Márịkọ̃ 5

Yẹ́sụ̃ ijá mãꞌdị́ orí ũnzí trõ rĩ ꞌi

¹ Yẹ́sụ̃ tị anâ mãju trõ ecákî mẽri Gãlĩléã áꞌdó gá ãꞌjíre lélé lọgọ Gãrásã dí gá. ² Ẹsị́kî ị́ꞌbọ́ ꞌa sĩ ꞌdĩ, mgbesâ ágó zị̃ orí ũnzí trõ rĩ engá jị̃mị̃tẹ́rịọ̃ ꞌa sĩ ẹmụ́ Yẹ́sụ̃ dí. ³ Ágó ꞌdĩ kóolu jị̃mị̃tẹ́rịọ̃ ꞌa, mãꞌdị́ mọ́rị́ trõ ani umbére wã na ị̃yọ, kolú nyõrĩ sĩ sâ ꞌi, ⁴ ãmãlã éci anâ dí pá trõ mgbírilã sĩ vú ũꞌbí sâ, kúcea tụ̂tụ̂ oko ká aya anâ pá gá rĩ tị sâ ụngọ̃ rá-rá. Mãꞌdị́ zị̃ ãlusâ mọ́rị́ trõ ani kore wã na ị̃yọ. ⁵ Lị́tị̃ rã kúupí owó trõ jị̃mị̃tẹ́rịọ̃ ꞌa sĩ oko ká acị́ ꞌbẹ́ lélé sĩ, ká anâ rụ uga ọ́nị́ sĩ. ⁶ Ọꞌdụ́ nã sĩ endé Yẹ́sụ̃ ni lọ́lụ́ sĩ ꞌdĩ, elũ anídí oko egaru anda arụ́ ãꞌja sĩ. ^7-8 Yẹ́sụ̃ oko ọꞌjọ orí ũnzí ꞌdĩ ní, “Nyekwí ágó ꞌdĩ ã rụ gá sĩ pí.” Ágó ꞌdĩ oko oza ụ́ꞌdụ́kụ́ sĩ, “Yẹ́sụ̃, Rũbãngã ã Ngwápị ꞌbụ̃ ꞌa rĩ ꞌi, nyílẽ mádí ãꞌdu? Rũbãngã ã rụ́ sĩ nyẽkẽ mání lãmgbá ku.” ⁹ ꞌDĩ ã vúgá Yẹ́sụ̃ ọzị ani, “Nyâ rụ́ ãꞌdi ꞌi?” Oko a’ị̃, “Mâ rụ́ Mụ̃ndãrã ꞌi ãꞌdusĩku ãma ũꞌbí!” ¹⁰ Oko a’ị́ Yẹ́sụ̃ ni vúgá vúgá kọ̃zẹ ãꞌi kãré nã ní gá sĩ pí ku.

¹¹ Sáã na sĩ, ẹsụ́ rãbãlã ũꞌbí kóonyá ꞌbẹ́ bara. ¹² Orí ũnzí ꞌdĩꞌbâ a’ị́ Yẹ́sụ̃ ã kizã, “Nyĩzẹ ãma rãbãlã nã ꞌbâtị ní rụ.” ¹³ Yẹ́sụ̃ eꞌbe oyíkî oko otõkî rãbãlã ꞌdĩꞌbâ ã rụ gá. Rãbãlã kátẽ ĩré élifũ ẹ̃rị̃ ꞌdĩꞌbâ ọfẹ̃ ilukî jụ̃lụ̃ gulukutũ ꞌa sĩ oko ọzọ̃kî mẽri ꞌa ọmvụ́kî kwící.

