Ahaz n di Juda na'am la yɛla
28
1 Ahaz da anɛ yʋma pisi ka di na'am Jerusalem tempʋʋgin. Ka da zin'in Juda na'am gbauŋ la zug yʋma pii nɛ ayuobʋ. On da ka' wʋʋ o yaab David n da an si'em la. O da pʋ tʋm linɛ dɔl suor Zugsɔb onɛ aan o Wina'am la nini nii. 2 Amaa o da tʋm wʋʋ Israel na'anam la tʋm si'em la, ka maal kʋnt wina ka ba mɔri li maan Baal. 3 O da nyu'od nɛ bʋnnyubisa Ben Hinnom Biis Bɔn'ɔgin la, ka nɔk o biribisi maal maannɛ nyu'oe nɛ bugum. Tʋʋm kisa bama buudi ka nimbanɛ da bɛ teŋin la da tʋm ka Zugsɔb la kadi ba yis ka Israel dim nyaan kpɛn' la. 4 O da maal maana ka nyu'oe bʋnnyubisa maana zin'ibanɛ bɛ kʋkʋna la zut la nɛ tibɛda wʋsa gbinnin.5 Alazug da kɛ ka o Zugsɔb Wina'am bas suor ka Aram na'ab kena nyaŋ o. Aram dim la da nyaŋi ba ka gban'e o nidib la bɛdegʋ keŋ Damaskus teŋin maali ba yammis.
Israel na'ab mɛ da nyaŋ o, ka kʋʋ o nidib la bɛdegʋ. 6 Daar yinne Remalaya biig Peka da kʋ soogianam tusa kɔbiga nɛ pisi (120,000) Juda teŋin, bɔzugɔ Juda dim da zan'as ye ba kʋ dɔl Zugsɔb onɛ aan ba yaanam Wina'am la. 7 Zikir onɛ an zabzabkpi'euŋ ka an Efiram nid la da kʋ Maaseya onɛ an Na'ab la biig nɛ Azirikam onɛ gɔt na'ayir la nɛ Elkana onɛ tia'al Na'ab la. 8 Israel dim la da gban'e ba sizuop la pu'ab tusa kɔbisyi' (200,000) nɛ ba biribis nɛ bipumis. Ba mɛ da vaae la'ad bɛdegʋ mɔri lɛb Samaria.
9 Amaa Wina'am nɔdi'es da bɛɛ ani ka o yʋ'ʋr buon Oded. O da yi ye o tʋ'ʋs soogianam ban da lɛbid Samaria na la. O da yɛli ba ye, “Li anɛ Zugsɔb onɛ aan ya yaanam Wina'am la sʋnfʋ daa duoe nɛ Juda dim la zug ka o kɛ ka ya nyaŋi ba, amaa ya kʋʋ ba nɛ hali ka li lɛn san'am o sʋnf. 10 Nannanna ya yʋ'ʋn bɔɔd ye ya nɔk dap nɛ pu'ab banɛ yi Juda nɛ Jerusalem na la ka ba liebi ya yammis. Yanam mɛ pʋ tʋm bɛ'ɛdi pɔ'ɔgi ya Zugsɔb Wina'am la? 11 Nannanna kɛlisimi, kɛlli ka ya taaba banɛ ka ya gban'e ye ya maali ba yammis la lɛbi, ya'a ka' ala Zugsɔb sʋnpɛɛn la na luu ya zugin.”
12 Efiram kpɛɛmnam la sieba banɛ da an; Azaria onɛ saamme an Johanan, nɛ Berekaya onɛ saamme an Mesielemof nɛ Jehiskia onɛ saamme an Sallum nɛ Amasa onɛ saamme an Hadila la, da keŋ nidib la san'anɛ yɛli ba ye, 13 “Da mɔri yammis bama kɛɛn kpɛla naa, ka li na an tʋʋmbɛ'ɛd linɛ ka Zugsɔb la sʋnf kʋ malis nɛ tii. Ya bɔɔd ye ya lɛm paas taal kanɛ ka ti pʋn mɔr la zugɔɔ? Ti tʋʋmbɛ'ɛd la pʋn zu'oe nɛ ka o sʋnf pɛlig nɛ Israel dim.”
14 Soogianam la da nɔk yammis la nɛ la'ad la tisi ba kpɛɛmnam la nɛ nidib la nini ni. 15 Dap banɛ ka ba da buoli ba yʋda anaasi la da gɔs la'adin la gaans fuudi yɛɛl banɛ da ken zaalim la. Ba da tisi ba fuud nɛ ta'ada nɛ diib nɛ bʋnnuuda ka suoɛn ba nɛ kpaam. Banɛ da tadig la wʋsa ba da nɔki ba pa'al bʋmis zug. Ka ba da mɔri ba lɛbi ba nidibin Jeriko teŋ kanɛ pɛ'ɛl nɛ kpʋkparis la, ka fɛndigi lɛb Samaria.
16 Saŋkan la Na'ab Ahaz da tʋm nidib Asiria na'ab la san'anɛ bɔɔd sʋŋir. 17 Edom dim la da lɛn kena zab nɛ Juda dim ya'as ka gban'e ba sieba keŋ ka ba aan ba yammis. 18 Filistia dim la da kena fan' la'ad tempʋbanɛ bɛ Sefela teŋin nɛ Juda sʋ'ʋlimin la. Ba da nyaŋ zin'ig la ka zin'in Bet Semes nɛ Aijalon nɛ Gederof la'am nɛ Soko nɛ Timna nɛ Gimiso nɛ tembibis banɛ giligi li la wʋsa. 19 Zugsɔb la da kɛ ka Juda dim nɔɔr lɛb biaunkin, Ahaz onɛ an Israel na'ab la zug. Bɔzugɔ o da kɛ ka bɛ'ɛd pɛ'ɛl Juda teŋ ka na'ab an onɛ ka' sida sɔb baa bi'elaa tis Zugsɔb la. 20 Asiria Na'ab Tigilaf-Pilesa da keŋ o san'an, amaa o da tis o nɛ yɛla ka ka' sʋŋirɛ. 21 Ahaz da faaɛn la'ad bɛdegʋ Zugsɔb Pʋ'ʋsim Dɔɔgin la nɛ na'ayin la nɛ kpɛɛmnam la san'an nɔki tis Asiria na'ab la, amaa li da pʋ sʋŋ oo.
22 Na'ab Ahaz n da bɛ yɛla ni la, o da maligim maan Zugsɔb la nɛ zam. 23 O da maannɛ maana tisid Damaskus bada banɛ da nyaŋ o la; ka tɛn'ɛs o sʋʋnrin ye, “Aram na'anam la bada sadigim sʋŋi ba la, m mɛ na maal maannɛ tisi ba ka ba sʋŋim.” Amaa banɛ lɛɛ da ye ba sʋŋnɛ lug on nɛ Israel dim wʋsa.
24 Ahaz da la'as la'abanɛ bɛ Wina'am Pʋ'ʋsim Dɔɔgin la wʋsa mɔri gaadi nwa' ba zɔra-zɔra. O da kpar Zugsɔb Pʋ'ʋsim Dɔɔg la kɔlis ka maal maan bimbima gilig Jerusalem teŋ la wʋsa. 25 O da mɛ' bimbima zi'el tempʋbanɛ wʋsa bɛ Juda ye ba maan bada ka li duoe Zugsɔb onɛ aan o yaanam Wina'am la sʋnf.