Matius 1

Kareba Moromiꞌ To Noꞌukiꞌ Hi

Matius

Pemuleꞌara tododuluna hi Yesu

1 Hieꞌemo peꞌuluane hi Yesu, muleꞌna datu Daudi, muleꞌna hi Burahima. Mepongka ka hi Burahima wute i datu Daudi, konaꞌra peꞌuluana hi Yesu, hieꞌemohi:

2 Hi Burahima mampemuleꞌki hi Isaki;

Hi Isaki mampemuleꞌki hi Akoꞌ;

hi Akoꞌ mampemuleꞌki hi Yehuda hante haꞌumborahi halali hampemomolona;

3 hi Yehuda mampemuleꞌki hi Pere hante hi Sera (inoꞌra nikokeneꞌi hi Tama);

hi Pere mampemuleꞌki hi Hesro;

hi Hesro mampemuleꞌki hi Rama;

4 hi Rama mampemuleꞌki hi Aminada;

hi Aminada mampemuleꞌki hi Nahaso;

hi Nahaso mampemuleꞌki hi Samo;

5 hi Samo mampemuleꞌki hi Boas (inoꞌna nikokeneꞌi hi Raha);

hi Boas mampemuleꞌki hi Obeꞌ (inoꞌna nikokeneꞌi hi Ruti);

hi Obeꞌ mampemuleꞌki hi Isai;

6 hei hi Isai mampemuleꞌki datu Daudi.

Mepongka ka datu Daudi wute i konitawaniꞌra toYahudi nolou pe woiꞌ Babeli, konaꞌra to mampemuleꞌki hi Yesu, hieꞌemohi:

Hi Daudi mampemuleꞌki hi Salomo (inoꞌna hi Salomo iomo hantambina hi Uria hampiha);

7 hi Salomo mampemuleꞌki hi Rehabea;

hi Rehabea mampemuleꞌki hi Abia;

hi Abia mampemuleꞌki hi Asa;

8 hi Asa mampemuleꞌki hi Yosafat;

hi Yosafat mampemuleꞌki hi Yoram;

hi Yoram mampemuleꞌki hi Usia;

9 hi Usia mampemuleꞌki hi Yotam;

hi Yotam mampemuleꞌki hi Ahas;

hi Ahas mampemuleꞌki hi Hiskia;

10 hi Hiskia mampemuleꞌki hi Manase;

hi Manase mampemuleꞌki hi Amos;

hi Amos mampemuleꞌki hi Yosia;

11 hi Yosia mampemuleꞌki hi Yekonia hante haꞌumborahi halali hampemomolona.

I tempo tiꞌo toYahudi nitawaniꞌhi rokomi nolou pe woiꞌ Babeli.

12 Mepongka ka konitawaniꞌra toYahudi i Babeli wute ikonipoꞌanaꞌkina hi Yesu, konaꞌra peꞌuluana hi Yesu, hieꞌemohi:

hi Yekonia mampemuleꞌki hi Sealtie;

hi Sealtie mampemuleꞌki hi Serubabel;

13 hi Serubabel mampemuleꞌki hi Abihu;

hi Abihu mampemuleꞌki hi Eliaki;

hi Eliaki mampemuleꞌki hi Aso;

14 hi Aso mampemuleꞌki hi Sado;

hi Sado mampemuleꞌki hi Akimi;

hi Akimi mampemuleꞌki hi Eliu;

15 hi Eliu mampemuleꞌki hi Eleasar;

hi Eleasar mampemuleꞌki hi Matan;

hi Matan mampemuleꞌki hi Akoꞌ;

16 hei hi Akoꞌ mampemuleꞌki hi Yusuf to mewali maꞌanina hi Maria.

Hi Maria tiꞌo to mampoꞌanaꞌki hi Yesu to nitiꞌi Kerisitu.

17 Mewaliꞌ, mepongka ka hi Burahima wute i hi Daudi, koworiꞌra hampuluꞌ iba lapina. Mepongka ka hi Daudi wute i konitawaniꞌra toYahudi nolou pe woiꞌ Babeli, hampuluꞌ iba lapi woꞌo, honiꞌi mepongka ka konitawaniꞌra toYahudi i Babeli wute ikonipoꞌanaꞌkina Kerisitu, hampuluꞌ iba lapi woꞌo.

Konipoꞌanaꞌkina hi Yesu

(Luk. 2:1-7)

18 Hieꞌemo lolitonane konipoꞌanaꞌkina hi Yesu Kerisitu. InoꞌNa iomo hi Maria. Hi Maria tiꞌo iomo wuliana hi Yusuf. Ikohandoaꞌara tene hamoko umbiꞌnamo hi Maria mehinonaꞌi, angkana ikopehinonaꞌina tiꞌo, alaꞌ kuasaꞌna Inohaꞌ Mangkolehi. 19 Hi Yusuf wolia maꞌanina hi Maria to moromiꞌ, hei hawaꞌi hiniꞌ mampokohili hi Maria, iomo horiana notiꞌi i lalina, “Agina maꞌoruꞌa ngkororomiꞌ.” 20 Kolentuꞌana hi Yusuf mampekokiri, hampiha tempo io mepototuru pangkiꞌ haduo malaꞌekana Pueꞌ to mampatiꞌikiꞌi, “Yusuf, muleꞌna datu Daudi! Inioꞌko morokaꞌ moroa hi Maria mewali hantambimu, alaꞌ Oꞌanaꞌ to nopehinonaꞌiki tiꞌo ka kuasaꞌna Inohaꞌ Mangkolehi. 21 Hi Maria hingkiꞌ mampoꞌanaꞌki haduo oꞌanaꞌ tomaꞌani, hei Oꞌanaꞌ tiꞌo hingkiꞌ ikokeneꞌi ‘Hi Yesu’ ala Io to hingkiꞌ mamposalamaꞌ toaꞌNa ka dosa.”

22 Lekiꞌ-lekiꞌna tiꞌo mewali hingkeꞌna tepobuhoꞌi pohawaꞌne Pueꞌ to nopowute nabi Yesaia hampiha:

23 “Haduo anaꞌntowowalo hingkiꞌ mehinonaꞌi,

hei mampoꞌanaꞌki haduo oꞌanaꞌ tomaꞌani.

Oꞌanaꞌ tiꞌo hingkiꞌ nikokeneꞌi Imanuel.” Palaihana, “Pueꞌ Ala moꞌowoniki.”

24 Meꞌaromo mpuꞌu hi Yusuf hei mampetuntui lekiꞌ-lekiꞌna hapo to notiꞌiki malaꞌekana Pueꞌ Ala tiꞌo. Katoꞌo nokohamokoimo mpuꞌu hi Maria, 25 angkana handoaꞌhi tene moꞌawa wute hi Maria moꞌanaꞌ. Konipoꞌanaꞌakinalu Oꞌanaꞌ tiꞌo, hi Yusuf mampaꞌaniꞌI konaꞌ “Hi Yesu”.