12
Lẹꞌjọ́ ékwí ꞌbá ámvụ́ ni tã mbaka rĩ ní dị.
1 Nã ã vúgá, Yẹ́sụ̃ iꞌdó anâ mãju ịnị̃ka lẹꞌjọ́ ékwí sĩ: “Ágó zị̃ ãlu osa anídí ámvụ́ ꞌa kwe õꞌa trõ rĩi yãyã dú kéendé áꞌbáláꞌbãngá áni rĩi, õꞌa na nyalé vúa idélé ĩrá du. Oco bara na celi sĩ cí ongo ọꞌdị ꞌbụ́ láka kwe ni õꞌa ꞌdĩ nyijó, vúa ọꞌdị lọrọ láka tã undéjó. Ágó ꞌdĩ onga ọmụ amụ̃ gá lọ́lụ́, kí eꞌbe ꞌbá zị̃ꞌbâtị ká ámvụ́ ꞌdĩ ꞌa dị̃ nde nĩ. 2 Sáã kwe ni õꞌa ꞌbwãjó rĩ sĩ, ọzẹ anâ tịluza ni kọ̃mụ losíꞌbá ꞌdĩ dí õꞌa ejíre ámvụ́ ꞌa sĩ. 3 Kí ꞌbá ꞌdĩ okokî ani cí, omgbakî ani oko odokî ani vúlé engwí dị́dị́ ni. 4 Ongo ọzẹ tịluza zị̃ áwu, kí omgbakî tịluza ꞌdĩ dị̃ gá oko tã ãꞌiã idélé ágó ꞌdĩ ã rụ gá rĩ kéendé dị̃nzá. 5 Ọzẹ tịluza zị̃ ị̃dị́, kí ani ꞌdĩ ni omgbakî kpó. Oko ọzẹ zị̃ꞌbâtị ị̃dị́, kí ãꞌi ꞌdĩ ni omgbakî zị̃tị mgbã, zị̃tị ọꞌdịkî kpó. 6 ꞌDĩ ã vúgá, aníní mãꞌdị́ zẹlẹ́ asị̃ tẽ ãlu, ani ꞌbarágó anâ lẽlé ndõ rĩi. Ọzẹ ani vúlégá oko orã ọꞌjọ, ‘Kákî mângwâ ni ru rá.’ 7 Kí losíꞌbá ꞌdĩ ọꞌjọkî ãꞌiã lélé gá, ‘ꞌDĩ ámvụ́ ꞌdị́pị ã lópíre ꞌi, ãnyevũ ộꞌdị ani kpó ộꞌdụ anâ limi ꞌbá ní.’ 8 ꞌDĩsĩdú ojikî oko ọꞌdịkî ani kpó. Oꞌbekî anâ ĩmwá ámvụ́ ꞌa sĩ pí.”
9 Yẹ́sụ̃ ọzị, “Ãnyĩrã ámvụ́ ꞌdị́pị ká ãꞌdu idé? Kệmụ́ ká losíꞌbá ꞌdĩ ụꞌdị rá oko ká ámvụ́ ꞌdĩ kẽ ꞌbá zị̃ ní. 10 Ẹsụ́ ãnyi lã ta sĩlé bụ́kụ̃ Rũbãngã dí rĩ ní ꞌa rĩ kurũ yã? ‘Ọ́nị́ ꞌbá jó ụsịka rĩ ã gãlé ĩmgbé rĩ o’e ọ́nị́ mbare jó ni gbúngú gá rĩi. 11 Ópí Rũbãngã idé tã ꞌdĩ nĩ oko tã anâ idélé rĩ kéendé pẹ́lẹ́rẹ́ ãmã mị gá.’”a
12 ꞌDĩ ã vúgá, amba Yụ̃dẹ́ị̃ꞌbá dí ọndụ̃kî lẹ́tị Yẹ́sụ̃ ni kojó, ãꞌdusĩku itirĩkî rá orĩ tã ꞌdĩ ꞌjọre lẹꞌjọ́ ékwí sĩ ãꞌiã rụ gá. Kí ẹsụ́ orĩkî laki ọrị̃re, ꞌdĩsĩdú eꞌbekî ani oko ovũkî pí.
