Jerusalem san'auŋ yɛla
52
1 Zedekaya da anɛ yʋma pisi nɛ yinne ka di na'am. O da zin'in na'am gbauŋ zug Jerusalem tempʋʋgin yʋʋm pii nɛ yinne. O ma yʋ'ʋri da buon Hamutal. O da anɛ Jeremia pu'ayua, ka yi Libna na. 2 Na'ab Zedekaya da tʋm bɛ'ɛd Zugsɔb la tuon nwɛnɛ Na'ab Jehoyakim da tʋm si'em la. 3 Li anɛ Zugsɔb la sʋnpɛɛnni da kɛ ka yɛlbama paae Jerusalem nɛ Juda. Ka li naar la, o kadi ba yis o san'an.Na'ab Zedekaya da zan'as Babilon Na'ab nɔɔr. 4 Zedekaya n da di o na'am la li yʋma awai, nwadis piiga la ni, dabpiiga daar, Babilon Na'ab da duoe nɛ o soogianam wʋsa kena zab nɛ Jerusalem. Ba da la'as nɛ tempʋʋg la yiŋ ka bia' gilig teŋ la. 5 Ba da gilig tempʋʋg la gur hali ti paae Zedekaya di na'am la li yʋma pii nɛ yinne saŋa.
6 Li da yuug ala ti paae nwadis anaasi saŋa li daba awai la daar, ka kɔ'ɔm da mu'oe tempʋʋgin la hali ka diib kae ka nidib la na dii. 7 Ani ka Babilon dim da nwa'ae tempʋʋg la zaŋguom, ka Juda soogianam la wʋsa zɔ. Ba da yi yʋ'ʋŋʋ dɔl na'ab lɔmbɔn'ɔg suori zɔɔ dɔl za'anɔɔr linɛ bɛ zaŋguoma ayi' sʋʋgin la, zɔti kpa'ad Araba linɛ bɛ Joodan bɔn'ɔgin la. 8 Amaa Babilon zabzabidib la da kad Na'ab Zedekaya gban'e o Jeriko zin'ikanɛ an sassi la ni. Soogianam la da baknɛ widig ka bas o, 9 ka ba gban'e o.
Ba da mɔr o keŋ Babilon Na'ab san'an Dibila linɛ bɛ Hamat teŋin la, ani ka ba kad o saria. 10 Dibila teŋin ka Babilon na'ab la da kʋ Zedekaya biis o nini ni, ka kʋ Juda kpɛɛmnam. 11 Ani ka o kpig Zedekaya nini, ka lɔɔ o nɛ kʋntzɛn'ug bana mɔr o keŋ Babilon teŋinɛ kpɛn'ɛs o sanrega ni, hali ti paae o kum daar.
Ban san'am Pʋ'ʋsim Yir la si'em
12 Nebukadnɛza onɛ an Babilon Na'ab la da di na'am la yʋma pii nɛ awai saŋa nwadig kanɛ paas anu la o dabpiiga daar la, Nebuzaradan onɛ an soogianam kpɛɛm ka an na'ayikpɛɛm Babilon na'ayin la da kɛn Jerusalem na. 13 O da nyu'oe Zugsɔb Pʋ'ʋsim Yir la nɛ bugum, nɛ na'ayir la, nɛ Jerusalem ya' la wʋsa. Mɛɛb banɛ an mɛsʋma la wʋsa o da nyu'oe li nɛ. 14 O soogianam la da la'asi da'ae Jerusalem zaŋguoma la wʋsa bas. 15 Nebuzaradan onɛ an soogianam tuongat la da zi nimbanɛ kpɛlim tempʋʋgin la ka mi' tʋʋma sʋ'ʋŋa la mɔri ba keŋ kpɛn'ɛs sankpan'asim, la'am nɛ teŋkpɛmisin nidib la wʋsa, nɛ banɛ pʋn dɛŋi keŋ Babilon Na'ab san'an la wʋsa. 16 Amaa Nebuzaradan da bas banɛ an nɔŋ dim amɛŋa la ka ba kpɛlim teŋin tʋm vain tiis pɔɔd nɛ pɔɔdin la.
17 Babilon dim la da nwa'ae kʋntzɛn'ug buos la nɛ tɛrekonam linɛ mɔr ku'om zi'esa la nɛ Atɛuk latita'ar dinɛ ka ba nɔk kʋntzɛn'ugʋ maal ka li bɛ Zugsɔb pʋ'ʋsim Yin la. Ba da zi kʋntzɛn'ug la lɛb Babilon teŋin. 18 Ba mɛ da nɔk dʋgid nɛ tampɛligim soobulnam la nɛ linɛ kpiisid bugum la nɛ labibis nɛ kʋntzɛn'ug la'abanɛ ka ba mɔri tʋm Wina'am Pʋ'ʋsim Yir tʋʋma la wʋsa. 19 Soogiakpɛɛm la da nɔk tudaar nyu'or dʋgid nɛ laas banɛ ka ba mɔri zu'asid ku'om ka ba nɔk sanlima nɛ anzurifa maali ba la mɔri keŋ.
