Mark
Markké Tatpon Lutad
Jon Baptiské Lugo:binam
( Moti 3.1-12; Luk 3.1-18; Jon 1.19-28)
1
Sidé Ru:néka Ao, Jisu Kiristok tatpon lutaddé. 2 Lungor-luné Jisoya:bí adla léngkamdémpé iropkangː"Kangkítok, ngok barígém ngo nompéyang méno:lígyé,
sé:kobí nok lambém síglenno:biyé,b
3 sullipotadokké séːkai jéːladung,
'Ru:tumké légaːpé lambédém síglenno:bito,
bík gínam légaːpé bélamdém yíg-émmoto."c
4 Édémpila Jonbí baptis bila lugoːbila sullipotado lendo. Odokké bí luto, "Noluk imurkídíːdokké méngkutsula baptisém laːtok odo Ruːnébí noluk imurém méːyinsubiyé." 5 Judia mongkédok appíːlokkélaː Jerusalemdok tani:yé bíkkodoːpé gílendo. Bulu buluk pa:bém ludesuto odokké Jordan Abu:do Jonké alaglo baptisém laːto.
6 Jonbí ut amídongki sumnam bédugasorém gédagaid, bík ígí:do suktam jinrékko yé:réksudagai, odokké bí bolodi-takomémna: yumrang tangudém dodogai.e 7 Bí sém lugo:bitoː "Ngok lédupé ngomyang kínggíːyaːnéko gíyé, sék létagdok ríbídémsin tunga:la taːsarnan ngokké arré kamang. 8 Ngo nolum asiki baptisém bidung, émpige:la bí nolum Angunné Yaloki baptisém biyé."
Jisuké Baptis Laːnamdé:lang Ankang Paːnam
(Moti 3.13-4.11; Luk 3.21-22; 4.1-13)
9 Odo longékídíːdo Jisubí Galili moːtagdok Najaret doːluːdokké gíla Jordan abuːdo Jonké alaglo baptisém la:to. 10 Jisubí asidokké gísaːdankunamméi, tayéng yabgo síggedopé bí kaːto, odokké Ruːnék Yalodé bík tayé:do pékíkonémpé déːyido. 11 Odokké tayéːtokké gomukko ludopé tatto: "No ngok méːbomsunam aoːo, nokkolo ngo airuːpé méːyumsudag."
12 Yalodé oddarong bím sullipotado:pé gímoto. 13 Odokké bím Uiːbí ankaːla yí:pi longéko sullipotado duːto. Bí simínsiro lédílo duːmínka, odokké tayéng-yaːmeyé gíla bím ka:síːngka.
Jisubí Mosua Appi:koném Gognam
14 Jonmé makana:lo tumnam lédupé, Ru:nék tatpon lutaddém lugoːbila, Jisubí Galiliːpé gíka. 15 Odokké bí luto,"Ayírdé píngangkaːbo, Ru:néké migomdokodé kérangkaːbo. Noluk imurrokké méngkutsugeːla tatpon lutaddém méngkésutokǃ"
16 Jisubí Galili Paːtang ragodok gíladuːdodo, Simonmélaː bík bíro Andriumé ésab érra duːdopé ka:to, kapilaːné bulu mosuangai. 17 Jisubí bulum luto, "Ngok lédíl gímínto odokké ngo nolum taniyém érgabné mosuaːpé imoyé." 18 Oddar bulu buluk ésabém mépagla bík lédílo gímínkang.
19 Odokké asudo:uko gíbadla, bí Jibediːké ao Jemsmélaː bík bíro Jonmé ka:to. Bulu buluk olluːdo buluk ésabém omna dungngai. 20 Odokké oddar bí bulum gokto; odokké bulu buluk abu Jibediːmé buluk dorra gíbonam taniːkídí:dok lédílo ollungíːdo mépaggeːla bík lédulo gímínkang.
Aiman Yalo Paːnam Tani:ko
21 Odok lédupé bulu Kaparnaumpé gíla angkuné Yoddo longédo bí murong-okumpé gíla luyírobbito. 22 Bík luyírnamdém tadné taniːkídíːdé tadngaksukang, kapéné bí luro luyírnékídí:dokkémpé luyírma, émpigeːla ilang-gílangkané taniː kísapé luyírto.
