Maria ngunsot kaki Isa ngau binyak wangi de Betania
12
Nam ari sebedau ari Raya Paskah, Isa angkat ke Betania, nyaꞌ mah kampong teban Lasaros diyau. Lasaros toꞌ urang te udah daidop Isa ageꞌ. 2 Diyaꞌ sidaꞌ mreꞌ Isa makai abaꞌ Marta ngadoh kebala temuai makai. Lasaros abaꞌ gaꞌ kebala sidaꞌ makai diyaꞌ. 3 Udah nyaꞌ Maria datai ngemaiꞌ setengah liter binyak wangi narwastu te mahal amat. Baroꞌ ya nureꞌ ke kaki Isa abaꞌ ngunos ngau bok ya, kebaꞌ rumah nyaꞌ semabar bau binyak wangi. 4 Uleh Yudas Iskariot salah sikoꞌ muret Isa, te kaꞌ nyual Ya madah, 5 “Ngapa binyak wangi nyaꞌ nadai de jual tiga ratos duet dinar jaꞌ, abaꞌ duet nyaꞌ tauꞌ dabreꞌ ke urang misken?” 6 Yudas madah piyaꞌ nadai amat kaseh ke urang misken, ya madah piyaꞌ nema ya jaiꞌ jari. Ya gah ngameꞌ duet ari kas te de pegai ya. 7 Uleh Isa madah, “Ngaꞌ kah inoꞌ toꞌ mulah utai toꞌ ngau nyiap ari Ku dekubor. 8 Kebala urang misken slareh adai daentara kitaꞌ, uleh Ku nadai slareh adai abaꞌ kitaꞌ.”aKebala kepalaꞌ imam kaꞌ munoh Lasarus
9 Mayoh sidaꞌ Yahudi ninga Isa adai de Betania, kebaꞌ sidaꞌ angkat kiyaꞌ kaꞌ medaꞌ Ya abaꞌ kaꞌ medaꞌ Lasaros te udah daidop Isa ageꞌ ari pemati. 10 Kebaꞌ nyaꞌ kebala kepalaꞌ imam bepekat gaꞌ kaꞌ munoh Lasaros. 11 Sidaꞌ kaꞌ munoh Lasaros nema tegal ya, mayoh sidaꞌ Yahudi nudi sidaꞌ abaꞌ pecayaꞌ ke Isa.
Urang mayoh nyamot Isa ngau raja sidaꞌ
12 Ari suteꞌ mayoh amat kebala urang te datai abaꞌ ngeramai ari besai sidaꞌ Yahudi te dasebot Paskah. Sidaꞌ ninga enteꞌ Isa tengan bejalai mansang ke Yerosalem. 13 Sidaꞌ ngameꞌ kebala daon palem, udah nyaꞌ angkat nyamot Isa blumaꞌ crigah gaga,
“Puji Tuhan Allah!
Tuhan Allah mreꞌ berkat ke Ya te datai alam nama Tuhan Allah.b
Engkremaꞌ Tuhan Allah mreꞌ berkat ke Raja Israel!”
14 Tengan nyaꞌ Isa medaꞌ sikoꞌ keledai mudaꞌ, baroꞌ Ya nikeꞌ ke keledai nyaꞌ. Utai nyaꞌ tejadi nunaꞌ upa te datules alam Kitab Suci:
15 “Nang takot kitaꞌ sidaꞌ Yerosalem,
pedaꞌ kah, Raja kitaꞌ datai,
dudok deatau sikoꞌ keledai mudaꞌ.”c
16 Tengan nyaꞌ kebala muret bedau nyarok utai nyaꞌ. Uleh pas Isa nyau idop ageꞌ abaꞌ dajunyong tingeꞌ, baroꞌ mah sidaꞌ ingat ke apa te udah da tules alam Kitab Suci nyaꞌ becakap tentang Ya. Baroꞌ mah sidaꞌ tekingat enteꞌ sidaꞌ udah mulah ugaꞌ toꞌ ke Ya. 17 Kebala urang te medaꞌ jalai Isa ngumai Lasaros keluar ari kubor abaꞌ ngidop ya ageꞌ ari pemati, sidaꞌ nusoi sengabot apa te udah dapedaꞌ sidaꞌ. 18 Kebaꞌ nyaꞌ mayoh urang angkat ngusong Isa, nema sidaꞌ ninga Ya udah mulah tana te nyaroh nyaꞌ ari Tuhan Allah. 19 Kebaꞌ nyaꞌ kebala urang kelompok Parisi madah kepangan bukai jakoꞌ sidaꞌ, “Niseꞌ gaya kita ageꞌ! Pedaꞌ kah, ugaꞌ dunia angkat nrudi Ya!”
