Senakɛrib n da vɔlisid Jerusalem dim si'em
32
1 Na'ab Hezekia da maal si'el wʋsa nɛ o pʋʋg nyain naae la, Asiria na'ab Senakɛrib da kena nɛ o nidibi lɔbi gilig Juda teŋ. Ba da lɔbi gilig teŋ kpi'ema la wʋsa mɔɔd ye ba zabi nyaŋ ka sʋ'ʋgi li. 2 Hezekia da nyɛ ka ba lɔbi giligi bɔɔd ye ba zab nɛ Jerusalem teŋ la, 3 o da buol o kpɛɛmnam nɛ zabzabidib la na nwɛ' ba sɔɔra ye ba giŋ ku'okanɛ bʋn teŋ la yiŋ la, ka ba siaki tis o. 4 Nidib bɛdegʋ da la'as na ka ba giŋ ku'obanɛ wʋsa bʋn la, nɛ kɔlis la, ka ye, “Asiria na'ab ye o niŋ wala kena paam ku'om bɛdegʋ kpɛla?” 5 Hezekia da maligim mɛ' zaŋguom banɛ lu la, ka mɛ' dɔwa'ama. O da lɛm mɛ' zaŋguom yinne yiŋ la ya'asi paas bʋnkʋdʋg la paŋ, ka maligim maal zaŋguoma banɛ gban'e David tempʋʋg zaŋguom ka li mɔr paŋ la. O mɛ da maal zaba la'ad bɛdegʋ nɛ linɛ lusid nyɔ'ɔg la.6 O da gaans banɛ na lu zabzabidib la tuon, ka la'as nidib la teŋ la za'anɔɔrin ka kpɛmisi ba yɛt ye, 7 “Mɔri sʋnkpi'euŋ ka da siaki tadʋŋɔ. Da zɔti dabiem bɛɛ kɛ ka ya sʋnya san'am, Asiria na'ab nɛ o nidib la zu'oe si'em la zugɔ; bɔzugɔ paŋ tita'ar bɛ tinam san'anɛ gat linɛ bɛ on san'an la. 8 Linɛ bɛɛ o ni la anɛ ninsaalib paŋ, amaa onɛ bɛ tinam san'an la anɛ Zugsɔb Wina'am onɛ sʋŋidi ti ka na zabi ti zaba tisi ti.” Nidib la da wʋm Hezekia onɛ an Juda na'ab la pian'ad la ba da paam sʋnkpi'euŋ.
9 Lin nya'aŋ, Asiria na'ab la da la'as o nidib la kena paae Lakis teŋin digin ani, ka tʋm o kpɛɛmnam ye ba mɔr labaari keŋ yɛl Hezekia onɛ an Juda na'ab la nɛ o nidib la wʋsa ye,
10 “Senakɛrib onɛ an Asiria na'ab la da bu'os ye, nannanna ya ti'e bɔ kimm ka bɛ Jerusalem pʋʋgin ka ba lɔbi giligi ya? 11 Hezekia ya'a ma'aa ya ye, ‘Zugsɔb onɛ aan ti Wina'am la na yisi ti Asiria na'ab nu'usin,’ o ma'adi ya nɛ ye ya kpi kɔ'ɔm nɛ ku'onuud. 12 Li ka' Hezekia mɛŋi da vɔɔnd maana zin'is nɛ bimbima laa? O pʋ yɛl Juda nɛ Jerusalem dim ye ba na pʋ'ʋsid nɛ ka nyu'od maana zin'ig yinne ma'aa nɛɛ?
13 Ya pʋ baŋ man nɛ m yaanamɛ maal tembama la wʋsa nidib si'em? Teŋ ban la wina ya'a da nyaŋi faaɛn ba yi man nu'usinɛ? 14 M yaanamɛ da san'am teŋ sieba wina la ya'a da nyaŋi faaɛn ba nidibi yii m san'anɛ? Ka yanam Wina'am la ye o niŋ wala faaɛn ya yi man nu'uginɛ? 15 Da kɛ ka Hezekia ma'aa ya kpɛn'ɛs mɔɔgɔ. Da niŋ o yadda, bɔzugɔ win si'a kae teŋ si'a bɛɛ sʋ'ʋlim si'a nyaŋi faaɛn o nidibi yi man bɛɛ m yaanam nu'uginɛ, ka yanam Wina'am la ye o niŋ wala faaɛn ya yis man nu'uginɛ?”
