Josia di Juda na'am la yɛla
34
1 Josia da anɛ yʋma anii ka di na'am, ka da zin'in na'am gbauŋ la zug Jerusalem tempʋʋgin yʋma pistan' nɛ yinne. 2 O da tʋm linɛ malis Zugsɔb la sʋʋnr ka dɔl o yaab Na'ab David suoya la wʋsa ka pʋ lɛb datiuŋ bɛɛ dagɔbʋga.3 O na'am la yʋma anii saŋa, saŋkan ka o da nan an dasaŋ la, ka o da pin'ili dɔl o yaab David Wina'am la. Lin da paae yʋma pisi la ka o pin'ili bɔɔd ye Juda nɛ Jerusalem an kasi la, o da san'am Asera daad nɛ bada banɛ ka ba kpi'a bɛɛ ya'ab la. 4 O da tis nɔɔr ka ba nwa'ae Baal bimbima nɛ bʋnnyubisa bimbima banɛ bɛɛ ba zug la, ka kɔ' Asera daad la nɛ bada nɛ ban ya'ab bʋnsieba la wʋsa. O da nwa'asi-nwa'asi ba ka widigi li niŋ banɛ da maannɛ ba la yaad zug. 5 Ka nɔk banɛ maannɛ li la kɔnba nyu'oe bimbim la zug, ka li kɛ ka Juda nɛ Jerusalem lieb kasi. 6 O da niŋ ala Manase nɛ Efiram nɛ Simeon hali ti paae Naftali tempʋʋsin nɛ linɛ gilig la wʋsa. 7 O da kɔ' Asera daad la ka nwa'as bada la bugusi bugus nɛ bimbima banɛ ka ba nyu'od bʋnnyubisa la Israel teŋin wʋsa ka yʋ'ʋn lɛb Jerusalem tempʋʋgin na.
8 O na'am la yʋma pii nɛ anii saŋa, on da bɔɔd ye o maal teŋ la nɛ Pʋ'ʋsim Yir la ka li an kasi la zug, o da tʋm Azalia biig Safan, nɛ Maaseya onɛ da an tempʋʋg la tuongat la, nɛ Joahas biig Joa onɛ an gbansɔbid la, ye ba maligim maal o Zugsɔb Wina'am Yir la.
9 Ba da keŋ Hilkia onɛ an maanmaan kpɛɛm la san'anɛ tis o ligidkanɛ ka Levi dim banɛ gur za'anɔɔr la di'e nimbanɛ kpɛn'ɛd Wina'am Pʋ'ʋsim Yin la san'an. Ba da anɛ Manase nɛ Efiram dim nɛ Israel dim banɛ kpɛlim la wʋsa, la'am nɛ Juda nɛ Benjamin nɛ Jerusalem nidib la. 10 Ba da nɔki li niŋ banɛ gɔt Zugsɔb tʋʋma yɛla la nu'usin. Bama da yɔɔd nimbanɛ maligim maan Wina'am Pʋ'ʋsim Yir la. 11 Ba mɛ da tis kampintanam nɛ banɛ mɛɛd la ligidi ye ba da' kugvɛnla nɛ dabanɛ gban'e zaŋguoma kuga la, nɛ yu'adbɛda la, maal zin'ikanɛ ka Juda na'anam da bas ka li san'am la.
12 Nidib la da tʋm tʋʋma la nɛ, nɛ sida. Banɛ da gɔti ba la da anɛ Jahaf nɛ Obadia, Levi dim banɛ yi Merari tuŋʋn nɛ Zakaria nɛ Mesulam banɛ yi Kohat tuŋʋn. Levi dim sieba banɛ wʋsa da mi' yʋʋma nɛ bʋnnwɛ'ɛda nwɛ'ɛb la 13 da gɔt banɛ tʋm ziid tʋʋma nɛ li buudi wʋsa ani la. Levi dim la sieba da anɛ gbansɔbidib nɛ pa'annib nɛ banɛ gur za'anɔɔr.
Ban da nyɛ wada gbauŋ la
14 Ban da yisid ligidkanɛ ka ba da mɔri kpɛn' Zugsɔb Pʋ'ʋsim Yin la, Hilkia onɛ an Maanmaan la da nyɛ Zugsɔb wada gbauŋ linɛ ka o da dɔlis Moses ni tisi ba la. 15 Hilkia da yɛl Safan onɛ an gbansɔbid la ye, “Man nyɛ Zi'elʋg Gbauŋ Zugsɔb Pʋ'ʋsim Yir la pʋʋgin.” O da nɔki tis Safan ka o karimi li.
16 Safan da nɔk gbauŋ la keŋ tis Na'ab ka yɛl o ye, “Naa, ti tʋm linɛ wʋsa ka fʋ ye ti tʋm la. 17 Ti yɔ ligidi kanɛ wʋsa daa bɛ Zugsɔb Pʋ'ʋsim Yin la tis banɛ gɔt tʋʋma la.” 18 O da lɛn yɛl Na'ab la ye, “Maanmaan Hilkia n tisim gbauŋ nwa.” Ka karim gbauŋ la tis o.
