6
ꞌBá Nãzãrẹ́tị̃ dí ogã Yẹ́sụ̃ ni ĩmgbé
1 Yẹ́sụ̃ tị anâ mãju trõ onga ovũkî táụnị̃ dị anâ zore gá Nãzãrẹ́tị̃ dí ígá. 2 Sãbátũ sĩ, iꞌdó tã ịnị̃ka jó lemú dî ní ꞌa. Laki tã anâ nzelé rĩ erika rĩ a’ụ̃kî cí. Ọzịkî, “Ágó ꞌdĩ ẹsụ́ tã ꞌdĩ íngo sĩ? ꞌDĩ cirĩ íngóni rĩ okẽru láka nĩ, oꞌbãdú ká nyúmá idé wã!” 3 ꞌDĩ gbá ágó vodo báũ ukware rĩi ku yã? ꞌDĩ õzi gbá Mãríã ã ngwâ ꞌi iku, oko adụ̂nzị tị Yãkọ́ꞌbọ̃ ꞌi, Yọ̃zẹ́fụ̃ ꞌi, Yụ́dã ꞌi oko Sị̃mọ́nẹ̃ tị trõ rĩi ku yã? Avûnzi tị laki lélé ꞌdía ị̃yọ yã?” ꞌDĩsĩdú ogã icî ari ĩmgbé. 4 Yẹ́sụ̃ ọꞌjọ óbébi ãꞌiní, “Tịluza Rũbãngã dí ní lãrú kẽa kãré kwící gá, kí jõ ani anídí vũ dị, ani anâ kãká trõ oko jõ ani anídí ꞌbãrụ́, ókẽ láka lãrú ku.” 5 ꞌDĩsĩdú ofũ nyúmá idé sĩ kurũ, rárĩ ọtị̃ dí ꞌbá ũꞌbí ku rụ unzi rĩ ã dị̃ gá oko rụ kína ẹꞌbwẹ rá. 6 Yẹ́sụ̃ a’ụ̃ cí ꞌbá ꞌdĩ ã olúka a’ị̃ ako sĩ.
Yẹ́sụ̃ ọzẹ anâ mãju mụdị́lị́mbị́ ẹ̃rị̃ rĩi kõvũ ꞌbá ịnị̃ sĩ.
Nã ã vúgá, Yẹ́sụ̃ eꞌbe kãré nani oko ọmụ ꞌbá ịnị̃ sĩ ganyi mgbị̂mgbị ꞌa sĩ. 7 Ụngwẹ anâ mãju oko ọzẹ ãꞌi ẹ̃rị̃-ẹ̃rị̃ ꞌbá ịnị̃ sĩ, oko okẽ ãꞌiní okpõ orí ũnzí rĩi udójó rĩ ꞌi. 8 Icarã ãꞌi, “Ôko tã zị̃ dí gá ku, ôji pẽké ku, ôji kũbẽgú ku, sãú ꞌa óꞌbã sítĩ sâ ku, kí ãnyĩko dí gá tẽ bẹ́lẹ áwu. 9 Ãnyí lõtî su wã, kí ôji bõngú ifũlé ku. 10 Ãnyolú jó ãnyã kwire gá rĩ ní gá ndị̃ ãnyĩfũ kãré nã eꞌbe. 11 Jõ kãré áa’ị́ ãnyi láka kurũ kusâ ólẽ ãnyã lẹꞌjọ́ erika láka ku rĩi, ãnyụtụ́ fụ́tụ̃ ãnyã pá gá rĩ kasị̃ ãꞌiní lẹtẹ̃ engwí jó vúlé ku rĩ ꞌi.”
12 Nã ã vúgá, ovũkî õfú losó rĩ nze sĩ ꞌbá ní dúdu kõru dú ãꞌiã enzĩ. 13 Udókî orí ũnzí rĩ ꞌbá ũꞌbí rụ gá sĩ, oko ẹfụkî ꞌbá rụ unzi rĩ ãrụ ãdu sĩ vúa rú rụ kína o’e ẹꞌbwẹ.