16 Senakɛrib kpɛɛmnam la da lɛm pian' hali zɛrig Zugsɔb Wina'am nɛ o tʋmtʋm Hezekia. 17 Na'ab la mɛ da sɔb gbana tʋ'ʋd Zugsɔb onɛ an Israel Wina'am la, yɛt ye, “Nwɛnɛ tembama la wina pʋ nyaŋi faaɛn ba nidib si'em yi man nu'ugin la, ala mɛn ka Hezekia Wina'am la mɛ kʋ nyaŋi faaɛn o nidibi yi man nu'uginɛ.” 18 Ba da tansid hali pian'ad nɛ Hibiru pian'adi tisid nimbanɛ da bɛ zaŋguoma zug la, ye ba vɔlisimi ba ka dabiem kpɛn' ba ka li kɛ ka ba nyaŋ teŋ la. 19 Ba da pian' Jerusalem Wina'am la gɛfa wʋʋ ban pian'ad si'em tisid dunia kaŋa wina banɛ ka nidib nɔki ba nu'usi maal ka pʋ'ʋsid la.
20 Hezekia onɛ an Na'ab la, nɛ Azaya onɛ an Amoz biig ka an nɔdi'es la da kaasi yɛl Zugsɔb la yɛl kaŋa. 21 Ka Zugsɔb la tʋm maliak ka o sig na kʋ Asiria kpɛɛmnam la nɛ tuongatib la nɛ Asiria na'ab zabzabidib la wʋsa. Ka o zɔɔ lɛb o teŋin nɛ nyan. Ka on da kpɛn' o ba'ar dɔɔgin la o biis la sieba da keŋ kʋʋ o.
22 Zugsɔb la da faaɛn Na'ab Hezekia nɛ Jerusalem nidib wʋsa yi Asiria na'ab nɛ ba dataas wʋsa nu'usin. O da guri ba zin'ig wʋsa. 23 Nidib pamm da zi piini kɛn Jerusalem na tis Zugsɔb la, ka tis Juda na'ab Hezekia piinsʋma. Lin yi saŋkan la teŋ wʋsa da tisid o nɛ girima.
Hezekia da dʋ'ʋs o mɛŋ, on tʋm si'el, nɛ o kum yɛla
24 Dabisban la Na'ab Hezekia da bɛn'ɛnɛ hali ti bɔɔd kum. O da sɔs nɛ Wina'am nɛ nimmua ka o wʋm ka pa'al o zanbin linɛ mɔr nyalima. 25 Amaa Na'ab Hezekia da mɔri nyɛɛsim hali, ka pʋ siaki tis Wina'am, linzug Zugsɔb nɔpɔɔr da lu on nɛ Juda nɛ Jerusalem zug. 26 Hezekia nɛ Jerusalem dim wʋsa da sɔs suguru ba nyɛɛsim la zug, linzug Zugsɔb tʋbtɛɛgir la da pʋ kɛn saŋkanɛ ka Hezekia da vʋe la naa.
27 Na'ab Hezekia da mɔr arezak bɛdegʋ, nɛ girima. O da mɛ' dɔɔgi niŋ o anzurifa nɛ sanlima nɛ kugsʋma nɛ tudaar nam nɛ zaba la'ad nɛ la'asʋma wʋsa. 28 O mɛ da mɛ' dɔɔdi su'a o bunib la'ad, nɛ o danpaalig nɛ kpaam, ka maal zin'isi niŋ o niigi nɛ pɛ'ɛs la. 29 O da maal o mɛŋ teŋkpɛmisi niŋ niigi nɛ kɔnbid bɛdegʋ, bɔzugɔ Wina'am da tis o kpan'am pamm.
30 Li anɛ Na'ab Hezekia da nyaŋi nwɛdig ku'okanɛ bʋn Gihon bulig zugin la ka kɛ ka li bunnɛ dɔl teŋiri kpɛn'ɛd ya-tuona David tempʋʋgin la. O ya'a da gban'e si'el wʋsa o da nyaŋidi maan. 31 Amaa Babilon dimi da tʋm nidib na ye ba bu'os o nyalima linɛ maal teŋin la, Wina'am da bas o ye o pian' o ya'amin ka o baŋ linɛ bɛɛ o sʋnfʋn.
32 Ya'a kpɛlim bʋn linɛ maal Hezekia na'am saŋa nɛ o pɛsigim-mɛŋ la sɔbi bɛ Amoz biig Azaya onɛ an nɔdi'es la da nyɛt si'el ka sɔbi niŋ Juda nɛ Israel Na'anam Gbauŋʋn la. 33 Hezekia da kpiya ka ba mum o kʋkʋn kanɛ ka David yaas yaad bɛ la zug. On da kpi la, Juda nɛ Jerusalem nidib wʋsa da tis o na'asi. Ka o biig Manase lɛdigi di na'am la.