Isa masok kaki kebala muret Ya
13
Tengan nyaꞌ Ari Besai Paskah sidaꞌ Yahudi nyau kaꞌ belaboh, Isa tauꞌ badaꞌ nyau kaꞌ senta Ya nudi dunia toꞌ pulai ngusong Apai Ya. Ya selareh ngaseh kebala urang te deempu Ya, abaꞌ Ya ngaseh sidaꞌ datai ke pemadoꞌ.2 Isa abaꞌ kebala muret Ya tengan makai malam. Sebedau nyaꞌ Ibles Kepalaꞌ bala Sitan lamaꞌ udah ngaru pemiker Yudas anak Simon Iskariot isaꞌ nyual Isa ke munsoh Ya. 3 Isa tauꞌ badaꞌ Apai udah nyerah ugaꞌ kuasa ke Ya. Abaꞌ Ya tauꞌ badaꞌ Direꞌ datai ari Tuhan Allah abaꞌ kaꞌ pulai ageꞌ ke Tuhan Allah. 4 Kebaꞌ nyaꞌ tengan sidaꞌ makai, baroꞌ Isa diri abaꞌ mukaꞌ jubah Ya. Ya ngameꞌ anok, abaꞌ namet anok de pungong Ya. 5 Udah nyaꞌ Ya ngiseꞌ aiꞌ ke alam jalong, baroꞌ Ya belaboh masok kaki kebala muret Ya abaꞌ ngenos ngau anok te detamet de pungong Ya.
6 Pas Ya nyau datai ke Simon Petros, Petros madah ke Ya, “Tuhan, ngapa piyaꞌ Wan alah masok kaki ku?”
7 Isa nyawot ya, “Entoꞌ nadai meh nyarok apa te Ku pulah toꞌ, uleh jemah lah baroꞌ meh nyarok.”
8 Baroꞌ Petros madah, “Adu Tuhan! Ku nadai ngamoꞌ nyadi Wan masok kaki ku!”
Uleh Isa nyawot ya, “Enteꞌ Ku nadai masok kaki meh, meh nadai tauꞌ jadi empu Ku.”
9 Simon Petros madah, “Tuhan, enteꞌ piyaꞌ nang Wan peroꞌ masok kaki ku, uleh jari abaꞌ palaꞌ ku gaꞌ!”
10 Isa madah ke ya, “Urang te udah maneꞌ bayah alah masok kaki ya jaꞌ, nema ugaꞌ tuboh ya udah breseh. Kitaꞌ toꞌ udah breseh, uleh nadai ugaꞌ kitaꞌ breseh.” 11 Isa udah tauꞌ badaꞌ sapa te kaꞌ nyual Ya ke kebala munsoh Ya. Nyaꞌ nyuroh Ya madah, “Nadai ugaꞌ kitaꞌ breseh.”
12 Udah Isa masok kaki sidaꞌ, Ya ngenaꞌ jubah Ya ageꞌ abaꞌ dudok ke teban awak Ya tadeꞌ. Baroꞌ Ya nanyaꞌ ke sidaꞌ, “Nyarok nadai kitaꞌ apa te baroꞌ udah Ku pulah ke kitaꞌ? 13 Kitaꞌ ngumai Ku Guru abaꞌ Tuhan, nyaꞌ kenaꞌ mah, nema amat mah Ku toꞌ Guru abaꞌ Tuhan. 14 Enteꞌ Ku toꞌ, te Tuhan abaꞌ Guru kitaꞌ jaꞌ udah masok kaki kitaꞌ, kitaꞌ sigeꞌ alah masok kaki sama direꞌ. 15 Ku mulah toꞌ ngau cuntoh ke kitaꞌ, isaꞌ kitaꞌ mulah upa te udah Ku pulah ke kitaꞌ. 16 Ku kaꞌ madah ngau pengamat ke kitaꞌ, pemantoꞌ nadai lebeh penteng ari tuan ya, abaꞌ urang te deutos nadai lebeh penteng ari te ngutos ya. 17 Nema kitaꞌ udah tauꞌ badaꞌ apa te Ku padah ke nyaꞌ kenaꞌ, kebaꞌ betuah amat mah enteꞌ kitaꞌ mulah nyaꞌ.
18 Te Ku cakap ke toꞌ ukai ugaꞌ kitaꞌ. Ku tauꞌ badaꞌ sapa kebala urang te udah Ku pileh. Uleh apa te detules alam Kitab Suci alah temoꞌ, ‘Urang te makai ruti abaꞌ Ku, belaboh ngelawan Ku.’a 19 Entoꞌ Ku kaꞌ dulau madah utai toꞌ ke kitaꞌ, sebedau utai toꞌ tejadi, isaꞌ enteꞌ utai toꞌ tejadi jemah lah, kitaꞌ pecayaꞌ Ku mah Ya. 20 Ku kaꞌ madah ngau pengamat ke kitaꞌ: Enteꞌ urang nerimaꞌ ya te Ku utos, urang nyaꞌ nerimaꞌ Ku. Abaꞌ urang te nerimaꞌ Ku, nerimaꞌ gaꞌ Ya te ngutos Ku.”
