Hezekia n maal Pʋ'ʋsim Dɔɔg la ka li an Kasi
29
1 Hezekia da anɛ yʋma pisi nɛ anu ka di na'am. O da zin'in Jerusalem na'am gbauŋ la zug yʋma pisi nɛ awai. O ma yʋ'ʋri da buon Abija, onɛ da anɛ Zakaria pu'ayua. 2 O da maan linɛ an sʋm Zugsɔb la nini ni wʋʋ o yaab David n da tʋm si'em la.3 On da dii o na'am yʋʋm si'a la nwadig kanɛ pin'in la ni ka o da yɔ'ɔg Zugsɔb Pʋ'ʋsim Dɔɔg kʋlis ka kɛ ka ba maligim maali li. 4 O da la'as maanmaannib nɛ Levi dim la ka ba la'asi zi'en paalʋ si'a linɛ bɛ ya-tuona baba la, 5 ka yɛl ye, “Yanam Levi dima, kɛlisimi man yɛt si'el la! Maaliminɛ ya mɛŋ kasi nannanna ka mɛ maali Zugsɔb onɛ aan ya yaanam Wina'am la Pʋ'ʋsim Dɔɔg la kasi. Yisimi dian'ad bʋn wʋsa dɔɔgin la. 6 Ti yaanam la da ka' sida dima; ba da tʋm linɛ pʋ malis Zugsɔb la ka zan'as o. Ba da fɛndigi ba nindaas ka bas zin'ikanɛ ka Zugsɔb la bɛ la, ka bid o kʋdig. 7 Ba da kpar Pʋ'ʋsim Dɔɔg la kʋlis ka kpiis bugum la. Ba da pʋ nyu'oe bʋnnyubisa bɛɛ maal nyu'or maan Israel Wina'am Yin la. 8 Alazug Zugsɔb la sʋnf da duoe nɛ Juda nɛ Jerusalem dim; dinzug o da kɛ ka ba di nyan ka nidib wʋsa la'adi ba ka gɔsidi ba nɛ pakir, wʋʋ yanamɛ nyɛt nɛ ya nini si'em zina la. 9 Linɛ da kɛ ka ti yaanam kpi zaba ni ka ti biribis nɛ ti bipumis nɛ ti pu'ab bɛ yammid pʋʋgin la. 10 Nannanna m gban'e nɛ ye m naal nɔɔr nɛ Zugsɔb onɛ an Israel Wina'am la, linɛ na kɛ ka o sʋnpɛɛn la yii ti san'an. 11 M ba'abiisɛ, da basini ya mɛŋa, saŋa kaŋa ka Zugsɔb gaŋi ya ye ya zi'enɛ o tuonnɛ tʋmm o tʋʋma, ka pʋ'ʋs o ka nyu'oe bʋnnyubisa tis o.”
12 Levi dim banɛ da duoe pin'il tʋʋma nwa: Kohat tuŋʋn la ba da gaŋnɛ Amasai biig Mahaf nɛ Azaria biig Joel. Merari tuŋʋn la ba da gaŋnɛ Abidi biig Kis nɛ Jehalelel biig Azaria. Gerson tuŋʋn la ba da gaŋnɛ Zima biig Joa nɛ Joa biig Eden 13 nɛ Elizafan biis Simir nɛ Jeiel nɛ Asaf biis Zakaria nɛ Matanaya 14 nɛ Heman biis Jehuel nɛ Simie nɛ Jedutun biis Semaya nɛ Uziel.
15 Ban da la'asi ba ba'abiis la ka maali ba mɛŋ kasi naae la, ba da kpɛn' maal Zugsɔb Pʋ'ʋsim Dɔɔg la kasi, wʋʋ Na'ab la tis nɔɔr si'em ka li dɔl nɛ Zugsɔb yɛla. 16 Maanmaannib la da kpɛn' Zugsɔb Pʋ'ʋsim Dɔɔgin la ye ba maali li kasi. Ba da yis linɛ wʋsa ka' sʋm ka ba nyɛ Pʋ'ʋsim Dɔɔgin la na niŋ zakin la. Levi dim la da zii li keŋ lɔbi bas Kidron bɔn'ɔgin la. 17 Ba da pin'il nɛ nwadig kanɛ an yiiga la si'iŋir daar ye ba maal Dɔɔg la kasi, lin ti paae daba anii la ka ba maali paae za'ambɛŋ kanɛ ka ba dɔlli kpɛn'ɛd Dɔɔgin la, ka lin ti paae dabpiiga nɛ anii la ka ba naae Zugsɔb Pʋ'ʋsim Yir la maalʋg.
18 Ba da keŋ Na'ab Hezekia san'anɛ yɛl o ye, “Ti maal Zugsɔb Pʋ'ʋsim Yir la kasi naae, nɛ nyu'or maan daka nɛ li la'ad wʋsa, nɛ teebul kanɛ ka ba nɔkid maan bodobodo pa'annɛ li zugin la nɛ li la'ad la wʋsa. 19 Ti nɔk la'abanɛ ka Na'ab Ahaz da yis on da an na'ab ka ka' sida sɔb saŋsi'a la maali li kasi. Ba wʋsa zi'e Zugsɔb maan daka la tuon.”
