7
Tã mãꞌdị́ ꞌbãre pẹ́lẹ́rẹ́ Rũbãngã andagá rĩi.
Mãtẹ́ọ̃ 15:1-20
1 Farịzẹị́ã lãpõnyiã cárá (Mũzê dí) ịnị̃ka rĩ tị trõ engáka Yẹ̃rụ́sãlẹ́mẹ̃ gá sĩ rĩ tị otarukî Yẹ́sụ̃ ã lãgagá. 2 Ondekî ꞌbá zị̃tị Yẹ́sụ̃ ã vú okoka rĩ ká tã nya dí ãndị́ trõ, ãꞌdusĩku ọꞌjẹ̃kî dí lãtị́ ãꞌidí ã lẽjó rĩ áni ku. 3 Farịzẹị́ã Yụ̃dẹ́ị̃ꞌbá nyã rĩ tị trõ unya tã ku jõ ọꞌjẹ̃kî dí lãtị́ ãꞌidí ã lẽjó rĩ áni ku, kákî lịnị̃ ãꞌbị dí ã vú oko dú. 4 Jõ engwíkî sọ́kọ̃ gá sĩ, onyakî tã dí jẹ̃ka ãkó ku. Kákî lãtị́ zị̃tị õvi dú kọ́pọ̃ oko kụ́ꞌdọ̃ ãbíndú trõ ụꞌjẹ̃jó rĩ ã vú oko. 5 ꞌDĩsĩdú Farịzẹị́ã lãpõnyiã cárá ịnị̃ka rĩ tị ọzịkî Yẹ́sụ̃ ni, “Nyí ꞌbã ꞌbá nyâ vú okoka rĩ okokî cárá ãꞌbị dí ã vú ku, kákî tã unya dí ãndị́ trõ ãꞌdusĩ yã?” 6 Yẹ́sụ̃ a’ị̃, “Ãnyi lọgọtị, lẹꞌjọ́ Ĩsãíã ã sĩlé rĩ ándá ịtẹꞌdẹ̃ru ãnyi rụ, kéendé anâ sĩjó rĩ áni, ‘ꞌBá ꞌdĩ ká mã ru tị sĩ, kí ãꞌiã ásị́ má trõ ị̃yọ. 7 Lẹ́tị ãꞌiã ma rujó rĩ andã ãkó, ãꞌdusĩku kákî cárá ꞌbá ã uꞌbãlé rĩ ịnị̃ áwu.’” 8 Ongo Yẹ́sụ̃ ọꞌjọ ãꞌiní, “Gbádu ãnyeꞌbe cárá Rũbãngã dî rá ãnyí lịnị̃ ãꞌbị dî ã vú oko áwu.” 9 Injáru andagá ọꞌjọ ãꞌiní, “Ãnyẹsụ́ lẹ́tị losó ãnyiní cárá Rũbãngã dí ꞌbãjó bãrã gá áwusĩ ní ãnyoko dú lịnị̃á ãꞌbị dí ã vú áwu! 10 Ãꞌdusĩku Mũzê ọꞌjọ, ‘Kólẽ nyĩru nyátâ tị nyéndẽ trõ,’ oko ọꞌjọ, ‘Jõ mãꞌdị́ owã átâ tị endẽ trõ rá, ộꞌdị ani kpó.’ 11 Kí ãnyoko lịnị̃ Mũzê ã kẽlé rĩ ã vú ku. ꞌDĩsĩdú jõ mãꞌdị́ ọꞌjọ átâ tị ní endẽ trõ, ‘Ikonyĩ ãnyã ẹsụ́lé má dí sĩ rĩ kõrõbánĩ’ (ékwí na tã azĩlé Rũbãngã ní rĩi), 12 áwusĩ ãnyĩꞌbã mãꞌdị́ okẽ ikonyĩ ãlusâ átâ tị ní endẽ trõ ku. 13 ꞌDĩsĩdú ãnyã lịnị̃ ã vú okoka áwu sĩ, ãnyĩꞌbã lẹꞌjọ́ Rũbãngã dî o’e ékwí ãkó. Oko ãnyidé tã ꞌdíni rĩ vú ụ̃ꞌbị́ sĩ.”
14 Yẹ́sụ̃ ụngwẹ laki ꞌdĩ, oko ọꞌjọ ãꞌiní, “Ãnyi cị̃dú ãnyeri lẹꞌjọ́ ꞌdĩ ã ékwí ni. 15 Tã engáre ãngwé sĩ kwire ꞌa gá rĩ inzĩ mãꞌdị́ ku. Kí rárĩ tã engáre mãꞌdị́ ni ꞌa gá sĩ ekwíre ãngwé rĩ ká ꞌbá inzĩ nĩ. 16 Mãꞌdị́ bị́ trõ rĩ keri!”
