Nebukadnɛza gilig Jerusalem la yɛla
25
Na'ab Zedekaya da zan'as Babilon Na'ab nɔɔr, 1 ka o na'am diib yʋma awai saŋa li nwadis piiga la ni li dabpiiga daar la, Babilon Na'ab Nebukadnɛza da duoe nɛ o zabzabidib wʋsa keŋ gilig Jerusalem, ka mɛ' zaba zin'igi giligi li. 2 Ba da gilig tempʋʋg la gur hali ti paae Zedekaya ti di na'am la li yʋma pii nɛ yinne saŋa. 3 Nwadis anaasi saŋa la, li daba awai daar, kɔ'ɔm da mu'oe tempʋʋgin la hali ka diib kae ka nidib la na dii.Zedekaya n lɛbig sankpan'as la yɛla
4 Babilon dim la da nwa'ae tempʋʋg la zaŋguom, ka yʋ'ʋŋ ka teŋ la zabzabidib zɔɔ dɔl za'anɔɔr kanɛ bɛ zaŋguoma ayi' teŋsʋk ka kpi'e na'ab lɔmbɔn'ɔg la, la'am nɛ Babilon dim la da gilig tempʋʋg la. Ba da zɔɔ lɛb nɛ Araba baba, 5 amaa Babilon soogianam da kadi ba hali ti gban'e Na'ab la Jeriko zin'ikanɛ an sassi la ni, ka o soogianam la zɔɔ widig ka bas o. 6 Ba da gban'e o mɔri keŋ Babilon Na'ab san'an Dibila teŋin, ani ka ba kad o saria. 7 Ba da kʋ Zedekaya biribis la nɛ o nini ni, ka yʋ'ʋn kpigi o nini ka lɔɔ o nɛ bana mɔr o keŋ Babilon teŋin la.
Ba nyu'oe Jerusalem la
8 Nebukadnɛza onɛ an Babilon Na'ab la da di na'am la yʋma pii nɛ awai saŋa nwadig kanɛ paas anu la daba ayɔpɔi daar la, Nebuzaradan onɛ an soogianam kpɛɛm ka an na'ayikpɛɛm Babilon na'ayin la da kɛn Jerusalem na. 9 O da nyu'oe Zugsɔb Pʋ'ʋsim Yir la nɛ bugum nɛ na'ayir la nɛ Jerusalem ya' la wʋsa. Mɛɛb banɛ an mɛ' sʋma la wʋsa o da nyu'oe ba nɛ. 10 O soogianam la da la'asi nwa'a zaŋguoma la wʋsa gilig Jerusalem. 11 Nebuzaradan onɛ an soogianam tuongat la da zi nimbanɛ kpɛlim tempʋʋgin la nɛ banɛ da nɔki ba mɛŋi niŋ Babilon Na'ab la nu'ugin la nɛ nimbanɛ kpɛlim wʋsa lɛb o teŋin. 12 Amaa o da bas banɛ an nɔŋ dim hali la ye ba kpɛlim tʋm vain tiis pɔɔdin nɛ pɔɔd tʋʋma wʋsa. 13 Babilon dim la da nwa'ae kʋntzɛn'ug buos la nɛ tɛrekonam linɛ mɔr ku'om zi'esa la nɛ latita'ar dinɛ ka ba nɔk kʋntzɛn'ugʋ maal ka li bɛ Zugsɔb Pʋ'ʋsim Yin la. Ba da zi kʋntzɛn'ug la lɛb Babilon teŋin. 14 Ba mɛ da nɔk dʋgid nɛ tampɛligim soobulnam la nɛ linɛ kpiisid bugum la nɛ labibis nɛ kʋntzɛn'ug la'abanɛ ka ba mɔri tʋm Wina'am Pʋ'ʋsim Yir tʋʋma la wʋsa. 15 Soogiakpɛɛm la da nɔk tudaar nyu'or dʋgid nɛ laas banɛ ka ba mɔri zu'asid ku'om ka ba nɔk sanlima nɛ anzurifa maali ba la mɔri keŋ. 16 Buos ayi' banɛ ka ba maal nɛ kʋntzɛn'ug la, nɛ latita'ar nɛ tɛrekonam linɛ mɔr ku'om zi'esa ka Solomon da maali niŋ Zugsɔb Pʋ'ʋsim Yin la da anɛ kʋntzɛn'ug linɛ zu'oe galis, ka ba kʋ nyaŋi maki li tɛbisim. 