Isa madah pemati Ya
20 Adai gaꞌ kebala sidaꞌ Yunani te abaꞌ sidaꞌ Yahudi angkat kumpol ngeramai Paskah sidaꞌ Yahudi de Yerosalem. 21 Sidaꞌn gusong Plipos abaꞌ madah, “Menyadeꞌ, asa tauꞌ kami kaꞌ betemu abaꞌ Isa.” (Plipos toꞌ sidaꞌ Betsaida te de wilayah Galelia.) 22 Udah nyaꞌ Plipos angkat madah utai nyaꞌ ke Andrias, baroꞌ snikoꞌ madah ke Isa. 23 Isa yawot snikoꞌ, “Entoꞌ nyau mah senta Ensia te datai ari Tuhan Allah dajunyong tingeꞌ. 24 Ku kaꞌ madah ngau pengamat ke kitaꞌ, igeꞌ ganom alah laboh ke tanah abaꞌ mati, sebedau naꞌ tumoh abaꞌ ngasel mayoh igeꞌ ganom. Enteꞌ igeꞌ ganom nyaꞌ nadai kalaꞌ mati, ya jong sleka. 25 Urang te ngaseh direꞌ de dunia toꞌ nitauꞌ jong idop abaꞌ Tuhan Allah. Uleh urang te nadai kaseh ke direꞌ, ya ngintu idop ya abaꞌ tauꞌ jong idop abaꞌ Tuhan Allah sengabot. 26 Urang te kaꞌ ngelayan Ku alah nunaꞌ Ku, isaꞌ playan Ku tauꞌ abaꞌ Ku dini Ku adai. Urang te ngelayan Ku kaꞌ de hormat Apai Ku. 27 Entoꞌ ati Ku ma riyu; apa weh te alah Ku padah kah entoꞌ? Kaꞌ ku madah, ‘Apai, jaoh kah pemedeh toꞌ ari Ku.’ Uleh Ku ngai madah piyaꞌ nema Ku tauꞌ badaꞌ tegal nyaꞌ mah ku alah datai ke dunia toꞌ. 28 Apai, anyaꞌ ke kuasa Wan te lampar besai!” Udah nyaꞌ kedinga goꞌ ari langet te madah, “Ku udah nganyaꞌ lampar besai kuasa Ku abaꞌ Ku kaꞌ nganyaꞌ ageꞌ.” 29 Kebala urang te diyaꞌ ninga goꞌ nyaꞌ. Sidaꞌ madah, “Nyaꞌ goꞌ guntor!” Uleh adai gaꞌ te madah, “Ukai! Nyaꞌ mlikat te becakap ke Ya!” 30 Udah nyaꞌ Isa madah ke sidaꞌ, “Apai Ku madah piyaꞌ nyaꞌ ngau kitaꞌ, nadai ngau nalau Ku. 31 Entoꞌ nyau senta dunia toꞌ dasidang; entoꞌ Ibles penguasa dunia toꞌ datesar keluar. 32 Uleh Ku kaꞌ deagkat ari bumi lah. Enteꞌ Ku udah deangkat tingeꞌ ari bumi, Ku kaꞌ ngemaiꞌ ugaꞌ urang datai ngusong Ku.” 33 Isa madah piyaꞌ ngau nunyok kati cara Ya kaꞌ mati. 34 Baroꞌ urang banyau nyaꞌ madah ke Isa, “Kami udah ninga Prator Tuhan Allah te datules Musa enteꞌ Al Maseh kaꞌ jong idop; Kati Wan tauꞌ madah, Ensia te datai ari Tuhan Allah alah deangkat tingeꞌ ari bumi? Sapa bah Ensia te datai ari Tuhan Allah nyaꞌ?”d 35 Isa nyawot sidaꞌ, “Nadai ageꞌ lamaꞌ trang nyaꞌ adai daentara kitaꞌ. Kebaꞌ, bejalai kah panyong trang nyaꞌ ageꞌ adai, isaꞌ kitaꞌ nadai idop de teban te petang. Urang te bejalai de teban te petang nitauꞌ badaꞌ kikai pemansang ya. 36 Kebaꞌ, pecayaꞌ ke kitaꞌ ke trang nyaꞌ, panyong trang nyaꞌ ageꞌ adai abaꞌ kitaꞌ, isaꞌ kitaꞌ jadi kebala anak trang.” Udah Isa madah piyaꞌ Ya angkat ari nyaꞌ, selabok ari sidaꞌ.
