36
1 Nidib la da gaŋ Jehoahas onɛ an Josia biig la bu'oe malʋŋ kpaam niŋ o zugin ka diis o saam na'am la.Jehoahas na'am yɛla
2 Jehoahas da anɛ yʋma pisi nɛ atan' ka di na'am, ka da zin'in na'am gbauŋ la zug Jerusalem tempʋʋgin nwadis atan'. 3 Egipt na'ab la da yis o na'amin Jerusalem teŋin, ka yʋ'ʋn muk Juda dim ye ba yɔ anzurifa ligidi kɔbiga nɛ sanlimgbil yinne. 4 Egipt na'ab Neko da diis Josia biig Eliakim o saam na'am, ka tiak Eliakim yʋ'ʋr ye Jehoyakim. Amaa o da nɔk Jehoahas n zii o keŋ Egipt teŋin.
5 Jehoyakim da anɛ yʋma pisi nɛ anu ka di na'am. O da zin'in na'am gbauŋ la zug Jerusalem tempʋʋgin yʋma pii nɛ yinne. O da tʋm bɛ'ɛd o Zugsɔb Wina'am tuon. 6 Babilon na'ab Nebukadnɛza da kena zab nɛ o ka gban'e o lɔɔ o nɛ kʋntzɛn'ug bana mɔr o keŋ Babilon teŋin. 7 Nebukadnɛza mɛ da nɔk la'asʋma banɛ bɛ Zugsɔb Pʋ'ʋsim Dɔɔgin Jerusalem la mɔri keŋ niŋ o na'ayir pʋʋgin.
8 Ya'a kpɛlim nɛ linɛ maal Na'ab Jehoyakim na'am diib saŋa la nɛ on tʋm yɛlkisa si'em, ka Zugsɔb la sʋnf pʋ malis nɛ o la, ba da sɔbi li niŋ Israel nɛ Juda Na'anam Gbauŋʋn la, ka o biig Jehoyakim di'e o na'am la di.
Jehoyakim di Juda na'am la yɛla
9 Jehoyakim da anɛ yʋʋm pii nɛ anii ka di na'am. O da zin'in na'am gbauŋ la zug Jerusalem tempʋʋgin nwadis atan'. O da tʋm bɛ'ɛd Zugsɔb la nindaan. 10 Sigir saŋa da paae la, Na'ab Nebukadnɛza da tʋm ka ba mɔr o kɛn Babilon na, la'am nɛ Zugsɔb la'abanɛ an sʋm hali bɛɛ o Yin la, ka kɛ ka o saambil Zedekaya di Juda nɛ Jerusalem na'am.
Zedekaya di Juda na'am la yɛla
11 Zedekaya da anɛ yʋma pisi nɛ yinne ka di na'am la. O da zin'in na'am gbauŋ la zug Jerusalem tempʋʋgin yʋʋm pii nɛ yinne. 12 O da tʋm bɛ'ɛd Zugsɔb onɛ aan o Wina'am la tuon, ka pʋ sie o mɛŋi tis Jeremia onɛ an nɔdi'esi pian'ad Zugsɔb yɛla la. 13 O mɛ da maal taawai nɛ Na'ab Nebukadnɛza, onɛ da kɛ ka o pɔɔ zi'el nɛ Wina'am yʋ'ʋr la. O tʋbir da ziank nɛ ka o zug kpi'em ka o zan'as ye o kʋ nɔk o mɛŋi lɛb Zugsɔb onɛ an Israel Wina'am la san'anɛ. 14 Linɛ paas la, maanmaannib kpɛɛmnam la wʋsa nɛ nidib la da lieb nɛ zamdimi kpɛn ken tuon ka dɔl tʋʋmkisa banɛ ka tɛɛns la nidib da tʋm, ka san'am Zugsɔb Pʋ'ʋsim Yir girima, kanɛ ka o da maal ka li an kasi Jerusalem teŋin la.
Jerusalem san'auŋ la yɛla
15 Zugsɔb onɛ aan ba yaanam Wina'am la da tʋm o nidibi ba san'anɛ pɛndigi pɛndig nɛ o labaar, on zɔt o nidib la nɛ o teŋ la nimbaanlig la zug. 16 Amaa ba da la' Wina'am nidib la ka zan'as o nɔɔr ka nɛ'ɛs o nɔdi'esidib la, hali ka Zugsɔb la sʋnf ti duoe nɛ nidib la hali, ka suguru kae. 17 O da kɛ ka Babilon Na'ab kena zab nɛ ba ka kʋʋ ba dasam la wʋsa ba Pʋ'ʋsim Yin la, ka pʋ yaae dasaŋ bɛɛ pu'asadire bɛɛ pʋnya'aŋ bɛɛ bʋnkʋdʋgɔ. Wina'am da kɛ ka Nebukadnɛza kena gban'e ba. 18 O da vaae la'abanɛ bɛ Wina'am Pʋ'ʋsim Yin la wʋsa, li la'abɛda nɛ la'abaanlʋg wʋsa, nɛ Na'ab la nɛ o kpɛɛmnam la'ad dɔɔdin la'ad wʋsa mɔri keŋ Babilon. 19 Ba da nyu'oe Wina'am Pʋ'ʋsim Yir la nɛ bugum, ka nwa'ae Jerusalem zaŋguoma la wʋsa; ba da nyu'oe na'anam ya' la nɛ linɛ wʋsa an sʋm.
20 O da vaae banɛ pʋ kpi la wʋsaa mɔri keŋ Babilon teŋin, ka ba lieb on nɛ o biis yammis hali nɛ Pesia sʋ'ʋlim ti paam paŋ. 21 Sɔ' da pʋ bʋd si'el teŋin la wʋʋ lin narin ye ba niŋ si'em yʋma ayɔpɔi wʋsa la, ala ka teŋgbauŋ la da yɔɔ li vʋ'ʋsʋm yʋma la sam, hali ka yʋma pisyɔpɔi la bɛn ti paae wʋʋ Zugsɔb la da kɛ ka Jeremia yɛl si'em la.
22-23 Pesia na'ab Sarus n da di na'am yʋʋm si'a la, o da kɛ ka ba mɔɔli tis Pesia sʋ'ʋlim wʋsa ka mɛ sɔbi li digil ye,
“Pesia na'ab Sarus n yɛl si'eli nwa ye,
Zugsɔb onɛ an Arezana Wina'am la tisim dunia sʋ'ʋlim wʋsa, ka gaŋim ye m mɛɛ o Pʋ'ʋsim Yir Jerusalem tempʋʋgin linɛ bɛ Juda sʋ'ʋlimin la.”
Zugsɔb la da si'is Na'ab Sarus sʋnf ye o sɔbi li. Nɛ'ɛŋa da niŋnɛ ye li kɛ ka Jeremia n da di'e Wina'am pian'adi pian' la niŋ amɛŋa.
Ka Sarus da lɛn sɔbi pɛ'ɛs ye, “Yanam banɛ an Zugsɔb nidib, ka siak ye ya na lɛb Jerusalem linɛ bɛ Juda sʋ'ʋlimin mɛ' Israel Wina'am yir la, kemi, ka ya Wina'am la na bɛ nɛ ya.”