17 Bua yinne wʋsa wa'alim da anɛ nɔbir makir pisi nɛ ayɔpɔi. Kʋntzɛn'ug bʋn linɛ nwɛnɛ laa sʋn'e bua la zug la wa'alim da anɛ nɔbir makir anaasi nɛ pʋsʋk nɛ linɛ nwɛnɛ nwiisi lɔɔ li zugin la ka ba maal nɛ kʋntzɛn'ug ka li vɛnl, ka gʋl pomanganɛt wala tɔ'ɔŋi giligi li ka li wʋsa an kʋntzɛn'ug. Ba da maal bua kanɛ kpɛlim la ka li nwɛnɛ oŋa la nɛ. 18 Soogiakpɛɛm la da gban'e Seraya onɛ an maanmaan kpɛɛm nɛ Zefanaya onɛ tia'al maanmaan kpɛɛm nya'aŋ la nɛ nidiba atan' banɛ gur za'anɔɔr la. 19 Banɛ da kpɛlim tempʋʋgin la, o da gban'e kpɛɛm kanɛ sʋ'oe zabzabidib la, nɛ na'ayikpɛm anu banɛ an sa'ansa'annib na'ayin la. O mɛ da gban'e gbansɔbid kpɛɛm onɛ da kpɛn'ɛsid nidib soogianam tʋʋma ni la, nɛ o nidib pisyuobʋ banɛ da bɛ tempʋʋgin la. 20 Soogiakpɛɛm Nebuzaradan da mɔri ba wʋsa keŋ Dibila teŋin tis Babilon Na'ab. 21 Ba da kʋʋ ba nɛ Dibila teŋ kanɛ bɛ Hamat sʋ'ʋlimin la.
Ala ka ba da gban'e Juda dimi yisi ba, ba mɛŋ teŋin.
Gedalaya lɛbig gɔmena la yɛla
(Jer 40:7-9; 41:1-3)
22 Babilon Na'ab Nebukadnɛza da tis Gedalaya onɛ an Ahikam biig ka an Safan yaaŋ la kpi'euŋ ye o sʋ'oe nimbanɛ kpɛlim Juda teŋin la. 23 Soogianam kpɛɛmnam nɛ ba nidib la wʋm ye Babilon Na'ab tis Gedalaya gɔmena kpi'euŋ la, ba kɛn Gedalaya san'an Misipa teŋin na. Ba da anɛ Isimael onɛ an Netanaya biig la nɛ Johanan onɛ an Karea biig la nɛ Seraya onɛ an Tanhumef biig ka an Netofa nid la nɛ Jaazanaya onɛ an Maakat nid la, ban nɛ ba nidib la wʋsa. 24 Gedalaya da kaanbi tis ban nɛ ba nidib la wʋsa ye, ba da zɔt dabiem nɛ Babilon kpɛɛmnam la, ka yɛl ye, “Zin'inimi teŋin la ka tʋm tis Babilon Na'ab ka si'el wʋsa na an sʋ'ʋŋa tisi ya.”
Ba kʋ Gedalaya la yɛla
25 Amaa nwadkanɛ da paas ayɔpɔi la ni, Isimael onɛ an Netanaya biig ka an Elisama yaaŋ ka kpin nɛ na'adɔɔg la, da dɔl dap piiga na kʋ Gedalaya. Ba mɛ da kʋ Juda nɛ Babilon nimbanɛ ka on nɛ ban la'am bɛ Misipa teŋin la. 26 Nɛ' zug, nimbanɛ da bɛɛ ani la, lin yi tadimnamɛ keŋ paae kpi'emnam la wʋsa, la'am nɛ soogiakpɛɛmnam la wʋsa, da zɔnɛ keŋ Egipt, ban zɔt Babilon dim dabiem la zug.
Juda na'ab Jehoyakin yi sanrega ni la yɛla
27 Ban da gban'e Juda Na'ab Jehoyakin n lɔ'ɔŋ teŋ la, li yʋʋm pistan' nɛ ayɔpɔi saŋa ka Evil-Merodak da di Babilon na'am, ka yis Jehoyakin sanrega ni nwadis pii nɛ ayi' la dabpisi nɛ ayɔpɔi daar. 28 O da pian' sʋ'ʋŋa tis o, ka tis o na'asi zin'ig hali ka li gaad na'abanɛ ka on nɛ ban la'am bɛ Babilon la. 29 Jehoyakin da yɛɛsi o sanrega fuud la digil. Ka on nɛ Na'ab la la'am dit hali ti paae o nyɔvʋr bɛn. 30 Dabisir wʋsa pʋʋgin Na'ab la da tisid Jehoyakin diib ligidi ti paae o vʋm bɛn.