Hezekia lu ban'a
20
1 Saŋkan la Hezekia da lu ban'a ka li bɔɔd o kʋʋb. Nɔdi'es Azaya onɛ an Amoz biig la da keŋ o san'an yɛl o ye, “Zugsɔb la yɛl si'eli nwa ye, ‘Maalimi fʋ yir sʋ'ʋŋa bɔzugɔ fʋ na kpi, fʋ kʋ duoe.’ ” 2 Hezekia da fɛndig o nindaa kpa' dɔkpinni sɔsid Zugsɔb la yɛt ye, 3 “M Zugsɔba, tiɛnm man dɔllif nɛ sida si'em nɛ m sʋnf wʋsa, m pɛsigi m mɛŋ ka tʋm si'el wʋsa ka li an sʋ'ʋŋa fʋ nini ni!” Ka Hezekia kaas nɛ sʋnsa'aŋ.4 Azaya da yit zakin la, ka Zugsɔb lɛm pian' tis o ye, 5 “Lɛm yɛl Hezekia onɛ aan m nidib tuongat la ye, ‘Zugsɔb onɛ aan fʋ yaab David Wina'am la yɛl ye: m wʋmi fʋ sɔsʋg, ka mɛ nyɛɛ fʋ ninta'am; m na kɛ ka fʋ paam laafi. Daba atan' zina fʋ na keŋ Zugsɔb Pʋ'ʋsim Yin. 6 M na paasif yʋma pii nɛ anu. M mɛ na faaɛn fʋn nɛ teŋ kaŋa yis Asiria Na'ab la nu'ugin. Man na gur teŋ kaŋa mam mɛŋ nɛ David yɛla.’ ”
7 Azaya da yɛl sankpan'asnam la ye ba yisim kekama kpaam suoɛn o natiŋkpi'eŋ la. Ka ba niŋ ala ka Hezekia paam laafi.
8 Hezekia da pʋn dɛŋi bu'os Azaya ye, “Zanbin bɔɔ na pa'alim ye Zugsɔb la na tisim laafi ka m keŋ Zugsɔb Pʋ'ʋsim Yin la daba atan' pʋʋginɛ?” 9 Ka Azaya lɛbis ye, “Nɛ' na an Zugsɔb la zanbinnɛ pa'anif ye Zugsɔb na maal on kaanb si'el wʋsa: ma'asim na vurigi keŋ tuon nɔba yakir piiga bɛɛ lɛb nya'aŋ nɔba yakir piigaa?” 10 Hezekia da lɛbis o ye, “Li anɛ na'ana ka ma'asim vurigi keŋ tuon nɔba yakir piiga, lɛɛ kɛl ka li lɛb nya'aŋ nɔba yakir piiga!” 11 Ka nɔdi'es Azaya sɔs Zugsɔb la, ka Zugsɔb la kɛ ka ma'asim la lɛb nya'aŋ nɔba yakir piiga wʋʋ lin da sig Ahaz ma'asim makir zin'igin si'em la.
Babilon na'ab tʋm nidib na'ab Hezekia san'an
12 Saŋkan la Merodak-Baladan onɛ saamme an Babilon na'ab ka o yʋ'ʋr buon Baladan la da tɔlim gbana nɛ piini ye ba tis Hezekia bɔzugɔ o da wʋm o ban'as la yɛla. 13 Hezekia da di'e saam la ka pa'ali ba linɛ wʋsa bɛɛ o la'ad dɔɔgin la. Linɛ an; anzurifa nɛ sanlima nɛ tudaar nɛ kpasʋma. O zaba la'ad zin'ig nɛ la'abanɛ wʋsa bɛ la'ad suak dɔɔgin la ka o da pa'ali ba. Si'el da pʋ kpɛlim na'ayin la bɛɛ o sʋ'ʋlim la ni ka o pʋ pa'alɛ.
14 Azaya onɛ da an nɔdi'es la da keŋ Na'ab Hezekia san'an bu'os o ye, “Nimbanɛ kena la yɛl ye bɔ, ka ba yi yaanɛ na?” Ka Hezekia lɛbis ye, “Ba yinɛ lallisa, hali Babilon teŋin na.” 15 Ka nɔdi'es la bu'os o ye, “Ba nyɛ bɔɔ fʋ yin la?” Ka Hezekia lɛbis ye, “Ba nyɛ si'el wʋsa. Si'el pʋ kpɛlim suak dɔɔgin la ka m pʋ pa'ali baa.” 16 Ka Azaya yɛl Hezekia ye, “Tɔ! Kɛlisim Zugsɔb la yɛl si'el: 17 ‘Saŋa kenna ka la'abanɛ bɛ na'ayin nwa wʋsa nɛ fʋ yaanamɛ da su'a la'asieba ba saŋa ti paae zina la wʋsa, ba na vaae li wʋsa lɛb Babilon teŋin ka si'el-si'el kʋ kpɛlim!’ Zugsɔb la yɛl ala.” 18 Fʋ yaas la sieba, banɛ aan fʋ mɛŋ ziim la, ba na gban'e ba mɔri keŋi zan' ba ka ba lieb Babilon Na'ab yin tʋmtʋmnib. 19 Ka Hezekia lɛbis ye, “Zugsɔb pian'akanɛ ka fʋ pian' la an sʋm!” Bɔzugɔ, o tɛn'ɛs o sʋʋnrin ye, “sumbʋgʋsʋm ya'a sadigim bɛ man nyɔvʋr bɛllim saŋa, li ka' yɛllɛ.”