Rumah Apai
14
Isa madah ke kebala muret Ya, “Nang kitaꞌ saban, pecayaꞌ jaꞌ Tuhan Allah abaꞌ pecayaꞌ gaꞌ ke Ku. 2 De rumah Apai Ku adai mayoh teban te jalai diyau. Abaꞌ Ku angkat ken ngageh teban jalai kitaꞌ diyau. Enteꞌ nadai piyaꞌ Ku nadai madah upa piyaꞌ ke kitaꞌ. 3 Udah Ku angkat ngageh teban ngau kitaꞌ, Ku kaꞌ bebalek ngameꞌ kitaꞌ abaꞌ Ku, isaꞌ dini Ku adai, diyaꞌ gaꞌ kitaꞌ adai. 4 Abaꞌ kikai Ku angkat kitaꞌ tauꞌ badaꞌ jalai kiyaꞌ.”5 Baroꞌ Tumas madah ke Isa, “Tuhan, kami nitauꞌ badaꞌ kikai Wan angkat, kati kami tauꞌ badaꞌ jalai kiyaꞌ?”
6 Isa nyawot ya, “Ku mah jalai nuju ke Apai. Ku mah pon ari ugaꞌ pengajar te kenaꞌ. Abaꞌ Ku gaꞌ te mereꞌ idop. Niseꞌ urang tauꞌ ngusong Apai enteꞌ nadai mansaꞌ Ku. 7 Enteꞌ kitaꞌ ngelala Ku, pesti kitaꞌ ngelala Apai Ku gaꞌ. Entoꞌ kitaꞌ udah ngelala Ya, abaꞌ udah medaꞌ Ya.”
8 Kebaꞌ Pelipos madah ke Isa, “Tuhan, anyaꞌ ke Apai ke kami, isaꞌ kami puas.”
9 Uleh Isa nyawot ya, “Pelipos nyau pelamaꞌ toꞌ Ku abaꞌ kitaꞌ, uleh bedau gaꞌ meh ngelala Ku? Urang te udah medaꞌ Ku, udah medaꞌ Apai. Kati meh rinah madah, ‘Anyaꞌ ke Apai ke kami?’ 10 Nadai meh pecayaꞌ enteꞌ Ku toꞌ suteꞌ abaꞌ Apai, abaꞌ Apai suteꞌ abaꞌ Ku weh? Apa te Ku padah ke meh, nadai Ku padah ari Ku kedireꞌ. Apai te diyau alam Ku, Ya te ngreja kreja Ya. 11 Pecayaꞌ jaꞌ ke Ku, enteꞌ Ku suteꞌ abaꞌ Apai abaꞌ Apai suteꞌ abaꞌ Ku. Enteꞌ kitaꞌ nadai pecayaꞌ ke apa te jakoꞌ Ku, paleng nadai pecayaꞌ ke kebala utai te nyaroh te udah Ku pulah. 12 Ku kaꞌ madah ngau pengamat ke kitaꞌ: Ngenap urang te pecayaꞌ ke Ku, kaꞌ mulah apa te udah Ku pulah. Sidaꞌ empala kaꞌ mulah te lebeh besai ageꞌ, ari te Ku pulah nema Ku kaꞌ angkat ngusong Apai. 13 Abaꞌ apa jaꞌ te kitaꞌ pintaꞌ ke ngau kuasa nama Ku, Ku kaꞌ mulah ke kitaꞌ, isaꞌ Apai dejunyong tingeꞌ ari Anak. 14 Apa te kitaꞌ pintaꞌ ngau kuasa Nama Ku, Ku kaꞌ mulah ke kitaꞌ.”
Isa nanyi kaꞌ mereꞌ Roh Kudos
15 Isa madah ageꞌ, “Enteꞌ kitaꞌ ngaseh Ku, kitaꞌ kaꞌ nunaꞌ kebala printah Ku. 16 Ku kaꞌ mintaꞌ ke Apai, abaꞌ Ya kaꞌ mereꞌ ke kitaꞌ Penalau te ke bukai, te kaꞌ diyau bekamoh abaꞌ kitaꞌ sengabot. 17 Ya nyaꞌ mah Roh Kudos te kaꞌ nganyaꞌ ke ensia sapa pengamat Tuhan Allah. Kebala urang de dunia toꞌ nadai tauꞌ nerimaꞌ Ya alam ati sidaꞌ, nema sidaꞌ nadai medaꞌ abaꞌ ngelala Ya. Uleh kitaꞌ ngelala Ya, nema Ya diyau bekamoh abaꞌ kitaꞌ abaꞌ kaꞌ adai alam kitaꞌ.
