24
1 Saŋkanɛ ka Jehoyakim da an na'ab la, Babilon Na'ab Nebukadnɛza da buug teŋin la na nɛ paŋ, ka kɛ ka Na'ab Jehoyakim dɔl o yʋma atan'. Amaa li da kena ka Na'ab Jehoyakim tiaki o pʋtɛn'ɛr ka zan'as Nebukadnɛza nɔɔr. 2 Zugsɔb la da tʋm Babilon dim nɛ Aram dim nɛ Moab nɛ Ammon dim banɛ faand la o san'an. O da kɛ ka ba keŋ san'am Juda nwɛnɛ Zugsɔb yammis banɛ aan o nɔdi'esidib la da yɛl si'em la. 3 Sida nɛ'ɛŋa da niŋ Juda dim nwɛnɛ Zugsɔb la da zi'el si'em ye o yisi ba o san'an ka li anɛ Manase tʋʋmbɛ'ɛd banɛ wʋsa ka o da tʋm la, 4 hali la'am nɛ on da kʋ nimbanɛ pʋ tʋm tʋʋmbɛ'ɛd la. O da kɛ ka Jerusalem pɛ'ɛl nɛ nimbanɛ pʋ tʋm tʋʋmbɛ'ɛd ziim, ka Zugsɔb la pʋ bɔɔd ye o kɛɛ o tʋʋmbɛ'ɛdi basɛ.5 Ya'a kpɛlim nɛ linɛ maal Na'ab Jehoyakim na'am diib saŋa la nɛ on tʋm si'el la, ba da sɔbi li niŋ Juda Na'anam Gbana la ni. 6 Na'ab Jehoyakim da maal ka'alim, ka o biig Jehoyakin dii o na'am la. 7 Egipt Na'ab la da pʋ lɛn yit o mɛŋ teŋin la ken naa, bɔzugɔ Babilon Na'ab da faaɛn o sʋ'ʋlim la, lin yi Egipt titɔndig kɔlbil la nɔɔrin ti paae Efiritis mu'arin la.
Jehoyakin n di Juda na'am la yɛla
8 Jehoyakin da anɛ yʋʋm pii nɛ anii ka di na'am. O da zin'in na'am gbauŋ zug Jerusalem tempʋʋgin nwadis atan'. O ma yʋ'ʋri da buon Nehusita onɛ da an Elinatan pu'ayua. O da yinɛ Jerusalem teŋin. 9 O da tʋm bɛ'ɛd Zugsɔb la san'an nwɛnɛ o saamme da tʋm si'em la. 10 Saŋkan la Babilon Na'ab Nebukadnɛza zaba tuongatib da kena lɔbi gilig Jerusalem tempʋʋg. 11 Na'ab Nebukadnɛza mɛŋ yʋ'ʋn da kɛn tempʋʋgin la na, saŋkanɛ ka o tuongatib da giligi li la, 12 ka Jehoyakin onɛ an Juda Na'ab la da yi, on nɛ o ma nɛ banɛ tʋmmi tisid o nɛ tuongatib nɛ o na'ayikpɛm la wʋsa, ka da zaŋi ba mɛŋi niŋ o nu'usin.
Babilon Na'ab la da dii o na'am la yʋma anii saŋa la, o da gban'e Jehoyakin n kpɛn'ɛs o sanrega. 13 Nwɛnɛ Zugsɔb la yɛl si'em la, Nebukadnɛza da vaae kpan'am dinɛ wʋsa bɛ Zugsɔb Pʋ'ʋsim Yinnɛ na'ayin la, ka vaae sanlima la'abanɛ ka Israel Na'ab Solomon da maali kpɛn'ɛs Zugsɔb Pʋ'ʋsim Yin la. 14 O da zi Jerusalem na'ayikpɛm nɛ zabzabidib nɛ banɛ mi' tʋʋma hali, ka ba wʋsa la'as tusa piiga mɔri kul o teŋin. Banɛ an nɔŋ dim nɛ tadimnam la ma'aa da kpɛlim teŋin la. 15 Nebukadnɛza da gban'e Na'ab Jehoyakin n mɔr o keŋ Babilon. O mɛ da gban'e Na'ab la ma nɛ o pu'ab nɛ o na'ayikpɛm nɛ teŋ la tuongatib Jerusalem teŋin la mɔri ba keŋ Babilon sʋ'ʋlimin. 16 Babilon Na'ab la mɛ da lɛm mɔr zabzabidib tusa ayɔpɔi la wʋsa, nɛ banɛ da mɔr paŋ ka na nyaŋi zab la, nɛ banɛ mi' tʋʋma sʋ'ʋŋa la tusir yinne lɛb Babilon teŋin. 17 O da kɛ ka Matanaya onɛ an Na'ab Jehoyakin saambil la di'e o na'am la, ka tiaki pʋdi o yʋ'ʋr ye Zedekaya.
Zedekaya n di Juda na'am la yɛla
18 Zedekaya da anɛ yʋma pisi nɛ yinne ka di na'am la. O da zin'in na'am gbauŋ zug Jerusalem tempʋʋgin yʋʋm pii nɛ yinne. O ma yʋ'ʋri da buon Hamutal. O da anɛ Jeremia pu'ayua, ka yi Libna na. 19 Na'ab Zedekaya da tʋm bɛ'ɛd Zugsɔb la san'an nwɛnɛ Jehoyakim da tʋm si'em la. 20 Li anɛ Zugsɔb la sʋnpɛɛnni da kɛ ka yɛlbama paae Jerusalem nɛ Juda. Ka li naar la, o da kadi ba yis o san'an.