Nang badoꞌ pecayaꞌ ke Isa
16
Isa madah ageꞌ, “Ugaꞌ toꞌ Ku padah ke kitaꞌ isaꞌ kitaꞌ nadai badoꞌ pecayaꞌ ke Ku. 2 Urang kaꞌ nesar kitaꞌ ari kebala rumah te jalai sidaꞌ Yahudi nyemah Tuhan Allah. Abaꞌ kaꞌ datai senta urang te munoh kitaꞌ miker sidaꞌ mulah te bayek ke Tuhan Allah. 3 Sidaꞌ kaꞌ mulah piyaꞌ ke kitaꞌ nema sidaꞌ nadai nglala Apai abaꞌ nadai nglala Ku. 4a Ku dulau madah ugaꞌ toꞌ ke kitaꞌ, isaꞌ enteꞌ senta nyaꞌ nyau tejadi, kitaꞌ ingat enteꞌ Ku udah ngingat ugaꞌ toꞌ ke kitaꞌ.”Te dakerja Roh Kudos
4b “Ku nadai madah ugaꞌ toꞌ ke kitaꞌ blaboh ari semaru Ku ngelayan nema slamaꞌ toꞌ Ku ageꞌ abaꞌ kitaꞌ.
5 Entoꞌ Ku kaꞌ angkat pulai ngusong Ya te ngutos Ku; abaꞌ datai ke sikoꞌ ari kitaꞌ niseꞌ te nanyaꞌ Ku, kikai Ku angkat. 6 Uleh entoꞌ ninga Ku madah piyaꞌ, kitaꞌ riyu amat. 7 Tunaꞌ des lebeh bayek ngau kitaꞌ enteꞌ Ku angkat. Nema enteꞌ Ku angkat, Ku kaꞌ ngutos Penalau ke kitaꞌ. Uleh enteꞌ Ku nadai angkat, Penalau nyaꞌ nadai datai ke kitaꞌ. 8 Enteꞌ Penalau nyaꞌ datai, Ya kaꞌ nyadar kebala urang de dunia enteꞌ sidaꞌ salah tentang tiga utai toꞌ: Tentang dusa, tentang apa te kenaꞌ abaꞌ tentang kati Tuhan Allah kaꞌ nyidang. 9 Penalau nyaꞌ te kaꞌ nunyok dusa sidaꞌ, nema sidaꞌ nadai pecayaꞌ ke Ku. 10 Ya kaꞌ nyadar penyalah sidaꞌ tentang utai te kenaꞌ, nema Ku angkat ngusong Apai abaꞌ kitaꞌ nadai medaꞌ Ku ageꞌ. 11 Ya gaꞌ kaꞌ nyadar penyalah sidaꞌ tentang kati Tuhan Allah kaꞌ nyidang, nema Tuhan Allah udah ngukom Ibles, penguasa dunia toꞌ.
12 Ageꞌ mayoh te kaꞌ Ku padah ke kitaꞌ, uleh entoꞌ kitaꞌ bedau talah nrimaꞌ nyaꞌ. 13 Uleh enteꞌ Roh te kenaꞌ nyaꞌ datai, Ya kaꞌ mimpen kitaꞌ isaꞌ tauꞌ badaꞌ ugaꞌ te kenaꞌ ari Tuhan Allah. Ya nadai becakap nunaꞌ penekaꞌ Ya kedireꞌ, uleh nunaꞌ apa te Ya tinga ari Tuhan Allah. Abaꞌ Ya kaꞌ madah ke kitaꞌ kebala utai te kaꞌ tejadi jemahlah. 14 Ya kaꞌ nyunyong tingeꞌ Ku, nema apa te depadah Ya ke kitaꞌ datrimaꞌ Ya ari Ku. 15 Ugaꞌ utai te da empu Apai, nyaꞌ mah empu Ku. Kebaꞌ nyaꞌ Ku madah: Roh kaꞌ madah ke kitaꞌ apa te datrimaꞌ Ya ari Ku.”