Lãzị́ Yẹ́sụ̃ ní mụ̃sọ́rọ́ ukẽka dị gá.
13 Nã ã vúgá, amba Yụ̃dẹ́ị̃ꞌbá dí ọzẹkî Farịzẹị́ã zị̃tị ꞌbá Ẹ̃rọ́dẹ̃ dí trõ Yẹ́sụ̃ dí olẽkî jõ ãꞌi kómãa wã Yẹ́sụ̃ kọ̃ꞌjọ tã ẽgo rĩi. 14 Evukî aní dí oko ọꞌjọkî, “Lãpọ́nyị́, ãmãnị̃ rá nyi mãꞌdị́ andã dí ꞌi. Ọrị̃ oko nyi ku tã ꞌbá ã urãlé rĩ sĩ, ãꞌdusĩku nyí ꞌbã bị́ mãꞌdị́ zị̃ ã ẹ̃kụ́ gá ku, kí nyí lẹ́tị Rũbãngã dí ịnị̃ áwu andã sĩ. ꞌDĩsĩdú ãmá nyĩ zị, ꞌdị́ mụ̃sọ́rọ́ kẽka amba Rómãꞌbá dí ụngwẹlé Cị́zãrị̃ rĩi ani tã ándá rĩi yã kusâ tã ẽgo rĩi yã? 15 Kólẽa ãmãkẽ ọ̃lẹ̃ ãmãkẽ õlẽ ãmãkẽ ku?” kí Yẹ́sụ̃ ọnị̃ ãꞌiã cirĩ ọ̃tẹ oko ọꞌjọ ãꞌiní, “Ãnyĩlẽ mâ tị ọndịlé ãꞌdusĩ?” Oko ọzị ãꞌi, “Ãnyejí ọ̃kọ̃lọ̃ngọ́ mụ̃sọ́rọ́ dí ukẽlé rĩi ãlu na mádí mãnde.” 16 Ejíkî ọ̃kọ̃lọ̃ngọ́ ãlu oko Yẹ́sụ̃ ọzị ãꞌi, “ꞌDĩ ãꞌdi ã énó ꞌi oko ãꞌdi ã rụ́ ọ̃kọ̃lọ̃ngọ́ ꞌdĩ ã rụ gá ꞌdĩ ꞌi?” A’ị̃kî, “Cị́zãrị̃ dí ꞌi.” 17 Ongo Yẹ́sụ̃ ọꞌjọ ãꞌiní, “Tã Cị́zãrị̃ dí ãnyĩkẽ Cị́zãrị̃ dí, tã Rũbãngã dí ãnyĩkẽ Rũbãngã dí.” Eꞌbedú a’ụ̃kî cí tã Yẹ́sụ̃ ã a’ị̃lé rĩ sĩ.
Yẹ́sụ̃ ni ọ́zị onzika dị
18 Yụ̃dẹ́ị̃ꞌbá ụngwẹlé Sadụsẹ́ị̃ rĩꞌbâtị ọzị Yẹ́sụ̃ ní lụbị dú onzika dị. ꞌBá Sadụsẹ́ị̃ ꞌdĩi ꞌbá a’ị̃ka kurũ õvi Rũbãngã ká ꞌbá inzí dã gá sĩ rĩi. Evũkî Yẹ́sụ̃ dí lãzị́ trõ. 19 Ọzịkî ani, “Lãpọ́nyị́, Mũzê osĩ ãmaní cárá áma jõ mãꞌdị́ zị̃ ã adụ́pịị̃ odã rá, kí eꞌbe ị́zị́ ꞌbõrõnzi ãkó, ágórî kõngwi adụ́pịị̃ ã ãwị́zị́ ꞌdĩ, áwusĩ ní kọ̃tị dú ꞌbõrõnzi adụ́pịị̃ ní. 20 Ándáni ezẽ sĩ, ẹsụ́ adụ̂nzị zị̃ tụ́dẹ̃rị̃ a’ã. Ãtịjóa rĩ ọꞌdụ ị́zị́, kí odã eꞌbe ꞌbõrõnzi kurũ. 21 Ẹ̃rị̃jóa rĩ ongwi ãwị́zị́ ꞌdĩ, kí ani sâ odã ofũ ꞌbará eꞌbe sĩ kurũ. Inajóa rĩ sâ aníáni. 