23 Odokké oddar buluk murong-okumdo aiman yalo pa:nam tani:ko gíaːla jéːla luto, 24 "Najareddok Jisuːa, ngoluk lédílo nokké oko ageré dun? No ngolum mokekapéi gídun? Ngo kindag no sé:kon, no Ru:néké Angunné Atérdé!"
25 Émpigeːla Jisubí bím morídla luto, "Aso:pé du:tok odokké no bíkkolokké gílentoku!"
26 Aiman yalodé taniːdém siyamogeːla bottépakpé jéːla bíkkolokké gílenkangku. 27 Taniːkídíːdé kínggíːpé méngaksula bulu akoné akoném taumínsuto, odokké luto, "Okkan séː? Anuné luyírnamkodaǃ Ilang-gílangki bí aiman yalokídíːdém lulígnammé bulusin bík lunamdém taddag."
28 Galili moːtagdok appíːlo bík doːyíngém lomdanna kinabamto.
Jisubí Bojéru:ngkom Ésaːmotoku
(Moti 8.14-17; Luk 4.38-41)
29 Jisubí Jemsmélaː Jonmé gíjonsula murong-okumdokké gílenna Simonkélaː Andriuké okumpé gíyarto. 30 Odo ayírdo Simonké ayodé ramna kédla dungngai, odokké Jisubí gípíːdannaméi, bulu bím bík ramnamdém lubito. 31 Édémpila bí bíkkodoːpé gíla bík alagdok sogabgeːla bím sosa:to. Odokké oddar bí ramngasukang odokké bí daroblangkula bulum ilaːsaːla bito.
32 Édé yummayíríːdo, do:nyi oaːnam lédupé, taniːkídíːdé Jisukodoːpé kinnémnaː butu paːnamkídíːdém gíbodo. 33 Taondok taniːappíːdé yabgodo gíkumamsukang. 34 Odokké Jisubí bangkí bangkípé kila duːném bojéruːngko ésaːmotoku. Bí bojéruːngkolokkém buttom ménnenbito. Émgom bí butukídíːdém lusa:modantoma, kapilaːné bulu bím kindaggai.
Galiliːdo Jisuké Lugoːbinam
35 Longkon roːrokomdo, édílo doːnyéi líːsaːmaːdaːan, Jisubí darobgeːla ronggamnékoloːpé gílenna odo bí kumto. 36 Simonbíːla bík duːjonkídí:dé bím mamínna gído, 37 odokké édílo bulu bím magapton odo bulu luto, "Appíngéi nom maladung!"
38 Odo Jisubí bulum luto, "Kajé ngolu okolaipé kérang-kétakké doːlungkídíːdoːpé gíkai, odo ngo odobulusin lugoːbilaːyé; kapéné odok légaːpéi ngo gítag."
39 Édémpila bí Galiliːdok appíːloi gígo:to, buluk murong-okumkídíːdo lugoːbila buttom ménnenbito.
Ngero-roːnam Taniːko
(Moti 8.1-4; Luk 5.12-16)
40 Odo ngero-ro:nam tani:ko bíkkodoːpé gíla lébíːtungaːla kumdanna bím luto, "No mé:mílo, no ngok asíksém naré:molaːdakku.f"
41 Ayapé-méːla, Jisubí bík alagém maːlenna bím gakkíto. Odokké bí luto, "Ngo méːlígdung, no naréngkaːngkulangka!" 42 Oddar ngero-roːnamdé bíkkolokké gípagla bí naréngkangku. 43 Jisubí bím torgampé lugeːla lomdanna mélíktoku. 44 Jisubí bím luto, "Tatpong, édém séːkomsin lupobiyok. Émpige:la mirroloːpég gíyarpoːla no bím kangkosupoːta, odokké no naréngkangku émna appíngém léngkansubikunam légaːpé, okkom Musiːbí lulíktagji édém palíglang."h
45 Émpigeːla bí gílenna appíngém lungabbito, odokké doːyiːdém appíːlo kinapkang. Odok-légaːpé, Jisubí taniːkangkolo taonkoloːpé gíangéi la:tokumang émpigeːla bí rongngampé dungkolo duːto. Émgom appíːlokké taniyé bíkkodoːpé gítído.