14 Yẹ́sụ̃ ã rụ́ ọkụ ꞌdãku eꞌbedú õfú na oca ndị̃ ópí Ẹ̃rọ́dẹ̃ dí rá. ꞌBá zị̃tị kộꞌjọa, “Yõánã Bãtị́sịtã enzí dã gá sĩ rá oꞌbãdú ká nyúmá idé wã.” 15 ꞌBá zị̃tị ọꞌjọ, “Ani Ẹ̃lị́jã ꞌi.” Kí zị̃tị ọꞌjọ, “Ani tịluza zị̃tị dãka rá rĩ ãlu na ꞌi.” 16 Kí Ẹ̃rọ́dẹ̃ eri õfú ꞌdĩi ꞌdĩ ọꞌjọ anângá sĩ, “Ozị Yõánã Bãtị́sịtã ni ꞌdĩ ꞌi gbá mâ ꞌbãlé. Ọ́lị dị̃ na pí rĩ ꞌi, oko onzí dã gá sĩ ra!”
Dã Yõánã Bãtị́sịtã dî
17 Tã Yõánã ní dãjó rĩ idéru ꞌdíni. Ãtị sĩ ị́zị́ zị̃ rụ́ na Ẹ̃rọ̃dị́yã ꞌi. Ẹ̃rọ̃dị́yã ni ẹsụ́ ópí Ẹ̃rọ́dẹ̃ adụ́pịị̃ ni Pị̃lị́pọ̃ ị́zị́ ꞌi. Kí Ẹ̃rọ́dẹ̃ onzã Ẹ̃rọ̃dị́yã ni pi adụ́pịị̃ dí sĩ, oko oji aníní ị́zị́ du. 18 Yõánã Bãtị́sịtã ocẽ ani keri õfú ꞌdĩ ꞌi ꞌdĩ, iꞌdó tã nze ka ópí Ẹ̃rọ́dẹ̃ ni ọꞌjọ, “Nyí nyâ adụ́pịị̃ ã ị́zị́ ni ꞌdụ nyẹ́cọa nyíní ani lídi du ni ándá ku.” 19 Tã anâ ꞌjọlé ꞌdĩ sĩ, Ẹ̃rọ̃dị́yã iꞌdó angalã ꞌbãka Yõánã rụ. Ị́zị́ ꞌdĩ ori lẹ́tị ndụ̃ka Yõánã ni ꞌdịjó. 20 Kí ópí Ẹ̃rọ́dẹ̃ ni anâ ngá sĩ ká Yõánã ni rurũ, ãꞌdusĩku ọnị̃ ọ̃tẹ Yõánã ni mãꞌdị́ ándá rĩ ꞌi Rũbãngã andagá oko oze ꞌbá ekó Yõánã ni, óꞌbã ani mãbụ́sị̃ gá dúdu Ẹ̃rọ̃dị́yã kẹsụ́ du lẹ́tị ani ꞌdịjó kpé. Ẹ̃rọ́dẹ̃ olẽ ani kọ̃mụ Yõánã ni asụre mãbụ́sị̃ ꞌa sĩ, vúa ani kizúru dú aní trõ kẹsụ́ tẽ sâ tã Yõánã ã ꞌjọlé rĩ kóꞌbãa Ẹ̃rọ́dẹ̃ ã dị̃ ká rụcị́ ụcị̂ sâ ꞌi. 21 Rũsâ ọꞌdụ́ zị̃ sĩ Ẹ̃rọ̃dị́yã ẹsụ́ lẹ́tị rá Yõánã ni ꞌdị jó. Ẹ̃rọ́dẹ̃ idé kãrámã ọꞌdụ́ ani tịjó rĩ erãjó, ụngwẹ amba rọ̃ngọ̃ rĩ ꞌi oko ãjụ̃gọ mụ̃ndãrã dí ꞌbá amba zị̃tị Gãlĩléã ꞌa rĩ trõ. 22 Ị́zị́ ꞌdĩ ã zâ ẹmụ́ otu tã ãꞌiã andagá eꞌbedú anzõ oko Ẹ̃rọ́dẹ̃ tị anâ amụ trõ pãlãndã. Ópí Ẹ̃rọ́dẹ̃ ọꞌjọ zángwá ꞌdĩ ní, “Nyĩ zị ma tã nyâ lẽlé rĩ sĩ, má nyíní kẽa rá.” 23 Ọꞌjọ zángwá ꞌdĩ ní oko alụ́rụ áma, “Tã nyâ lẽlé rĩ má kẽa nyíní rá jõsâ kolú ẽwá mâ opĩ dî sâ ꞌi.” 24 Zángwá ꞌdĩ olũ ọmụ ọzị endẽ ní, “Ma’ị́ ãꞌdu áwu?” Endẽ ọꞌjọ, “Yõánã ã dị̃ ꞌi.” 25 Mgbesâ zángwá ꞌdĩ ari ópí ni oko ọꞌjọ láka, “Malẽ nyekẽ mání Yõánã ã dị̃ sẽníyã ꞌa dĩádu.” 26 Tã zángwá ꞌdĩ ã zịlé rĩ eꞌbe ópí ã ásị́ azá ꞌdãku, kí anâ ralúka rá sĩ oko amba rọ̃ngọ̃ anâ emúlé rĩ tị sĩ, kógãa kpé. 27 Mgbesâ ọzẹ anâ ãsĩkérĩ kọ̃mụ kejí Yõánã ã dị̃. Ágó ꞌdĩ ọmụ ẹlị́ Yõánã ã dị̃ mãbụ́sị̃ ꞌa sĩ, 28 oko ejí sẽníyã ꞌa. Okẽ zángwá ꞌdĩ dí, kí zángwá ꞌdĩ ọꞌdụ ịdị̃ endẽ dí. 29 ꞌBá Yõánã ã vú okoka rĩ erikî tã ꞌdĩi ꞌdĩ, evũkî oji anâ ĩmwá ovũ osekî rá.
