Tomoto Ando mampaliꞌ hi Yesu
2
1 Hi Yesu nipoꞌanaꞌki i bolaꞌ Beteleme i woiꞌ Yudea, i tempona datu Ngkodeꞌ Herode moparenta. Katoꞌo uwaꞌhi haꞌumbora duo toaꞌ to mehupaꞌ pe Yerusale ka woiꞌ to moꞌela tinaꞌ i motoꞌando. Tomoto Ando tiꞌo pobahaꞌhi mpololeke mampeꞌele tandaꞌ i betueꞌ. 2 Meꞌitano-tanohi pe toaꞌ to meꞌohaꞌ i Yerusale, rotiꞌi, “I imbo Oꞌanaꞌ to nipoꞌanaꞌki tieꞌ to hingkiꞌ mewali datura toYahudi? Kiꞌokiꞌmo betueꞌ tinaꞌ i motoꞌando to mewali tandaꞌna. Iomo horiana humeika menomba pe Io.”3 Ikonohorinalu datu Herode kareba tiꞌo, nopohoko hei nokorokaꞌ. Hatoꞌo woꞌo lekiꞌ-lekiꞌna toaꞌ to i Yerusale. 4 Katoꞌo, io mowowoi lekiꞌ-lekiꞌna tutuꞌ tadulako mpenomba hante guru-guru agama Yahudi, hingkeꞌna morampuhi. Koporampura, meꞌitanomo datu Herode pe iohi, notiꞌi, “I imbo mpuꞌu konipoꞌanaꞌakine Datu Topohompoꞌ to nodandi Pueꞌ Ala hampiha?”
5 Mehoniꞌhi, rotiꞌi, “I bolaꞌ Beteleme i woiꞌ Yudea, alaꞌ uwaꞌmo lolitane Pueꞌ to noꞌukiꞌ nabi Mika hampiha, to mantiꞌi waheꞌe:
6 ‘Bolaꞌ Beteleme to i woiꞌ Yehuda,
hamboaꞌmoko hingkiꞌ nitiꞌi bolaꞌ tota mokonaꞌ
i lumbuna lekiꞌ-lekiꞌna bolaꞌ to uwaꞌ i woiꞌ Yehuda,
alaꞌ ka ingko hingkiꞌ mehupaꞌ haduo Tadulako
to hingkiꞌ morewahi toaꞌKu toSaraeli.’ ” \rq (Mi. 5:2)
7 Ikonohorinalu Herode lolita tiꞌo, norumbaꞌmohi toaꞌne nolou mowowoi ngkawowuni Tomoto Ando. Noteneihi hiwaꞌimbo mpuꞌu betueꞌ tiꞌo uluꞌ-uluꞌne mehupaꞌ. 8 Uko tiꞌo, norumbaꞌmohi nolou pe Beteleme, notiꞌikihi, “Ipaliꞌkei mpololeke Oꞌanaꞌ tiꞌo. Ane ihuakei, humei itiꞌikiꞌakei, hingkeꞌna nolouꞌa woꞌo menomba pe Io.”
9-10 Korohorinalu lolitane datu noloumohi mpuꞌu. Motanaꞌhi mpololeke alaꞌ pangkiꞌhi womo betueꞌ to roꞌokiꞌ hampiha tinaꞌ i motoꞌando. Betueꞌ tiꞌo mampodulukihi wute meꞌohaꞌ i nontona peꞌohaꞌana Oꞌanaꞌ tiꞌo. 11 Kohupaꞌra, mekahimohi i lali tambi. Koroꞌokiꞌna Oꞌanaꞌ tiꞌo hante hi Maria inoꞌna, kaliuꞌhi melingkotuꞌ metoungkaꞌ, menomba pe Oꞌanaꞌ tiꞌo. Uko tiꞌo, momolomohi komiara honiꞌi mampeweimohi popenombara pe Io. Popenombara tiꞌo iomo bulawa hante dupaꞌ hei mur.a 12 Katoꞌo nopaꞌingaꞌimohi Pueꞌ Ala i lali pepototurura, Notiꞌi, “Hampoliꞌmokei mahuliꞌ nolou pe datu Herode!” Iomo horiana hamboaꞌmohi moliu ka Yerusale, angkana mahuliꞌmohi pe bolaꞌra motuntuni lala to ntaniꞌna.