17 Nã ã vúgá, Yẹ́sụ̃ eꞌbe laki nã ꞌbâtị oko okwi jó gá, ꞌbá anâ vú okoka rĩ ọzị ani lẹꞌjọ́ ékwí ꞌdĩ sĩ. 18 Ọzị ãꞌi, “Ãnyi lãli ku yã? Ãnyĩnde tã engáre ãngwé kádĩ kwi mãꞌdị́ ni ꞌa gá rĩ ká ani inzĩ kpé ni kũru yã? 19 Tã ꞌdĩ okwi ásị́ arú ku, kí anâ ꞌa gá kádĩ efũ ãngwé.” (Tã ꞌdĩ ꞌjọka sĩ, Yẹ́sụ̃ ịtẹꞌdẹ̃ lonya kwící nyalé losó.) 20 Yẹ́sụ̃ ọmụ andagá lẹꞌjọ́ trõ, “Tã engáre mãꞌdị́ ni ásị́ gá sĩ rĩ ká ani inzĩ ni. 21 Ãꞌdusĩku rã ẽgo rĩ kéengá mãꞌdị́ ni ásị́ gá sĩ õvi dú: rã ãndị́ rĩi, batẽ, ọgụ̃, lọꞌdị, 22 mọmọ̃, ásị́ unzĩ, lunzã, tị batẽ, avĩ, tị enzõ, lẹcụ́ lalĩ trõ. 23 Tã unzi ꞌdĩꞌbâ kéengá mãꞌdị́ ni ásị́ gá sĩ kádĩ ani inzĩ.
Gị̃rị́kị̃zị́ a’ị̃ trõ rĩi
Mãtẹ́ọ̃ 15:21-28
24 Nã ã vúgá, Yẹ́sụ̃ eꞌbe kãré nã rá, onga ọmụ lọgọ Táyã dí gá. Okwi jó zị̃ gá, olẽ mãꞌdị́ zị̃ ãlusâ kọ̃nị̃ ni ku, kí omã ani uzũlé kpé. 25-26 Kãré nã ní gá, ẹsụ́ ị́zị́ zị̃ a’ã. Ị́zị́ ꞌdĩ ani Gị̃rị́kị̃zị́, kí ọ́tị ani vũ Fõnéciã ni Síriã ꞌa rĩ ní gá. Ị́zị́ ꞌdĩ ã zâ ni orí ũnzí trõ, eri tã Yẹ́sụ̃ ã dị̃ gá ꞌdĩ, ẹmụ́ oꞌde pá arụ́. A’ị́ ani kizã sĩ kõdo dú orí ũnzí zâ ã rụ gá sĩ pí. 27 Yẹ́sụ̃ ọꞌjọ láka, “Ãtịjóa dú kólẽ nyĩꞌbã ꞌbácírí kõnya tã ãꞌiã lẽlé rĩ kpá, ãꞌdusĩku lonya ꞌbácírí dî ꞌbeka õcé ní ni ũnzí.” 28 Ị́zị́ ꞌdĩ ọꞌjọ, “Oo Ópí, kí õcé sâ ká lonya ꞌbácírí dí zọ̃ka mézã pá gá rĩ nya wã.” 29 Yẹ́sụ̃ ọꞌjọ ị́zị́ ꞌdĩ ní, “Nyâ tã ꞌdĩ a’ị̃ka ꞌdíni sĩ, nyị̂mụ wã, orí ũnzí rĩ onga nyâ zâ ã rụ gá sĩ pí.” 30 Ị́zị́ ꞌdĩ ọmụ ꞌbãrụ́ rá, ẹsụ́ zâ oꞌde gbọlọ dị, kí orí ũnzí rụ arụ́ ị̃yọ.
Mãꞌdị́ bị́ ãkó tã ꞌjọre kpé rĩ ijáka.
Mãtẹ́ọ̃ 15:29-31
31 Yẹ́sụ̃ eꞌbe lọgọ Táyã dí rá, oko lẹ́tị alịre Sĩdónẽ gá sĩ mụre mẽri Gãlĩléã gá sĩ rĩi, ọmụ lọgọ Dị̃kápọlị̃ a dí gá. 32 ꞌBá zị̃ ejí anídí ágó bị́ ãkó tã ꞌjọre kpé rĩi, a’ị́kî anâ kizã ni kọ̃tị̃ dí du ágó ꞌdĩ ã dị̃ gá. 33 Yẹ́sụ̃ oji ani laki andagá sĩ bãrã gá, osu dí ángwá ágó ꞌdĩ ã bị́ gá. Owĩ tụzẽ ongo eló ágó ꞌdĩ ã lẽda. 34 Onde tã ꞌbụ̃ ꞌa oko o’ã ãnzị ọꞌjọ láka, “Ẽfétã!” (ékwí na “Nyawị́ru!”) 35 Mgbesâ ágó ꞌdĩ ã bị́ awị́ru rá, lẽda na sâ ayụru rá oko iꞌdó tã ꞌjọka pẹ́lẹ́rẹ́. 36 Yẹ́sụ̃ icarã ãꞌiní kólẽ kọ̃ꞌjọkî tã ꞌdĩ mãꞌdị́ zị̃ ní ãlusâ ku. Õzi Yẹ́sụ̃ inzáru cárá ꞌdĩ trõ andagá, kí rũsâ kákî zi rinzá sĩ õfú ꞌdĩ icáka trõ. 37 ꞌBá ꞌdĩ a’ụ̃ okpõ sĩ. Ọꞌjọkî, “Idé tã kwící losó. Oꞌbã ꞌbá bị́ ãkó rĩ ká tã eri oko tị ãkó rĩ sâ ká tã ꞌjọ wã.