18 Ku nadai ngamoꞌ nudi kitaꞌ kedireꞌ de dunia toꞌ upa anak patu. Ku kaꞌ datai ageꞌ ngusong kitaꞌ. 19 Nadai lamaꞌ ageꞌ kebala urang de dunia toꞌ nitauꞌ medaꞌ Ku. Uleh kitaꞌ kaꞌ medaꞌ Ku. Kitaꞌ kaꞌ idop nema Ku idop. 20 Senta Ku idop ageꞌ lah, kitaꞌ tauꞌ badaꞌ Ku suteꞌ abaꞌ Apai, kitaꞌ suteꞌ abaꞌ Ku, abaꞌ Ku suteꞌ abaꞌ kitaꞌ.
21 Ngenap urang te nerimaꞌ kebala printah Ku abaꞌ nunaꞌ te Ku Printah ke nyaꞌ, ya mah te ngaseh Ku. Ngenap urang te ngaseh Ku, dekaseh Apai Ku. Abaꞌ Ku sigeꞌ kaꞌ gaꞌ ngaseh urang nyaꞌ abaꞌ nganyaꞌ Direꞌ Ku ke ya.”
22 Yudas te ukai Yudas Iskariot, nanyaꞌ Isa, “Tuhan, ngapa Wan kaꞌ nganyaꞌ Direꞌ ke kami uleh nadai nganyaꞌ Direꞌ ke urang te de dunia toꞌ?”
23 Isa nyawot ya, “Ngenap urang te ngaseh Ku, kaꞌ nunaꞌ pengajar Ku. Apai Ku kaꞌ ngaseh ya, abaꞌ kemua Apai Ku kaꞌ datai ngusong ya abaꞌ diyau bekamoh abaꞌ ya. 24 Urang te nadai ngaseh Ku, nadai kaꞌ nunaꞌ pengajar Ku. Pengajar te kitaꞌ dinga nyaꞌ, nadai ari Ku, uleh ari Apai te ngutos Ku.
25 Ugaꞌ nyaꞌ Ku padah ke kitaꞌ panyong Ku ageꞌ abaꞌ kitaꞌ. 26 Uleh Roh Kudos, Penalau te kaꞌ deutos Apai ngau kuasa nama Ku, Ya mah te kaꞌ ngajar kitaꞌ kebala utai abaꞌ ngingat ke kitaꞌ ugaꞌ te udah Ku padah ke kitaꞌ.
27 Entoꞌ Ku kaꞌ nudi damai ke kitaꞌ isaꞌ ati kitaꞌ lantang. Damai te Ku bereꞌ ke kitaꞌ nyaꞌ, nadai upa te debereꞌ urang de dunia. Kebaꞌ nyaꞌ nang kitaꞌ kuah-kanah, abaꞌ nang takot. 28 Kitaꞌ udah ninga, enteꞌ Ku udah madah, ‘Ku kaꞌ angkat, uleh Ku kaꞌ datai bebalek ageꞌ ngusong kitaꞌ.’ Enteꞌ kitaꞌ ngaseh Ku, tunaꞌ des kitaꞌ gaga enteꞌ Ku angkat ngusong Apai, nema Apai lebeh besai ari Ku. 29 Entoꞌ Ku dulau madah ugaꞌ nyaꞌ ke kitaꞌ, sebedau ugaꞌ nyaꞌ tejadi, isaꞌ enteꞌ nyaꞌ tejadi lah, kitaꞌ pecayaꞌ. 30 Nadai ageꞌ mayoh ari ngau Ku becakap abaꞌ kitaꞌ, nema Ibles, penguasa dunia toꞌ, nyau kaꞌ datai. Uleh ya nadai talah mrintah Ku. 31 Uleh kebala urang te de dunia toꞌ alah tauꞌ badaꞌ Ku ngaseh Apai. Kebaꞌ Ku mulah nunaꞌ apa te deprintah Apai ke Ku. Boh kita angkat ari toꞌ.”