Isa gemala te bayek
10
Isa madah ke urang banyau, jakoꞌ Ya, “Ku kaꞌ madah ngau pengamat ke kitaꞌ, enteꞌ adai urang te kaꞌ tamaꞌ ke alam pagar dumba ngau cara nikeꞌ pagar nadai ari pintu, urang te piyaꞌ pencuri abaꞌ perampok; 2 uleh urang te tamaꞌ ari pintu, ya mah gemala dumba. 3 Baroꞌ penyaga pintu pagar nyaꞌ mukaꞌ pintu ke gemala dumba. Kebala dumba ninga goꞌ gemala sidaꞌ ngumai nama sidaꞌ sikoꞌ-sikoꞌ abaꞌ ya ngemaiꞌ sidaꞌ kluar. 4 Udah gemala ngemaiꞌ kebala dumba ya kluar, ya slareh bejalai de mua sidaꞌ abaꞌ sidaꞌ nrudi ya, nema sidaꞌ nglala goꞌ ya. 5 Uleh kebala dumba nyaꞌ pesti ngai nrudi urang te nadai deklala. Sidaꞌ empala rari ari urang nyaꞌ, nema sidaꞌ nadai nglala goꞌ ya.”6 Isa nusoi kisah empama nyaꞌ ke sidaꞌ, uleh sidaꞌ nadai nyarok apa te demaksot Isa ari kisah nyaꞌ.
7 Kebaꞌ nyaꞌ, Isa madah ageꞌ, “Ku kaꞌ madah ngau pengamat ke kitaꞌ, Ku mah pintu te ngau dumba tamaꞌ. 8 Ngenap urang te dulau datai ari Ku nyaꞌ pencuri abaꞌ perampok. Sidaꞌ kaꞌ ngumai kebala dumba uleh kebala dumba ngai ninga sidaꞌ. 9 Ku mah pintu, urang te tamaꞌ ari Ku kaꞌ slamat. Abaꞌ Ku kaꞌ nyaga sidaꞌ isaꞌ sidaꞌ tauꞌ kluar tamaꞌ pagar abaꞌ buleh rumpot depakai. 10 Pencuri datai proꞌ kaꞌ encuri, munoh, abaꞌ ngancor. Uleh Ku datai mreꞌ kitaꞌ idop. Nyaꞌ mah idop te penoh berkat.
11 Ku mah gemala te bayek. Gemala te bayek kaꞌ nyerah idop ngau kebala dumba Ya. 12 Uleh urang te deupah ngintu dumba te ukai gemala abaꞌ te ukai empu kebala dumba nyaꞌ, enteꞌ medaꞌ serigala datai, ya rari nudi kebala dumba. Kebaꞌ adai dumba te kenaꞌ tangkap serigala abaꞌ kebala dumba te kebukai rari pamar piyar. 13 Urang te deupah ngintu dumba nyaꞌ rari nema ya proꞌ kreja isaꞌ buleh upah. Ya nadai iboh kebala dumba nyaꞌ. 14 Ku mah gemala te bayek abaꞌ Ku nglala kebala dumba Ku abaꞌ kebala dumba Ku nglala Ku. 15 Sama upa Apai nglala Ku abaꞌ Ku nglala Apai, abaꞌ Ku kaꞌ nyerah idop ngau nyelamat kebala dumba Ku. 16 Ageꞌ adai kebala dumba empu Ku te kebukai te nadai de pagar toꞌa. Kebala dumba nyaꞌ alah Ku baiꞌ abaꞌ sidaꞌ kaꞌ ninga goꞌ Ku. Kebaꞌ ugaꞌ sidaꞌ kaꞌ jadi suteꞌ klumpok, abaꞌ gemala sidaꞌ sikoꞌ mah. 17 Apai Ku kaseh ke Ku, nema Ku kaꞌ nyerah idop Ku isaꞌ Ku tauꞌ idop ageꞌ. 18 Niseꞌ urang te tauꞌ ngameꞌ idop Ku. Uleh Ku mah te kaꞌ nyerah direꞌ. Ku bekuasa nyerah idop Ku, abaꞌ Ku bekuasa gaꞌ ngameꞌ idop Ku ageꞌ. Nyaꞌ mah te desuroh Apai Ku ke Ku.”
19 Ninga Isa madah piyaꞌ, kebala sidaꞌ Yahudi betengek abaꞌ sama direꞌ. 20 Adai sidaꞌ te madah, “Ya desarong sitan abaꞌ gila; engkapaꞌ kitaꞌ ninga Ya?” 21 Uleh adai gaꞌ te kebukai madah, “Urang te desarong sitan nitauꞌ madah kebala utai te piyaꞌ. Sitan nitauꞌ nyuroh urang te butaꞌ tauꞌ medaꞌ.”