Hi Yusuf mangkomi hi Maria hante hi Yesu nolou pe woiꞌ Masiri
13 Ikopahuliꞌra Tomoto Ando, mampomombaha womo malaꞌekane Pueꞌ pe hi Yusuf i lali pototuruna. Notiꞌi malaꞌeka tiꞌo, “Yusuf! Datu Herode hingkiꞌ mampaliꞌ Oꞌanaꞌ tiꞌo alaꞌ nokodokoꞌi norokoꞌ. Meꞌaromoko, ikomimo hohiꞌ Oꞌanaꞌ tiꞌo hante inoꞌna nolou pe woiꞌ Masiri! Meꞌohaꞌkei duluna itoꞌo wuteꞌA mololita womo pe ingkei.”
14 Wini tiꞌo woꞌo, meꞌaromo mpuꞌu hi Yusuf, mangkomi Oꞌanaꞌ tiꞌo hante inoꞌNa molai nolou pe woiꞌ Masiri. 15 Meꞌohaꞌhi itoꞌo wute datu Herode mahi.
Lekiꞌ-lekiꞌna tiꞌo mewali hingkeꞌna tebuhoꞌimo Pohawaꞌne Pueꞌ to nopowute nabi Hosea hampiha, waheꞌe, “AnaꞌKu Kuwowoi ka Masiri.”
Oꞌanaꞌ i Beteleme nirokoꞌ
16 Ikonobahaꞌnalu datu Herode koroꞌakalaine Tomoto Ando, makaja mpololeke kobukotane. Iomo horiana norumbaꞌhi surodadune nolou morokoꞌ lekiꞌ-lekiꞌna oꞌanaꞌ tomaꞌani i Beteleme hante i bolaꞌ-bolaꞌ to dodungku, mepongka ka oꞌanaꞌ to moꞌumuruꞌ merontoꞌa munaꞌu, hingkeꞌna Oꞌanaꞌ to hingkiꞌ mewali Datu tiꞌo nirokoꞌ woꞌo. Datu Herode mohawaꞌ hatoꞌo, alaꞌ noꞌihaꞌi mepongka ka konopeꞌitanokina pe Tomoto Ando hiwaꞌimbo peluane betueꞌ. 17 Woriꞌ toBeteleme mampeꞌoloni anaꞌra to norokoꞌ surodaduna datu Herode. Iomo horiana tebuhoꞌimo lolitana nabi Yeremia hampiha noniuꞌ i bolaꞌ Rama to dodungku i bolaꞌ Beteleme, to mantiꞌi waheꞌe:
18 “I bolaꞌ Rama nihori topeꞌola hante kohanondoiha mpololeke.
Hi Rahelib mampeꞌoloni anaꞌnahi
alaꞌ hamboaꞌmohi uwaꞌ,
iomo horiana hawaꞌi hiniꞌ nipododoli.” \rq (Yer. 31:15)
Hi Yusuf mangkomi hi Maria hante hi Yesu molai ka woiꞌ Masiri
19 Kolentuꞌara tene hi Yusuf, hi Maria hante hi Yesu i woiꞌ Masiri, mahimo Datu Herode. Uko tiꞌo, hupaꞌ womo malaꞌekane Pueꞌ Ala pe hi Yusuf i lali pototuruna. 20 Notiꞌi malaꞌeka tiꞌo, “Toaꞌ to mangkodokoꞌi morokoꞌ Oꞌanaꞌ tiꞌo mahimo. Mewaliꞌ meꞌaromoko, ikomimo Oꞌanaꞌ tiꞌo hante inoꞌna, mahuliꞌmoko nolou pe woiꞌ Saraeli.” 21 Kaliuꞌ meꞌaromo hi Yusuf, mangkomi Oꞌanaꞌ tiꞌo hante hi Maria mahuliꞌ nolou pe woiꞌ Saraeli. 22 Angkana ikonohorinalu hi Yusuf hi Akelau anaꞌna Herode to mampohawa umoꞌna mewali datu i woiꞌ Yudea, hi Yusuf morokaꞌ mahuliꞌ nolou pe woiꞌ Yudea. Uko tiꞌo, uwaꞌ womo to nopowute Pueꞌ i lali pototuruna, iomo horiana nolouhi pe Galilea, 23 hei meꞌohaꞌhi i haꞌanu bolaꞌ to nikokeneꞌi Nasareꞌ. Mewaliꞌ tebuhoꞌimo lolitara nabi hampiha noniuꞌ i Datu Topohompoꞌ, to mantiꞌi waheꞌe: “Io hingkiꞌ nitiꞌi toNasare.”