Yẹ́sụ̃ okẽ lonya ꞌbá élifũ tọ̃ụ́ ní
30 Mãju mụdị́lị́mbị́ ẹ̃rị̃ rĩ evũ otarukî Yẹ́sụ̃ ã lãgagá, onzekî láka tã ãꞌiã idélé rĩ oko tã ãꞌiã ịnị̃lé rĩ trõ. 31 Kí ꞌbá ũꞌbí kévũ ãꞌidí, ꞌdĩsĩdú ofũkî sáã ẹsụ́ sĩ tã nyajó vúa ovujó kurũ, ọꞌjọ ãꞌiní, “Ãnyevũ óvũkî kãré ꞌbá ãkó rĩ ní gá ovure.” 32 ꞌDĩsĩdú ovũkî ãꞌi-ãꞌi ị́ꞌbọ́ sĩ ovure kãré ꞌbá ãkó rĩ ní gá. 33 Kí ꞌbá ãmgbụ́ ãꞌiã vũka ni ndeka rá rĩ itirĩkî ãꞌi rá oko olũkî pá sĩ vúa ꞌbá táụnị̃ ĩré-ĩré rĩ ní gá rĩ sâ olũkî pá sĩ kwícídu ocakî ãꞌiní ãtị. 34 Yẹ́sụ̃ tị ecá ꞌdĩ, onde laki ãmgbụ́ ꞌdĩ kizã oko ani cí, ãꞌdusĩku kákî racị bị̃lọ̃ ẹyị̃lé ku rĩ áni. ꞌDĩsĩdú ịnị̃ ãꞌiní tã ũꞌbí.
35 Ũndwélãga vũ ã nịre rĩi, anâ mãju evũ anídí. Ọꞌjọkî láka, “Kãré ꞌdĩ cãlọ̃ oko vũ sâ ịnị. 36 Nyĩzẹ ꞌbá ꞌdĩ pí áwusĩ ní kõvũkî dú ẹ́’ị́ ĩré-ĩré rĩ ní gá sĩ lonya ẹjẹ́re ãꞌiní nyalé.” 37 Kí Yẹ́sụ̃ a’ị̃, “Ãnyĩkẽ ãꞌiní tã nyalé rĩi.” Ọꞌjọkî láka, “Lonya ꞌbá ꞌdítí ꞌdĩ ní jẹka ká mãꞌdị́ ãlu ni dîde ĩmbá ãrõ dí lẽ áwu?” 38 Yẹ́sụ̃ ọzị, “Ãnyidí mũgãtĩ a’ã rĩ sị́? Ãnyĩvũ endé arú.” Endékî ꞌdĩ, ọꞌjọkî, “Mũgãtĩ tọ̃ụ́ ẹ̃ꞌbị ẹ̃rị̃ trõ.” 39 Nã ã vúgá Yẹ́sụ̃ ọꞌjọ ãꞌiní, “Ãnyĩꞌbã ꞌbá ꞌdĩ kõrĩkî tụ́rụ́mụ́-tụ́rụ́mụ́ ayị́sẹ́ dị. 40 ꞌDĩsĩdú otarukî tụ́rụ́mụ́-tụ́rụ́mụ́ zị̃tị orĩ mị́ã-mị́ã zị̃tị mụ̃dịtọ̃ụ́-mụ̃dịtọ̃ụ́. 41 Yẹ́sụ̃ ọꞌdụ mũgãtĩ tọ̃ụ́ ꞌdĩ ẹ̃ꞌbị ẹ̃rị̃ ꞌdĩ trõ, onde tã ꞌbụ̃ ꞌa, okẽ ãnzó Rũbãngã ní ongo atĩ mũgãtĩ ni ẽwá ũꞌbĩ sĩ. Acị́ andagá ẽwá mũgãtĩ dí kẽka trõ anâ mãju dí, kanzukî laki ꞌdĩꞌbâ ã lélé gá. Oko anzu ẹ̃ꞌbị ẹ̃rị̃ ꞌdĩ sâ ꞌbá ꞌdĩ ã lélé gá kwící. 42 Laki onya tã títí. 43 Anâ mãju ota mũgãtĩ ẹ̃ꞌbị ni fúfú asị̃re rĩ trõ ẽvú mụdị́lị́mbị́ ẹ̃rị̃. 44 Laki lonya ꞌdĩ nyaka rĩ ã lélé gá ãgo ni wẹ́lị́ kátẽ élifũ tọ̃ụ́.
