Josia maal Kum Maliak Gaadʋg malʋŋ la
35
1 Josia da pʋ'ʋs Kum Maliak Gaadʋg malʋŋ la Jerusalem tempʋʋgin, ka ba da kɔt malʋŋ la pɛ'ɛs yiiga nwadig la dabpii nɛ anaasi daar. 2 O da gaans maanmaannib la ye ba tʋmmi ba tʋʋma, ka kpɛmisi ba zaŋi keŋ Zugsɔb Pʋ'ʋsim Dɔɔg la tʋʋma yɛla. 3 O da yɛl Levi dim banɛ pa'an Israel dim wʋsa ka an banɛ pɛsigi ba mɛŋi tis Zugsɔb la ye, “Nɔkimi Zugsɔb Nɔnaar Daka la niŋi Dɔɔg kanɛ ka Israel na'ab David biig Solomon da mɛ' la ni. Li ka' ye ya bugidi li giligida. Nannanna tʋm tisi Zugsɔb onɛ aan ya Wina'am la nɛ o nimbanɛ an Israel dim la. 4 Yir wʋsa dim ti'ebimi ya mɛŋ wʋʋ David onɛ an Israel na'ab nɛ o biig Solomon n sɔbi pa'al si'em la.5 “Zi'enimi yir-yir zin'ikanɛ an kasi la ni ka kɛ ka Levi dim la pʋʋ paas yir wʋsa. 6 Kɔtimi Kum Maliak Gaadʋg malʋŋ pɛ'ɛs la, ka maali ya mɛŋ kasi ka ti'eb malʋŋ la yɛla zi'e ye ya sʋŋi ya taaba la ka li dɔl wʋʋ Zugsɔb la da pa'al Moses si'em la.”
7 Josia da nɔk o mɛŋ pɛ'ɛs nɛ bʋʋs tusa pistan' nɛ na'araad tusa atan', tis ye ba zaŋi maal Kum Maliak Gaadʋg malʋŋ la.
8 O kpɛɛmnam la mɛ da tis nidib la nɛ maanmaannib la nɛ Levi dim la nɛ ba ya'amlɛog. Hilkia nɛ Zakaria nɛ Jehel onɛ an tʋʋma la tuongat Wina'am Pʋ'ʋsim Yin la, da tis maanmaannib la malʋŋ la piini ka li anɛ pɛribis nɛ bʋribis tusa ayi' nɛ kɔbisyuobʋ nɛ na'araad kɔbistan'. 9 Konania onɛ ba'abiisi an Semaya nɛ Netanɛl la, nɛ Hasiabiya nɛ Jeiel nɛ Jozabad banɛ an Levi dim tuongatib la da nɔk pɛribis nɛ bʋribis tusa anu nɛ na'araad kɔbisnu linɛ an Kum Maliak Gaadʋg malʋŋ piini tis Levi dim la.
10 Ban da ti'eb si'el wʋsa naae la, ka maanmaannib la zi'enɛ ba zi'esigin, ka Levi dim la zi'en ban pʋdigi ba si'em wʋʋ Na'ab la pa'al ye ba dɔl si'em la. 11 Ba da kɔt Kum Maliak Gaadʋg malʋŋ pɛ'ɛs la, ka maanmaannib la di'e ziim kanɛ ka ba tisi ba la misig, ka Levi dɔɔg dim la si kɔnbid la. 12 Ba da bɛŋ nyu'or maan la li kɔn' ye ba tis nidib la lin dɔlisi ba yaanam tuŋʋ an si'em la ye ba nɔki tis Zugsɔb la wʋʋ lin sɔb si'em Moses gbauŋʋn la. Ala mɛn ka ba da niŋ nɛ na'araad la. 13 Ba da sɛn' Kum Maliak Gaadʋg malʋŋ la kɔnbid la wʋʋ lin dɔl si'em, ka dʋg maan ni'im linɛ an kasi la dʋgidin nɛ laasin pʋdigi keŋ tis nidib la wʋsa tɔ'ɔtɔ. 14 Nɛ' nya'aŋ ka ba yʋ'ʋn ti'ebi ba mɛŋ nɛ maanmaannib la din, bɔzugɔ maanmaannib banɛ an Aaron yaas la da bɛɛ ani maan nyu'or maana nɛ ni'im kpama la hali ka zaam ti ma'ae. Alazug Levi dim la da ti'eb nɛ ba mɛŋ nɛ Aaron tuŋ maanmaannib la dinɛ pɛ'ɛs.
