Isa mah pon angor te bamat
15
Isa madah ageꞌ, “Ku mah pon angor te bamat, abaꞌ Apai Ku urang te ngintu kebon angor. 2 Ngenap dan Ku te nadai bebuah, dakempat Ya, abaꞌ ngenap dan te bebuah, de breseh Ya isaꞌ bebuah lebeh lebau. 3 Kitaꞌ udah breseh nema pengajar te Ku ajar ke kitaꞌ. 4 Diyau ke kitaꞌ abaꞌ Ku, abaꞌ Ku kaꞌ diyau abaꞌ kitaꞌ. Niseꞌ dan te tauꞌ bebuah kedireꞌ enteꞌ nadai tumoh ari pon ya. Piyaꞌ gaꞌ kitaꞌ nadai tauꞌ bebuah, enteꞌ kitaꞌ nadai diyau abaꞌ Ku. 5 Ku mah pon angor, abaꞌ kitaꞌ mah kebala dan ya. Enteꞌ kitaꞌ slareh diyau abaꞌ Ku, abaꞌ Ku diyau abaꞌ kitaꞌ, kitaꞌ kaꞌ bebuah lebau. Uleh enteꞌ kitaꞌ pamar ari Ku, kitaꞌ nitauꞌ mulah kebala utai. 6 Enteꞌ kitaꞌ nadai slareh diyau abaꞌ Ku, kitaꞌ kaꞌ upa dan te debuai abaꞌ rangkai. Ugaꞌ dan te rangkai nyaꞌ kaꞌ dakumpol abaꞌ kaꞌ debuai kealam api. 7 Enteꞌ kitaꞌ slareh diyau abaꞌ Ku abaꞌ nunaꞌ pengajar Ku, pintaꞌ jaꞌ te dakedekaꞌ kitaꞌ, apa te kitaꞌ pintaꞌ ke nyaꞌ kaꞌ dabreꞌ ke kitaꞌ. 8 Apai Ku kaꞌ dajunyong tingeꞌ enteꞌ kitaꞌ bebuah lebau abaꞌ nyaꞌ mah bukti kitaꞌ bamat-amat muret Ku.”Printah isaꞌ ngaseh sama direꞌ
9 “Upa Apai kaseh ke Ku, piyaꞌ gaꞌ Ku kaseh ke kitaꞌ. Kitaꞌ alah slareh diyau alam kaseh Ku. 10 Enteꞌ kitaꞌ nunaꞌ printah Ku, kitaꞌ diyau alam kaseh Ku, upa medaꞌ Ku nunaꞌ printah Apai Ku abaꞌ diyau alam kaseh Ya.
11 Ugaꞌ toꞌ Ku padah ke kitaꞌ, isaꞌ pengaga Ku adai alam ati kitaꞌ, abaꞌ pengaga kitaꞌ penoh. 12 Toꞌ mah printah Ku: Kaseh kah sama direꞌ, upa Ku kaseh ke kitaꞌ. 13 Niseꞌ kaseh te lebeh besai ari kaseh kawan te nyerah idop ngau nyelamat kebala kawan ya te ke bukai. 14 Enteꞌ kitaꞌ mulah apa te Ku printah ke kitaꞌ, kitaꞌ mah kebala kawan Ku. 15 Entoꞌ Ku nadai ageꞌ nyebot kitaꞌ pemantoꞌ, nema pemantoꞌ nitauꞌ badaꞌ apa te tengan dapulah tuan ya. Uleh entoꞌ Ku ngumai kitaꞌ kawan, nema Ku udah madah ke kitaꞌ kebala utai te Ku dinga ke ari Apai Ku. 16 Ukai kitaꞌ te mileh Ku, uleh Ku te mileh kitaꞌ. Ku ngasoh kitaꞌ angkat isaꞌ bebuah lebau, abaꞌ buah nyaꞌ nitauꞌ punas. Isaꞌ apa jaꞌ te kitaꞌ pintaꞌ ke Apai ngau kuasa nama Ku, de breꞌ Ya ke kitaꞌ. 17 Toꞌ mah printah Ku ke kitaꞌ: Kaseh ke sama direꞌ.”
Dunia areh ke Isa abaꞌ kebala muret Ya
18 “Enteꞌ dunia areh ke kitaꞌ, ingat kah Ku udah dulau dekareh dunia. 19 Enteꞌ kitaꞌ empu dunia, pesti mah dunia ngaseh kitaꞌ nema kitaꞌ empu ya. Uleh nema Ku udah mileh kitaꞌ ari dunia toꞌ, kebaꞌ kitaꞌ bukai empu dunia toꞌ ageꞌ. Nyaꞌ mah ngasoh dunia toꞌ areh ke kitaꞌ. 20 Ingat ke apa te udah Ku padah ke kitaꞌ, ‘Pemantoꞌ nadai lebeh besai ari tuan ya.’ Sidaꞌ udah mrisa Ku, abaꞌ sidaꞌ sigeꞌ kaꞌ mrisa kitaꞌ. Adai gaꞌ kebala urang te kaꞌ nunaꞌ pengajar Ku, sidaꞌ nyaꞌ kaꞌ gaꞌ nunaꞌ pengajar kitaꞌ. 21 Ugaꞌ nyaꞌ kaꞌ sidaꞌ pulah ke kitaꞌ, nema kitaꞌ muret Ku abaꞌ sidaꞌ nadai nglala Ya te ngutos Ku. 22 Enteꞌ Ku nadai datai abaꞌ nadai madah ugaꞌ toꞌ ke sidaꞌ, sidaꞌ nadai dusa. Uleh Ku udah datai abaꞌ udah madah ugaꞌ toꞌ ke sidaꞌ, kebaꞌ sidaꞌ nitauꞌ madah, ‘Kami nitauꞌ badaꞌ apa te udah kami pulah ke nyaꞌ dusa.’ 23 Ngenap urang te areh ke Ku, areh gaꞌ ke Apai Ku. 24 Enteꞌ Ku nadai kalaꞌ mulah kebala tana te nyelah de tengah sidaꞌ, sidaꞌ nadai dusa. Uleh entoꞌ sidaꞌ udah medaꞌ te ku pulah ke sidaꞌ abaꞌ sidaꞌ tetap mah areh ke Ku abaꞌ Apai Ku. 25 Uleh apa te da tules alam Kitab Suci sidaꞌ alah temoꞌ, ‘Sidaꞌ areh ke Ku, amat mah Ku niseꞌ mulah penyalah ke sidaꞌ.’a