22 Ãgo tụ́dẹ̃rị̃ ꞌdĩꞌbâ kwící ofũ udã eꞌbekî ꞌbõrõnzi kurũ. Vúlé gá, ị́zị́ ꞌdĩ sâ odã rá. 23 Dĩáã ãmãzị nyi, jõ ẹsụ́ onzika a’ã, ꞌdị́ ị́zị́ ꞌdĩ kóolú ãꞌdi dí ꞌi, ãꞌdusĩku ãgo tụ́dẹ̃rị̃ ꞌdĩꞌbâ ọꞌdụkî ị́zị́ ꞌdi rá?” 24 Yẹ́sụ̃ ingwi, “Ãnyĩnị̃ ãnyi ẽgo ni ku yã ãmãlã ãnyĩnị̃ tã sĩlé bụ́kụ̃ Rũbãngã dí rĩ ní ꞌa rĩ ku kusâ ãnyĩnị̃ okpõ Rũbãngã dí ni ku yã? 25 Jõ ꞌbá dãka rá rĩ onzi rá, ọꞌdụrukî ku, kí kákî olú mãláikã ꞌbụ̃ ꞌa rĩ áni.
26 “Dĩáã onzika ã dị̃ gá, ꞌdị́ ãnyĩlã tã sĩlé bụ́kụ̃ Mũzê dî gá rĩ kurũ yã? Sáã Rũbãngã ịtẹꞌdẹ̃ru láka ãcí sĩ kwe gá rĩi, ọꞌjọ láka, ‘Ma Rũbãngã Ãbãrámõ dí ꞌi, Ĩsákõ dí ꞌi oko Yãkọ́ꞌbọ̃ dí ꞌi.’ 27 Ani Rũbãngã ꞌbá dãka rá rĩ dí ꞌi ku, kí ꞌbá lĩdi rĩ dí ꞌi. Ãnyi ẽgo réré.”
Cárá ndẽre rĩi.
28 Lãpõnyiã cárá Mũzê dí ịnị̃ka rĩ ãlu na ẹmụ́ eri tã ꞌbá Yẹ́sụ̃ tị Sadụsẹ́ị̃ ã izúlé rĩ rá. Anâ ndeka Yẹ́sụ̃ a’ị̃ ãꞌiní lẹ́tị ándá rĩ sĩ ꞌdi, ọzị Yẹ́sụ̃ ni, “Cárá ꞌdĩꞌbâ ní gá ndẽre rĩ íngõ ꞌi?” 29 Yẹ́sụ̃ ọꞌjọ, “Ndẽre rĩ ꞌdĩ ꞌi, ‘Yụ̃dẹ́ị̃ꞌbá ãnyeri, Ópí Rũbãngã ãmadí, Ópí ni ãlu tẹ̃ndẹ̃. 30 Nyĩlẽ nyâ Ópí Rũbãngã ni ásị́ cị̃dú sĩ, éndí cị̃dú sĩ, rã cị̃dú sĩ oko mọ́rị́ cị̃dú sĩ.’ 31 Ẹ̃rị̃jóa rĩ ꞌdĩ ꞌi, ‘Nyĩlẽ nyâ wãꞌdêzí kéendé nyâ nyi lẽka rĩ áni.’ Cárá zị̃ ꞌdĩꞌbâ ndẽka rá na ị̃yọ.” 32 Ágó ꞌdĩ ọꞌjọ, “Nyi ándá nyâ ꞌjọka Rũbãngã ni ãlu tẹ̃ndẹ̃ oko zị̃na ị̃yọ sĩ. 33 Ani lẽka ásị́ cị̃dú sĩ, rã cị̃dú sĩ, mọ́rị́ cị̃dú sĩ oko nyâ wãꞌdêzí ni lẽka nyâ nyi lẽka rĩ áni ni ani tã õkpó ondẽ azĩ kẽka cị̃dú rá.” 34 Yẹ́sụ̃ itirĩ mãꞌdị́ ꞌdĩ a’ị̃ ani cirĩ sĩ ꞌdĩ, ọꞌjọ láka, “Nyi lọ́lụ́ ku opĩ Rũbãngã dí gá sĩ.”