Ati te reyu kaꞌ bebaleꞌ gaga
16 Isa madah, “Stegal ageꞌ kitaꞌ nadai medaꞌ Ku, abaꞌ udah nyaꞌ stegal ageꞌ kitaꞌ kaꞌ medaꞌ Ku.” 17 Ninga Isa madah piyaꞌ kebala muret Isa blaboh nanyaꞌ ke pangan bukai, “Apa naꞌ mah maksod Ya madah ke kita, ‘Stegal ageꞌ kitaꞌ nadai medaꞌ Ku, abaꞌ udah nyaꞌ stegal ageꞌ kitaꞌ kaꞌ medaꞌ Ku?’ Abaꞌ Apa naꞌ mah maksod Ya madah, ‘Ku angkat ngusong Apai’?” 18 Sidaꞌ nanyaꞌ sengabot, “Apa naꞌ reti ‘Stegal ageꞌ’? Kita nadai nyarok Ya becakap ke apa!” 19 Isa tauꞌ badaꞌ sidaꞌ kaꞌ betanyaꞌ ke Ya. Kebaꞌ Ya madah, “Kitaꞌ tengan becakap ke apa te de maksod Ku, ‘Stegal ageꞌ kitaꞌ nadai medaꞌ Ku, abaꞌ udah nyaꞌ stegal ageꞌ kitaꞌ kaꞌ medaꞌ Ku’ weh? 20 Ku kaꞌ madah ngau pengamat ke kitaꞌ, kitaꞌ kaꞌ nyabak abaꞌ bekenang, uleh urang de dunia kaꞌ gaga. Semaru ati kitaꞌ kaꞌ reyu amat, uleh ati kitaꞌ te reyu nyaꞌ kaꞌ bebaleꞌ gaga. 21 Urang inoꞌ enteꞌ kaꞌ beranak ma tusah, nema nyau senta ya kaꞌ ngasa pemedeh. Uleh pas anak ya adai, ya klupa ke pemedeh nyaꞌ, nema gaga medaꞌ miyak adai ke alam dunia. 22 Upa piyaꞌ gaꞌ kitaꞌ. Entoꞌ ati kitaꞌ reyu amat, uleh Ku kaꞌ betemu ageꞌ abaꞌ kitaꞌ, kebaꞌ ati kitaꞌ kaꞌ gaga. Abaꞌ niseꞌ urang tauꞌ ngameꞌ pengaga nyaꞌ ari ati kitaꞌ. 23 Pas ari nyaꞌ, kitaꞌ nadai kaꞌ nanyaꞌ ageꞌ kebala utai ke Ku. Ku kaꞌ madah ngau pengamat ke kitaꞌ, apa jaꞌ te kitaꞌ pintaꞌ ke Apai ngau kuasa nama Ku, nyaꞌ kaꞌ dabreꞌ Apai ke kitaꞌ. 24 Datai ke entoꞌ kitaꞌ bedau kalaꞌ mintaꞌ kebala utai ngau kuasa nama Ku. Pintaꞌ jaꞌ, abaꞌ kitaꞌ kaꞌ nrimaꞌ, isaꞌ pengaga kitaꞌ penoh.”
Isa udah ngalah dunia toꞌ
25 “Ugaꞌ nyaꞌ Ku padah ke kitaꞌ, ngau cara daengkales. Uleh kaꞌ datai lah senta Ku nadai ageꞌ becakap ngau cara de engkales, uleh becakap teros-trang ke kitaꞌ tentang Apai. 26 Pas ari nyaꞌ, kitaꞌ kaꞌ mintaꞌ ke Apai ngau nama Ku te bekuasa. Abaꞌ nadai perlu ageꞌ Ku mintaꞌ ke Apai pemintaꞌ kitaꞌ, 27 nema Apai kedireꞌ ngaseh kitaꞌ. Ya ngaseh kitaꞌ nema kitaꞌ ngaseh Ku, abaꞌ pecayaꞌ Ku datai ari Tuhan Allah. 28 Ku datai ari Apai, abaꞌ Ku datai ke alam dunia. Uleh entoꞌ Ku nudi dunia pulai ageꞌ ngusong Apai.”
29 Baroꞌ kebala muret Isa madah, “Nah, entoꞌ Wan becakap teros-trang nadai ageꞌ ngau cara daengkales. 30 Entoꞌ kami tauꞌ badaꞌ enteꞌ Wan tauꞌ badaꞌ ugaꞌ utai. Nema Wan lamaꞌ udah tauꞌ badaꞌ kebala utai sebedau kami nanyaꞌ Wan. Kebaꞌ nyaꞌ kami pecayaꞌ enteꞌ Wan datai ari Tuhan Allah.” 31 Isa nyawot sidaꞌ, “Kati, nyau mah kitaꞌ pecayaꞌ entoꞌ? 32 Dinga kah! Kaꞌ datai lah senta, kitaꞌ kaꞌ depamar-piyar abaꞌ kitaꞌ kaꞌ pulai kerumah kitaꞌ kedireꞌ. Tunaꞌ des nyau mah senta nyaꞌ datai abaꞌ kitaꞌ kaꞌ nudi Ku kedireꞌ. Uleh tunaꞌ des Ku nadai kedireꞌ nema adai Apai abaꞌ Ku. 33 Ugaꞌ toꞌ Ku padah kah, isaꞌ ati kitaꞌ lantang nema kitaꞌ suteꞌ abaꞌ Ku. De dunia toꞌ kitaꞌ kaꞌ ngasa pemedeh. Uleh tegoh ke ati kitaꞌ! Nema Ku udah ngalah dunia toꞌ!”