Jerusalem dim wʋmi ba faangir yɛla
19
1 Na'ab Hezekia da wʋm ala la, o da aans o fuud ka yɛ bɔto fuugʋ keŋ Zugsɔb Pʋ'ʋsim Yin. 2 O da tʋm Eliakim onɛ an na'ayikpɛɛm la nɛ Siebna onɛ an gbansɔbid la nɛ maanmaannib kpɛɛmnam la ka ba wʋsa yɛ bɔto fuudi keŋ nɔdi'es Azaya onɛ an Amoz biig la san'an. 3 Ba da yɛl o ye, “Na'ab Hezekia yɛl si'eli nwa: zina anɛ tɔɔg nɛ sʋnsa'aŋ nɛ nyan dabisir, nwɛnɛ pu'a na sa'ae ka biig zug tʋm na ka paŋ lɛn kae na uns ka o yina la. 4 Daasi'erɛɛ Zugsɔb onɛ aan fʋ Wina'am la wʋm Asiria na'ayikpɛɛm onɛ ka o zugdaan Asiria Na'ab tʋm ye o tʋ' Wina'am Kanɛ Vʋe la pian' si'em; ka na zɛrig o zaŋi ken pian'akanɛ ka Zugsɔb onɛ aan fʋ Wina'am wʋm la. Alazugɔ sɔsim Wina'am tis banɛ kpɛlim bi'ela ka nan vʋe la!”5 Na'ab Hezekia kpi'emnam la da kɛn Azaya san'an na la, 6 Azaya da yɛli ba ye, “Yɛlimini ya zugdaan la ye, ‘Zugsɔb la yɛl si'eli nwa: Da zɔti dabiem nɛ yanamɛ wʋm pian'abanɛ ka Asiria na'ab biis la kena pian' pɔ'ɔg mam la zugɔ. 7 Kɛlisimi! M na fɛndig o ya'am ka o ya'a wʋm labasi'a o na lɛb o mɛŋ teŋin, ani ka m na kɛ ka ba ki'e o nɛ sʋ'ʋgʋ kʋ.’ ”
8 Asiria kpɛɛm la da wʋm ye Asiria Na'ab yi Lakis la, o da yii keŋ nyɛ ka Na'ab la zabid nɛ Libna teŋ dim. 9 Saŋkan la Senakɛrib da wʋm labaar ye Tirhaka onɛ an Kusa Na'ab la yit ye o zab nɛ o la, o da lɛn tɔlim labaari yɛl Hezekia ye, 10 “Yɛlim Hezekia onɛ an Juda Na'ab la ye, da kɛ ka teŋgban kanɛ ka fʋ dɛl la ma'af ye, ‘Ba kʋ nyaŋi di'e Jerusalem tis Asiria Na'ab laa.’ 11 Gɔsima, fʋ mɛŋ pʋn wʋm Asiria Na'abi tʋm si'el tembama la ni; o san'ami ba nyain-nyain. Ka fʋn tɛn'ɛs ka fʋ na paam faangirɛɛ? 12 Tembanɛ ka m yaanam da zabi nyaŋi san'am la teŋgbana da nyaŋi faaɛn baa? Tembanɛ an: Gozan nɛ Haran nɛ Rezef teŋgbana la nɛ Eden nimbanɛ da bɛ Telasa la. Ba teŋgban baa yinne da pʋ nyaŋi faaɛn baa! 13 Hamat Na'ab la bɛɛ Apad Na'ab bɛɛ na'ab onɛ an Sefaavam tempʋʋg Na'ab la bɛɛ banɛ an Hena bɛɛ Iva Na'anam la bɛ yaanɛ?”
14 Hezekia da di'e gbauŋ la ban tʋm sieba o san'an na la nu'ugin karim. Ka duoe keŋ Zugsɔb Pʋ'ʋsim Yinnɛ fuoe gbauŋ la digil Zugsɔb la tuon, 15 ka sɔs Zugsɔb la ye, “M Zugsɔb onɛ an Israel Wina'am, fʋnɛ zin' Kerubnam teŋsʋk. Fʋn ma'aa an Wina'am sʋ'oe sʋ'ʋlim banɛ bɛ dunia wʋsa. Fʋnɛ maal agɔl nɛ teŋ. 16 Zugsɔba, yɔ'ɔgimi fʋ tʋba ka wʋm, Zugsɔba lakimi fʋ nini ka nyɛ; kɛlisim Senakɛrib n tɔlim pian'asi'a na tʋ' fʋn Wina'am Onɛ Vʋe la. 17 Zugsɔba, li anɛ sida ye Asiria na'anam san'am tembama nɛ li teŋgbana wʋsa. 18 Ba nɔki ba bada la wʋsa lɔb bugumini san'ami ba. Bɔzugɔ ba daa ka' winaa, amaa daad nɛ kuga linɛ ka nidib maali kpi'a nɛ ba nu'us la. 19 M Zugsɔb onɛ aan ti Wina'am, faanmi ti yii o nu'ugin, ka sʋ'ʋlim linɛ bɛ dunia kaŋa wʋsa baŋ ye fʋn ma'aa an Wina'am, m Zugsɔba.”
Azaya da tu'as Senakɛrib luus yɛla
20 Azaya onɛ an Amoz biig la da tɔlim labaari tis Na'ab Hezekia ye, “Zugsɔb onɛ an Israel Wina'am la yɛl ye, ‘Mam wʋmi fʋ sɔsʋg Asiria Na'ab Senakɛrib yɛla.’ 21 Pian'akanɛ ka Zugsɔb la pian' zɛrig o nwa:
“ ‘Zion pu'asadir onɛ nan zi' dau nɛ'ɛsif ka la'adif.