Iꞌdó sáã nã sĩ, mãꞌdị́ zị̃ ọzị ani lãzị́ sĩ ị̃dị́ kurũ.
Yẹ́sụ̃ ọꞌjọ tã ãriꞌdị́pị ã dị̃ gá.
35 Yẹ́sụ̃ ã tã ịnị̃re dịfọ jó Rũbãngã dí ígá rĩi, ọzị lãzị́, “ꞌDị́ lãpõnyiã cárá kí nị̃a áma ãríꞌdị́pị ni Dãvị́dẹ̃ ã ngwâ ꞌi ni ãꞌdu sĩ? 36 Dãvị́dẹ̃ ni anâ ngásĩ sâ mọ́rị́ Éndí Ọlẹ rĩ dí sĩ ọꞌjọ tã ãriꞌdị́pị ã dị̃ gá, ‘Ópí Rũbãngã ọꞌjọ mâ Ópí ní, “Nyĩrĩ mâ dí ãndá gá ꞌbá kpộ dú asere, vúa má ꞌbãa nyâ óꞌjáꞌbâzí kộwọ nyâ pá gá.”’ 37 Jõ Dãvị́dẹ̃ ni anâ ngásĩ kụ́ngwẹa ani ‘Ópí’ ꞌi, ꞌdị́ kóolú ngwâ ꞌi ni íngóni?” Laki ũꞌbí rũtaka rĩ eri tã ꞌdĩ anzõ trõ.
Yẹ́sụ̃ ká ꞌbá iꞌjá amba Yụ̃dẹ́ị̃ dí ꞌa idélé rĩ sĩ.
38 Yẹ́sụ̃ ã tã ịnị̃re rĩ ọꞌjọ, “Ãnyĩꞌbã mị õkpó lãpõnyiã cárá ịnị̃ka rĩ ã tã idélé rĩ ní gá. Olẽrukî kãnzụ usúka sĩ ndõ ọ́kọ̃nị̃ dú ãꞌi ãꞌdu ꞌbá yã ꞌi, oko olẽkî ộzị ãꞌi lãrú sĩ sọ́kọ̃ ꞌa sĩ, 39 oko olẽkî tẽsâ kómí andagá rĩ áwu jó lemú dí ní gá oko kãrámã ni kãré gá sĩ. 40 ꞌBá ꞌdĩ vụ̃rụ́-vụ̃rụ́ ni, kákî ãwị̃zị ni tã itá cirĩ sĩ, kí jõ ecá ilegĩ gá, kákî ilegĩ pãrã dúdu ꞌbá kọ̃ꞌjọ ãꞌi ꞌbá losó rĩi. ꞌBá ꞌdíni rĩ ká lãmgbá ãnzị rĩ ẹsụ́ rá.”
Azĩ ãwị́zị́ ã kẽlé rĩi.
Lụ́kã 21:1-4
41 Yẹ́sụ̃ orĩ dịfọ jó Rũbãngã dí ígá asõ kãré azĩ ꞌbereẽ gá rĩ trõ, ká ꞌbá azĩ ꞌbeka arụ́ rĩ undé. Kwọ̃rọ̃nị ãmgbụ́ oꞌbe sítĩ wẹ́lị́ nzá-nzá. 42 Kí ãwị́zị́ zị̃ tã ãkó rĩ ẹmụ́ oꞌbe ọ̃kọ̃lọ̃ngọ́ ékwí ẹ̃rị̃ dángá. 43 Yẹ́sụ̃ ụngwẹ ꞌbá anâ vú okoka rĩ oko ọꞌjọ, “Má ãnyiní tã ándá rĩ ꞌjọ áwu, ãwị́zị́ tã ãkó ꞌdĩ oꞌbe azĩ nzá oza cítĩ cị̃dú ꞌbá ũꞌbí rĩ ã ꞌbelé rĩ rá. 44 ꞌBá ꞌdĩ oꞌbekî ãꞌiã limi ewá áwu, kí ãwị́zị́ ꞌdĩ tã ãkó sâ, oꞌbe sítĩ anídí a’ã rĩ kwící, sítĩ zị̃ asị̃ aníní kurũ.”