¹⁴ Tã ꞌdĩ ã ridéka sĩ, ꞌbá rãbãlã ẹyị̃ka ꞌdĩꞌbâ ọfẹ̃kî õfú ꞌdĩ icá sĩ táụnị̃ ꞌa sĩ, cãlọ̃ ꞌa sĩ oko ꞌbá evũ tã ridére ꞌdĩ ndere. ¹⁵ ꞌBá õfú ꞌdĩ erika rĩ evũ Yẹ́sụ̃ dí ꞌdĩ, ondekî ágó jõsî orí ũnzí trõ rĩ orĩ laki lélé, osu bõngú cí, orí ũnzí onga rụ arụ́ sĩ pí oko ụ́jẹ́ na sâ awị́ru pẹ́lẹ́rẹ́ eꞌbedú ꞌbá ꞌdĩ o’e ọrị. ¹⁶ ꞌBá tã ridére ágó ꞌdĩ ã rụ gá rĩ oko rãbãlã ã rụ gá rĩ ndeka rá rĩ onzekî ꞌbá zị̃tị ni rá. ¹⁷ ꞌDĩ ã vúgá, iꞌdókî Yẹ́sụ̃ ni a’ị́ka kizã sĩ keꞌbe lọgọ ãꞌidí nã rá. ¹⁸ Yẹ́sụ̃ ã tụre ị́ꞌbọ́ ꞌa rĩi, ágó tébẽ orí ũnzí trõ rĩ a’ị́ Yẹ́sụ̃ ni ani kõko dú anâ vú trõ. ¹⁹ Yẹ́sụ̃ ogã láka ĩmgbé oko ọꞌjọ, “Nyĩmụ ꞌbãrụ́ nyâ ꞌbá gá oko nyĩnze ãꞌiní tã Ópí ã idélé nyíní rĩ oko kizã anâ ịtẹꞌdẹ̃lé nyíní rĩi.” ²⁰ Yẹ́sụ̃ ã gãka aníní ĩmgbé sĩ, ágó ꞌdĩ eꞌbe ani oko ọmụ tã nzágó Yẹ́sụ̃ ã idélé aníní rĩ nze sĩ lọgọ ĩré-ĩré Dị̃kápọlị̃ dị gá rĩ ní gá. ꞌBá tã ꞌdĩ erika rĩ cị̃dú a’ụ̃ rá.

Yẹ́sụ̃ inga Jáirõ ã zâ ni dã gá sĩ

Mãtẹ́ọ̃ 9:18-26; Lụ́kã 8:41-56

²¹ ꞌDĩ ã vúgá, Yẹ́sụ̃ engwí mẽri áꞌdó ị́ꞌbọ́ sĩ ꞌdĩ, laki ũꞌbí ovũ otaru lãga arụ́ mẽri tị. ²² Ãmbá zị̃ jó lemú dí ụngwẹlé Jáirõ ni ẹsụ́ laki nã ã lélé gá. Onde Yẹ́sụ̃ ni mgbesâ oꞌde pá arụ́. ²³ Oko a’ị́ anâ kizã ni, “Mâ zâ ni ĩré kódã. Nyẹmụ́ nyị̃tị̃ dí dị̃arụ́, rụ na kẹꞌbwẹ dú kolú du lídi.” ²⁴ ꞌDĩsĩdú ovũkî ãlu Yẹ́sụ̃ tị trõ oko laki ũꞌbí oko Yẹ́sụ̃ ã vú trõ kakîji rũmwĩ sĩ rụ arụ́.

²⁵ Ẹsụ́ ị́zị́ zị̃ laki lélé gá. Ãrí orĩ rare rụ arụ́ sĩ kĩnyã kátẽ mụdị́lị́mbị́ ẹ̃rị̃. ²⁶ Ị́zị́ ꞌdĩ icandĩru pãlãndã akimúã ũꞌbí ni vúgá sĩ, kí omãkî ani ijálé kpé. Ẹꞌbụ̃ limi anídí a’ã rĩ kwící lãzá ꞌdĩ ijájó, kí dusĩ lãzá na inzáru andagá. ²⁷ Eri õfú Yẹ́sụ̃ ã ẹmụ́jó rĩ ꞌdĩ, ẹmụ́ láka opiru ọ̃gụ gá sĩ laki lélé kádĩ anâ bõngú eló, ²⁸ ãmãlã orã ásị́-ásị́ ni, “Jõ meló anâ bõngú gbárĩ áwu sâ, mâ rụ kôja rá.” ²⁹ Mgbesâ ãrí rare rụ arụ́ sĩ rĩ ọnị̃ mba cí oko itirĩ rá icandĩ onga anâ rụ gá sĩ pí.

