebaꞌ ku aja ma mah gaga. Uleh ku mintaꞌ isaꞌ kitaꞌ panai mileh apa te bayek abaꞌ breseh ari ugaꞌ utai te jat. 20 Tuhan Allah te mereꞌ idop penoh damai ke ensia, kaꞌ nepoꞌ Ibles kepalaꞌ bala Sitan de baroh kuasa kitaꞌ abaꞌ kitaꞌ kaꞌ ngancor ya.
Kebala menyadeꞌ, ku bradua engkremaꞌ Tuhan kita Isa Al Maseh selareh nganyaꞌ pemayek ati Ya ke kitaꞌ.
21 Timutios, kawan kreja ku, kirem tabeꞌ ke kitaꞌ. Piyaꞌ gaꞌ kebala menyadeꞌ sebansa ku Lukios, Yason, abaꞌ Sosipater, sidaꞌ kirem tabeꞌ gaꞌ ke kitaꞌ.
22 Kirem tabeꞌ alam Tuhan, ari ku, Tertios, te nules surat Paulos toꞌ. Ku nules surat toꞌ nunaꞌ te depadah Paulos.
23 Gayos, urang te udah mukaꞌ pintu rumah ya jalai ku diyau abaꞌ mukaꞌ pintu rumah ya ngau jemat kumpol, kirem tabeꞌ ke kitaꞌ. Erastos bendahara kuta toꞌ abaꞌ Kuartos menyadeꞌ seiman kita, kirem tabeꞌ gaꞌ ke kitaꞌ.
[ 24 Kebala menyadeꞌ, ku bradua engkremaꞌ Tuhan kita Isa Al Maseh selareh nganyaꞌ pemayek ati Ya ke kitaꞌ. Amen.]
Pemadoꞌ surat
25 Puji Tuhan Allah! Ya mah te bekuasa nyuroh iman kitaꞌ kuat ari Brita Bayek Isa Al Maseh te ku tusoi. Brita Bayek toꞌ nyelas utai te kenaꞌ te bedau deketauꞌ uleh urang turon menuron. 26 Uleh entoꞌ, utai te kenaꞌ nyaꞌ udah deanyaꞌ ke kita. Toꞌ tejadi nunaꞌ te deprintah Tuhan Allah ke kebala nabi Ya isaꞌ sidaꞌ nules alam Kitab Suci. Entoꞌ Brita Bayek nyaꞌ udah deanyaꞌ ke ugaꞌ bansa isaꞌ ugaꞌ bansa pecayaꞌ abaꞌ patoh ke Ya. Ya mah Tuhan Allah te jong idop sengabot, 27 abaꞌ Ya mah sikoꞌ-ikoꞌ Tuhan Allah te lampar panai. Kita patot muji Ya sengabot nema apa te udah depulah Isa Al Maseh! Amen.