Mayoh urang ngai pecayaꞌ ke Isa
37 Amat mah udah mayoh tana te nyelah dapulah Isa demua sidaꞌ, uleh sidaꞌ nadai kaꞌ pecayaꞌ ke Ya. 38 Kebaꞌ nyaꞌ temoꞌ mah apa te depadah nabi Yesaya,
“Tuhan, sapa te pecayaꞌ ke pesau Wan te depadah kami? Abaꞌ ke sapa Wan nganyaꞌ kuasa Wan?”e
39 Sidaꞌ nitauꞌ pecayaꞌ, nema nabi Yesaya madah Tuhan Allah udah madah upa pitoꞌ,
40 “Ku udah ngemutaꞌ mata sidaꞌ abaꞌ ngasoh ati sidaꞌ degel
isaꞌ mata sidaꞌ nadai medaꞌ, abaꞌ pemiker sidaꞌ nadai nyarok.
Isaꞌ sidaꞌ nadai bebalek ke Ku, abaꞌ isaꞌ Ku nadai nyemoh sidaꞌ.”f
41 Yesaya madah piyaꞌ nema ya udah medaꞌ Lampar besai kuasa Isa, abaꞌ ya becakap tentang Isa. 42 Amat mah piyaꞌ mayoh kebala pemimpen sidaꞌ Yahudi te pecayaꞌ ke Isa. Uleh sidaꞌ nadai brani ngakoꞌ de mua banyau, nema sidaꞌ takot urang ari klumpok Parisi nadai nyadi sidaꞌ tamaꞌ ke rumah te jalai sidaꞌ Yahudi nyemah Tuhan Allah. 43 Sidaꞌ lebeh gaga dapuji ensia ari pada dapuji Tuhan Allah.
Ensia kaꞌ dasidang nunaꞌ pengajar Isa
44 Isa madah ngau goꞌ te sareng, “Ngenap urang te pecayaꞌ ke Ku, ya nadai proꞌ pecayaꞌ ke Ku, uleh urang nyaꞌ pecayaꞌ gaꞌ ke Ya te ngutos Ku. 45 Abaꞌ urang te medaꞌ Ku, medaꞌ Ya te ngutos Ku. 46 Ku datai ke dunia toꞌ ngemaiꞌ trang ke urang, isaꞌ ugaꞌ urang te pecayaꞌ ke Ku nadai diyau de teban te petang. 47 Urang te ninga pengajar Ku, uleh nadai nunaꞌ apa te Ku ajar, ukai Ku te ngukom. Nema Ku datai nadai ngukom dunia toꞌ, uleh Ku datai nyelamat dunia toꞌ. 48 Ngenap urang te ngai pecayaꞌ ke Ku abaꞌ ngai nrimaꞌ apa te Ku padah kah, adai lah te nyidang sidaꞌ. Pengajar te udah Ku padah ke nyaꞌ lah te kaꞌ nyidang sidaꞌ de pemadoꞌ dunia toꞌ. 49 Nema apa te Ku ajar kah, nadai ari Ku kedireꞌ. Apai te ngutos Ku, Ya te mrintah Ku madah apa te alah Ku padah. 50 Abaꞌ Ku tauꞌ badaꞌ apa te daprintah Ya nyaꞌ ngasoh urang jong idop abaꞌ Tuhan Allah sengabot. Kebaꞌ nyaꞌ Ku madah nunaꞌ apa te daprintah Apai Ku ke Ku.”