Hezekia vʋ'ʋg pʋ'ʋsim la ya'as
31
1 Malʋŋ la da naae la, Israel buudbanɛ da bɛɛ ani la da yii kpɛn' Juda tempʋʋsin nwa' maana kuga la ka vuoɛn Asera dazi'eda la. Ba da san'am maana zin'ibanɛ bɛ Juda nɛ Benjamin nɛ Efiram nɛ Manase tɛɛnsin la wʋsa. Ban da niŋ ala naae la, ka lɛbi ba mɛŋ tɛɛnsin.Ban la'as la'ad ye li sʋŋ ka ba pʋ'ʋs la
2 Hezekia da pʋdig maanmaannib nɛ Levi dɔɔg dim la ka li dɔl wʋʋ ba tʋʋma an si'em ye ba maal taaba la'asʋg nɛ nyu'or maana la ka tʋm tʋʋma Zugsɔb Pʋ'ʋsim Yir za'anɔya la ni ka yʋʋm sumalisim yʋʋma. 3 Na'ab la da yis nɛ o mɛŋ arezak ka ba maan bɛogʋn nɛ zaam nyu'or maana la, nɛ Vʋ'ʋsʋm Daar maana la, nɛ nwadpaalig nɛ maan banɛ bɛ wʋʋ lin sɔb si'em Zugsɔb wada gbauŋʋn la. 4 O da tis nɔɔr ye banɛ bɛ Jerusalem la tisim linɛ an maanmaannib la nɛ Levi dim la din, ka li kɛ ka ba pɛsigi ba mɛŋi dɔl Zugsɔb wada la bɔɔd ye ba maal si'em. 5 Labaar la da paae la, Israel buudi la da tisi ba bʋndɛɛnna la'ad nɛ ba zʋʋd nɛ ba danpaalig nɛ kpaam nɛ siind nɛ linɛ wʋsa aan ba pɔɔg zʋʋd. Ba da pʋdig si'el wʋsa zin'is piiga ka yis yinne tis. 6 Israel nɛ Juda nimbanɛ da bɛ tempʋʋsin la da tisi ba niigi nɛ bʋnkɔnbid pʋʋr piiga nɛ bʋmbanɛ wʋsa ka ba pɛsigi tis Zugsɔb la. Ba da mɔri li na digil dʋʋr-dʋʋr. 7 Ba da pin'il piinkaŋa tisib nɛ nwadkanɛ paas atan' la ni ti paae nwadis ayɔpɔi la ni. 8 Hezekia nɛ o kpɛɛmnam la da kena nyɛ la'ad la dig dʋʋr si'em la, ba da pian' Wina'am ka kaanb bareka niŋ Israel nidib la.
9 Hezekia da bu'os maanmaannib nɛ Levi dim la la'abanɛ dig kuda-kuda la yɛla; 10 ka Azaria onɛ an maanmaan kpɛɛm ka an Zadok yaaŋ la lɛbis ye, “Nidib la pin'ili ziidi ba piini la ken Zugsɔb Pʋ'ʋsim Dɔɔgin na la, li kɛ ka ti paam diib bɛdegʋ di ka li kpɛlim pamm, bɔzugɔ Wina'am niŋ o nidib la zug bareka linɛ kɛ ka li kpɛlim zu'oe anwa la.”
11 Hezekia da tis nɔɔr ye ba maal la'ad dɔɔg Zugsɔb Pʋ'ʋsim Yin la, ka ba sid niŋ ala. 12 Ba da nɔk ban la'as si'el la wʋsa nɛ pɛsigir piini la mɔri kena. Konania onɛ an Levi nid la da gɔti li yɛla ka o pitʋ Simie tia'al o. 13 Jehel nɛ Azazaya nɛ Nahaf, nɛ Asahel, nɛ Jerimof, nɛ Jozabad nɛ Eliel nɛ Isimakaya nɛ Mahaf nɛ Benaya da gɔti li yɛla, ka Konania nɛ o pitʋ aan ba tuongatib. Na'ab Hezekia nɛ Azaria onɛ an kpɛɛm sʋ'oe Wina'am Pʋ'ʋsim Dɔɔg yɛla la da gaansi ba.
14 Imnah biig Kore onɛ an Levi dɔɔg nid ka da gur ya-nya'aŋ za'anɔɔr la, da sʋ'oe ya'amlɛog piini linɛ ka ba tisid Wina'am la, ka pʋdig ban la'as piinsieba tis Zugsɔb la nɛ pɛsigir piini la wʋsa. 15 Eden nɛ Minyamin nɛ Jesua nɛ Semaya nɛ Amaraya nɛ Siekania da sʋŋid Kore nɛ ba sʋʋnr wʋsa maanmaannib la bɛ tempʋsieba la. Ba da pʋdigidi tisidi ba maanmaan taaba la wʋʋ lin nar si'em, ninkʋda nɛ dasam wʋsa.
16 Linɛ paas la ba da lɛm pʋdigi tisid biribis banɛ an yʋma atan' bɛɛ gaad ala ka ba yʋda paas tʋʋma dimin la banɛ na kpɛn' Zugsɔb Pʋ'ʋsim Dɔɔgin la tʋm dabisir wʋsa tʋʋma nɛ li buudi, ka li dɔl nɛ ban pʋʋ ba si'em la. 17 Ka mɛ sɔb maanmaannib la yʋda ka li dɔlli ba yaanam tuŋ la nɛ Levi dim banɛ an wʋʋ yʋma pisi bɛɛ gaad ala ka li dɔl nɛ ba tʋʋma nɛ ban pʋdigi ba zi'el si'em. 18 Ba da la'am paas maanmaannib la bibaanlʋg nɛ ba pu'ab nɛ ba bipumis nɛ biribis wʋsa banɛ bɛ teŋin la ka ba yʋda sɔb gbauŋʋn la, bɔzugɔ ba da maali ba mɛŋ kasi nɛ ba sʋnf wʋsa.
19 Ya'a kpɛlim maanmaannib banɛ an Aaron yaas ka bɛ kuob zin'isin linɛ kpi'e ba tempʋʋg bɛɛ teŋ sieba la, ba da pʋ Kɔ'ɔŋi ba dinnɛ, bɔzugɔ ba da gaans dap sieba ye ba pʋdigidi tisid onɛ wʋsa yʋ'ʋri bɛ gbauŋʋn la ka li pa'al ye o anɛ Levi nid.