Kebala sidaꞌ Yahudi ngai nrimaꞌ Isa
22 Nadai lamaꞌ udah nyaꞌ, de Yerosalem kebala urang tengan ngeraya ari besai ngudos Rumah Kudos Tuhan Allah.b Tengan nyaꞌ rama celap. 23 Isa tengan nyaꞌ bejalai de teban te dasebot ruai Salomo te de Rumah Kudos Tuhan Allah. 24 Baroꞌ kebala sidaꞌ Yahudi datai begugoꞌ ngelileng Isa abaꞌ madah ke Ya, “Ngapa Wan jong bedau madah direꞌ ke kami sapa Wan? Enteꞌ Wan amat Al Maseh padah jaꞌ ke kami.” 25 Baroꞌ Isa nyawot sidaꞌ, “Udah Ku madah ke kitaꞌ, uleh kitaꞌ te ngai pecayaꞌ. Kebala kreja te Ku pulah ngau kuasa Apai Ku, nyaꞌ mah ngau bukti tentang Ku, 26 uleh kitaꞌ nadai pecayaꞌ, nema kitaꞌ ukai kebala dumba Ku. 27 Kebala dumba Ku pesti ninga goꞌ Ku. Ku nglala sidaꞌ abaꞌ sidaꞌ slareh nrudi Ku, 28 abaꞌ Ku ngasoh sidaꞌ tauꞌ jong idop abaꞌ Tuhan Allah sengabot. Sidaꞌ pesti nadai jong mati abaꞌ niseꞌ urang te tauꞌ ngerampas sidaꞌ ari Ku. 29 Apai Ku, te mreꞌ sidaꞌ ke Ku. Ya lebeh besai ari kebala utai, abaꞌ datai ke sikoꞌ niseꞌ urang tauꞌ ngerampas sidaꞌ ari Apai. 30 Ku abaꞌ Apai toꞌ suteꞌ mah.”
31 Ninga piyaꞌ, skaleꞌ ageꞌ kebala sidaꞌ Yahudi ngameꞌ batu ngau nikam Isa. 32 Uleh Isa madah ke sidaꞌ, “Kitaꞌ udah medaꞌ Ku mayoh mulah kreja bayek, te datugas Apai ke Ku. Ari ugaꞌ kreja nyaꞌ, ni bah te ngasoh kitaꞌ kaꞌ nikam Ku?” 33 Baroꞌ kebala sidaꞌ Yahudi nyaꞌ nyawot Isa, “Nadai tegal kebala kreja Wan te bayek nyaꞌ, kami kaꞌ nikam Wan ngau batu, uleh tegal Wan mlicak Tuhan Allah.c Wan toꞌ ensia biasa, kaꞌ nyama direꞌ ke Tuhan Allah.” 34 Baroꞌ Isa nyawot, “Kitaꞌ udah tauꞌ badaꞌ alam Kitab Suci madah, ‘Ugaꞌ kitaꞌ toꞌ anak Tuhan Allah te Ma besai, abaꞌ gaya idop kitaꞌ toꞌ upa Ya.’d 35 Amat mah te depadah Kitab Suci. Enteꞌ Tuhan Allah nyebot kebala urang te nrimaꞌ pemadah Ya ngau anak Ya, 36 nang kitaꞌ miker Ku mlicak Tuhan Allah ninga Ku madah, ‘Ku toꞌ Anak Tuhan Allah.’ Ku mah te dapileh abaꞌ dautos Apai ke dunia toꞌ. 37 Enteꞌ Ku nadai mulah kebala te de kreja Apai Ku, adu mah pecayaꞌ ke Ku. 38 Uleh enteꞌ Ku mulah kreja Apai Ku, abaꞌ kitaꞌ ngai mah pecayaꞌ ke Ku, senadai-nadai kitaꞌ pecayaꞌ te ku kreja ke nyaꞌ ari Apai Ku. Ngau cara nyaꞌ, kitaꞌ tauꞌ badaꞌ abaꞌ nyarok enteꞌ Apai Ku suteꞌ abaꞌ Ku abaꞌ Ku suteꞌ abaꞌ Apai Ku.”
39 Skaleꞌ ageꞌ sidaꞌ kaꞌ nangkap Isa, uleh sidaꞌ nadai tetangkap ke Ya.
Isa de sebrang sungai Yordan