Manase n di Juda na'am la yɛla
33
1 Manase da anɛ yʋma pii nɛ ayi' ka di na'am. O da zin'in na'am gbauŋ la zug Jerusalem tempʋʋgin yʋma pisnu nɛ anu. 2 Tʋʋm banɛ zug ka Zugsɔb la da kad buudbanɛ da bɛ teŋin la wʋsa nidib ka Israel dim lɛdig la, lin ka Manase da tʋm san'am Zugsɔb la sʋnf. 3 O da maligim mɛ' ba'a maalʋg zin'ibanɛ ka o saam Na'ab Hezekia da san'am bas la. O da mɛ' maan zin'isi tis Baal ka ba' Asera dazi'eda la, ka iginidi pʋ'ʋsid nwadbibis nɛ li buudi wʋsa. 4 O da mɛ' ba'ar bimbima Zugsɔb Pʋ'ʋsim Dɔɔgin la, zin'ikanɛ ka o ye, “Man yʋ'ʋr na bɛ Jerusalem saŋa wʋsa la.” 5 O da mɛ' bimbima Pʋ'ʋsim Dɔɔg za'ambɛŋin la tis nwadbibis nɛ li buudi wʋsa. 6 O da nɔk o biisi maal nyu'or maana Ben Hinnom Biis Bɔn'ɔgin la, ka bugid ba'akɔn buudi wʋsa ka dɔl sɔnpʋttib ka ken kikirisin. O da tʋm yɛlkisa ka li kɛ ka Zugsɔb la sʋnf duoe hali.7 O da nɔk ba'ar kanɛ ka o kpi'a la zi'el Wina'am Pʋ'ʋsim Dɔɔgin, zin'ikanɛ ka o da yɛl David nɛ o biig Solomon ye, “Pʋ'ʋsim Yikaŋa pʋʋg, nɛ Jerusalem tempʋʋg linɛ ka man gaŋi yi Israel buudi la tɛɛns wʋsa ni la, ka m na niŋi m yʋ'ʋr ani yʋma linɛ ka' bɛnnɛ. 8 Ba ya'a gu'us ka tʋm wʋʋ m wada nɛ m gban'ar nɛ zi'ela banɛ ka m sankpan'as Moses da tisi ba la, m kʋ lɛn kɛ ka Israel dim yi teŋ kanɛ ka m da tisi ba yaanam la.” 9 Amaa Manase da nɔk Juda teŋ nɛ Jerusalem nidibi kpɛn'ɛs nɛ mɔɔg, alazug ba da tʋm bɛ'ɛd hali gat buudbanɛ ka Zugsɔb la da kad ka Israel buudi lɛdig la.
10 Zugsɔb la da kɛn'ɛs Na'ab Manase nɛ o nidib la, amaa ba da pʋ wʋm tis oo. 11 Alazug, Zugsɔb la da kɛ ka Asiria zaba kpɛɛmnam kena zabi nyaŋ teŋ la, ka gban'e Manase bɔ baŋi tʋʋ o nyɔnya ka lɔɔ o nɛ kʋntzɛn'ug bana mɔr o keŋ Babilon. 12 On yʋ'ʋn da bɛ mugusʋgin la, o da sie o mɛŋi tis Zugsɔb onɛ aan o yaanam Wina'am la. 13 On da sɔs Zugsɔb ka o nyɛ on sie o mɛŋi an si'em la, o da wʋm o sɔsʋg ka zii o lɛb o mɛŋ sʋ'ʋlimin Jerusalem na. Ka Na'ab Manase yʋ'ʋn baŋ ye Zugsɔb la anɛ Wina'am.
14 Lin nya'aŋ la o da maligim mɛ' zaŋguomi gilig David tempʋʋg la, lɛbisid ya-tuona Gihon bulig kanɛ bɛ bɔn'ɔg la baba ti paae Zimi Za'anɔɔr la baba ka maligim paas Ofel kʋkʋn la paŋ; o mɛ da mɛɛ li ka li dʋ hali. Ka gaans zaba tuongatib ka ba bɛ Juda teŋ kpi'ema la wʋsa ni.
15 O da yis teŋ zʋŋ bada la wʋsa, ka yis bʋmbanɛ ka o ya'abi zi'el Zugsɔb Pʋ'ʋsim Dɔɔgin la, nɛ bimbima banɛ ka o mɛɛ zi'el Pʋ'ʋsim Yir kʋkʋn zug la nɛ Jerusalem tempʋʋgin la wʋsa lɔbi bas teŋ la yiŋ. 16 Ka yʋ'ʋn mɛ' Zugsɔb maan bimbim ka maal taaba la'asʋg maana nɛ bareka pʋ'ʋsʋg maana, ka yɛl Israel dim ye ba dɔl Zugsɔb onɛ an Israel Wina'am la. 17 Nidib la da nan kpɛm maan maana zin'ibanɛ bɛ kʋkʋna zut la, amaa ba da maannɛ tisid Zugsɔb la ma'aa.
18 Ya'a kpɛlim linɛ wʋsa da maal Na'ab Manase na'am saŋa la, la'am nɛ on sɔs o Wina'am, nɛ linɛ ka nɔdi'esidib pian' tis o nɛ Zugsɔb onɛ an Israel Wina'am la yʋ'ʋr la wʋsa, li sɔbi bɛ Israel Na'anam Gbana la ni. 19 On da sɔs Wina'am ka o di'e o winsɔsʋg si'em, la'am nɛ o tʋʋmbɛ'ɛd nɛ on da pʋ zi'e kimm nɛ Wina'am nɛ on da maal bada zin'is ka sɛ Asera dazi'eda ka nyaan ti sie o mɛŋ si'em la wʋsa sɔbi bɛ nɔdi'esidib gbana la ni. 20 Na'ab Manase da maal ka'alim ka ba mum o, o na'ayin la pʋʋgin. Ka o biig Ammon lɛdigi di na'am la.
Ammon n di Juda na'am la yɛla
21 Ammon da anɛ yʋma pisi nɛ ayi' ka di na'am. O da zin'in na'am gbauŋ la zug Jerusalem tempʋʋgin yʋma ayi'. 22 O da tʋm linɛ kis Zugsɔb la tuon, wʋʋ o saam Na'ab Manase da tʋm si'em la. Na'ab Ammon da maan bada banɛ wʋsa ka Manase da maal la ka wɔ'ɔgidi li. 23 On da ka' wʋʋ o saam la, bɔzugɔ o da pʋ sie o mɛŋi tis Zugsɔb la, amaa ka keŋ tuonnɛ tʋm tʋʋmbɛ'ɛd hali.