13
Yẹ́sụ̃ onze tã kộmụ ká ridé rĩi
1 Yẹ́sụ̃ ã efũre jó Rũbãngã dí ꞌa sĩ rĩi, anâ májú ãlu na ọꞌjọ láka, “Lãpọ́nyị́, nyĩnde jó nã ọsịru ọ́nị́ gbọ̃rọ́ rĩ sĩ oko ọsịru kéendé pẹ̃lẹ̃rẹ́!” 2 Yẹ́sụ̃ ọꞌjọ, “Ãnyĩnde jó ụsịlé gbọ̃rọ́ ꞌdĩꞌbâ rá yã? Ọ́nị́ jó ꞌdĩꞌbâ ụsịjó rĩ iréa dị̃dị̃ ãlusâ ọ́nị́ asị̃re rẽsíã dị̃ gá na kóolú ị̃yọ.”
3 Yẹ́sụ̃ tị anâ mãju trõ ovũkî ꞌbẹ́ Ólivã dị. Yẹ́sụ̃ orĩ ká tã nde jó Rũbãngã dí Yẹ̃rụ́sãlẹ́mẹ̃ gá rĩ gá lẹ́lẹ́. Sáã gã ã vúgá, Péturũ ꞌi, Yãkọ́ꞌbọ̃ ꞌi, Yõánã ꞌi, Ãndẽréã tị trõ ovũ ọzịkî ani mụ̃gụ́mụ̃gụ́ du, 4 “Nyĩꞌjọ ãmaní tã ꞌdĩꞌbâ ká ridé ãꞌdungání? Oko lẹtẹ̃ kóolú a’ã ịtẹdẹ̃jóa tã ꞌdĩꞌbâ ká ridé rá ꞌi?” 5 Yẹ́sụ̃ ọꞌjọ ãꞌiní, “Ãnyĩtã asị́ dúdu mãꞌdị́ zị̃ kõnzã ãnyi ku.” 6 ꞌBá ũꞌbí kévũ mâ rụ́ sĩ kákî ꞌjọa, ‘Ma ãriꞌdị́pị ꞌi,’ Oko kákî ꞌbá ũꞌbí unzã rá. 7 Jõ ãnyeri óꞌjá eꞌdé rá kusâ õfú óꞌjá dí kộkụ, ọrị̃ kõko ãnyi ku. Tã ꞌdĩꞌbâ olẽru kidéru rá, kí ꞌdĩ vũtị ọkọ́ka ꞌi ku. 8 Lọgọ kéci lọgọ trõ, õpi kéci õpi trõ. Vũ ká royo kãré ũꞌbí gá rá oko ị̃tụ́kã sâ kéeꞌdé rá. ꞌDĩ icandĩ ã iꞌdo kaã ꞌi.
9 “Ãnyĩ mba õkpó. Áꞌdi ãnyĩꞌbã vụra anda gá rá, oko áꞌdi ãnyĩ mgba jó lemú dî ní gá rá. Ãnyî mbá amba vũ aseka rĩ tị õpi trõ anda gá rá mâ sãdẹ̃nịã dú. 10 Kí õfú losó rĩ kólẽa kâcá sụ́rụ́ kwící gá kpá. 11 Jõ óko ãnyi oko ójí ãnyi kẹ́sị̃ andagá, ọrị̃ kõko ãnyi ꞌdị́ ãnyí ãꞌdu tã ꞌjọ yã sĩ ku. Ãnyĩꞌjọ tã ẹmụ́re ãnyã dị̃ gá sáã nã sĩ rĩi, ãꞌdusĩku ãnyiꞌjọ ãnyi ku, kí Éndí Ọlẹ rĩ ká tã ꞌjọ nĩ. 12 ꞌBá zị̃tị adụ́nzị ã tị ọndị ãꞌi ꞌdịjó, oko ãtâ zị̃tị sâ ká ãꞌiã ꞌbará ã tị ọndị rá. ꞌBácírí zị̃tị ká rẹcọ endé ãta trõ ã rụ gá óꞌjáꞌbâzí oko kákî ꞌbãa áꞌdi ãꞌi ꞌdị kpó. 13 ꞌBá kwící ká ãnyi evu rá mâ rụ́ sĩ, kí mãꞌdị́ mbare õkpó ndị̃ tã tị ọkọ́reẽ gá rĩ ká lari ẹsụ́ rá.
14 “Jõ ãnyĩnde ꞌbá ká tã ẹsị̃re ku Rũbãngã andagá rĩ ejí, oko kákî ꞌbãa kãré ẹsụ́ olẽru kolú láka ku rĩ ní gá, kólẽa ꞌbá Yụ̃dẹ́ị̃ ꞌa rĩ kọ̃fẹ̃ rũzũre ꞌbẹ́ dị.” a Mãꞌdị́ lẹꞌjọ́ ꞌdĩ lãre rĩ keri ékwí na. 15 Mãꞌdị́ zị̃ kwire anídí jó gá okojó ẹꞌdụ́re na kóolú ị̃yọ. 16 Mãꞌdị́ ámvụ́ ꞌa ngwire vúlé ꞌbãrụ́ anâ bõngú ẹꞌdụ́re na kóolú ị̃yọ. 17 Jõ ọꞌdụ́ na nã ecá nĩ, ũkú ꞌbõrõnzi trõ ꞌa gá rĩ lũkũnde trõ kévũ ká ricandĩ ꞌdãku! 18 Ãnyilegĩ tã ꞌdĩꞌbâ kidéru áyi sĩ ku, 19 ãꞌdusĩku ọꞌdụ́ nã sĩ icandĩ ꞌdere rĩ oza icandĩ kwící rá, eríjó Rũbãngã ã vũ ꞌbĩjó rĩ íngá ndị̃ dĩádu, oko icandĩ zị̃ rũvire ꞌdĩ trõ rá na ị̃dị́ sâ kóolú ị̃yọ. 20 ꞌBá Ópí Rũbãngã ã upẽlé aníní rĩ sĩ, ká ọꞌdụ́ icandĩ dí ꞌdĩ lị ãlị. Kẹsụ́ aní áni ku, mãꞌdị́ olúre lídi na kóolú ị̃yọ. Kí ꞌbá anâ ovilé rĩ sĩ, oꞌbã ọꞌdụ́ na o’e ãlị́.
