Manase di Juda na'am la yɛla
21
1 Manase da anɛ yʋma pii nɛ ayi' ka di na'am, o da zin'in na'am gbauŋ la zug Jerusalem tempʋʋgin yʋma pisnu nɛ anu. O ma yʋ'ʋri da buon Hefiziba. 2 O da tʋm bɛ'ɛd Zugsɔb la tuon, o da tʋm tʋʋmkisa banɛ ka buudbanɛ ka Zugsɔb da kadi ba teŋin la ka Israel nyaan paae la da tʋm la nɔɔ. 3 O da lɛm mɛ' teŋgbana zin'ibanɛ ka o saam Hezekia da san'am bas la. O mɛ da lɛm mɛ' Baal maan bimbima la, ka zi'el daugʋ tis teŋgban Asera la nwɛnɛ Israel na'ab Ahab n da tʋm si'em la. O da iginid nwadbibis tuonnɛ wɔ'ɔgidi ba. 4 O da mɛ maan bimbima Zugsɔb Pʋ'ʋsim Yin linɛ ka Zugsɔb yɛl ye, “Jerusalem pʋʋgin ka m na niŋi m yʋ'ʋr la.” 5 Pʋ'ʋsim Yir za'as ayi' la pʋʋgin wʋsa o da mɛ' nɛ bimbima tis nwadbibis la wʋsa. 6 Manase da nɔk o mɛŋ biigi maal maannɛ nyu'oe bugum. O da la'am tʋm tiim tʋʋma wʋsa, ka ken sɔnpʋttibin nɛ ba'abʋgʋdibin. O da tʋm bɛ'ɛd hali Zugsɔb la tuon ka li duoe o sʋnf. 7 Manase da zaŋ daugʋ kpi'e maal Asera ba'ar la niŋ Pʋ'ʋsim Yin la, zin'ikanɛ ka Zugsɔb da yɛl David nɛ o biig Solomon ye, “Pʋ'ʋsim Yikaŋa pʋʋg, nɛ Jerusalem tempʋʋg linɛ ka man gaŋi yi Israel buudi tɛɛns wʋsa ni la, ka m na niŋi m yʋ'ʋr ani yʋma linɛ ka' bɛn la. 8 Ba ya'a gu'us ka tʋmmi m nɔzi'elʋg kanɛ ka m yɛli ba ye ba tʋm la, ka dɔlli m wada linɛ ka m sankpan'as Moses da tisi ba la, m kʋ lɛn kɛ ka Israel dim yiridi yit teŋ kanɛ ka m da tisi ba yaanam la.” 9 Amaa nidib la da pʋ siakɛ. Manase da pan'asi ba kpɛn'ɛs mɔɔg, ka li kɛ ka ba maligim tʋm tʋʋmbɛ'ɛd hali gat buudbanɛ ka Zugsɔb da san'am ka Israel dim nyaan paae na la.10 Zugsɔb la da pʋn kɛ ka yammis banɛ an o nɔdi'esidib la yɛl 11 ye, “Juda Na'ab Manase tʋm tʋʋmkisa. O tʋm bɛ'ɛdi gaad Amor dim banɛ da gaad o tuon la, ka kɛ ka Juda dim dɔl o bada la ka tʋm bɛ'ɛd. 12 Alazug Zugsɔb onɛ an Israel Wina'am la yɛl ye, ‘M ye m kɛnɛ ka san'auŋ kɛn Jerusalem nɛ Juda dim zugin na hali ka onɛ tʋbiri wʋmi li yɛla la, o niŋgbiŋ na dam. 13 M na tiɛn linɛ ka ba mɔri makid la Jerusalem pʋʋgin nwɛnɛ man da nɔki lii mak Samaria tempʋʋg nɛ Ahab zak si'em la. M na pie Jerusalem ka pibili li wʋʋ ban ɛɛnti pie laa si'em ka lɛbigi pibil la. 14 M na zan'asi m nimbanɛ kpɛlim la, ka basi ba tisi ba dataas la ka ba faaɛn ba ka san'ami ba la'asʋma wʋsa. 15 Bɔzugɔ ba tʋm nɛ bɛ'ɛdi m san'an ka kɛ ka li daamim ka m sʋnf duoe, lin pin'il daakanɛ ka ba yaanam naam Egipt yina la ti paae zina.’ ”
16 Dinɛ lɛm pɛ'ɛs la, Manase da kʋ nidib bɛdegʋ banɛ pʋ tʋm taalɛ, ka ziim pɛ'ɛli pʋbid Jerusalem teŋin zin'is wʋsa, hali lin pʋ pɛ'ɛs tʋʋmbɛ'ɛd linɛ ka o da kɛ ka Juda dim tʋm, ka li kɛ ka ba tʋm bɛ'ɛd hali Zugsɔb tuon la. 17 Ya'a kpɛlim linɛ wʋsa maal Manase na'am saŋa la, la'am pɛ'ɛs tʋʋmbɛ'ɛd kanɛ ka o tʋm la, ba sɔbi li Juda Na'anam Gbana la ni. 18 Manase da maal ka'alim ka ba mum o, o pɔkanɛ bɛ na'ayir samannin la, linɛ an Uzaa pɔɔg la. Ka o biig Ammon lɛdigi di na'am la.
Ammon n di Juda na'am la yɛla
19 Ammon da anɛ yʋma pisi nɛ ayi' ka di na'am. O da zin'inɛ na'am gbauŋ la zug Jerusalem tempʋʋgin yʋma ayi'. O ma yʋ'ʋri da buon Mesuelemef onɛ yi Jotab teŋin na ka an Harus pu'ayua. 20 O da tʋm bɛ'ɛd bɛdegʋ Zugsɔb la tuon wʋʋ o saam Manase da tʋm si'em la. 21 O da dɔl o saam suoya la wʋsa. O da maannɛ bada banɛ ka o saam da maan la, ka iginidi wɔ'ɔgidi ba. 22 Na'ab Ammon da ki'is Zugsɔb onɛ aan o yaanam Wina'am la, ka pʋ dɔl Zugsɔb la bɔɔd si'em.
23 Ammon na'ayikpɛm la da yii o nya'aŋ ka kʋʋ o na'ayir la pʋʋg. 24 Teŋ la nidib mɛ da kʋ nimbanɛ da naal nɔɔri kʋʋ o la wʋsa, ka diis o biig Josia na'am la.