15 Yʋʋmyʋ'ʋmnib banɛ an Asaf yaas la da zi'enɛ ba zi'esa ni wʋʋ David nɛ Asaf nɛ Heman nɛ Jedutun onɛ nyɛt bɛog sa yɛla tisid Na'ab la da pa'al si'em la. Za'anɔgu'udib la da zi'en za'anɔɔr wʋsa ni ka li pʋ nar ye ba basi ba zi'esa la, bɔzugɔ ba du'adib banɛ an Levi dim la da maannɛ ba malima tisidi ba.
16 Saŋkan la, ba da maal Zugsɔb malima la wʋsa nɛ Kum Maliak Gaadʋg malʋŋ di'ema dabisir la daar, ka nyu'od maana la Zugsɔb maan daka la zug wʋʋ Na'ab Josia n da pa'al si'em la. 17 Israel dim banɛ da bɛɛ ani la da di Kum Maliak Gaadʋg malʋŋ la nɛ sumalisim, ka tiɛn Bodobodo Linɛ Ka' Danbin dabisir la yɛla daba ayɔpɔi. 18 Wina'am nɔdi'es Samuel saŋa la sa ba nan zi' di Kum Maliak Gaadʋg malʋŋ la wʋʋ yʋʋm kanɛ. Na'asɔ' mɛ nan zi' kɛ ka ba pʋ'ʋs Malʋŋ la Israel teŋin wʋʋ Josia da niŋ si'em la, la'am nɛ maanmaannib nɛ Levi dɔɔg dim nɛ Juda nɛ Israel dim banɛ bɛɛ ani la nɛ Jerusalem dim wʋsaa. 19 Ba da di Kum Maliak Gaadʋg malʋŋ kaŋa nɛ Josia na'am la yʋʋm pii nɛ anii saŋa.
Josia kum yɛla
20 Nɛ'ɛŋa wʋsa nya'aŋ, Na'ab Josia n da maal si'el wʋsa sʋ'ʋŋa Pʋ'ʋsim Yin la, Neko onɛ an Egipt na'ab la da keŋ Kakimis teŋin ye o zab zaba Efiritis kɔldaug la baba, ka Josia yii tʋ'ʋs o ye ba zab. 21 Amaa Neko da tʋm yɛl o ye, “Israel Na'aba, zab bɔɔ bɛ man nɛ fʋn teŋsʋkɔ? Li ka' fʋn ka man yina ye m zab saŋa kaŋaa, amaa banɛ aan m dataas la. Wina'am yɛlim ye m niŋim tɔ'ɔtɔ; alazug kɛl, ka da zab nɛ Wina'am onɛ bɛ nɛ mam la, ka o na kʋʋf.”
22 La'am nɛ wala Josia da pʋ siak ye o keŋ ka bas o, ka tiaki o mɛŋ ye o zab nɛ o. O da pʋ kɛlis Neko yɛl Wina'am tis o nɔsi'a la, ka sia'al o Megido paalʋ la ni ye o zab nɛ o.
23 Ba da tɔn Na'ab Josia piim, ka o yɛl o kpɛɛmnam la ye, “Mɔrinimi keŋi, ka m pu'alim nɛ bɛ'ɛd bɛ'ɛdi.” 24 Ka ba yis o zaba tɛreko la nii niŋ o tɛreko yinne ni, mɔr o keŋ Jerusalem, ani ka o da kpi, ka ba mum o, o yaanam yaadin ka Juda nɛ Jerusalem dim kum o yɛla hali.
25 Jeremia mɛ da yʋ'ʋm kʋʋr yʋʋm paalli fabil Josia yɛla, ka hali lin yi saŋkan la ti paae zina pu'ab nɛ dap banɛ yʋ'ʋm kʋʋr yʋʋma la yʋ'ʋmmi lii fabin Josia yɛla. Nɛ'ɛŋa da lieb nɛ malʋŋ Israel teŋin, ka ba sɔbi li niŋ Fabʋlʋg Gbauŋʋn la.