21 Jõ mãꞌdị́ zị̃ ọꞌjọ ãnyiní sáã nã sĩ, ‘Nyĩnde, ãriꞌdị́pị ni ꞌdĩ kusâ ani nã!’ kwá ị́gẹnị̃ ku. 22 Ãꞌdusĩku ꞌbá ẽnzo rĩ kévũ kákî ꞌjọa ãꞌi ãriꞌdị́pị ꞌi kusâ ãꞌi tịluza Rũbãngã dí. Kákî nyúmá idé ꞌbá Rũbãngã upẽlé rĩ unzãjó, jõ ẹsụ́ kákî mãa wã ꞌi. 23 Ãnya wị́ mị mgbọ. Má tã ꞌjọ ãnyi ní oca ridére ku drú ãnyolú du bábá.”
Ọ́rị Mãꞌdị́ ã engwíka
24 Yẹ́sụ̃ ọꞌjọ, “Kí ọꞌdụ́ icandĩ dí nã ã vúgá, ‘Ĩmbá tị ị̃tụ́ trõ kô’e ị̃yọ, vúa vũ kô’e mũdĩ. 25 Tã Rũbãngã ã bĩlé ꞌbụ̃ ꞌa rĩ ká royo rá oko lẽlẽgó kẹ́zọ̃ vụ̃rụ́.’ 26 Sáã nã sĩ, ꞌbá ká Ọ́rị Mãꞌdị́ ni nde lõfú ꞌa, kệmụ́ mọ́rị́ sĩ oko ẹ̃kụ́ trõ. 27 Oko ká anâ mãláikã tị zẹ ꞌbá anâ upẽlé rĩ tị etáre kíiꞌdó vũ tị iꞌdóre gá ndị̃ anâ ọkọ́re gá.
28 “Dĩáa ãnyeri lịnị̃ ngwire ẹ́lẹ́ụ́ kwe rụ gá rĩi: Jõ ẹ́lẹ́ụ́ kwe ni bị́ kọ́zọ̃, ãnyí nị̃a rá melí ecá rá. 29 Kéendé ꞌjọjó rá rĩ áni, jõ ẹ́lẹ́ụ́ ni bị́ iꞌdó zọ̃ka rá, ékwí na melí ecá ĩré, vúa jõ tã mâꞌjọlé ãnyi ní rĩ ká ridé, ékwí na Ọ́rị Mãꞌdị́ ã ẹmụ́ka ĩré. 30 Mãꞌjọ ãnyiní tã ándá rĩi, tã ꞌdĩꞌbâ ká ridé kệsụ́a ꞌbá dĩadu lĩdi rĩ uca dãre túwá ni kurũ. 31 ꞌBụ̃ vũ trõ kọ́ọkọ́ rá, kí tã mâ ꞌjọlé rĩi kóolú tádu.
32 “Mãꞌdị́ zị̃ ọꞌdụ́ tã ꞌdĩꞌbâ ká ridé du na nị̃re kusâ sáã na nị̃re na ị̃yọ, mãláikã ꞌbụ̃ ꞌa rĩ ọnị̃ ku, Rũbãngã ã Ngwâ ni sâ ọnị̃ ku, kí tẽ Rũbãngã ọnị̃ nĩ. 33 Ãnyolú bábá! Ãnyĩta ásị́! Ãꞌdusĩku ãnyĩnị̃ sáã anâ ẹmụ́jó rĩ ku. 34 Oviru vĩ kéendé mãꞌdị́ kộmụ amụ̃ gá rĩ áni: Ká anâ ẹ́’ị́ eꞌbe anâ ẹꞌbụ̃ꞌbá dí, ká ãlu-ãlu ní ẹꞌbụ̃ kẽ oko kộꞌjọa mãꞌdị́ jótị tẹ̃re rĩ ní kolú tã undére. 35 ꞌDĩsĩdú ãnyolú bábá, ãꞌdusĩku ãnyĩnị̃ jó átá kéengwí ãꞌdungání yã ni ku, ꞌdị́ ũndwélãga sĩ yã, ị́nị́ yã, ã’ụ́lọ́gọ́ ã sĩrá sõre rĩ yã, kusâ ãꞌjí sĩ yã ni ku. 36 Jõ engwí tụ̃rụ̃kụ̃nyã dú, nyĩꞌbã kẹsụ́ nyi ọꞌdụ́ gá ku. 37 Tã mâ ꞌjọlé ãnyiní ꞌdĩ, mâ ꞌjọa ꞌbá kwící ní: ‘Ãnyĩta ásị́!’”