Hezekia n maal Kum Maliak Gaadʋg malʋŋ la
30
1 Hezekia da tʋm yɛl Israel nɛ Juda dim wʋsa, ka mɛ sɔb gbana buon Efiram nɛ Manase dim wʋsa ye ba kɛn Zugsɔb Pʋ'ʋsim Yir linɛ bɛ Jerusalem teŋin la na ka ba pʋ'ʋs Zugsɔb onɛ an Israel Wina'am Kum Maliak Gaadʋg malʋŋ la. 2 Na'ab la, nɛ o na'ayikpɛm la, nɛ nidib la wʋsa da gban'e ye ba pʋ'ʋs dabisir la nwadkanɛ tia'al ayi' la ni. 3 Ba da pʋ nyaŋidi pʋ'ʋsid saŋa linɛ nar la bɔzugɔ maanmaannib la pamm da pʋ nyaŋi maali ba mɛŋ kasii, ka nidib la mɛ pʋ la'as Jerusalem teŋinɛ. 4 Gban'akaŋa da nwɛnɛ li an sʋm tis Na'ab la nɛ nidib la wʋsa. 5 Ba da gban'e ye ba mɔɔl Israel teŋin wʋsa lin pin'il Beerseba teŋin hali ti paae Dan teŋinɛ buol nidib la ka ba la'as Jerusalem na ka ba pʋ'ʋs Zugsɔb onɛ an Israel Wina'am Kum Maliak Gaadʋg malʋŋ la. Ba da nan zi' la'as taaba bɛdegʋ pʋ'ʋs wʋʋ lin sɔb si'em la.6 Na'ab la da tis nɔɔr ka banɛ mɔɔn la di'e gbana Na'ab la san'anɛ o kpɛɛmnam san'an mɔri keŋ gilig Israel nɛ Juda wʋsa, lin da sɔb si'em nwa ye,
“Yanam Israel nidiba, fɛndigim lɛbi Abraham nɛ Isaak nɛ Jakob Wina'am la san'an na, ka o mɛ na fɛndigi lɛb yanam banɛ kpɛlim la san'an na, banɛ nyaŋi yi Asiria na'ab nu'usin la. 7 Da aaɛn wʋʋ ya yaanam nɛ ya Israel taaba banɛ da ka' sida dimi tis Zugsɔb onɛ aan ya yaanam Wina'am la, ka o da kɛ ka ba nyɛt san'auŋ wʋʋ yanamɛ nyɛɛ li si'em la. 8 Da kɛ ka ya zug kpi'em wʋʋ ya yaanam la da an si'em la; sigisimi ya mɛŋi tis Zugsɔb la. Kemi Pʋ'ʋsim Dɔɔg kanɛ ka o maali li kasi saŋa linɛ ka' bɛn la ni na. Dɔlli Zugsɔb Wina'am nɛ ya sʋnf wʋsa ka o sʋnpɛɛn na yii ya san'an. 9 Ya ya'a fɛndigi lɛb Zugsɔb la san'an na li na kɛ ka banɛ gban'e ya ba'abiis nɛ ya biis la zɔɔ ba nimbaanlig ka kɛ ka ba lɛb teŋ kaŋa ni na, bɔzugɔ Zugsɔb onɛ aan ya Wina'am la mɔri nyɔɔg ka zɔt nimbaanlig. O kʋ fɛndig o nindaa ka basi ya, ya ya'a lɛb o san'an na.”
10 Labaya dim la da keŋ tempʋʋg wʋsa linɛ bɛ Efiram nɛ Manase tɛɛnsin la, hali ti paae Zebulun sʋ'ʋlimin, amaa nidib la da la'adi ba nɛ. 11 Amaa Aser nɛ Manase nɛ Zebulun tɛɛnsin ninsieba da sie ba mɛŋ ka keŋ Jerusalem. 12 Wina'am mɛ da sʋŋ Juda dim ka ba niŋ nɔɔr yinne nɛ ya'am yinne ye ba tʋm Na'ab la nɛ o na'ayikpɛm la yɛl si'el la, ka li da anɛ wʋʋ Zugsɔb la pian' si'em la.
13 Nidib pamm da la'as ye ba pʋ'ʋs Bodobodo Linɛ Ka' Danbin Dabisir la, nwadig kanɛ tia'al ayi' la ni. 14 Ba da vuoɛn maan bimbima buudi wʋsa linɛ bɛ Jerusalem la m mɔri keŋ bas Kidron bɔn'ɔgin.