Yẹ́sụ̃ káacị́ ẹ̃yị́ dị sĩ.
45 Yẹ́sụ̃ oꞌbã anâ mãju otõ ị́ꞌbọ́ ꞌa vũjó áꞌdógá ẹ́’ị́ Bẽtẽsáidã ꞌa, kí asị̃ laki icáre ꞌbã rụ́. 46 ꞌDĩ ã vúgá, Yẹ́sụ̃ ọmụ ilegĩre ꞌbẹ́ bara. 47 Oca ị́nị́ ágá, ẹsụ́ ị́ꞌbọ́ omba lọ́lụ́ mẽri ágágá, oko Yẹ́sụ̃ asị̃ lọgọ dị aꞌdụ́tẹ. 48 Onde anâ mãju imbáru ị́ꞌbọ́ pẽreẽ gá, ãꞌdusĩku ẹ́rị́vị́ kộlwẹ́ ãꞌidí lẹ́lẹ́ sĩ, oko Yẹ́sụ̃ ọmụ ãꞌidí káacị́ ẹ̃yị́ dị sĩ. Tã ꞌdĩ idéru ĩré sáã sụ gá vũ ọwị́re rĩi. Apá alịlé ãꞌiã bãrã gá sĩ pí, 49 kí ãꞌiã ndeka Yẹ́sụ̃ káacị́ ẹ̃yị́ dị sĩ, orãkî ani ori-ori. Ọrị̃ sĩ, ozakî ụ́ꞌdụ́kụ́ sĩ, 50 ondekî ani ꞌdĩ, ọrị̃ oko ãꞌi cí. Mgbesâ ọꞌjọ tã ãꞌidí “Ãnyimbá ásị́! ꞌdĩ ma ꞌi. Ọrị̃ kõko ãnyi ku.” 51 Oko ọtụ ị́ꞌbọ́ ꞌa ãꞌi trõ ẹ́rị́vị́ ọnị̃ mba ꞌdị̃ eꞌbedú a’ụ̃kî cí, 52 ẹsụ́ tọ́ erikî nyúmá idélé mũgãtĩ sĩ rĩ ã ékwí kurũ ãꞌiã ásị́ olúka ãnyụ sĩ.
Yẹ́sụ̃ ká ꞌbá ijá Jẽnẽsãrétĩ ꞌa.
Mãtẹ́ọ̃ 14:34-46
53 Ezákî mẽri áꞌdó vũ Jẽnẽsãrétĩ dí gá, oko o’ĩkî ị́ꞌbọ́ ọ́tịá gá. 54 Ẹsị́kî ị́ꞌbọ́ ꞌa sĩ ꞌdĩ, ꞌbá itirĩ Yẹ́sụ̃ ni rá. 55 ꞌDĩsĩdú acákî lọgọ nã ã dị̃ gá ndụtụ, iꞌdókî ꞌbá rụ unzi rĩ ajika ãvurukwẽ sĩ Yẹ́sụ̃ ã vúgá sĩ. 56 Yẹ́sụ̃ acị́ cãlọ̃ ꞌa sĩ, táụnị̃ ꞌa sĩ, lọ̃ụ́ ꞌa sĩ oko kãré ꞌdĩꞌbâ gá sĩ kwící, úla ꞌbá rụ unzi rĩ sọ́kọ̃ kãré gá sĩ. Kákî anâ kizã a’ị́ dũbãsĩ kõꞌbã ꞌbá rụ unzi rĩ keló anâ bõngú ã tị áwu. ꞌBá ani elóka rá rĩ ã rụ ẹꞌbwẹ rá.