³⁰ Sáã nã ní mị gá, mgbesâ Yẹ́sụ̃ itirĩ rá okpõ onga anâ rụ gá sĩ pí. Oko ẹcọru laki gá ọzị, “Ãꞌdi eló mâ bõngú nĩ?” ³¹ Anâ mãju a’ị̃, “Nyínde ꞌbá rumwĩka nyâ rụ gá ꞌdĩ ọ̃tẹ oko nyîzịa, ‘ãꞌdi eló ma nĩ’ ni íngóni?” ³² Kí rũsâ Yẹ́sụ̃ undé laki eci mgbí ká mãꞌdị́ ani elóre rĩ ndụ̃. ³³ ꞌDĩ ã vúgá, ị́zị́ ꞌdĩ ọ̃nị̃ tã ridére anâ rụ gá ri ọ̃tẹ sĩ, ẹmụ́ oꞌde Yẹ́sụ̃ ã pá gá rụ na kôzi ꞌdĩ sĩ ọrị̃ sĩ, oko a’ị̃ rá ani eló Yẹ́sụ̃ ni nĩ. ³⁴ Yẹ́sụ̃ ọꞌjọ láka, “Mâ zâ, nyâ a’ị̃ ari nyi rá. Nyĩmụ ẹ̃ꞌbwẹ́ kolú nyí trõ, dĩáa nyâ lãzá oja rá.”

³⁵ Lẹꞌjọ́ Yẹ́sụ̃ ã tị gá rĩ oca ọkọ́re kurũ, ãgo zị̃ evũ ãmbá Jáirõ dí ꞌbãrụ́ sĩ oko ọꞌjọkî Jáirõ ní, “Nyâ zâ odã rá, nyí lãpọ́nyị́ ni icandĩ ị̃dị́-ị̃dị́ ãꞌdusĩ?” ³⁶ Yẹ́sụ̃ idé ani kéendé eri tã ãꞌiã ꞌjọlé rĩ kurũ, oko ọꞌjọ Jáirõ ní, “Ọrị̃ kõko nyi ku, rári nyolú a’ị̃ trõ.” ³⁷ Olẽ ꞌbá ũꞌbí ꞌdĩ kõvũ ãꞌiã vúgá Jáirõ trõ ni ku, kí ovi Péturũ ꞌi oko Yãkọ́ꞌbọ̃ tị adụ́pị̂ ni Yõánã trõ áwu. ³⁸ Ecákî ãmbá Jáirõ dí ꞌbãrụ́ ꞌdĩ, Yẹ́sụ̃ onde ꞌbá kúꞌde oko zị̃ꞌbâ ká kụ́kụ̃ dị. ³⁹ Oko okwi jó gá ọꞌjọ ãꞌiní, “Ãnyá owó ãꞌdusĩ? Zángwá ꞌdĩ odã kurũ, ká ọꞌdụ́ ko.” ⁴⁰ Kí kákî ani gụgụ̃. Ẹzẹ́ ꞌbá ꞌdĩ ãngwé, ẹꞌdụ́ zángwá ꞌdĩ ã átâ tị endẽ trõ oko anâ mãju ina rĩ láka, okwikî kãre ẽwá zángwá ꞌdĩ lareẽ gá rĩ ní gá. ⁴¹ Ekó zángwá ꞌdĩ dí sĩ oko ọꞌjọ láka, “Tãlítã kụm!” (Ékwí na “Zángwá, máꞌjọ nyíní nyĩnga ọrụ!”) ⁴² Mgbesâ zángwá ꞌdĩ onga ọrụ oko iꞌdó acị́. Ẹsụ́ anâ kĩnyã mụdị́lị́mbị́ ẹ̃rị̃. Tã ridére ꞌdĩ sĩ, ꞌbá ndeka rá rĩ a’ụ̃ cí. ⁴³ Oko icarã ãꞌi kĩlí-kĩlí kõnzekî tã ridére rĩ ꞌbá zị̃ ní ku, oko ọꞌjọ kõkẽkî zángwá ꞌdĩ ní lonya.