15 Ba da kɔt Maliak Gaadʋg Malʋŋ pɛ'ɛs la nɛ nwadkanɛ paasid ayi' la dabisa pii nɛ anaasi daar. Ka nyan gban'e maanmaannib la nɛ Levi dim la ka ba maali ba mɛŋ kasi ka mɔr nyu'or maannɛ kɛn Zugsɔb Pʋ'ʋsim Dɔɔgin la na. 16 Ka yʋ'ʋn zi'en lin nar ye ba zi'en zin'isi'a la wʋʋ lin sɔb si'em Moses onɛ an Wina'am tʋmtʋm la gbauŋʋn la. Maanmaan la da nɔk ziim kanɛ ka Levi dim la ti'eli tis o la misig. 17 Bɔzugɔ nidib pamm da bɛɛ ani nam pʋ maali ba mɛŋ kasii, ka li anɛ ye Levi dim la da kɔt Kum Maliak Gaadʋg malʋŋ pɛ'ɛs la tis banɛ bɛɛ ani ka' nyain wʋʋ ba malima la zi'el si'em ka ba kʋ nyaŋi nɔki ba pɛ'ɛs la pɛsig Zugsɔb la. 18 La'am nɛ nidib bɛdegʋ banɛ yi Efiram nɛ Manase nɛ Isaka nɛ Zebulun dɔɔd ni na da pʋ maali ba mɛŋ kasi la, ba da di Kum Maliak Gaadʋg malʋŋ la diib ka li pʋ dɔl nɛ lin sɔb si'em la. Amaa Hezekia da sɔs Wina'am tisi ba ye, “Zugsɔb onɛ an sʋm la na kɛ sɔ' wʋsa taali bas 19 onɛ wʋsa ieed Zugsɔb onɛ aan o yaanam Wina'am la nɛ o sʋnf wʋsa, hali baa o ya'a la'am ka' kasi wʋʋ Pʋ'ʋsim Dɔɔg wada la zi'el si'em la.” 20 Zugsɔb la da wʋm Hezekia pʋ'ʋsʋg ka ma'ae nidib la ban'as.
21 Israel dim banɛ da bɛ Jerusalem la wʋsa da pʋ'ʋs Bodobodo Linɛ Ka' Danbin Malʋŋ la daba ayɔpɔi ka maal sumalisim bɛdegʋ, ka maanmaannib la nɛ Levi dim la yʋ'ʋm yʋʋma tis Zugsɔb la daar wʋsa nɛ Zugsɔb yʋʋma la'ad la.
22 Hezekia da pian' kpɛmis Levi dɔɔg dim la, banɛ sid da pa'al ye ba gban'e Zugsɔb tʋʋma la gbin la. Bɔzugɔ daba ayɔpɔi la wʋsa ba da di taaba la'asʋg maan la, ka wɔ'ɔg Zugsɔb onɛ aan ba yaanam Wina'am la.
23 Nidib la wʋsa da gban'e ye ba na di malʋŋ la daba ayɔpɔi paas; alazug ba da lɛm maal sumalisim daba ayɔpɔi ya'as. 24 Juda na'ab Hezekia da tis nidib la na'araad tusir nɛ pɛ'ɛs nɛ bʋʋs tusa ayɔpɔi, ka kpɛɛmnam la tis na'araad tusir nɛ pɛ'ɛs nɛ bʋʋs tusa piiga. Maanmaannib bɛdegʋ da maali ba mɛŋ kasi. 25 Juda nidib la wʋsa nɛ maanmaannib la nɛ nimbanɛ da yi Jerusalem keŋ la wʋsa da maal sumalisim, la'am nɛ saam banɛ da yi Israel sʋ'ʋlimin keŋ la nɛ banɛ da bɛ Juda la. 26 Sumalistita'ar da bɛ Jerusalem, bɔzugɔ lin pin'il David biig Solomon onɛ da an Israel na'ab la saŋa sa, li buudi nan zi' maal Jerusalem teŋinɛ. 27 Maanmaannib la nɛ Levi buudi la da duoe zi'en ka kaanb bareka niŋ nidib la, ka Wina'am gandig, bɔzugɔ ba sɔsʋg la da paae arezana ni, zin'ikanɛ an kasi ka o bɛ la.