Isa madah pengamat sapa te kaꞌ nyual Ya
21 Udah Isa madah piyaꞌ Ya ma riyu. Baroꞌ Ya madah, “Tulu amat mah jakoꞌ Ku toꞌ, sikoꞌ ari entara kitaꞌ kaꞌ nyual Ku ke kebala munsoh Ku.”
22 Kebala muret Ya betilek pangan, nema sidaꞌ nitauꞌ badaꞌ sapa te demaksot Ya. 23 Salah sikoꞌ muret Isa te ma Ya kaseh, dudok nyaneh de sepiyak kanan Ya. 24 Baroꞌ Simon Petros ngudi isaꞌ muret te nungaꞌ Isa nyaꞌ nanyaꞌ ke Isa sapa te demaksot Ya.
25 Muret te dudok nyemak Isa nyaꞌ nanyaꞌ Ya, “Tuhan, sapa te jakoꞌ Wan nyaꞌ?”
26 Sawot Isa, “Urang te Ku bereꞌ ke ruti te udah Ku calop ke alam mangkok, nyaꞌ mah ya.” Baroꞌ Isa ngameꞌ selapek ruti, encalop ke alam mangkok; baroꞌ mereꞌ ke Yudas anak Simon Iskariot. 27 Breta Yudas udah nyamot ruti nyaꞌ, ya desarong Ibles Kepalaꞌ kebala sitan. Kebaꞌ Isa madah ke ya, “Pulah ke deras geꞌ apa te kaꞌ meh pulah.” 28 Uleh sidaꞌ te dudok makai diyaꞌ datai ke sikoꞌ mah niseꞌ te nyarok, ngapa Isa madah piyaꞌ ke Yudas. 29 Nema sidaꞌ tauꞌ badaꞌ Yudas te megai duet kas, kebaꞌ adai sidaꞌ te miker Isa ngasoh Yudas meli kebala utai te kaꞌ dengau ngeramai ari besai Paskah. Adai gaꞌ sidaꞌ te miker Isa nyuroh ya mereꞌ utai ke urang misken.
30 Udah Yudas nyamot ruti te debereꞌ Isa, ya lansong keluar. Tengan nyaꞌ ari sigeꞌ nyau malam.
Isa mereꞌ perintah baru
31 Udah Yudas angkat Isa madah, “Entoꞌ nyau mah senta Anak Ensia kaꞌ dejunyong tingeꞌ, abaꞌ Tuhan Allah kaꞌ dejunyong tingeꞌ gaꞌ ari apa te Ya pulah. 32 Enteꞌ Tuhan Allah dejunyong tingeꞌ ari Ya, Tuhan Allah sigeꞌ kaꞌ nyunyong tingeꞌ Anak Ensia ari Ya kedireꞌ, abaꞌ nyaꞌ nyau mah kaꞌ tejadi.”
33 Baroꞌ Isa madah ageꞌ, “Kebala anak Ku, Ku nadai lamaꞌ ageꞌ abaꞌ kitaꞌ. Kitaꞌ kaꞌ ngigaꞌ Ku, uleh upa te udah Ku padah ke kebala pemimpen Yahudi, piyaꞌ gaꞌ Ku madah ke kitaꞌ, ‘Ke teban Ku angkat kitaꞌ nitauꞌ datai kiyaꞌ.’
34 Ku mereꞌ printah baru ke kitaꞌ: Kitaꞌ alah kaseh kepangan bukai. Sama upa Ku kaseh ke kitaꞌ, piyaꞌ gaꞌ kitaꞌ alah kaseh kepangan bukai. 35 Enteꞌ kitaꞌ kaseh kepangan bukai, ugaꞌ urang tauꞌ badaꞌ enteꞌ kitaꞌ muret Ku.”
Isa madah Petros kaꞌ madah direꞌ nadai ngelala Ya
36 Simon Petros nanyaꞌ Isa, “Tuhan, kaꞌ kikai Wan angkat?” Isa nyawot ya, “Kikai Ku angkat meh nitauꞌ abaꞌ entoꞌ. Uleh jemah lah meh nerudi Ku.”
37 Baroꞌ Petros nanyaꞌ ageꞌ, “Tuhan, ngapa ku nitauꞌ abaꞌ Wan entoꞌ? Ku siap mah mati ngau Wan!”
38 Sawot Isa, “Kati meh madah direꞌ siap mati ngau Ku? Ku madah ngau pengamat ke meh, sebedau manok engkukok, tiga kaleꞌ meh kaꞌ madah direꞌ nadai ngelala Ku!”