19 Na'ab la da wʋm on karim wada gbauŋ la, o da aans o fuudi pa'an o sʋnsa'aŋ. 20 O da pian' Hilkia nɛ Safan biig Ahikam nɛ Maika biig Abidon nɛ Safan onɛ an gbansɔbid la, nɛ Asaya onɛ tʋmmi tisid Na'ab la, tisi ba nɔɔr ye, 21 “Kem bu'osi Zugsɔb la man nɛ Israel dim banɛ kpɛlim la nɛ Juda dim yɛla zaŋi ken gbauŋ kanɛ ka ba nyɛ la yɛla. Ka Zugsɔb sʋnpɛɛn na luu ti zug na, bɔzugɔ ti yaanam daa pʋ siak Zugsɔb la pian'adɛ ka mɛ pʋ dɔl wʋʋ gbauŋ la yɛt si'em la zug.”
22 Hilkia nɛ banɛ ka Na'ab la da tʋm la da keŋ ye ba pian' tis nɔdi'espu'ak onɛ yʋ'ʋri buon Hulda ka da an Sallum pu'a la. Sallum da anɛ onɛ gur fuud suak dɔɔg la, ka an Tikiva biig ka an Haras yaaŋ. O da bɛ nɛ Jerusalem teŋ yapaala la ni.
23 Pu'a la da yɛli ba ye, Zugsɔb onɛ an Israel Wina'am la yɛl si'eli nwa: Yɛlimi dau kanɛ tʋmi ya man san'an na la ye, 24 “Zugsɔb la yɛl si'eli nwa, Mam ye m kɛnɛ ka tɔɔg lu teŋ kaŋa nɛ li nidib la zug, ka li dɔl wʋʋ lin sɔb gbauŋ kanɛ ka ba karim Juda Na'ab tuon si'em la. 25 Bɔzugɔ ba zan'as mam, ka maan maana ka nyu'od bʋnnyubisa tisid teŋgbana ka li duoe m sʋʋnr. Teŋgban banɛ ka ba maal nɛ ba nu'us la zug ka m ye m kɛ ka m sʋnf linɛ dit wʋʋ bugum na lu teŋin la ka sɔ' kae na nyaŋi kpiisi lii!” 26 Yɛlimi Juda na'ab onɛ tʋmmi ya ye ya kena bu'osimi baŋ Zugsɔb pʋtɛn'ɛr la ye on yɛl si'em nwa, Zugsɔb onɛ an Israel Wina'am la yɛl si'eli nwa zaŋi ken pian'abanɛ ka fʋ wʋm la, ye 27 “Fʋn wʋm mam zɛrig teŋ kaŋa nɛ li nidib la, ka ye ba na paam nɔpɔɔr ka lieb zaalim ka li tuaki fʋ sʋnf ka fʋ sie fʋ mɛŋ ka aansi fʋ fuud ka kaas man tuon la zug, m wʋmi fʋ sɔsʋg.” Zugsɔb la yɛl si'em la, 28 “Fʋ kʋ nyɛ tɔɔg kanɛ ka m ye m kɛ ka li kɛn teŋ kaŋa ni na laa. Fʋ na ti niŋ ka'alim ka ba mumif nɛ sumbʋgʋsʋm.”
Ba da mɔr pu'a la gandig si'em la wʋsa lɛbi yɛl Na'ab la.
29 Ka Na'ab la da buol Jerusalem nɛ Juda kpɛɛmnam la wʋsa la'as. 30 O da dɔl Juda nɛ Jerusalem nidib la nɛ maanmaannib nɛ Levi dim la nɛ nidib buudi wʋsa lin yi kpi'emnamin ti paae tadimnamin keŋ Zugsɔb Pʋ'ʋsim Yin la. O da karim linɛ wʋsa sɔb nɔnaar gbauŋʋn linɛ ka ba nyɛ Zugsɔb Pʋ'ʋsim Yin la ka li kpɛn' ba tʋba ni. 31 Na'ab la da duoe zi'enɛ o zin'ig linɛ kpi'e bua la ka tɛndig nɔnaar la Zugsɔb tuon ye o na dɔl Zugsɔb la nɛ o sʋnf wʋsa, ka siak o nɔzi'elʋg nɛ on pa'an si'el la nɛ o gban'ar linɛ sɔb nɔnaar gbauŋʋn la wʋsa.
32 Ka o kɛ ka sɔ' wʋsa Jerusalem nɛ Benjamin sʋ'ʋlimin pɔɔ zi'eli tisi ba mɛŋ, Israel dim la da niŋ nɛ' nɛ, ka li dɔl wʋʋ ba yaanam Wina'am nɔnaar la an si'em la.
33 Na'ab Josia da yis bada la wʋsa Israel dim la bɛ zin'isi'a wʋsa, ka kɛ ka banɛ bɛ Israel wʋsa dɔl Zugsɔb onɛ an Wina'am la. On da vʋe saŋa si'a la wʋsa ba da pʋ gu'oe Zugsɔb onɛ aan ba yaanam Wina'am la dɔllim.