20 Bɛog da nie bɛkɛung asuba ka Na'ab Hezekia la'as tempʋʋg la kpɛɛmnam ka ba keŋ Zugsɔb Pʋ'ʋsim Yin la. 21 Ba da mɔri na'araad ayɔpɔi nɛ pɛraad ayɔpɔi nɛ pɛribis ayɔpɔi nɛ bʋraad ayɔpɔi linɛ maan tʋʋmbɛ'ɛd maan teŋ la yɛla, nɛ Pʋ'ʋsim Dɔɔg nɛ Juda dim la yɛla. Na'ab la da tis nɔɔr ye maanmaannib banɛ an Aaron yaas la nɔkim kɔnbid la maal Zugsɔb maan daka la zug. 22 Ala ka ba da kɔt niigi la ka Maanmaan la ti'el ziim la misig maan daka la, ka lɛn kɔt pɛraad la nɔki ba ziim la mɛ misig bimbim la; ka nyaan kɔt pɛribis la nɔki ba ziim la misig maan daka la. 23 Bʋʋs banɛ da an ye ba nɔki maal tʋʋmbɛ'ɛd maan la, ba da mɔri ba kɛn Na'ab la nɛ nidib la san'an na ka ba nɔki ba nu'usi pa'ali ba zug. 24 Ka Maanmaan la yʋ'ʋn kɔt bʋʋs la nɔki ba ziim la sʋn'ʋl bimbim la zug ka li an Israel dim wʋsa tʋʋmbɛ'ɛd maan.
25 O da kɛ ka maanmaannib la zi'en Pʋ'ʋsim Yin la nɛ bʋnnwɛ'ɛda nɛ li buudi wʋsa wʋʋ David nɛ Gad onɛ an onɛ nyɛt bɛog sa yɛla ka tu'asid Wina'am yɛla la nɛ Natan onɛ an Zugsɔb nɔdi'es la da pa'al si'em la; Zugsɔb la da dɔlis o nɔdi'esidibin tis nɔɔr kaŋa. 26 Alazug Levi dim la da zanli David bʋnnwɛ'ɛda la ka maanmaannib la mɛ zanl na'atana la.
27 Na'ab Hezekia da tis nɔɔr ye ba maal nyu'or maan daka la zug. Ban da pin'il maan la maalʋg la, ka mɛ pin'ili yʋ'ʋm yʋʋma tisid Zugsɔb la nɛ na'atana nɛ yʋʋma la'abanɛ an Israel na'ab David din la. 28 Nidib la wʋsa da igini pʋ'ʋs Wina'am, ka yʋʋmyʋ'ʋmnib la yʋ'ʋm, ka na'atana la piebid. Ba da niŋnɛ ala hali ka ba ti maal nyu'or maan la naae.
29 Maan la da naae la, Na'ab la nɛ onɛ wʋsa da bɛɛ ani da igin teŋin pʋ'ʋs Zugsɔb la. 30 Na'ab Hezekia nɛ o kpɛɛmnam la da yɛl Levi dim la ye ba yʋ'ʋm yʋʋm banɛ ka David nɛ Asaf onɛ an onɛ nyɛt la da sɔbi digil la. Dinzug, ba da yʋ'ʋm sumalisim yʋʋma ka su'uni ba zut teŋin wɔ'ɔg Zugsɔb la.
31 Ka Hezekia yɛl ye, “Ya yʋ'ʋn pɛsigi ya mɛŋi tis Zugsɔb. Mɔri maan nɛ bareka pʋ'ʋsim kɛɛn Zugsɔb Pʋ'ʋsim Dɔɔgin la na.” Dinzug nidib la wʋsa da mɔr maan nɛ bareka pʋ'ʋsim piini na, ka banɛ sʋnfʋ mɛ ma'ae zi nyu'or maan na.
32 Nyu'or maan linɛ ka nidib la da mɔr da anɛ na'araad pisyɔpɔi nɛ pɛraad kɔbiga nɛ pɛribis kɔbisyi' ye ba maal maannɛ tis Zugsɔb la. 33 Bʋnkɔnbid banɛ ka ba da ye ba maal maan la kal da anɛ niigi kɔbisyuobʋ nɛ pɛ'ɛs nɛ bʋʋs tusa atan'. 34 Maanmaannib la da pʋ zu'oe na nyaŋi si maan kɔnbid la, ka Levi dim la da sʋŋi ba hali ka tʋʋma la ti naae nɛ ban ti maal maanmaannib sieba kasi paas, bɔzugɔ Levi dim la da dɔlisid malima la gat maanmaannib la. 35 Nyu'or maana la da zu'oya, nɛ taaba la'asʋg maana bʋnkɔnbid nɛ ba kpaam la, nɛ bʋnnuuda maan linɛ dɔl nyu'or maan la.