Jerusalem pu'ayua lɔbid o zugʋ fʋ zɔɔg la yɛla.
22 Anɔ'ɔn ka fʋ tʋ'ʋd ka nɛ'ɛsida?
Anɔ'ɔn ka fʋ tansid nɛ kʋkɔtita'ar
ka midigid nini nɛ nyɛɛsim?
Ka'anɛ Israel Dim Wina'am Onɛ An Kasi laa?
23 Fʋ bas nɛ banɛ ziidi fʋ labaya ken la na nɔɔr
ye ba kena tʋ' Zugsɔb la bam bɔɔd si'em.
Ka yɛl ye, “Mam mɔr zaba tɛrekonam bɛdegʋ la zug
ka m nyaŋi dʋ zuor zug
zin'ikanɛ dʋʋ gaad zin'is wʋsa Lebanon teŋin.
Man nwa na'aziinr tiwa'a la wʋsa digil teŋin
nɛ tibanɛ ka li daad wa'am la.
Man keŋi paae teŋ la nɛ sian'anr la bɛn.”
24 Ka ye, “Man tu bulis teŋ zʋna ni ka nuu li ku'om,
Ka mam mɛŋ nɔbpansimpana ka m nɔki
kɛ ka Egipt ku'osuoya kpiɛn.”
25 Fʋ pʋ wʋm ye kʋdimin sa ka m gban'e lii?
Ɛɛn, yʋʋm pʋkʋdʋgin sa ka mam da pʋn gban'e li yɛla!
Nannanna ka m yʋ'ʋn kɛ ka li maal.
Ka fʋ nɔk tɛɛns banɛ da mɔr kpi'euŋ la
ka kɛ ka li lieb zin'ikanɛ ka kuga dig kuda-kuda.
26 Ba nimbanɛ paŋi naae la lidig nɛ ka di nyan.
Ba nwɛnɛ bʋmbʋta linɛ nam bʋn pɔɔgin
ka nwɛnɛ mɔbiili linɛ nan tansid.
Ka lɛn nwɛnɛ mɔɔdi naanɛ tansid mɔpil zug,
ka nintaŋ tʋʋlʋg nyaŋi ba ka ba pʋ nyaŋi nɔbigɛ.
27 Amaa mam mi' fʋn bɛ zin'isi'a,
nɛ fʋn ken ka lɛbid suosi'a;
nɛ fʋn kis mam si'em la.
28 Fʋn kisim si'em la, nɛ fʋ tʋ'ʋd la kpɛn' m tʋba ni,
alazug, m na nɔki m gu'a la ga' fʋ nyɔnya,
ka li'a fʋ nɔɔr nɛ salibir,
ka kɛ ka fʋ lɛb wʋʋ fʋn kɛn si'em la na.’
29 Na'ab Hezekia, zanbin kanɛ ka m na tisi fʋ nwa: dʋnna ya ye ya dinɛ ki linɛ yi ka sɔ' pʋ bʋdɛ. Ka yʋʋm kanɛ pɛ'ɛs ayi' la ya na di linɛ yii li mɛŋ. Amaa yʋʋm kanɛ paasida atan' la bʋdim ka bʋn. Bʋdim tiis pɔɔd ka dii li wala. 30 Linɛ paas la, nimbanɛ kpɛlim Juda dɔɔgin la na ba'a nya'a teŋin yina wal wala agɔl. 31 Jerusalem pʋʋgin nidib bi'ela na kpɛlim ka Zion zuor zug banɛ kpɛlim ka pʋ kpi la na la'as na. Zugsɔb la nyɛlʋg na kɛ ka nɛ' maal. 32 Alazug, Zugsɔb la yɛt si'eli nwa zaŋi ken Asiria Na'ab la yɛla ye, ‘O kʋ kpɛn' teŋ kaŋa pʋʋga, bɛɛ tɔn piim kpɛla. O kʋ nyaŋi kpɛn' ani ka zanl gbanti'edʋg bɛɛ nyaŋi mɛ' gu'ub zaŋguomi giŋi li. 33 On dɔl suosi'a kena la o na dɔl anii lɛb, o kʋ kpɛn' teŋ kaŋa pʋʋginɛ.’ Zugsɔb la yɛl ala. 34 Ka ye ‘Mam na sʋŋ teŋ kaŋa ka faaɛn li bas mam mɛŋ yɛla, nɛ David onɛ an man tʋmtʋm la yɛla.’ ”
35 Yʋ'ʋŋ kan la Zugsɔb maliak da keŋ kʋ dap tusa kɔbiga nɛ pisnii nɛ anu Asiria dim la'asʋgʋn la. Bɛog da nie ya, ka nidib la duoe nyɛ nidibi kpii digi dig. 36 Dinzug Na'ab Senakɛrib da basi ba gu'ub zin'ig la ka duoe tɔɔm ka lɛb Ninive tempʋʋgin zin'inɛ ani.
37 Daar yinne ka o bɛɛ o teŋgban kanɛ buon Nisirok la dɔɔgin maan malʋŋ ka o biis Adiramelek nɛ Siareza ki'e o nɛ sʋ'ʋgʋ kʋ ka zɔɔ keŋ Ararat teŋin. Ka Esaraddon onɛ aan o biig la di na'am.