20 Kʋntzɛn'ug linɛ bɛ buos ayi' la ni nɛ atɛuk la nɛ kʋntzɛn'ug na'araad pii nɛ ayi' banɛ bɛ li lɛuŋʋn la, nɛ tɛrekonam banɛ mɔr ku'om zi'esa li zug la ka Na'ab Solomon da maali li niŋ Wina'am pʋ'ʋsim Yin ka ba kʋ nyaŋi maki li tɛbisim. 21 Bua wʋsa wa'alim da anɛ nɔbir makir pisi nɛ ayɔpɔi ka li bɛdim an nɔbir makir pii nɛ anii, li pʋʋgin da anɛ vɔɔsim ka li mugilim zem wʋʋ nu'ubibis anaasi nɛ. 22 Kʋntzɛn'ug buos la da mɔr bʋnam ayi' banɛ nwɛnɛ laas nɛ sʋn'ʋl buos la zug. Yinne wʋsa wa'alim da anɛ nɔbir makir ayɔpɔi nɛ pʋsʋk ka ba ʋg kʋnt ka li nwɛnɛ nwiisi lɔɔ li zugin la, nɛ pomanganɛt wala tɔ'ɔŋi li zin'is ayi' gilig buos la zugin ka li vɛnl. Ka bua kaŋa la nɛ li pomanganɛt mɛ nwɛnɛ ala. 23 Pomanganɛt piswai nɛ ayuobʋ da bɛ lʋga la ni, ka pomanganɛt banɛ bɛ ban ʋg si'el ka li nwɛnɛ nwiisi lɔɔ gilig zugin la da anɛ kɔbiga.
24 Soogiakpɛɛm la da gban'e Seraya onɛ an maanmaan kpɛɛm la nɛ Zefanaya onɛ tia'al maanmaan kpɛɛm la nɛ nidiba atan' banɛ gur za'anɔɔr la. 25 Banɛ da kpɛlim tempʋʋgin la, o da gban'e kpɛɛm kanɛ sʋ'oe zabzabidib la, nɛ na'ayikpɛm anu banɛ an sa'ansa'annib na'ayin la. O mɛ da gban'e gbansɔbid kpɛɛm onɛ da kpɛn'ɛsid nidib soogianam tʋʋma ni la, nɛ nidib pisyuobʋ banɛ da bɛ tempʋʋgin la. 26 Soogiakpɛɛm Nebuzaradan da mɔri ba wʋsa keŋ tis Babilon Na'ab Dibila teŋin. 27 Ba da kʋʋ ba nɛ Dibila teŋ kanɛ bɛ Hamat sʋ'ʋlimin la, ani ka Na'ab la da paami ba kʋ.
Ala ka ba da gban'e Juda dimi yisi ba, ba mɛŋ teŋin. 28 Nebukadnɛza da gban'e ninsieba lɔ'ɔŋ teŋ la kalli nwa: O yʋma ayɔpɔi la ni o da gban'e Jew dim tusa atan' nɛ pisi nɛ atan' (3,023). 29 Nebukadnɛza yʋma pii nɛ anii la saŋa nidib kɔbisnii nɛ pistan' nɛ ayi' (832) ka o da gban'e Jerusalem. 30 O yʋma pisi nɛ atan' saŋa: Nidib kɔbisyɔpɔi nɛ pisnaasi nɛ anu (745) ka Nebuzaradan onɛ an soogianam kpɛɛm la da gban'e. Ba da la'as nɛ tusa anaasi nɛ kɔbisyuobʋ (4,600).
Ba bas na'ab Jehoyakin la yɛla
31 Ban da gban'e Juda Na'ab Jehoyakin lɔ'ɔŋ teŋ la, li yʋma pistan' nɛ ayɔpɔi saŋa ka Evil-Merodak da di Babilon na'am, ka yis Jehoyakin sanrega ni nwadis pii nɛ ayi' la ni li dabpisi nɛ anu daar. 32 O da pian' sʋ'ʋŋa tis o, ka tis o na'asi zin'ig hali ka li gaad na'anam banɛ kpɛlim ka on nɛ ban ɛɛnti la'am bɛ Babilon la. 33 Jehoyakin da yɛɛs o sanrega fuud la digil. Ka on nɛ Na'ab la la'am dit hali ti paae o nyɔvʋr bɛn. 34 Dabisir wʋsa pʋʋgin Na'ab la da tisid Jehoyakin diib ligidi hali ti paae o vʋm bɛn.